১. মহামোগ্গল্লানত্থেরগাথাৰণ্ণনা

সট্ঠিনিপাতে আরঞ্ঞিকাতিআদিকা আযস্মতো মহামোগ্গল্লানত্থেরস্স গাথা. কা উপ্পত্তি? তস্স ৰত্থু ধম্মসেনাপতিৰত্থুম্হি ৰুত্তমেৰ. থেরো হি পব্বজিতদিৰসতো সত্তমে দিৰসে মগধরট্ঠে কল্লৰালগামকং উপনিস্সায সমণধম্মং করোন্তো থিনমিদ্ধে ওক্কন্তে সত্থারা – ‘‘মোগ্গল্লান, মোগ্গল্লান, মা, ব্রাহ্মণ, অরিযং তুণ্হীভাৰং পমাদো’’তিআদিনা (সং. নি. ২.২৩৫) সংৰেজিতো থিনমিদ্ধং ৰিনোদেত্ৰা ভগৰতা ৰুচ্চমানং ধাতুকম্মট্ঠানং সুণন্তো এৰ ৰিপস্সনং ৰড্ঢেত্ৰা পটিপাটিযা উপরিমগ্গত্তযং উপগন্ত্ৰা অগ্গফলক্খণে সাৰকপারমীঞাণস্স মত্থকং পাপুণি. তেন ৰুত্তং অপদানে (অপ. থের ১.১.৩৭৫-৩৯৭) –

‘‘অনোমদস্সী ভগৰা, লোকজেট্ঠো নরাসভো;

ৰিহাসি হিমৰন্তম্হি, দেৰসঙ্ঘপুরক্খতো.

‘‘ৰরুণো নাম নামেন, নাগরাজা অহং তদা;

কামরূপী ৰিকুব্বামি, মহোদধিনিৰাসহং.

‘‘সঙ্গণিযং গণং হিত্ৰা, তূরিযং পট্ঠপেসহং;

সম্বুদ্ধং পরিৰারেত্ৰা, ৰাদেসুং অচ্ছরা তদা.

‘‘ৰজ্জমানেসু তূরেসু, দেৰা তূরানি ৰজ্জযুং;

উভিন্নং সদ্দং সুত্ৰান, বুদ্ধোপি সম্পবুজ্ঝথ.

‘‘নিমন্তেত্ৰান সম্বুদ্ধং, সকং ভৰনুপাগমিং;

আসনং পঞ্ঞপেত্ৰান, কালমারোচযিং অহং.

‘‘খীণাসৰসহস্সেহি, পরিৰুতো লোকনাযকো;

ওভাসেন্তো দিসা সব্বা, ভৰনং মে উপাগমি.

‘‘উপৰিট্ঠং মহাৰীরং, দেৰদেৰং নরাসভং;

সভিক্খুসঙ্ঘং তপ্পেসিং, অন্নপানেনহং তদা.

‘‘অনুমোদি মহাৰীরো, সযম্ভূ অগ্গপুগ্গলো;

ভিক্খুসঙ্ঘে নিসীদিত্ৰা, ইমা গাথা অভাসথ.

‘‘যো সো সঙ্ঘং অপূজেসি, বুদ্ধঞ্চ লোকনাযকং;

তেন চিত্তপ্পসাদেন, দেৰলোকং গমিস্সতি.

‘‘সত্তসত্ততিক্খত্তুঞ্চ, দেৰরজ্জং করিস্সতি;

পথব্যা রজ্জং অট্ঠসতং, ৰসুধং আৰসিস্সতি.

‘‘পঞ্চপঞ্ঞাসক্খত্তুঞ্চ, চক্কৰত্তী ভৰিস্সতি;

ভোগা অসঙ্খিযা তস্স, উপ্পজ্জিস্সন্তি তাৰদে.

‘‘অপরিমেয্যে ইতো কপ্পে, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

‘‘নিরযা সো চৰিত্ৰান, মনুস্সত্তং গমিস্সতি;

কোলিতো নাম নামেন, ব্রহ্মবন্ধু ভৰিস্সতি.

‘‘সো পচ্ছা পব্বজিত্ৰান, কুসলমূলেন চোদিতো;

গোতমস্স ভগৰতো, দুতিযো হেস্সতি সাৰকো.

‘‘আরদ্ধৰীরিযো পহিতত্তো, ইদ্ধিযা পারমিং গতো;

সব্বাসৰে পরিঞ্ঞায, নিব্বাযিস্সতিনাসৰো.

‘‘পাপমিত্তোপনিস্সায, কামরাগৰসং গতো;

মাতরং পিতরঞ্চাপি, ঘাতযিং দুট্ঠমানসো.

‘‘যং যং যোনুপপজ্জামি, নিরযং অথ মানুসং;

পাপকম্মসমঙ্গিতা, ভিন্নসীসো মরামহং.

‘‘ইদং পচ্ছিমকং ময্হং, চরিমো ৰত্ততে ভৰো;

ইধাপি এদিসো ময্হং, মরণকালে ভৰিস্সতি.

‘‘পৰিৰেকমনুযুত্তো, সমাধিভাৰনারতো;

সব্বাসৰে পরিঞ্ঞায, ৰিহরামি অনাসৰো.

‘‘ধরণিম্পি সুগম্ভীরং, বহলং দুপ্পধংসিযং;

ৰামঙ্গুট্ঠেন খোভেয্যং, ইদ্ধিযা পারমিং গতো.

‘‘অস্মিমানং ন পস্সামি, মানো ময্হং ন ৰিজ্জতি;

সামণেরে উপাদায, গরুচিত্তং করোমহং.

‘‘অপরিমেয্যে ইতো কপ্পে, যং কম্মমভিনীহরিং;

তাহং ভূমিমনুপ্পত্তো, পত্তোম্হি আসৰক্খযং.

‘‘পটিসম্ভিদা চতস্সো…পে… কতং বুদ্ধস্স সাসন’’ন্তি.

অথ নং সত্থা অপরভাগে জেতৰনমহাৰিহারে অরিযগণমজ্ঝে নিসিন্নো তেন তেন গুণেন অত্তনো সাৰকে এতদগ্গে ঠপেন্তো ‘‘এতদগ্গং, ভিক্খৰে, মম সাৰকানং ভিক্খূনং ইদ্ধিমন্তানং যদিদং মহামোগ্গল্লানো’’তি (অ. নি. ১.১৮৮, ১৯০) ইদ্ধিমন্ততায এতদগ্গে ঠপেসি. তেন এৰং সত্থারা এতদগ্গে ঠপিতেন সাৰকপারমিযা মত্থকং পত্তেন মহাথেরেন তং তং নিমিত্তং আগম্ম তত্থ তত্থ ভাসিতা গাথা, তা সঙ্গীতিকালে ধম্মসঙ্গাহকেহি –

১১৪৯. ‘‘আরঞ্ঞিকা পিণ্ডপাতিকা, উঞ্ছাপত্তাগতে রতা;

দালেমু মচ্চুনো সেনং, অজ্ঝত্তং সুসমাহিতা.

১১৫০. ‘‘আরঞ্ঞিকা পিণ্ডপাতিকা, উঞ্ছাপত্তাগতে রতা;

ধুনাম মচ্চুনো সেনং, নল়াগারংৰ কুঞ্জরো.

১১৫১. ‘‘রুক্খমূলিকা সাততিকা, উঞ্ছাপত্তাগতে রতা;

দালেমু মচ্চুনো সেনং, অজ্ঝত্তং সুসমাহিতা.

১১৫২. ‘‘রুক্খমূলিকা সাততিকা, উঞ্ছাপত্তাগতে রতা;

ধুনাম মচ্চুনো সেনং, নল়াগারংৰ কুঞ্জরো.

১১৫৩. ‘‘অট্ঠিকঙ্কলকুটিকে, মংসন্হারুপসিব্বিতে;

ধিরত্থু পুরে দুগ্গন্ধে, পরগত্তে মমাযসে.

১১৫৪. .

‘‘তৰ সরীরং নৰসোতং, দুগ্গন্ধকরং পরিবন্ধং;

ভিক্খু পরিৰজ্জযতে তং, মীল়্হঞ্চ যথা সুচিকামো.

১১৫৬. ‘‘এৰঞ্চে তং জনো জঞ্ঞা, যথা জানামি তং অহং;

আরকা পরিৰজ্জেয্য, গূথট্ঠানংৰ পাৰুসে.

১১৫৭. ‘‘এৰমেতং মহাৰীর, যথা সমণ ভাসসি;

এত্থ চেকে ৰিসীদন্তি, পঙ্কম্হিৰ জরগ্গৰো.

১১৫৮. ‘‘আকাসম্হি হলিদ্দিযা, যো মঞ্ঞেথ রজেতৰে;

অঞ্ঞেন ৰাপি রঙ্গেন, ৰিঘাতুদযমেৰ তং.

১১৫৯. ‘‘তদাকাসসমং চিত্তং, অজ্ঝত্তং সুসমাহিতং;

মা পাপচিত্তে আসাদি, অগ্গিখন্ধংৰ পক্খিমা.

১১৬০. ‘‘পস্স চিত্তকতং বিম্বং, অরুকাযং সমুস্সিতং;

আতুরং বহুসঙ্কপ্পং, যস্স নত্থি ধুৰং ঠিতি.

১১৬১. ‘‘পস্স চিত্তকতং রূপং, মণিনা কুণ্ডলেন চ;

অট্ঠিং তচেন ওনদ্ধং, সহ ৰত্থেহি সোভতি.

১১৬২. ‘‘অলত্তককতা পাদা, মুখং চুণ্ণকমক্খিতং;

অলং বালস্স মোহায, নো চ পারগৰেসিনো.

১১৬৩. ‘‘অট্ঠাপদকতা কেসা, নেত্তা অঞ্জনমক্খিতা;

অলং বালস্স মোহায, নো চ পারগৰেসিনো.

১১৬৪. ‘‘অঞ্জনীৰ নৰা চিত্তা, পূতিকাযো অলঙ্কতো;

অলং বালস্স মোহায, নো চ পারগৰেসিনো.

১১৬৫. ‘‘ওদহি মিগৰো পাসং, নাসদা ৰাগুরং মিগো;

ভুত্ৰা নিৰাপং গচ্ছাম, কদ্দন্তে মিগবন্ধকে.

১১৬৬. ‘‘ছিন্নো পাসো মিগৰস্স, নাসদা ৰাগুরং মিগো;

ভুত্ৰা নিৰাপং গচ্ছাম, সোচন্তে মিগলুদ্দকে.

১১৬৭. ‘‘তদাসি যং ভিংসনকং, তদাসি লোমহংসনং;

অনেকাকারসম্পন্নে, সারিপুত্তম্হি নিব্বুতে.

১১৬৮. ‘‘অনিচ্চা ৰত সঙ্খারা, উপ্পাদৰযধম্মিনো;

উপ্পজ্জিত্ৰা নিরুজ্ঝন্তি, তেসং ৰূপসমো সুখো.

১১৬৯. ‘‘সুখুমং তে পটিৰিজ্ঝন্তি, ৰালগ্গং উসুনা যথা;

যে পঞ্চক্খন্ধে পস্সন্তি, পরতো নো চ অত্ততো.

১১৭০. ‘‘যে চ পস্সন্তি সঙ্খারে, পরতো নো চ অত্ততো;

পচ্চব্যাধিংসু নিপুণং, ৰালগ্গং উসুনা যথা.

১১৭১. ‘‘সত্তিযা ৰিয ওমট্ঠো, ডয্হমানোৰ মত্থকে;

কামরাগপ্পহানায, সতো ভিক্খু পরিব্বজে.

১১৭২. ‘‘সত্তিযা ৰিয ওমট্ঠো, ডয্হমানোৰ মত্থকে;

ভৰরাগপ্পহানায, সতো ভিক্খু পরিব্বজে.

১১৭৩. ‘‘চোদিতো ভাৰিতত্তেন, সরীরন্তিমধারিনা;

মিগারমাতুপাসাদং, পাদঙ্গুট্ঠেন কম্পযিং.

১১৭৪. ‘‘নযিদং সিথিলমারব্ভ, নযিদং অপ্পেন থামসা;

নিব্বানমধিগন্তব্বং, সব্বগন্থপমোচনং.

১১৭৫. ‘‘অযঞ্চ দহরো ভিক্খু, অযমুত্তমপোরিসো;

ধারেতি অন্তিমং দেহং, জেত্ৰা মারং সৰাহনং.

১১৭৬. ‘‘ৰিৰরমনুপভন্তি ৰিজ্জুতা, ৰেভারস্স চ পণ্ডৰস্স চ;

নগৰিৰরগতো ঝাযতি, পুত্তো অপ্পটিমস্স তাদিনো.

১১৭৭. ‘‘উপসন্তো উপরতো, পন্তসেনাসনো মুনি;

দাযাদো বুদ্ধসেট্ঠস্স, ব্রহ্মুনা অভিৰন্দিতো.

১১৭৮. ‘‘উপসন্তং উপরতং, পন্তসেনাসনং মুনিং;

দাযাদং বুদ্ধসেট্ঠস্স, ৰন্দ ব্রাহ্মণ কস্সপং.

১১৭৯. ‘‘যো চ জাতিসতং গচ্ছে, সব্বা ব্রাহ্মণজাতিযো;

সোত্তিযো ৰেদসম্পন্নো, মনুস্সেসু পুনপ্পুনং.

১১৮০. ‘‘অজ্ঝাযকোপি চে অস্স, তিণ্ণং ৰেদান পারগূ;

এতস্স ৰন্দনাযেতং, কলং নাগ্ঘতি সোল়সিং.

১১৮১. ‘‘যো সো অট্ঠ ৰিমোক্খানি, পুরেভত্তং অফস্সযি;

অনুলোমং পটিলোমং, ততো পিণ্ডায গচ্ছতি.

১১৮২. ‘‘তাদিসং ভিক্খুং মাসাদি, মাত্তানং খণি ব্রাহ্মণ;

অভিপ্পসাদেহি মনং, অরহন্তম্হি তাদিনে;

খিপ্পং পঞ্জলিকো ৰন্দ, মা তে ৰিজটি মত্থকং.

১১৮৩. ‘‘নেসো পস্সতি সদ্ধম্মং, সংসারেন পুরক্খতো;

অধোগমং জিম্হপথং, কুম্মগ্গমনুধাৰতি.

১১৮৪. ‘‘কিমীৰ মীল়্হসল্লিত্তো, সঙ্খারে অধিমুচ্ছিতো;

পগাল়্হো লাভসক্কারে, তুচ্ছো গচ্ছতি পোট্ঠিলো.

১১৮৫. ‘‘ইমঞ্চ পস্স আযন্তং, সারিপুত্তং সুদস্সনং;

ৰিমুত্তং উভতোভাগে, অজ্ঝত্তং সুসমাহিতং.

১১৮৬. ‘‘ৰিসল্লং খীণসংযোগং, তেৰিজ্জং মচ্চুহাযিনং;

দক্খিণেয্যং মনুস্সানং, পুঞ্ঞক্খেত্তং অনুত্তরং.

১১৮৭. ‘‘এতে সম্বহুলা দেৰা, ইদ্ধিমন্তো যসস্সিনো.

দস দেৰসহস্সানি, সব্বে ব্রহ্মপুরোহিতা;

মোগ্গল্লানং নমস্সন্তা, তিট্ঠন্তি পঞ্জলীকতা.

১১৮৮. ‘‘নমো তে পুরিসাজঞ্ঞ, নমো তে পুরিসুত্তম;

যস্স তে আসৰা খীণা, দক্খিণেয্যোসি মারিস.

১১৮৯. ‘‘পূজিতো নরদেৰেন, উপ্পন্নো মরণাভিভূ;

পুণ্ডরীকংৰ তোযেন, সঙ্খারেনুপলিম্পতি.

১১৯০. ‘‘যস্স মুহুত্তেন সহস্সধা লোকো, সংৰিদিতো সব্রহ্মকপ্পো ৰসি;

ইদ্ধিগুণে চুতুপপাতে কালে, পস্সতি দেৰতা স ভিক্খু.

১১৯১. ‘‘সারিপুত্তোৰ পঞ্ঞায, সীলেন উপসমেন চ;

যোপি পারঙ্গতো ভিক্খু, এতাৰপরমো সিযা.

১১৯২. ‘‘কোটিসতসহস্সস্স, অত্তভাৰং খণেন নিম্মিনে;

অহং ৰিকুব্বনাসু কুসলো, ৰসীভূতোম্হি ইদ্ধিযা.

১১৯৩. ‘‘সমাধিৰিজ্জাৰসিপারমীগতো, মোগ্গল্লানগোত্তো অসিতস্স সাসনে;

ধীরো সমুচ্ছিন্দি সমাহিতিন্দ্রিযো, নাগো যথা পূতিলতংৰ বন্ধনং.

১১৯৪. ‘‘পরিচিণ্ণো মযা সত্থা, কতং বুদ্ধস্স সাসনং;

ওহিতো গরুকো ভারো, ভৰনেত্তি সমূহতা.

১১৯৫. ‘‘যস্স চত্থায পব্বজিতো, অগারস্মানগারিযং;

সো মে অত্থো অনুপ্পত্তো, সব্বসংযোজনক্খযো.

১১৯৬. ‘‘কীদিসো নিরযো আসি, যত্থ দুস্সী অপচ্চথ;

ৰিধুরং সাৰকমাসজ্জ, ককুসন্ধঞ্চ ব্রাহ্মণং.

১১৯৭. ‘‘সতং আসি অযোসঙ্কূ, সব্বে পচ্চত্তৰেদনা;

ঈদিসো নিরযো আসি, যত্থ দুস্সী অপচ্চথ;

ৰিধুরং সাৰকমাসজ্জ, ককুসন্ধঞ্চ ব্রাহ্মণং.

১১৯৮. ‘‘যো এতমভিজানাতি, ভিক্খু বুদ্ধস্স সাৰকো;

তাদিসং ভিক্খুমাসজ্জ, কণ্হ দুক্খং নিগচ্ছসি.