৪. নন্দাপেতিৰত্থুৰণ্ণনা

কাল়ী দুব্বণ্ণরূপাসীতি ইদং সত্থরি জেতৰনে ৰিহরন্তে নন্দং নাম পেতিং আরব্ভ ৰুত্তং. সাৰত্থিযা কির অৰিদূরে অঞ্ঞতরস্মিং গামকে নন্দিসেনো নাম উপাসকো অহোসি সদ্ধো পসন্নো. ভরিযা পনস্স নন্দা নাম অস্সদ্ধা অপ্পসন্না মচ্ছরিনী চণ্ডী ফরুসৰচনা সামিকে অগারৰা অগ্গতিস্সা সস্সুং চোরিৰাদেন অক্কোসতি পরিভাসতি. সা অপরেন সমযেন কালং কত্ৰা পেতযোনিযং নিব্বত্তিত্ৰা তস্সেৰ গামস্স অৰিদূরে ৰিচরন্তী একদিৰসং নন্দিসেনস্স উপাসকস্স গামতো নিক্খমন্তস্স অৰিদূরে অত্তানং দস্সেসি. সো তং দিস্ৰা –

১৬৮. ‘‘কাল়ী দুব্বণ্ণরূপাসি, ফরুসা ভীরুদস্সনা;

পিঙ্গলাসি কল়ারাসি, ন তং মঞ্ঞামি মানুসি’’ন্তি. –

গাথায অজ্ঝভাসি. তত্থ কাল়ীতি কাল়ৰণ্ণা, ঝামঙ্গারসদিসো হিস্সা ৰণ্ণো অহোসি. ফরুসাতি খরগত্তা. ভীরুদস্সনাতি ভযানকদস্সনা সপ্পটিভযাকারা. ‘‘ভারুদস্সনা’’তি ৰা পাঠো, ভারিযদস্সনা, দুব্বণ্ণতাদিনা দুদ্দসিকাতি অত্থো. পিঙ্গলাতি পিঙ্গললোচনা. কল়ারাতি কল়ারদন্তা. ন তং মঞ্ঞামি মানুসিন্তি অহং তং মানুসিন্তি ন মঞ্ঞামি, পেতিমেৰ চ তং মঞ্ঞামীতি অধিপ্পাযো. তং সুত্ৰা পেতী অত্তানং পকাসেন্তী –

১৬৯. ‘‘অহং নন্দা নন্দিসেন, ভরিযা তে পুরে অহুং;

পাপকম্মং করিত্ৰান, পেতলোকং ইতো গতা’’তি. –

গাথমাহ. তত্থ অহং নন্দা নন্দিসেনাতি সামি নন্দিসেন অহং নন্দা নাম. ভরিযা তে পুরে অহুন্তি পুরিমজাতিযং তুয্হং ভরিযা অহোসিং. ইতো পরং –

১৭০. ‘‘কিং নু কাযেন ৰাচায, মনসা দুক্কটং কতং;

কিস্স কম্মৰিপাকেন, পেতলোকং ইতো গতা’’তি. –

তস্স উপাসকস্স পুচ্ছা. অথস্স সা –

১৭১. ‘‘চণ্ডী চ ফরুসা চাসিং, তযি চাপি অগারৰা;

তাহং দুরুত্তং ৰত্ৰান, পেতলোকং ইতো গতা’’তি. –

ৰিস্সজ্জেসি. পুন সো –

১৭২. ‘‘হন্দুত্তরীযং দদামি তে, ইমং দুস্সং নিৰাসয;

ইমং দুস্সং নিৰাসেত্ৰা, এহি নেস্সামি তং ঘরং.

১৭৩. ‘‘ৰত্থঞ্চ অন্নপানঞ্চ, লচ্ছসি ত্ৰং ঘরং গতা;

পুত্তে চ তে পস্সিস্সসি, সুণিসাযো চ দক্খসী’’তি. – অথস্স সা –

১৭৪. ‘‘হত্থেন হত্থে তে দিন্নং, ন ময্হং উপকপ্পতি;

ভিক্খূ চ সীলসম্পন্নে, ৰীতরাগে বহুস্সুতে.

১৭৫. ‘‘তপ্পেহি অন্নপানেন, মম দক্খিণমাদিস;

তদাহং সুখিতা হেস্সং, সব্বকামসমিদ্ধিনী’’তি. –

দ্ৰে গাথা অভাসি. ততো –

১৭৬. ‘‘সাধূতি সো পটিস্সুত্ৰা, দানং ৰিপুলমাকিরি;

অন্নং পানং খাদনীযং, ৰত্থসেনাসনানি চ;

ছত্তং গন্ধঞ্চ মালঞ্চ, ৰিৰিধা চ উপাহনা.

১৭৭. ‘‘ভিক্খূ চ সীলসম্পন্নে, ৰীতরাগে বহুস্সুতে;

তপ্পেত্ৰা অন্নপানেন, তস্সা দক্খিণমাদিসী.

১৭৮. ‘‘সমনন্তরানুদ্দিট্ঠে, ৰিপাকো উদপজ্জথ;

ভোজনচ্ছাদনপানীযং, দক্খিণায ইদং ফলং.

১৭৯. ‘‘ততো সুদ্ধা সুচিৰসনা, কাসিকুত্তমধারিনী;

ৰিচিত্তৰত্থাভরণা, সামিকং উপসঙ্কমী’’তি. –

চতস্সো গাথা সঙ্গীতিকারেহি ৰুত্তা. ততো পরং –

১৮০. ‘‘অভিক্কন্তেন ৰণ্ণেন, যা ত্ৰং তিট্ঠসি দেৰতে;

ওভাসেন্তী দিসা সব্বা, ওসধী ৰিয তারকা.

১৮১. ‘‘কেন তেতাদিসো ৰণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

১৮২. ‘‘পুচ্ছামি তং দেৰি মহানুভাৰে, মনুস্সভূতা কিমকাসি পুঞ্ঞং;

কেনাসি এৰং জলিতানুভাৰা, ৰণ্ণো চ তে সব্বদিসা পভাসতী’’তি.

১৮৩. ‘‘অহং নন্দা নন্দিসেন, ভরিযা তে পুরে অহুং;

পাপকম্মং করিত্ৰান, পেতলোকং ইতো গতা.

১৮৪. ‘‘তৰ দিন্নেন দানেন, মোদামি অকুতোভযা;

চিরং জীৰ গহপতি, সহ সব্বেহি ঞাতিভি;

অসোকং ৰিরজং খেমং, আৰাসং ৰসৰত্তিনং.

১৮৫. ‘‘ইধ ধম্মং চরিত্ৰান, দানং দত্ৰা গহপতি;

ৰিনেয্য মচ্ছেরমলং সমূলং, অনিন্দিতো সগ্গমুপেহি ঠান’’ন্তি. –

উপাসকস্স চ পেতিযা চ ৰচনপটিৰচনগাথা.

১৭৬. তত্থ দানং ৰিপুলমাকিরীতি উক্খিণেয্যখেত্তে দেয্যধম্মবীজং ৰিপ্পকিরন্তো ৰিয মহাদানং পৰত্তেসি. সেসং অনন্তরৰত্থুসদিসমেৰ.

এৰং সা অত্তনো দিব্বসম্পত্তিং তস্সা চ কারণং নন্দিসেনস্স ৰিভাৰেত্ৰা অত্তনো ৰসনট্ঠানমেৰ গতা. উপাসকো তং পৰত্তিং ভিক্খূনং আরোচেসি, ভিক্খূ ভগৰতো আরোচেসুং. ভগৰা তমত্থং অট্ঠুপ্পত্তিং কত্ৰা সম্পত্তপরিসায ধম্মং দেসেসি. সা দেসনা মহাজনস্স সাত্থিকা অহোসীতি.

নন্দাপেতিৰত্থুৰণ্ণনা নিট্ঠিতা.