১৪. দ্ৰেসহাযকভিক্খুৰত্থু

বহুম্পি চেতি ইমং ধম্মদেসনং সত্থা জেতৰনে ৰিহরন্তো দ্ৰে সহাযকে আরব্ভ কথেসি.

সাৰত্থিৰাসিনো হি দ্ৰে কুলপুত্তা সহাযকা ৰিহারং গন্ত্ৰা সত্থু ধম্মদেসনং সুত্ৰা কামে পহায সাসনে উরং দত্ৰা পব্বজিত্ৰা পঞ্চ ৰস্সানি আচরিযুপজ্ঝাযানং সন্তিকে ৰসিত্ৰা সত্থারং উপসঙ্কমিত্ৰা সাসনে ধুরং পুচ্ছিত্ৰা ৰিপস্সনাধুরঞ্চ গন্থধুরঞ্চ ৰিত্থারতো সুত্ৰা একো তাৰ ‘‘অহং, ভন্তে, মহল্লককালে পব্বজিতো ন সক্খিস্সামি গন্থধুরং পূরেতুং, ৰিপস্সনাধুরং পন পূরেস্সামী’’তি যাৰ অরহত্তা ৰিপস্সনাধুরং কথাপেত্ৰা ঘটেন্তো ৰাযমন্তো সহ পটিসম্ভিদাহি অরহত্তং পাপুণি. ইতরো পন ‘‘অহং গন্থধুরং পূরেস্সামী’’তি অনুক্কমেন তেপিটকং বুদ্ধৰচনং উগ্গণ্হিত্ৰা গতগতট্ঠানে ধম্মং কথেতি, সরভঞ্ঞং ভণতি, পঞ্চন্নং ভিক্খুসতানং ধম্মং ৰাচেন্তো ৰিচরতি. অট্ঠারসন্নং মহাগণানং আচরিযো অহোসি. ভিক্খূ সত্থু সন্তিকে কম্মট্ঠানং গহেত্ৰা ইতরস্স থেরস্স ৰসনট্ঠানং গন্ত্ৰা তস্স ওৰাদে ঠত্ৰা অরহত্তং পত্ৰা থেরং ৰন্দিত্ৰা, ‘‘সত্থারং দট্ঠুকামম্হা’’তি ৰদন্তি. থেরো ‘‘গচ্ছথ, আৰুসো, মম ৰচনেন সত্থারং ৰন্দিত্ৰা অসীতি মহাথেরে ৰন্দথ, সহাযকত্থেরম্পি মে ‘অম্হাকং আচরিযো তুম্হে ৰন্দতী’তি ৰদথা’’তি পেসেতি. তে ভিক্খূ ৰিহারং গন্ত্ৰা সত্থারঞ্চেৰ অসীতি মহাথেরে চ ৰন্দিত্ৰা গন্থিকত্থেরস্স সন্তিকং গন্ত্ৰা, ‘‘ভন্তে, অম্হাকং আচরিযো তুম্হে ৰন্দতী’’তি ৰদন্তি. ইতরেন চ ‘‘কো নাম সো’’তি ৰুত্তে, ‘‘তুম্হাকং সহাযকভিক্খু, ভন্তে’’তি ৰদন্তি. এৰং থেরে পুনপ্পুনং সাসনং পহিণন্তে সো ভিক্খু থোকং কালং সহিত্ৰা অপরভাগে সহিতুং অসক্কোন্তো ‘‘অম্হাকং আচরিযো তুম্হে ৰন্দতী’’তি ৰুত্তে, ‘‘কো এসো’’তি ৰত্ৰা ‘‘তুম্হাকং সহাযকভিক্খূ’’তি ৰুত্তে, ‘‘কিং পন তুম্হেহি তস্স সন্তিকে উগ্গহিতং, কিং দীঘনিকাযাদীসু অঞ্ঞতরো নিকাযো, কিং তীসু পিটকেসু একং পিটক’’ন্তি ৰত্ৰা ‘‘চতুপ্পদিকম্পি গাথং ন জানাতি, পংসুকূলং গহেত্ৰা পব্বজিতকালেযেৰ অরঞ্ঞং পৰিট্ঠো, বহূ ৰত অন্তেৰাসিকে লভি, তস্স আগতকালে মযা পঞ্হং পুচ্ছিতুং ৰট্টতী’’তি চিন্তেসি.

অথ অপরভাগে থেরো সত্থারং দট্ঠুং আগতো. সহাযকস্স থেরস্স সন্তিকে পত্তচীৰরং ঠপেত্ৰা গন্ত্ৰা সত্থারঞ্চেৰ অসীতি মহাথেরে চ ৰন্দিত্ৰা সহাযকস্স ৰসনট্ঠানং পচ্চাগমি. অথস্স সো ৰত্তং কারেত্ৰা সমপ্পমাণং আসনং গহেত্ৰা, ‘‘পঞ্হং পুচ্ছিস্সামী’’তি নিসীদি. তস্মিং খণে সত্থা ‘‘এস এৰরূপং মম পুত্তং ৰিহেঠেত্ৰা নিরযে নিব্বত্তেয্যা’’তি তস্মিং অনুকম্পায ৰিহারচারিকং চরন্তো ৰিয তেসং নিসিন্নট্ঠানং গন্ত্ৰা পঞ্ঞত্তৰরবুদ্ধাসনে নিসীদি. তত্থ তত্থ নিসীদন্তা হি ভিক্খূ বুদ্ধাসনং পঞ্ঞাপেত্ৰাৰ নিসীদন্তি. তেন সত্থা পকতিপঞ্ঞত্তেযেৰ আসনে নিসীদি. নিসজ্জ খো পন গন্থিকভিক্খুং পঠমজ্ঝানে পঞ্হং পুচ্ছিত্ৰা তস্মিং অকথিতে দুতিযজ্ঝানং আদিং কত্ৰা অট্ঠসুপি সমাপত্তীসু রূপারূপেসু চ পঞ্হং পুচ্ছি. গন্থিকত্থেরো একম্পি কথেতুং নাসক্খি. ইতরো তং সব্বং কথেসি. অথ নং সোতাপত্তিমগ্গে পঞ্হং পুচ্ছি. গন্থিকত্থেরো কথেতুং নাসক্খি. ততো খীণাসৰত্থেরং পুচ্ছি. থেরো কথেসি. সত্থা ‘‘সাধু সাধু, ভিক্খূ’’তি অভিনন্দিত্ৰা সেসমগ্গেসুপি পটিপাটিযা পঞ্হং পুচ্ছি. গন্থিকো একম্পি কথেতুং নাসক্খি, খীণাসৰো পুচ্ছিতং পুচ্ছিতং কথেসি. সত্থা চতূসুপি ঠানেসু তস্স সাধুকারং অদাসি. তং সুত্ৰা ভুম্মদেৰে আদিং কত্ৰা যাৰ ব্রহ্মলোকা সব্বা দেৰতা চেৰ নাগসুপণ্ণা চ সাধুকারং অদংসু. তং সাধুকারং সুত্ৰা তস্স অন্তেৰাসিকা চেৰ সদ্ধিৰিহারিনো চ সত্থারং উজ্ঝাযিংসু – ‘‘কিং নামেতং সত্থারা কতং, কিঞ্চি অজানন্তস্স মহল্লকত্থেরস্স চতূসু ঠানেসু সাধুকারং অদাসি, অম্হাকং পনাচরিযস্স সব্বপরিযত্তিধরস্স পঞ্চন্নং ভিক্খুসতানং পামোক্খস্স পসংসামত্তম্পি ন করী’’তি. অথ নে সত্থা ‘‘কিং নামেতং, ভিক্খৰে, কথেথা’’তি পুচ্ছিত্ৰা তস্মিং অত্থে আরোচিতে, ‘‘ভিক্খৰে, তুম্হাকং আচরিযো মম সাসনে ভতিযা গাৰো রক্খণসদিসো, ময্হং পন পুত্তো যথারুচিযা পঞ্চ গোরসে পরিভুঞ্জনকসামিসদিসো’’তি ৰত্ৰা ইমা গাথা অভাসি –

১৯. ‘‘বহুম্পি চে সংহিত ভাসমানো,

ন তক্করো হোতি নরো পমত্তো;

গোপোৰ গাৰো গণযং পরেসং,

ন ভাগৰা সামঞ্ঞস্স হোতি.

২০. ‘‘অপ্পম্পি চে সংহিত ভাসমানো,

ধম্মস্স হোতি অনুধম্মচারী;

রাগঞ্চ দোসঞ্চ পহায মোহং,

সম্মপ্পজানো সুৰিমুত্তচিত্তো.

‘‘অনুপাদিযানো ইধ ৰা হুরং ৰা,

স ভাগৰা সামঞ্ঞস্স হোতী’’তি.

তত্থ সংহিতন্তি তেপিটকস্স বুদ্ধৰচনস্সেতং নামং. তং আচরিযে উপসঙ্কমিত্ৰা উগ্গণ্হিত্ৰা বহুম্পি পরেসং ভাসমানো ৰাচেন্তো তং ধম্মং সুত্ৰা যং কারকেন পুগ্গলেন কত্তব্বং, তক্করো ন হোতি. কুক্কুটস্স পক্খপহরণমত্তম্পি অনিচ্চাদিৰসেন যোনিসোমনসিকারং নপ্পৰত্তেতি. এসো যথা নাম দিৰসং ভতিযা গাৰো রক্খন্তো গোপো পাতোৰ নিরৰসেসং সম্পটিচ্ছিত্ৰা সাযং গহেত্ৰা সামিকানং নিয্যাদেত্ৰা দিৰসভতিমত্তং গণ্হাতি, যথারুচিযা পন পঞ্চ গোরসে পরিভুঞ্জিতুং ন লভতি, এৰমেৰ কেৰলং অন্তেৰাসিকানং সন্তিকা ৰত্তপটিৰত্তকরণমত্তস্স ভাগী হোতি, সামঞ্ঞস্স পন ভাগী ন হোতি. যথা পন গোপালকেন নিয্যাদিতানং গুন্নং গোরসং সামিকাৰ পরিভুঞ্জন্তি, তথা তেন কথিতং ধম্মং সুত্ৰা কারকপুগ্গলা যথানুসিট্ঠং পটিপজ্জিত্ৰা কেচি পঠমজ্ঝানাদীনি পাপুণন্তি, কেচি ৰিপস্সনং ৰড্ঢেত্ৰা মগ্গফলানি পাপুণন্তি, গোণসামিকা গোরসস্সেৰ সামঞ্ঞস্স ভাগিনো হোন্তি.

ইতি সত্থা সীলসম্পন্নস্স বহুস্সুতস্স পমাদৰিহারিনো অনিচ্চাদিৰসেন যোনিসোমনসিকারে পমত্তস্স ভিক্খুনো ৰসেন পঠমং গাথং কথেসি, ন দুস্সীলস্স. দুতিযগাথা পন অপ্পস্সুতস্সপি যোনিসোমনসিকারে কম্মং করোন্তস্স কারকপুগ্গলস্স ৰসেন কথিতা.

তত্থ অপ্পম্পী চেতি থোকং একৰগ্গদ্ৰিৰগ্গমত্তম্পি. ধম্মস্স হোতি অনুধম্মচারীতি অত্থমঞ্ঞায ধম্মমঞ্ঞায নৰলোকুত্তরধম্মস্স অনুরূপং ধম্মং পুব্বভাগপটিপদাসঙ্খাতং চতুপারিসুদ্ধিসীলধুতঙ্গঅসুভকম্মট্ঠানাদিভেদং চরন্তো অনুধম্মচারী হোতি. সো ‘‘অজ্জ অজ্জেৰা’’তি পটিৰেধং আকঙ্খন্তো ৰিচরতি. সো ইমায সম্মাপটিপত্তিযা রাগঞ্চ দোসঞ্চ পহায মোহং সম্মা হেতুনা নযেন পরিজানিতব্বে ধম্মে পরিজানন্তো তদঙ্গৰিক্খম্ভনসমুচ্ছেদপটিপ্পস্সদ্ধিনিস্সরণৰিমুত্তীনং ৰসেন সুৰিমুত্তচিত্তো, অনুপাদিযানো ইধ ৰা হুরং ৰাতি ইধলোকপরলোকপরিযাপন্না ৰা অজ্ঝত্তিকবাহিরা ৰা খন্ধাযতনধাতুযো চতূহি উপাদানেহি অনুপাদিযন্তো মহাখীণাসৰো মগ্গসঙ্খাতস্স সামঞ্ঞস্স ৰসেন আগতস্স ফলসামঞ্ঞস্স চেৰ পঞ্চঅসেক্খধম্মক্খন্ধস্স চ ভাগৰা হোতীতি রতনকূটেন ৰিয অগারস্স অরহত্তেন দেসনায কূটং গণ্হীতি.

গাথাপরিযোসানে বহূ সোতাপন্নাদযো অহেসুং. দেসনা মহাজনস্স সাত্থিকা জাতাতি.

দ্ৰেসহাযকভিক্খুৰত্থু চুদ্দসমং.

যমকৰগ্গৰণ্ণনা নিট্ঠিতা.

পঠমো ৰগ্গো.