২৭. গোতমবুদ্ধৰংসৰণ্ণনা

দূরেনিদানকথা

‘‘ইদানি যস্মা অম্হাকং, বুদ্ধৰংসস্স ৰণ্ণনা;

অনুক্কমেন সম্পত্তা, তস্মাযং তস্স ৰণ্ণনা’’.

তত্থ অম্হাকং বোধিসত্তো দীপঙ্করাদীনং চতুৰীসতিযা বুদ্ধানং সন্তিকে অধিকারং করোন্তো কপ্পসতসহস্সাধিকানি চত্তারি অসঙ্খ্যেয্যানি আগতো. কস্সপস্স পন ভগৰতো ওরভাগে ঠপেত্ৰা ইমং সম্মাসম্বুদ্ধং অঞ্ঞো বুদ্ধো নাম নত্থি. ইতি দীপঙ্করাদীনং চতুৰীসতিযা বুদ্ধানং সন্তিকে লদ্ধব্যাকরণো পন বোধিসত্তো যেনেন –

‘‘মনুস্সত্তং লিঙ্গসম্পত্তি, হেতু সত্থারদস্সনং;

পব্বজ্জা গুণসম্পত্তি, অধিকারো চ ছন্দতা;

অট্ঠধম্মসমোধানা, অভিনীহারো সমিজ্ঝতী’’তি. (বু. ৰং. ২.৫৯) –

ইমে অট্ঠ ধম্মে সমোধানেত্ৰা দীপঙ্করপাদমূলে কতাভিনীহারেন ‘‘হন্দ, বুদ্ধকরে ধম্মে, ৰিচিনামি ইতো চিতো’’তি উস্সাহং কত্ৰা ‘‘ৰিচিনন্তো তদাদক্খিং, পঠমং দানপারমি’’ন্তি দানপারমিতাদযো বুদ্ধকারকধম্মা দিট্ঠা, তে পূরেন্তো যাৰ ৰেস্সন্তরত্তভাৰা আগমি, আগচ্ছন্তো চ যে তে কতাভিনীহারানং বোধিসত্তানং আনিসংসা সংৰণ্ণিতা –

‘‘এৰং সব্বঙ্গসম্পন্না, বোধিযা নিযতা নরা;

সংসরং দীঘমদ্ধানং, কপ্পকোটিসতেহিপি.

‘‘অৰীচিম্হি নুপ্পজ্জন্তি, তথা লোকন্তরেসু চ;

নিজ্ঝামতণ্হা খুপ্পিপাসা, ন হোন্তি কাল়কঞ্জিকা.

‘‘ন হোন্তি খুদ্দকা পাণা, উপ্পজ্জন্তাপি দুগ্গতিং;

জাযমানা মনুস্সেসু, জচ্চন্ধা ন ভৰন্তি তে.

‘‘সোতৰেকল্লতা নত্থি, ন ভৰন্তি মূগপক্খিকা;

ইত্থিভাৰং ন গচ্ছন্তি, উভতোব্যঞ্জনপণ্ডকা.

‘‘ন ভৰন্তি পরিযাপন্না, বোধিযা নিযতা নরা;

মুত্তা আনন্তরিকেহি, সব্বত্থ সুদ্ধগোচরা.

‘‘মিচ্ছাদিট্ঠিং ন সেৰন্তি, কম্মকিরিযদস্সনা;

ৰসমানাপি সগ্গেসু, অসঞ্ঞং নূপপজ্জরে.

‘‘সুদ্ধাৰাসেসু দেৰেসু, হেতু নাম ন ৰিজ্জতি;

নেক্খম্মনিন্না সপ্পুরিসা, ৰিসংযুত্তা ভৰাভৰে;

চরন্তি লোকত্থচরিযাযো, পূরেন্তি সব্বপারমী’’তি. (ধ. স. অট্ঠ. নিদানকথা; অপ. অট্ঠ. ১.দূরেনিদানকথা; জা. অট্ঠ. ১.দূরেনিদানকথা; চরিযা. অট্ঠ. পকিণ্ণককথা);

তে আনিসংসে অধিগন্ত্ৰাৰ আগতো. এৰং আগচ্ছন্তো ৰেস্সন্তরত্তভাৰে ঠিতো –

‘‘অচেতনাযং পথৰী, অৰিঞ্ঞায সুখং দুখং;

সাপি দানবলা ময্হং, সত্তক্খত্তুং পকম্পথা’’তি. (চরিযা. ১.১২৪) –

এৰং মহাপথৰিকম্পনাদীনি মহাপুঞ্ঞানি কত্ৰা আযুপরিযোসানে ততো চৰিত্ৰা তুসিতপুরে নিব্বত্তি.

অৰিদূরেনিদানকথা

তুসিতপুরে ৰসমানেযেৰ পন বোধিসত্তে বুদ্ধকোলাহলং নাম উদপাদি. লোকস্মিঞ্হি তীণি কোলাহলানি উপ্পজ্জন্তি. সেয্যথিদং – কপ্পকোলাহলং, বুদ্ধকোলাহলং, চক্কৰত্তিকোলাহলন্তি. তত্থ ‘‘ৰস্সসতসহস্সস্স অচ্চযেন কপ্পুট্ঠানং ভৰিস্সতী’’তি লোকব্যূহা নাম কামাৰচরদেৰা মুত্তসিরা ৰিকিণ্ণকেসা রুদমুখা অস্সূনি হত্থেহি পুঞ্ছমানা রত্তৰত্থনিৰত্থা অতিৰিয ৰিরূপৰেসধারিনো হুত্ৰা মনুস্সপথে ৰিচরন্তা এৰং আরোচেন্তি – ‘‘মারিসা, মারিসা, ইতো ৰস্সসতসহস্সস্স অচ্চযেন কপ্পুট্ঠানং ভৰিস্সতি, অযং লোকো ৰিনস্সিস্সতি, মহাসমুদ্দোপি উস্সুস্সিস্সতি, অযঞ্চ মহাপথৰী সিনেরু চ পব্বতরাজা উড্ডয্হিস্সন্তি ৰিনস্সিস্সন্তি, যাৰ ব্রহ্মলোকা লোকৰিনাসো ভৰিস্সতি, মেত্তং, মারিসা, ভাৰেথ, করুণং মুদিতং উপেক্খং, মারিসা, ভাৰেথ, মাতরং পিতরং উপট্ঠহথ, কুলে জেট্ঠাপচাযিনো হোথা’’তি. ইদং কপ্পকোলাহলং নাম.

‘‘ৰস্সসহস্সস্স অচ্চযেন পন সব্বঞ্ঞুবুদ্ধো লোকে উপজ্জিস্সতী’’তি লোকপালদেৰতা – ‘‘ইতো, মারিসা, ৰস্সসহস্সস্স অচ্চযেন বুদ্ধো লোকে উপ্পজ্জিস্সতী’’তি উগ্ঘোসেন্তিযো আহিণ্ডন্তি. ইদং বুদ্ধকোলাহলং নাম.

‘‘ৰস্সসতস্স অচ্চযেন চক্কৰত্তিরাজা উপ্পজ্জিস্সতী’’তি দেৰতা – ‘‘ইতো, মারিসা, ৰস্সসতস্স অচ্চযেন চক্কৰত্তিরাজা উপ্পজ্জিস্সতী’’তি উগ্ঘোসেন্তিযো আহিণ্ডন্তি. ইদং চক্কৰত্তিকোলাহলং নাম (খু. পা. অট্ঠ. ৫.মঙ্গলপঞ্হসমুট্ঠানকথা; অপ. অট্ঠ. ১.অৰিদূরেনিদানকথা; জা. অট্ঠ. ১.অৰিদূরেনিদানকথা).

তেসু বুদ্ধকোলাহলসদ্দং সুত্ৰা সকলদসসহস্সচক্কৰাল়দেৰতা একতো সন্নিপতিত্ৰা – ‘‘অসুকো নাম সত্তো বুদ্ধো ভৰিস্সতী’’তি ঞত্ৰা উপসঙ্কমিত্ৰা আযাচন্তি, আযাচমানা চ তস্স পুব্বনিমিত্তেসু উপ্পন্নেসু আযাচন্তি. তদা পন সব্বাপি তা একেকচক্কৰাল়ে চতুমহারাজ-সক্ক-সুযাম-সন্তুসিত-সুনিম্মিত-ৰসৰত্তি-মহাব্রহ্মেহি সদ্ধিং একচক্কৰাল়ে সন্নিপতিত্ৰা তুসিতভৰনে উপ্পন্নচুতিনিমিত্তস্স বোধিসত্তস্স সন্তিকং গন্ত্ৰা – ‘‘মারিস, তুম্হেহি দস পারমিযো পূরিতা, পূরেন্তেহি চ ন সক্কব্রহ্মসম্পত্তিআদিকং সম্পত্তিং পত্থেন্তেহি পূরিতা, লোকনিত্থরণত্থায পন ৰো সব্বঞ্ঞুতং পত্থেন্তেহি পরিপূরিতা বুদ্ধত্তায –

‘‘কালো খো তে মহাৰীর, উপ্পজ্জ মাতুকুচ্ছিযং;

সদেৰকং তারযন্তো, বুজ্ঝস্সু অমতং পদ’’ন্তি. (বু. ৰং. ১.৬৭) –

যাচিংসু.

অথ মহাসত্তো দেৰতাহি এৰং আযাচিযমানো দেৰতানং পটিঞ্ঞং অদত্ৰাৰ কাল-দীপ-দেস-কুল-জনেত্তিআযুপরিচ্ছেদৰসেন পঞ্চ মহাৰিলোকনানি ৰিলোকেসি. তত্থ ‘‘কালো নু খো, ন কালো’’তি পঠমং কালং ৰিলোকেসি. তত্থ ৰস্সসতসহস্সতো উদ্ধং ৰড্ঢিতআযুকালো কালো নাম ন হোতি. কস্মা? তদা হি সত্তানং জাতিজরামরণানি ন পঞ্ঞাযন্তি, বুদ্ধানঞ্চ ধম্মদেসনা তিলক্খণমুত্তা নাম নত্থি, তেসং ‘‘অনিচ্চং দুক্খমনত্তা’’তি কথেন্তানং ‘‘কিং নামেতং কথেন্তী’’তি নেৰ সোতব্বং ন সদ্ধাতব্বং মঞ্ঞন্তি, ততো অভিসমযো ন হোতি, তস্মিং অসতি অনিয্যানিকং সাসনং হোতি. তস্মা সো অকালো. ৰস্সসততো ঊনআযুকালোপি কালো ন হোতি. কস্মা? তদা সত্তা উস্সন্নকিলেসা হোন্তি, উস্সন্নকিলেসানঞ্চ দিন্নোৰাদো ওৰাদট্ঠানে ন তিট্ঠতি, উদকে দণ্ডরাজি ৰিয খিপ্পং ৰিগচ্ছতি. তস্মা সোপি অকালো. ৰস্সসতসহস্সতো পন পট্ঠায হেট্ঠা ৰস্সসততো পট্ঠায উদ্ধং আযুকালো কালো নাম. তদা পন ৰস্সসতকালো অহোসি. অথ মহাসত্তো ‘‘নিব্বত্তিতব্বকালো’’তি কালং পস্সি.

ততো দীপং ওলোকেন্তো সপরিৰারে চত্তারো মহাদীপে ওলোকেত্ৰা – ‘‘তীসু দীপেসু বুদ্ধা ন নিব্বত্তন্তি, জম্বুদীপেযেৰ নিব্বত্তন্তী’’তি দীপং পস্সি.

ততো ‘‘জম্বুদীপো নাম মহা, দসযোজনসহস্সপরিমাণো. কতরস্মিং নু খো পদেসে বুদ্ধা নিব্বত্তন্তী’’তি ওকাসং ওলোকেন্তো মজ্ঝিমদেসং পস্সি. ‘‘কপিলৰত্থু নাম নগরং, তত্থ মযা নিব্বত্তিতব্ব’’ন্তি নিট্ঠমগমাসি.

ততো কুলং ৰিলোকেন্তো – ‘‘বুদ্ধা নাম ৰেস্সকুলে ৰা সুদ্দকুলে ৰা ন নিব্বত্তন্তি. লোকসম্মতে পন খত্তিযকুলে ৰা ব্রাহ্মণকুলে ৰা নিব্বত্তন্তি, এতরহি খত্তিযকুলং লোকসম্মতং, তত্থ নিব্বত্তিস্সামি সুদ্ধোদনো নাম রাজা পিতা মে ভৰিস্সতী’’তি কুলং পস্সি.

ততো মাতরং ৰিলোকেন্তো – ‘‘বুদ্ধমাতা নাম লোলা সুরাধুত্তা ন হোতি, কপ্পসতসহস্সং পন পূরিতপারমী জাতিতো পট্ঠায অখণ্ডপঞ্চসীলাযেৰ হোতি. অযঞ্চ মহামাযা নাম দেৰী এদিসী, অযং মে মাতা ভৰিস্সতি, কিত্তকং পনস্সা আযূতি, দসন্নং মাসানং উপরি সত্ত দিৰসানী’’তি পস্সি.

ইতি ইমং পঞ্চৰিধং মহাৰিলোকনং ৰিলোকেত্ৰা – ‘‘কালো মে, মারিসা, বুদ্ধভাৰাযা’’তি দেৰানং পটিঞ্ঞং দত্ৰা – ‘‘গচ্ছথ তুম্হে’’তি তা দেৰতা উয্যোজেত্ৰা তুসিতদেৰতাহি পরিৰুতো তুসিতপুরে নন্দনৰনং পাৰিসি. সব্বদেৰলোকেসু হি নন্দনৰনং অত্থিযেৰ. তত্র নং দেৰতা – ‘‘ইতো চুতো সুগতিং গচ্ছা’’তি পুব্বে কতকুসলকম্মোকাসং সারযমানা ৰিচরন্তি. সো এৰং তাহি দেৰতাহি কুসলং সারযমানাহি পরিৰুতো তত্র ৰিচরন্তোৰ চৰিত্ৰা মহামাযায দেৰিযা কুচ্ছিস্মিং উত্তরাসাল়্হনক্খত্তেন পটিসন্ধিং গণ্হি. মহাপুরিসস্স পন মাতু কুচ্ছিস্মিং পটিসন্ধিগ্গণ্হনক্খণে একপ্পহারেনেৰ সকলদসসহস্সিলোকধাতু সঙ্কম্পি. দ্ৰত্তিংস পুব্বনিমিত্তানি পাতুরহেসুং.

এৰং গহিতপটিসন্ধিকস্স বোধিসত্তস্স চেৰ বোধিসত্তমাতুযা চ উপদ্দৰনিৰারণত্থং খগ্গহত্থা চত্তারো দেৰপুত্তা আরক্খং গণ্হিংসু. বোধিসত্তস্স মাতু পুরিসেসু রাগচিত্তং নুপ্পজ্জি, লাভগ্গযসগ্গপ্পত্তা চ সা অহোসি সুখিনী অকিলন্তকাযা. বোধিসত্তঞ্চ অত্তনো কুচ্ছিগতং ৰিপ্পসন্নে মণিরতনে আৰুতপণ্ডুসুত্তং ৰিয পস্সতি. যস্মা বোধিসত্তেন ৰসিতকুচ্ছি নাম চেতিযগব্ভসদিসা হোতি, ন সক্কা অঞ্ঞেন সত্তেন আৰসিতুং ৰা পরিভুঞ্জিতুং ৰা, তস্মা বোধিসত্তমাতা সত্তাহজাতে বোধিসত্তে কালং কত্ৰা তুসিতপুরে নিব্বত্তি. যথা পন অঞ্ঞা ইত্থিযো দস মাসে অপ্পত্ৰাপি অতিক্কমিত্ৰাপি নিসিন্নাপি নিপন্নাপি ৰিজাযন্তি, ন এৰং বোধিসত্তমাতা. বোধিসত্তমাতা পন বোধিসত্তং দস মাসে কুচ্ছিনা পরিহরিত্ৰা ঠিতাৰ ৰিজাযতি. অযং বোধিসত্তমাতু ধম্মতা.

মহামাযাপি দেৰী দস মাসে কুচ্ছিনা বোধিসত্তং পরিহরিত্ৰা পরিপুণ্ণগব্ভা ঞাতিঘরং গন্তুকামা সুদ্ধোদনমহারাজস্স আরোচেসি – ‘‘ইচ্ছামহং, মহারাজ, দেৰদহনগরং গন্তু’’ন্তি. রাজা ‘‘সাধূ’’তি সম্পটিচ্ছিত্ৰা কপিলৰত্থুতো যাৰ দেৰদহনগরা অঞ্জসং সমং কারেত্ৰা কদলিপুণ্ণঘটকমুকধজপটাকাদীহি অলঙ্কারাপেত্ৰা নৰকনকসিৰিকায নিসীদাপেত্ৰা মহতিযা ৰিভূতিযা মহতা পরিৰারেন পেসেসি. দ্ৰিন্নং পন নগরানং অন্তরে উভযনগরৰাসীনং পরিভোগারহং লুম্বিনীৰনং নাম মঙ্গলসালৰনং অত্থি, তং তস্মিং সমযে মূলতো যাৰ অগ্গসাখা সব্বং একফালিফুল্লং অহোসি. সাখন্তরেহি চেৰ পুপ্ফন্তরেহি চ পরমরতিকরমধুরমনোরমৰিরুতাহি মদমুদিতাহি অনুভুত্তপঞ্চরাহি পরভতমধুকরৰধূহি উপগীযমানসুরনন্দননন্দনৰনসদিসসোভং ৰনং দিস্ৰা দেৰিযা সালৰনকীল়মনুভৰিতুং চিত্তমুপ্পজ্জি (অপ. অট্ঠ. ১.অৰিদূরেনিদানকথা; জা. অট্ঠ. ১.অৰিদূরেনিদানকথা).

‘‘ৰিভূসিতা বালজনাতিচালিনী, ৰিভূসিতঙ্গী ৰনিতেৰ মালিনী;

সদা জনানং নযনালিমালিনী, ৰিলুম্পিনীৰাতিৰিরোচি লুম্বিনী’’.

অমচ্চা রঞ্ঞো আরোচেত্ৰা দেৰিং গহেত্ৰা তং লুম্বিনীৰনং পৰিসিংসু. সা মঙ্গলসালমূলং গন্ত্ৰা তস্স উজুসমৰট্টক্খন্ধস্স পুপ্ফফলপল্লৰসমলঙ্কতস্স যং সাখং গণ্হিতুকামা অহোসি, সা সালসাখা অবলা জনহদযলোলা সযমেৰ ৰিলম্বমানা হুত্ৰা তস্সা করতলস্মিং সমুপগতা. অথ সা তং সালসাখং তম্বতুঙ্গনখুজ্জলেন কমলদলৰত্তিৰট্টঙ্গুলিনা নৰকনককটৰলযসোভিনা দক্খিণেন পরমরতিকরেন করেন অগ্গহেসি. সা তং সালসাখং গহেত্ৰা ঠিতা অসিতজলধরৰিৰরগতা বালচন্দলেখা ৰিয চ অচিরট্ঠিতিকা অচ্চিপভা ৰিয চ নন্দনৰনজাতা দেৰী ৰিয চ দেৰী ৰিরোচিত্থ. তাৰদেৰ চস্সা কম্মজৰাতা চলিংসু. অথস্সা সাণিপাকারং পরিক্খিপিত্ৰা মহাজনো পটিক্কমি. সা সালসাখং গহেত্ৰা তিট্ঠমানায এৰ তস্সা গব্ভৰুট্ঠানং অহোসি.

তঙ্খণংযেৰ চত্তারো ৰিসুদ্ধচিত্তা মহাব্রহ্মানো সুৰণ্ণজালং আদায আগন্ত্ৰা তেন সুৰণ্ণজালেন বোধিসত্তং সম্পটিচ্ছিত্ৰা মাতু পুরতো ঠপেত্ৰা – ‘‘অত্তমনা, দেৰি, হোহি, মহেসক্খো তে পুত্তো উপ্পন্নো’’তি আহংসু. যথা পন অঞ্ঞে সত্তা মাতুকুচ্ছিতো নিক্খমন্তা পটিক্কূলেন অসুচিনা মক্খিতা নিক্খমন্তি, ন এৰং বোধিসত্তো. বোধিসত্তো পন দ্ৰে হত্থে দ্ৰে পাদে পসারেত্ৰা ঠিতকোৰ মাতুকুচ্ছিসম্ভৰেন কেনচি অসুচিনা অমক্খিতোৰ সুদ্ধো ৰিসদো কাসিকৰত্থে নিক্খিত্তমণিরতনং ৰিয ৰিরোচমানো মাতুকুচ্ছিতো নিক্খমি. এৰং সন্তেপি বোধিসত্তস্স চ বোধিসত্তমাতুযা চ সক্কারত্থং আকাসতো দ্ৰে উদকধারা নিক্খমিত্ৰা বোধিসত্তস্স চ মাতুযা চ সরীরে উতুং গাহাপেসুং.

অথ নং সুৰণ্ণজালেন পটিগ্গহেত্ৰা ঠিতানং ব্রহ্মানং হত্থতো চত্তারো মহারাজানো মঙ্গলসম্মতায সুখসম্ফস্সায অজিনপ্পৰেণিযা গণ্হিংসু, তেসং হত্থতো মনুস্সা দুকূলচুম্বটকেন গণ্হিংসু, মনুস্সানং হত্থতো মুচ্চিত্ৰা পথৰিযং পতিট্ঠায পুরত্থিমং দিসং ওলোকেসি, অনেকানি চক্কৰাল়সহস্সানি একঙ্গণানি অহেসুং. তত্থ দেৰমনুস্সা গন্ধপুপ্ফমালাদীহি পূজযমানা – ‘‘মহাপুরিস, তুম্হেহি সদিসো এত্থ নত্থি, কুতো উত্তরিতরো’’তি আহংসু. এৰং দস দিসা অনুৰিলোকেত্ৰা অত্তনা সদিসং অদিস্ৰা উত্তরদিসাভিমুখো সত্তপদৰীতিহারেন অগমাসি. গচ্ছন্তো চ পথৰিযা এৰ গতো, নাকাসেন. অচেলকোৰ গতো, ন সচেলকো. দহরোৰ গতো, ন সোল়সৰস্সুদ্দেসিকো. মহাজনস্স পন আকাসেন গচ্ছন্তো ৰিয অলঙ্কতপটিযত্তো ৰিয চ সোল়সৰস্সুদ্দেসিকো ৰিয চ অহোসি. ততো সত্তমে পদে ঠত্ৰা ‘‘অগ্গোহমস্মি লোকস্সা’’তিআদিকং (দী. নি. ২.৩১; ম. নি. ৩.২০৭) আসভিং ৰাচং নিচ্ছারেন্তো সীহনাদং নদি.

বোধিসত্তো হি তীসু অত্তভাৰেসু মাতুকুচ্ছিতো নিক্খন্তমত্তোৰ ৰাচং নিচ্ছারেসি মহোসধত্তভাৰে, ৰেস্সন্তরত্তভাৰে, ইমস্মিং অত্তভাৰেতি. মহোসধত্তভাৰে কিরস্স মাতুকুচ্ছিতো নিক্খন্তমত্তস্সেৰ সক্কো দেৰরাজা আগন্ত্ৰা চন্দনসারং হত্থে ঠপেত্ৰা গতো, তং মুট্ঠিযং কত্ৰাৰ নিক্খন্তো. অথ নং মাতা – ‘‘তাত, ত্ৰং কিং গহেত্ৰা আগতোসী’’তি পুচ্ছি. ‘‘ওসধং, অম্মা’’তি. ইতি ওসধং গহেত্ৰা আগতত্তা ‘‘ওসধকুমারো’’ত্ৰেৰস্স নামমকংসু.

ৰেস্সন্তরত্তভাৰে পন মাতুকুচ্ছিতো নিক্খন্তমত্তোৰ দক্খিণহত্থং পসারেত্ৰা – ‘‘অত্থি নু খো, অম্ম, কিঞ্চি গেহস্মিং ধনং, দানং দস্সামী’’তি ৰদন্তো নিক্খমি. অথস্স মাতা – ‘‘সধনে কুলে নিব্বত্তোসি, তাতা’’তি পুত্তস্স হত্থং অত্তনো হত্থতলে কত্ৰা সহস্সত্থৰিকং ঠপেসি.

ইমস্মিং পন অত্তভাৰে ইমং সীহনাদং নদীতি এৰং বোধিসত্তো তীসু অত্তভাৰেসু মাতুকুচ্ছিতো নিক্খন্তমত্তোৰ ৰাচং নিচ্ছারেসি. জাতক্খণেপিস্স দ্ৰত্তিংস পুব্বনিমিত্তানি পাতুরহেসুং. যস্মিং পন সমযে অম্হাকং বোধিসত্তো লুম্বিনীৰনে জাতো তস্মিংযেৰ সমযে রাহুলমাতা দেৰী আনন্দো ছন্নো কাল়ুদাযী অমচ্চো কণ্ডকো অস্সরাজা মহাবোধিরুক্খো চতস্সো নিধিকুম্ভিযো চ জাতা, তত্থ একো গাৰুতপ্পমাণো একো অড্ঢযোজনপ্পমাণো একো তিগাৰুতপ্পমাণো একো যোজনপ্পমাণো অহোসি. ইমে সত্ত সহজাতা নাম হোন্তি.

উভযনগরৰাসিনো মহাপুরিসং গহেত্ৰা কপিলৰত্থুপুরমেৰ অগমংসু. তংদিৰসমেৰ – ‘‘কপিলৰত্থুনগরে সুদ্ধোদনমহারাজস্স পুত্তো বোধিমূলে নিসীদিত্ৰা বুদ্ধো ভৰিস্সতী’’তি তাৰতিংসভৰনে হট্ঠতুট্ঠা দেৰসঙ্ঘা চেলুক্খেপাদীনি পৰত্তেন্তা কীল়িংসু. তস্মিং সমযে সুদ্ধোদনমহারাজস্স কুলূপকো অট্ঠসমাপত্তিলাভী কাল়দেৰলো নাম তাপসো ভত্তকিচ্চং কত্ৰা দিৰাৰিহারত্থায তাৰতিংসভৰনং গন্ত্ৰা তত্থ দিৰাৰিহারং নিসিন্নো তা দেৰতা তুট্ঠমানসা কীল়ন্তিযো দিস্ৰা ‘‘কিংকারণা তুট্ঠমানসা পমুদিতহদযা কীল়থ, ময্হং তং কারণং কথেথা’’তি পুচ্ছি. ততো দেৰতা আহংসু – ‘‘মারিস, সুদ্ধোদনরঞ্ঞো পুত্তো জাতো, সো বোধিমণ্ডে নিসীদিত্ৰা বুদ্ধো হুত্ৰা ধম্মচক্কং পৰত্তেস্সতি, তস্স ‘অনন্তরূপং বুদ্ধলীল়ং পস্সিতুং লভিস্সামা’তি ইমিনা কারণেন তুট্ঠম্হা’’তি.

অথ তাপসো তাসং দেৰতানং ৰচনং সুত্ৰা পরমদস্সনীযরতনাৰলোকতো দেৰলোকতো ওরুয্হ নরপতিনিৰেসনং পৰিসিত্ৰা পঞ্ঞত্তে আসনে নিসীদি. ততো কতপটিসন্থারং রাজানং – ‘‘পুত্তো কির তে, মহারাজ, জাতো, তং পস্সিস্সামা’’তি আহ. রাজা অলঙ্কতপটিযত্তং তনযং আহরাপেত্ৰা দেৰলতাপসং ৰন্দাপেতুং অভিহরি. মহাপুরিসস্স পাদা পরিৰত্তিত্ৰা ৰিজ্জুলতা ৰিয অসিতজলধরকূটেসু তাপসস্স জটাসু পতিট্ঠহিংসু. বোধিসত্তেন হি তেনত্তভাৰেন ৰন্দিতব্বো নাম অঞ্ঞো নত্থি. ততো তাপসো উট্ঠাযাসনা বোধিসত্তস্স অঞ্জলিং পগ্গহেসি. রাজা তং অচ্ছরিযং দিস্ৰা অত্তনো পুত্তং ৰন্দি. তাপসো বোধিসত্তস্স লক্খণসম্পত্তিং দিস্ৰা – ‘‘ভৰিস্সতি নু খো বুদ্ধো, উদাহু ন ভৰিস্সতী’’তি আৰজ্জেত্ৰা উপধারেন্তো – ‘‘নিস্সংসযং বুদ্ধো ভৰিস্সতী’’তি অনাগতংসঞাণেন ঞত্ৰা – ‘‘অচ্ছরিযপুরিসো অয’’ন্তি সিতং অকাসি.

ততো ‘‘অহং ইমং বুদ্ধভূতং দট্ঠুং লভিস্সামি নু খো, নো’’তি উপধারেন্তো – ‘‘ন লভিস্সামি, অন্তরাযেৰ কালং কত্ৰা বুদ্ধসতেনপি বুদ্ধসহস্সেনপি গন্ত্ৰা বোধেতুং অসক্কুণেয্যে অরূপভৰে নিব্বত্তিস্সামী’’তি দিস্ৰা – ‘‘এৰরূপং নাম অচ্ছরিযপুরিসং বুদ্ধভূতং দট্ঠুং ন লভিস্সামি, মহতী ৰত মে জানি ভৰিস্সতী’’তি পরোদি. মনুস্সা পন দিস্ৰা – ‘‘অম্হাকং অয্যো ইদানেৰ হসিত্ৰা পুন রোদিতুমারভি, কিং নু খো, ভন্তে, অম্হাকং অয্যপুত্তস্স কোচি অন্তরাযো ভৰিস্সতী’’তি পুচ্ছিংসু. তাপসো আহ – ‘‘নত্থেতস্স অন্তরাযো, নিস্সংসযেন বুদ্ধো ভৰিস্সতী’’তি. ‘‘অথ কস্মা তুম্হে পরোদিত্থা’’তি? ‘‘এৰরূপং অচ্ছরিযপুরিসং বুদ্ধভূতং দট্ঠুং ন লভিস্সামি, মহতী ৰত মে জানি ভৰিস্সতীতি অত্তানং অনুসোচন্তো রোদামী’’তি আহ.

ততো বোধিসত্তং পঞ্চমে দিৰসে সীসং ন্হাপেত্ৰা – ‘‘নামং গণ্হিস্সামা’’তি রাজভৰনং চতুজ্জাতিকগন্ধেন উপলিম্পিত্ৰা লাজপঞ্চমানি কুসুমানি ৰিকিরিত্ৰা অসম্ভিন্নপাযাসং পচাপেত্ৰা তিণ্ণং ৰেদানং পারঙ্গতে অট্ঠসতে ব্রাহ্মণে নিমন্তেত্ৰা রাজভৰনে নিসীদাপেত্ৰা মধুপাযাসং ভোজেত্ৰা সক্কারং কত্ৰা – ‘‘কিং নু খো ভৰিস্সতী’’তি লক্খণানি পরিগ্গাহাপেসুং. তেসু রামাদযো অট্ঠ ব্রাহ্মণপণ্ডিতা লক্খণপরিগ্গাহকা অহেসুং. তেসু সত্ত জনা দ্ৰে অঙ্গুলিযো উক্খিপিত্ৰা দ্ৰেধা ব্যাকরিংসু – ‘‘ইমেহি লক্খণেহি সমন্নাগতো অগারং অজ্ঝাৰসন্তো রাজা হোতি চক্কৰত্তী, পব্বজমানো বুদ্ধো’’তি. তেসং পন সব্বদহরো গোত্তেন কোণ্ডঞ্ঞো নাম ব্রাহ্মণো বোধিসত্তস্স লক্খণৰরসম্পত্তিং দিস্ৰা – ‘‘এতস্স অগারমজ্ঝে ঠানকারণং নত্থি, একন্তেনেৰ ৰিৰটচ্ছদো বুদ্ধো ভৰিস্সতী’’তি একমেৰ অঙ্গুলিং উক্খিপিত্ৰা একংসব্যাকরণং ব্যাকাসি. অথস্স নামং গণ্হন্তা সব্বলোকত্থসিদ্ধিকরত্তা সিদ্ধত্থোতি নামমকংসু.

অথ তে ব্রাহ্মণা অত্তনো ঘরানি গন্ত্ৰা পুত্তে আমন্তেত্ৰা এৰমাহংসু – ‘‘অম্হে মহল্লকা, সুদ্ধোদনমহারাজস্স পুত্তং সব্বঞ্ঞুতং পত্তং সম্ভাৰেয্যাম ৰা নো ৰা, তুম্হে পন তস্মিং পব্বজিত্ৰা সব্বঞ্ঞুতং পত্তে তস্স সাসনে পব্বজথা’’তি. ততো সত্তপি জনা যাৰতাযুকং ঠত্ৰা যথাকম্মং গতা. কোণ্ডঞ্ঞমাণৰো অরোগো অহোসি. তদা পন রাজা তেসং ৰচনং সুত্ৰা – ‘‘কিং দিস্ৰা মম পুত্তো পব্বজিস্সতী’’তি তে পুচ্ছি. ‘‘চত্তারি পুব্বনিমিত্তানি, দেৰা’’তি. ‘‘কতরঞ্চ কতরঞ্চা’’তি? ‘‘জিণ্ণং ব্যাধিতং মতং পব্বজিত’’ন্তি. রাজা ‘‘ইতো পট্ঠায এৰরূপানং মম পুত্তস্স সন্তিকং আগমিতুং মা অদত্থা’’তি ৰত্ৰা কুমারস্স চক্খুপথে জিণ্ণপুরিসাদীনং আগমননিৰারণত্থং চতূসু দিসাসু গাৰুতগাৰুতট্ঠানে আরক্খং ঠপেসি. তংদিৰসং মঙ্গলট্ঠানে সন্নিপতিতেসু অসীতিযা ঞাতিকুলসহস্সেসু একমেকো একমেকং পুত্তং পটিজানি – ‘‘অযং বুদ্ধো ৰা হোতু রাজা ৰা, মযং একমেকং পুত্তং দস্সাম, সচে বুদ্ধো ভৰিস্সতি, খত্তিযসমণেহেৰ পরিৰুতো ৰিচরিস্সতি. সচে রাজা চক্কৰত্তী ভৰিস্সতি, খত্তিযকুমারেহেৰ পরিৰুতো ৰিচরিস্সতী’’তি. অথ রাজা মহাপুরিসস্স পরমরূপসম্পন্না ৰিগতসব্বদোসা চতুসট্ঠি ধাতিযো অদাসি. বোধিসত্তো অনন্তেন পরিৰারেন মহতা সিরিসমুদযেন ৰড্ঢি.

অথেকদিৰসং রঞ্ঞো ৰপ্পমঙ্গলং নাম অহোসি. তংদিৰসং রাজা মহতিযা ৰিভূতিযা মহতা পরিৰারেন নগরতো নিক্খমন্তো পুত্তম্পি গহেত্ৰাৰ অগমাসি. কসিকম্মট্ঠানে একো জম্বুরুক্খো পরমরমণীযো ঘনসন্দচ্ছাযো অহোসি. তস্স হেট্ঠা কুমারস্স সযনং পঞ্ঞাপেত্ৰা উপরি ৰরকনকতারাখচিতং রত্তচেলৰিতানং বন্ধিত্ৰা সাণিপাকারেন পরিক্খিপাপেত্ৰা আরক্খং ঠপেত্ৰা রাজা সব্বালঙ্কারং অলঙ্করিত্ৰা অমচ্চগণপরিৰুতো নঙ্গলকরণট্ঠানমগমাসি. তত্থ রাজা পরমমঙ্গলং সুৰণ্ণনঙ্গলং গণ্হাতি, অমচ্চাদযো রজতনঙ্গলাদীনি গণ্হন্তি. তংদিৰসং নঙ্গলসহস্সং যোজীযতি. বোধিসত্তং পরিৰারেত্ৰা নিসিন্না ধাতিযো – ‘‘রঞ্ঞো সম্পত্তিং পস্সিস্সামা’’তি অন্তোসাণিতো বহি নিক্খন্তা.

অথ বোধিসত্তো ইতো চিতো চ ওলোকেন্তো কিঞ্চি অদিস্ৰা সহসা উট্ঠায পল্লঙ্কং আভুজিত্ৰা আনাপানে পরিগ্গহেত্ৰা পঠমজ্ঝানং নিব্বত্তেসি. ধাতিযো খজ্জভোজ্জন্তরে ৰিচরন্তিযো থোকং চিরাযিংসু. সেসরুক্খানং ছাযা নিৰত্তা, তস্স পন জম্বুরুক্খস্স ছাযা পরিমণ্ডলা হুত্ৰা তত্থেৰ অট্ঠাসি. ধাতিতো পনস্স ‘‘অয্যপুত্তো এককোৰা’’তি ৰেগেন সাণিপাকারং উক্খিপিত্ৰা পরিযেসন্তিযো সিরিসযনে পল্লঙ্কেন নিসিন্নং তঞ্চ পাটিহারিযং দিস্ৰা গন্ত্ৰা তং পৰত্তিং রঞ্ঞো আরোচেসুং. রাজা ৰেগেন আগন্ত্ৰা তং পাটিহারিযং দিস্ৰা – ‘‘অযং ৰো, তাত, দুতিযৰন্দনা’’তি পুত্তং ৰন্দি.

অথ মহাপুরিসো অনুক্কমেন সোল়সৰস্সুদ্দেসিকো অহোসি. রাজা বোধিসত্তস্স তিণ্ণং উতূনং অনুচ্ছৰিকে রম্ম-সুরম্ম-সুভনামকে তযো পাসাদে কারেসি. একং নৰভূমিকং একং সত্তভূমিকং একং পঞ্চভূমিকং. তযোপি পাসাদা উব্বেধেন সমপ্পমাণা অহেসুং. ভূমিকাসু পন নানত্তং অহোসি.

অথ রাজা চিন্তেসি – ‘‘পুত্তো মে ৰযপ্পত্তো ছত্তমস্স উস্সাপেত্ৰা রজ্জসিরিং পস্সিস্সামী’’তি. সো সাকিযানং পণ্ণানি পহিণি ‘‘পুত্তো মে ৰযপ্পত্তো, রজ্জে নং পতিট্ঠাপেস্সামি, সব্বে অত্তনো গেহেসু ৰযপ্পত্তা দারিকা ইমং গেহং পেসেন্তূ’’তি. তে রঞ্ঞো সাসনং সুত্ৰা – ‘‘কুমারো কেৰলং রূপসম্পন্নো, ন কিঞ্চি সিপ্পং জানাতি, দারভরণং কাতুং ন সক্খিস্সতি, ন মযং ধীতরো দস্সামা’’তি আহংসু. রাজা তং পৰত্তিং সুত্ৰা পুত্তস্স সন্তিকং গন্ত্ৰা তমত্থং আরোচেসি. বোধিসত্তো – ‘‘কিং সিপ্পং দস্সেতুং ৰট্টতী’’তি আহ. ‘‘সহস্সত্থামং ধনুং আরোপেতুং ৰট্টতি, তাতা’’তি. ‘‘তেন হি আহরাপেথা’’তি আহ. রাজা আহরাপেত্ৰা অদাসি. তং ধনুং পুরিসসহস্সং আরোপেতি, পুরিসসহস্সং ওরোপেতি. মহাপুরিসো তং সরাসনং আহরাপেত্ৰা পল্লঙ্কেন নিসিন্নোৰ জিযং পাদঙ্গুট্ঠকে ৰেঠাপেত্ৰা কড্ঢন্তো পাদঙ্গুট্ঠকেনেৰ ধনুং আরোপেত্ৰা ৰামেন হত্থেন দণ্ডে গহেত্ৰা দক্খিণেন হত্থেন কড্ঢিত্ৰা জিযং রোপেসি. সকলনগরং উপ্পত্তনাকারপ্পত্তং অহোসি. ‘‘কিং এসো সদ্দো’’তি চ ৰুত্তে ‘‘দেৰো গজ্জতী’’তি আহংসু. অথঞ্ঞে ‘‘তুম্হে ন জানাথ, ন দেৰো গজ্জতি, অঙ্গীরসস্স কুমারস্স সহস্সত্থামং ধনুং আরোপেত্ৰা জিযং পোঠেন্তস্স জিযপ্পহারসদ্দো এসো’’তি আহংসু. সাকিযা তং সুত্ৰা তাৰতকেনেৰ আরদ্ধচিত্তা তুট্ঠমানসা অহেসুং.

অথ মহাপুরিসো – ‘‘কিং কাতুং ৰট্টতী’’তি আহ. অট্ঠঙ্গুলবহলং অযোপট্টং কণ্ডেন ৰিজ্ঝিতুং ৰট্টতীতি. তং ৰিজ্ঝিত্ৰা – ‘‘অঞ্ঞং কিং কাতুং ৰট্টতী’’তি আহ. চতুরঙ্গুলবহলং অসনফলকং ৰিজ্ঝিতুং ৰট্টতীতি. তম্পি ৰিজ্ঝিত্ৰা – ‘‘অঞ্ঞং কিং কাতুং ৰট্টতী’’তি আহ. ৰিদত্থিবহলং উদুম্বরফলকং ৰিজ্ঝিতুং ৰট্টতীতি. তম্পি ৰিজ্ঝিত্ৰা অঞ্ঞং কিং কাতুং ৰট্টতীতি. ততো ‘‘ৰালুকসকটানী’’তি আহংসু. মহাসত্তো ৰালুকসকটম্পি পলালসকটম্পি ৰিনিৰিজ্ঝিত্ৰা উদকে একূসভপ্পমাণং কণ্ডং পেসেসি থলে অট্ঠউসভপ্পমাণং. অথ নং ‘‘ৰাতিঙ্গণসঞ্ঞায ৰালং ৰিজ্ঝিতুং ৰট্টতী’’তি আহংসু. ‘‘তেন হি যোজনমত্তং ৰাতিঙ্গণং বন্ধাপেথা’’তি ৰত্ৰা যোজনমত্তকে ৰাতিঙ্গণসঞ্ঞায ৰালং বন্ধাপেত্ৰা রত্তন্ধকারে মেঘপটলেহি ছন্নাসু দিসাসু কণ্ডং খিপি. তং গন্ত্ৰা যোজনমত্তকে ৰালং ফালেত্ৰা পথৰিং পাৰিসি. ন কেৰলং এত্তকমেৰ, তংদিৰসং মহাপুরিসো লোকে ৰত্তমানং সিপ্পং সব্বমেৰ দস্সেসি.

অথ সাকিযা অত্তনো ধীতরো অলঙ্করিত্ৰা পেসযিংসু. চত্তালীসসহস্সা নাটকিত্থিযো অহেসুং. রাহুলমাতা পন দেৰী অগ্গমহেসী অহোসি. মহাপুরিসো দেৰকুমারো ৰিয সুরযুৰতীহি পরিৰুতো নরযুৰতীহি পরিৰুতো নিপ্পুরিসেহি তুরিযেহি পরিচারিযমানো মহাসম্পত্তিং অনুভৰমানো উতুৰারেন উতুৰারেন তেসু তীসু পাসাদেসু ৰিহরতি. অথেকদিৰসং বোধিসত্তো উয্যানভূমিং গন্তুকামো সারথিং আমন্তেত্ৰা – ‘‘রথং যোজেহি উয্যানভূমিং পস্সিস্সামী’’তি আহ. সো ‘‘সাধূ’’তি পটিস্সুণিত্ৰা মহারহং ৰররুচিরথিরকুব্বরৰরত্তং থিরতরনেমিনাভিং ৰরকনকরজতমণিরতনখচিতঈসামুখং নৰকনকরজততারকখচিতনেমিপস্সং সমোসরিতৰিৰিধসুরভিকুসুমদামসস্সিরিকং রৰিরথসদিসদস্সনীযং ৰররথং সমলঙ্করিত্ৰা সসিকুমুদসদিসৰণ্ণে অনিলগরুল়জৰে আজানীযে চত্তারো মঙ্গলসিন্ধৰে যোজেত্ৰা বোধিসত্তস্স পটিৰেদেসি. বোধিসত্তো দেৰৰিমানসদিসং তং রথৰরমারুয্হ উয্যানাভিমুখো পাযাসি.

অথ দেৰতা ‘‘সিদ্ধত্থকুমারস্স অভিসম্বুজ্ঝনকালো আসন্নো, পুব্বনিমিত্তমস্স দস্সেস্সামা’’তি একং দেৰপুত্তং জরাজজ্জরসরীরং খণ্ডদন্তং পলিতকেসং ৰঙ্কগত্তং দণ্ডহত্থং পৰেধমানং কত্ৰা দস্সেসুং. তং বোধিসত্তো চেৰ সারথি চ পস্সন্তি. ততো বোধিসত্তো – ‘‘সারথি কো নামেস পুরিসো কেসাপিস্স ন যথা অঞ্ঞেস’’ন্তি মহাপদানসুত্তে (দী. নি. ২.৪৩ আদযো) আগতনযেনেৰ পুচ্ছিত্ৰা তস্স ৰচনং সুত্ৰা – ‘‘ধিরত্থু ৰত, ভো, জাতি, যত্র হি নাম জাতস্স জরা পঞ্ঞাযিস্সতী’’তি (দী. নি. ২.৪৫, ৪৭) সংৰিগ্গহদযো ততোৰ পটিনিৰত্তিত্ৰা পাসাদমেৰ অভিরুহি.

রাজা ‘‘কিংকারণা মম পুত্তো পটিনিৰত্তী’’তি পুচ্ছি. ‘‘জিণ্ণপুরিসং দিস্ৰা, দেৰা’’তি. ততো কম্পমানমানসো রাজা অড্ঢযোজনে আরক্খং ঠপেসি. পুনেকদিৰসং বোধিসত্তো উয্যানং গচ্ছন্তো তাহি এৰ দেৰতাহি নিম্মিতং ব্যাধিতঞ্চ পুরিসং দিস্ৰা পুরিমনযেনেৰ পুচ্ছিত্ৰা সংৰিগ্গহদযো নিৰত্তিত্ৰা পাসাদমেৰ অভিরুহি. রাজা পুচ্ছিত্ৰা নাটকানি ৰিস্সজ্জেসি. ‘‘পব্বজ্জায মানসং অস্স ভিন্নং করিস্স’’ন্তি আরক্খং ৰড্ঢেত্ৰা সমন্ততো তিগাৰুতপ্পমাণে পদেসে আরক্খং ঠপেসি.

পুনপি বোধিসত্তো একদিৰসং উয্যানং গচ্ছন্তো তথেৰ দেৰতাহি নিম্মিতং কালঙ্কতং দিস্ৰা পুরিমনযেনেৰ পুচ্ছিত্ৰা সংৰিগ্গহদযো নিৰত্তিত্ৰা পাসাদমভিরুহি. রাজা নিৰত্তনকারণং পুচ্ছিত্ৰা পুন আরক্খং ৰড্ঢেত্ৰা যোজনপ্পমাণে পদেসে আরক্খং ঠপেসি.

পুনপি বোধিসত্তো একদিৰসং উয্যানং গচ্ছন্তো তথেৰ দেৰতাহি নিম্মিতং সুনিৰত্থং সুপারুতং পব্বজিতং দিস্ৰা – ‘‘কো নামেসো, সম্ম, সারথী’’তি সারথিং পুচ্ছি. সারথি কিঞ্চাপি বুদ্ধুপ্পাদস্স অভাৰা পব্বজিতং ৰা পব্বজিতগুণে ৰা ন জানাতি, দেৰতানুভাৰেন পন ‘‘পব্বজিতো নামাযং দেৰা’’তি ৰত্ৰা পব্বজ্জায গুণং তস্স ৰণ্ণেসি.

ততো বোধিসত্তো পব্বজ্জায রুচিং উপ্পাদেত্ৰা তংদিৰসং উয্যানং অগমাসি. দীঘাযুকা বোধিসত্তা ৰস্সসতে ৰস্সসতে অতিক্কন্তে জিণ্ণাদীসু একেকং অদ্দসংসু. অম্হাকং পন বোধিসত্তো অপ্পাযুককালে উপ্পন্নত্তা চতুন্নং চতুন্নং মাসানং অচ্চযেন উয্যানং গচ্ছন্তো অনুক্কমেন একেকং অদ্দস. দীঘভাণকা পনাহু – ‘‘চত্তারি নিমিত্তানি একদিৰসেনেৰ দিস্ৰা অগমাসী’’তি. তত্থ দিৰসভাগং কীল়িত্ৰা উয্যানরসমনুভৰিত্ৰা মঙ্গলপোক্খরণিযং ন্হত্ৰা অত্থঙ্গতে সূরিযে মঙ্গলসিলাতলে নিসীদি অত্তানং অলঙ্কারাপেতুকামো. অথস্স চিত্তাচারমঞ্ঞায সক্কেন দেৰানমিন্দেন আণত্তো ৰিস্সকম্মো নাম দেৰপুত্তো আগন্ত্ৰা তস্সেৰ কপ্পকসদিসো হুত্ৰা দিব্বেহি অলঙ্কারেহি অলঙ্করি. অথস্স সব্বালঙ্কারসমলঙ্কতস্স সব্বতালাৰচরেসু সকানি সকানি পটিভানানি দস্সযন্তেসু ব্রাহ্মণেসু চ ‘‘জয নন্দা’’তিআদিৰচনেহি সুতমঙ্গলিকাদীসু নানপ্পকারেহি মঙ্গলৰচনত্থুতিঘোসেহি সম্ভাৰেন্তেসু সব্বালঙ্কারসমলঙ্কতং রথৰরং অভিরুহি. তস্মিং সমযে – ‘‘রাহুলমাতা পুত্তং ৰিজাতা’’তি সুত্ৰা সুদ্ধোদনমহারাজা – ‘‘পুত্তস্স মে তুট্ঠিং নিৰেদেথা’’তি সাসনং পহিণি. বোধিসত্তো তং সুত্ৰা – ‘‘রাহু জাতো, বন্ধনং জাত’’ন্তি আহ. রাজা – ‘‘কিং মে পুত্তো অৰচা’’তি পুচ্ছিত্ৰা তং ৰচনং সুত্ৰা ‘‘ইতো পট্ঠায মে নত্তা ‘রাহুলকুমারো’ত্ৰেৰ নামং হোতূ’’তি আহ.

বোধিসত্তোপি তং রথৰরমারুয্হ মহতা পরিৰারেন অতিমনোরমেন সিরিসোভগ্গেন নগরং পাৰিসি. তস্মিং সমযে রূপসিরিযা গুণসম্পত্তিযা চ অকিসা কিসাগোতমী নাম খত্তিযকঞ্ঞা উপরিপাসাদৰরতলগতা নগরং পৰিসন্তস্স বোধিসত্তস্স রূপসিরিং দিস্ৰা সঞ্জাতপীতিসোমনস্সা হুত্ৰা –

‘‘নিব্বুতা নূন সা মাতা, নিব্বুতো নূন সো পিতা;

নিব্বুতা নূন সা নারী, যস্সাযং ঈদিসো পতী’’তি. (ধ. স. অট্ঠ. নিদানকথা; ধ. প. অট্ঠ. ১.সারিপুত্তত্থেরৰত্থু; অপ. অট্ঠ. ১.অৰিদূরেনিদানকথা; জা. অট্ঠ. ১.অৰিদূরেনিদানকথা) –

ইমং উদানং উদানেসি.

বোধিসত্তো তং সুত্ৰা চিন্তেসি – ‘‘অযং মে সুস্সৰনং ৰচনং সাৰেসি, অহঞ্হি নিব্বানং গৰেসন্তো ৰিচরামি, অজ্জেৰ মযা ঘরাৰাসং ছড্ডেত্ৰা নিক্খম্ম পব্বজিত্ৰা নিব্বানং গৰেসিতুং ৰট্টতী’’তি. ‘‘অযং ইমিস্সা আচরিযভাগো হোতূ’’তি মুত্তাহারং কণ্ঠতো ওমুঞ্চিত্ৰা কিসাগোতমিযা সতসহস্সগ্ঘনিকং পরমরতিকরং মুত্তাহারং পেসেসি. সা ‘‘সিদ্ধত্থকুমারো মযি পটিবদ্ধহদযো হুত্ৰা পণ্ণাকারং পেসেসী’’তি সোমনস্সজাতা অহোসি.

বোধিসত্তোপি মহতা সিরিসমুদযেন পরমরমণীযং পাসাদং অভিরুহিত্ৰা সিরিসযনে নিপজ্জি. তাৰদেৰ নং পরিপুণ্ণরজনিকরসদিসরুচিরৰরৰদনা বিম্বফলসদিসদসনৰসনা সিতৰিমলসমসংহিতাৰিরল়ৰরদসনা অসিতনযনকেসপাসা সুজাতঞ্জনাতিনীলকুটিলভমুকা সুজাতহংসসমসংহিতপযোধরা রতিকরনৰকনকরজতৰিরচিতৰরমণিমেখলা পরিগতৰিপুলঘনজঘনতটা করিকরসন্নিভোরুযুগলা নচ্চগীতৰাদিতেসু কুসলা সুরযুৰতিসদিসরূপসোভা ৰরযুৰতিযো মধুররৰানি তুরিযানি গহেত্ৰা মহাপুরিসং সম্পরিৰারেত্ৰা রমাপযন্তিযো নচ্চগীতৰাদিতানি পযোজযিংসু. বোধিসত্তো পন কিলেসেসু ৰিরত্তচিত্ততায নচ্চগীতাদীসু অনভিরতো মুহুত্তং নিদ্দং ওক্কমি.

তা তং দিস্ৰা ‘‘যস্সত্থায নচ্চাদীনি মযং পযোজেম, সো নিদ্দং উপগতো, ইদানি কিমত্থং কিলমামা’’তি গহিতানি তুরিযানি অজ্ঝোত্থরিত্ৰা নিপজ্জিংসু, গন্ধতেলপ্পদীপা চ ঝাযন্তি. বোধিসত্তো পবুজ্ঝিত্ৰা সযনপিট্ঠে পল্লঙ্কেন নিসিন্নো অদ্দস তা ইত্থিযো তুরিযভণ্ডানি অৰত্থরিত্ৰা নিদ্দাযন্তিযো পগ্ঘরিতলালা কিলিন্নকপোলগত্তা, একচ্চা দন্তে খাদন্তিযো, একচ্চা কাকচ্ছন্তিযো, একচ্চা ৰিপ্পলপন্তিযো, একচ্চা ৰিৰটমুখা, একচ্চা অপগতৰসনরসনা, পাকটবীভচ্ছসম্বাধট্ঠানা, একচ্চা ৰিমুত্তাকুলসিরোরুহা সুসানরূপরূপং ধারযমানা সযিংসু. মহাসত্তো তাসং তং ৰিপ্পকারং দিস্ৰা ভিয্যোসোমত্তায কামেসু ৰিরত্তচিত্তো অহোসি. তস্স পন অলঙ্কতপটিযত্তং দসসতনযনভৰনসদিসং রুচিরসোভম্পি পাসাদৰরতলং অপৰিদ্ধমতসরীরকুণপভরিতং আমকসুসানমিৰ পরমপটিক্কূলং উপট্ঠাসি. তযোপি ভৰা আদিত্তভৰনসদিসা হুত্ৰা উপট্ঠহিংসু. ‘‘উপদ্দুতং ৰত, ভো, উপস্সট্ঠং ৰত ভো’’তি চ ৰাচং পৰত্তেসি. অতিৰিয পব্বজ্জায চিত্তং নমি.

সো ‘‘অজ্জেৰ মযা মহাভিনিক্খমনং নিক্খমিতুং ৰট্টতী’’তি সিরিসযনতো উট্ঠায দ্ৰারসমীপং গন্ত্ৰা – ‘‘কো এত্থা’’তি আহ. উম্মারে সীসং কত্ৰা নিপন্নো ছন্নো আহ – ‘‘অহং, অয্যপুত্ত, ছন্নো’’তি. অথ মহাপুরিসো – ‘‘অহং অজ্জ মহাভিনিক্খমনং নিক্খমিতুকামো, ন কঞ্চি পটিৰেদিত্ৰা সীঘমেকং অতিজযং সিন্ধৰং কপ্পেহী’’তি. সো ‘‘সাধু, দেৰা’’তি অস্সভণ্ডকং গহেত্ৰা অস্সসালং গন্ত্ৰা গন্ধতেলপ্পদীপেসু জলন্তেসু সুমনপট্টৰিতানস্স হেট্ঠা পরমরমণীযে ভূমিভাগে ঠিতং অরিমন্থকং কণ্ডকং তুরঙ্গৰরং দিস্ৰা – ‘‘অজ্জ মযা অয্যপুত্তস্স নিক্খমনত্থায ইমমেৰ মঙ্গলহযং কপ্পেতুং ৰট্টতী’’তি কণ্ডকং কপ্পেসি. সো কপ্পিযমানোৰ অঞ্ঞাসি – ‘‘অযং কপ্পনা অতিগাল়্হা, অঞ্ঞেসু দিৰসেসু উয্যানকীল়ং গমনকালে কপ্পনা ৰিয ন হোতি. নিস্সংসযং অজ্জেৰ অয্যপুত্তো মহাভিনিক্খমনং নিক্খমিস্সতী’’তি. ততো তুট্ঠমানসো মহাহসিতং হসি. সো নাদো তং সকলকপিলৰত্থুপুরং উন্নাদং করেয্য, দেৰতা পন সন্নিরুম্ভিত্ৰা ন কস্সচি সোতুং অদংসু.

বোধিসত্তো ‘‘পুত্তং তাৰ পস্সিস্সামী’’তি চিন্তেত্ৰা ঠিতট্ঠানতো উট্ঠায রাহুলমাতুযা ৰসনট্ঠানং গন্ত্ৰা গব্ভদ্ৰারং ৰিৰরি. তস্মিং খণে অন্তোগব্ভে গন্ধতেলপ্পদীপো ঝাযতি. রাহুলমাতা সুমনমল্লিকাদীনং অম্বণমত্তেন অত্তিপ্পকিণ্ণে ৰরসযনে পুত্তস্স মত্থকে হত্থং ঠপেত্ৰা নিদ্দাযতি. বোধিসত্তো উম্মারে পাদং ঠপেত্ৰা ঠিতকোৰ ওলোকেত্ৰা – ‘‘সচাহং দেৰিযা হত্থং অপনেত্ৰা মম পুত্তং গণ্হিস্সামি, দেৰী পবুজ্ঝিস্সতি, এৰং মে অভিনিক্খমনস্স অন্তরাযো ভৰিস্সতি. বুদ্ধো হুত্ৰাৰ আগন্ত্ৰা পুত্তং পস্সিস্সামী’’তি চিন্তেত্ৰা পাসাদতলতো ওতরিত্ৰা অস্সস্স সমীপং গন্ত্ৰা এৰমাহ – ‘‘তাত কণ্ডক, ত্ৰং অজ্জ একরত্তিং মং তারয, অহং তং নিস্সায বুদ্ধো হুত্ৰা সদেৰকং লোকং তারেস্সামী’’তি. ততো উল্লঙ্ঘিত্ৰা কণ্ডকস্স পিট্ঠিং অভিরুহি. কণ্ডকো গীৰতো পট্ঠায আযামতো অট্ঠারসহত্থো হোতি তদনুরূপেন উব্বেধেন সমন্নাগতো রূপগ্গজৰবলসম্পন্নো সব্বসেতো ধোতসঙ্খসদিসদস্সনীযৰণ্ণো. ততো বোধিসত্তো ৰরতুরঙ্গপিট্ঠিগতো ছন্নং অস্সস্স ৰালধিং গাহাপেত্ৰা অড্ঢরত্তসমযে নগরস্স মহাদ্ৰারং সম্পত্তো.

তদা পন রাজা পুব্বেৰ বোধিসত্তস্স গমনপটিসেধনত্থায দ্ৰীসু দ্ৰারকৰাটেসু একেকং পুরিসসহস্সেন ৰিৰরিতব্বং কারেত্ৰা তত্থ বহুপুরিসে আরক্খং ঠপেসি. বোধিসত্তো কির পুরিসগণনায কোটিসতসহস্সস্স বলং ধারেসি, হত্থিগণনায কোটিসহস্সস্স. তস্মা সো চিন্তেসি – ‘‘যদি দ্ৰারং ন ৰিৰরীযতি, অজ্জ কণ্ডকস্স পিট্ঠে নিসিন্নো ছন্নং ৰালধিং গাহাপেত্ৰা তেন সদ্ধিংযেৰ কণ্ডকং ঊরূহি নিপ্পীল়েত্ৰা অট্ঠারসহত্থং পাকারং উপ্পতিত্ৰা অতিক্কমেয্য’’ন্তি. ছন্নো চিন্তেসি – ‘‘সচে দ্ৰারং ন উগ্ঘাপযতি, অহং অয্যপুত্তং খন্ধে কত্ৰা কণ্ডকং দক্খিণহত্থেন পরিক্খিপন্তো উপকচ্ছকে কত্ৰা উপ্পতিত্ৰা পাকারং অতিক্কমিস্সামী’’তি. কণ্ডকো চিন্তেসি – ‘‘অহং দ্ৰারে অৰিৰরিযমানে যথানিসিন্নমেৰ অয্যপুত্তং গহিতৰালধিনা ছন্নেন সদ্ধিং উপ্পতিত্ৰা পাকারস্স পুরতো পতিট্ঠহিস্সামী’’তি. এৰমেৰ তযো পুরিসা চিন্তযিংসু. দ্ৰারে অধিৰত্থা দেৰতা মহাদ্ৰারং ৰিৰরিংসু.

তস্মিং খণে মারো পাপিমা ‘‘মহাসত্তং নিৰত্তেস্সামী’’তি আগন্ত্ৰা গগনতলে ঠত্ৰা আহ –

‘‘মা নিক্খম মহাৰীর, ইতো তে সত্তমে দিনে;

দিব্বং তু চক্করতনং, অদ্ধা পাতু ভৰিস্সতি. –

দ্ৰিসহস্সপরিত্তদীপপরিৰারানং চতুন্নং মহাদীপানং রজ্জং কারেস্সসি, নিৰত্ত, মারিসা’’তি. মহাপুরিসো আহ ‘‘কোসি ত্ৰ’’ন্তি. অহং ৰসৰত্তীতি.

‘‘জানামহং মহারাজ, ময্হং চক্কস্স সম্ভৰং;

অনত্থিকোহং রজ্জেন, গচ্ছ ত্ৰং মার মা ইধ.

‘‘সকলং দসসহস্সম্পি, লোকধাতুমহং পন;

উন্নাদেত্ৰা ভৰিস্সামি, বুদ্ধো লোকে ৰিনাযকো’’তি. –

আহ. সো তত্থেৰন্তরধাযি.

মহাসত্তো একূনত্তিংসৰস্সকালে হত্থগতং চক্কৰত্তিরজ্জং খেল়পিণ্ডং ৰিয অনপেক্খো ছড্ডেত্ৰা চক্কৰত্তিসিরিনিৰাসভূতা রাজভৰনা নিক্খমিত্ৰা আসাল়্হিপুণ্ণমায উত্তরাসাল়্হনক্খত্তে ৰত্তমানে নগরতো নিক্খমিত্ৰা নগরং অপলোকেতুকামো অহোসি. ৰিতক্কসমনন্তরমেৰ চস্স কুলালচক্কং ৰিয সো ভূমিপ্পদেসো পরিৰত্তি. যথাঠিতোৰ মহাসত্তো কপিলৰত্থুপুরং দিস্ৰা তস্সিং ভূমিপ্পদেসে কণ্ডকনিৰত্তনং নাম চেতিযট্ঠানং দস্সেত্ৰা গন্তব্বমগাভিমুখংযেৰ কণ্ডকং কত্ৰা পাযাসি মহতা সক্কারেন উল়ারেন সিরিসমুদযেন. তদা মহাসত্তে গচ্ছন্তে তস্স পুরতো দেৰতা সট্ঠি উক্কাসতসহস্সানি ধারযিংসু, তথা পচ্ছতো সট্ঠি দক্খিণতো সট্ঠি উক্কাসতসহস্সানি, তথা ৰামপস্সতো. অপরা দেৰতা সুরভিকুসুমমালাদামচন্দনচুণ্ণচামরধজপটাকাহি সক্করোন্তিযো পরিৰারেত্ৰা অগমংসু. দিব্বানি সঙ্গীতানি অনেকানি চ তুরিযানি ৰজ্জিংসু.

ইমিনা সিরিসমুদযেন গচ্ছন্তো বোধিসত্তো একরত্তেনেৰ তীণি রজ্জানি অতিক্কম্ম তিংসযোজনিকং মগ্গং গন্ত্ৰা অনোমানদীতীরং সম্পাপুণি. অথ বোধিসত্তো নদীতীরে ঠত্ৰা ছন্নং পুচ্ছি – ‘‘কা নামাযং নদী’’তি? ‘‘অনোমা নাম, দেৰা’’তি. ‘‘অম্হাকম্পি পব্বজ্জা অনোমা ভৰিস্সতী’’তি পণ্হিযা অস্সং ঘট্টেন্তো অস্সস্স সঞ্ঞং অদাসি. অস্সো উল্লঙ্ঘিত্ৰা অট্ঠউসভৰিত্থারায নদিযা পারিমতীরে অট্ঠাসি. বোধিসত্তো অস্সপিট্ঠিতো ওরুয্হ মুত্তরাসিসদিসে ৰালুকাপুলিনে ঠত্ৰা ছন্নং আমন্তেসি – ‘‘সম্ম ছন্ন, ত্ৰং ময্হং আভরণানি চেৰ কণ্ডকঞ্চ আদায গচ্ছ, অহং পব্বজিস্সামী’’তি. ছন্নো, ‘‘অহম্পি, দেৰ, পব্বজিস্সামী’’তি. বোধিসত্তো আহ – ‘‘ন লব্ভা তযা পব্বজিতুং, গচ্ছেৰ ত্ৰ’’ন্তি তিক্খত্তুং নিৰারেত্ৰা আভরণানি চেৰ কণ্ডকঞ্চ পটিচ্ছাপেত্ৰা চিন্তেসি – ‘‘ইমে ময্হং কেসা সমণসারুপ্পা ন হোন্তি, তে খগ্গেন ছিন্দিস্সামী’’তি দক্খিণেন হত্থেন পরমনিসিতমসিৰরং গহেত্ৰা ৰামহত্থেন মোল়িযা সদ্ধিং চূল়ং গহেত্ৰা ছিন্দি, কেসা দ্ৰঙ্গুলমত্তা হুত্ৰা দক্খিণতো আৰট্টমানা সীসে অল্লীযিংসু. তেসং পন কেসানং যাৰজীৰং তদেৰ পমাণং অহোসি, মস্সু চ তদনুরূপং, পুন কেসমস্সুওহারণকিচ্চম্পিস্স নাহোসি. বোধিসত্তো সহ মোল়িযা চূল়ং গহেত্ৰা – ‘‘সচাহং বুদ্ধো ভৰিস্সামি, আকাসে তিট্ঠতু, নো চে, ভূমিযং পততূ’’তি আকাসে খিপি. তং চূল়ামণিবন্ধনং যোজনপ্পমাণং ঠানং গন্ত্ৰা আকাসে অট্ঠাসি.

অথ সক্কো দেৰরাজা দিব্বেন চক্খুনা ওলোকেন্তো যোজনিকেন রতনচঙ্কোটকেন তং পটিগ্গহেত্ৰা তাৰতিংসভৰনে তিযোজনং সত্তরতনমযং চূল়ামণিচেতিযং নাম পতিট্ঠাপেসি. যথাহ –

‘‘ছেত্ৰান মোল়িং ৰরগন্ধৰাসিতং, ৰেহাযসং উক্খিপি অগ্গপুগ্গলো;

সহস্সনেত্তো সিরসা পটিগ্গহি, সুৰণ্ণচঙ্কোটৰরেন ৰাসৰো’’তি. (ম. নি. অট্ঠ. ১.২২২; সং. নি. অট্ঠ. ২.২.১২; অপ. অট্ঠ. ১.অৰিদূরেনিদানকথা; জা. অট্ঠ. ১.অৰিদূরেনিদানকথা);

পুন বোধিসত্তো চিন্তেসি – ‘‘ইমানি কাসিকৰত্থানি মহগ্ঘানি, ন ময্হং সমণসারুপ্পানী’’তি. অথস্স কস্সপবুদ্ধকালে পুরাণসহাযকো ঘটিকারমহাব্রহ্মা একং বুদ্ধন্তরং ৰিনাসভাৰাপ্পত্তেন মিত্তভাৰেন চিন্তেসি – ‘‘অজ্জ মে সহাযকো মহাভিনিক্খমনং নিক্খন্তো, সমণপরিক্খারমস্স গহেত্ৰা গচ্ছিস্সামী’’তি.

‘‘তিচীৰরঞ্চ পত্তো চ, ৰাসি সূচি চ বন্ধনং;

পরিস্সাৰনঞ্চ অট্ঠেতে, যুত্তযোগস্স ভিক্খুনো’’তি. (দী. নি. অট্ঠ. ১.২১৫; ম. নি. অট্ঠ. ১.২৯৪; ২.৩৪৯; অ. নি. অট্ঠ. ২.৪.১৯৮; পারা. অট্ঠ. ১.৪৫ পদভাজনীযৰণ্ণনা; অপ. অট্ঠ. ১.অৰিদূরেনিদানকথা; জা. অট্ঠ. ১.অৰিদূরেনিদানকথা; মহানি. অট্ঠ. ২০৬) –

ইমে অট্ঠ সমণপরিক্খারে আহরিত্ৰা অদাসি. মহাপুরিসো অরহদ্ধজং নিৰাসেত্ৰা উত্তমং পব্বজ্জাৰেসং গহেত্ৰা সাটকযুগলং আকাসে খিপি. তং মহাব্রহ্মা পটিগ্গহেত্ৰা ব্রহ্মলোকে দ্ৰাদসযোজনিকং সব্বরতনমযং চেতিযং কত্ৰা তং অন্তো পক্খিপিত্ৰা ঠপেসি. অথ নং মহাসত্তো – ‘‘ছন্ন, মম ৰচনেন মাতাপিতূনং আরোগ্যং ৰদেহী’’তি ৰত্ৰা উয্যোজেসি. ততো ছন্নো মহাপুরিসং ৰন্দিত্ৰা পদক্খিণং কত্ৰা পক্কামি. কণ্ডকো পন ছন্নেন সদ্ধিং মন্তযমানস্স বোধিসত্তস্স ৰচনং সুণন্তো ঠত্ৰা – ‘‘নত্থি দানি ময্হং পুন সামিনো দস্সন’’ন্তি চক্খুপথমস্স ৰিজহন্তো ৰিযোগদুক্খমধিৰাসেতুং অসক্কোন্তো হদযেন ফলিতেন কালং কত্ৰা সুররিপুদুরভিভৰনে তাৰতিংসভৰনে কণ্ডকো নাম দেৰপুত্তো হুত্ৰা নিব্বত্তি. তস্স উপ্পত্তি ৰিমলত্থৰিলাসিনিযা ৰিমানৰত্থুট্ঠকথায গহেতব্বা. ছন্নস্স পঠমং একোৰ সোকো অহোসি. সো কণ্ডকস্স কালকিরিযায দুতিযেন সোকেন পীল়িযমানো রোদন্তো পরিদেৰন্তো দুক্খেন অগমাসি.

বোধিসত্তোপি পব্বজিত্ৰা তস্মিংযেৰ পদেসে অনুপিযং নাম অম্বৰনং অত্থি, তত্থেৰ সত্তাহং পব্বজ্জাসুখেন ৰীতিনামেত্ৰা ততো পচ্ছা সঞ্ঝাপ্পভানুরঞ্জিতসলিলধরসংৰুতো সরদসমযে পরিপুণ্ণরজনিকরো ৰিয কাসাৰৰরসংৰুতো এককোপি অনেকজনপরিৰুতো ৰিয ৰিরোচমানো তং ৰনৰাসিমিগপক্খীনং নযনামতপানমিৰ করোন্তো একচরো সীহো ৰিয নরসীহো মত্তমাতঙ্গৰিলাসগামী সমস্সাসেন্তো ৰিয ৰসুন্ধরং পাদতলেহি একদিৰসেনেৰ তিংসযোজনিকং মগ্গং গন্ত্ৰা উত্তুঙ্গতরঙ্গভঙ্গং অসঙ্গং গঙ্গং নদিং উত্তরিত্ৰা রতনজুতিৰিসরৰিরাজিতৰররুচিররাজগহং রাজগহং নাম নগরং পাৰিসি. পৰিসিত্ৰা চ পন সপদানং পিণ্ডায চরি. সকলং পন তং নগরং বোধিসত্তস্স রূপদস্সনেন ধনপালকে পৰিট্ঠে তং নগরং ৰিয অসুরিন্দে পৰিট্ঠে দেৰনগরং ৰিয সঙ্খোভমগমাসি. পিণ্ডায চরন্তে মহাপুরিসে নগরৰাসিনো মনুস্সা মহাসত্তস্স রূপদস্সনেন সঞ্জাতপীতিসোমনস্সা জাতৰিম্হিতা বোধিসত্তস্স রূপদস্সনাৰজ্জিতহদযা অহেসুং.

তেসং মনুস্সানং অঞ্ঞতরো অঞ্ঞতরমেৰমাহ – ‘‘কিন্নু যং, ভো, রাহুভযেন নিগূল়্হকিরণজালো পুণ্ণচন্দো মনুস্সলোকমাগতো’’তি. তমঞ্ঞো সিতং কত্ৰা এৰমাহ – ‘‘কিং কথেসি, সম্ম, কদা নাম তযা পুণ্ণচন্দো মনুস্সলোকমাগতো দিট্ঠপুব্বো, ননু এস কুসুমকেতুকামদেৰো ৰেসন্তরমাদায অম্হাকং মহারাজস্স নাগরানঞ্চ পরমলীল়াৰিভূতিং দিস্ৰা কীল়িতুমাগতো’’তি. তমঞ্ঞো সিতং কত্ৰা এৰমাহ – ‘‘কিং, ভো, ত্ৰং উম্মত্তোসি, ননু কামো ইস্সরকোধহুতাসনপরিদড্ঢসরীরো সুরপতিদসসতনযনো এসো অমরপুরসঞ্ঞায ইধাগতো’’তি! তমঞ্ঞো ঈসকং হসিত্ৰা – ‘‘কিং ৰদেসি, ভো, তে পুব্বাপরৰিরোধং, কুতো পনস্স দসসতনযনানি, কুতো ৰজিরং, কুতো এরাৰণো. অদ্ধা ব্রহ্মা এস ব্রাহ্মণজনং পমত্তং ঞত্ৰা ৰেদৰেদঙ্গাদীসু নিযোজনত্থায আগতো’’তি. তে সব্বেপি অপসাদেত্ৰা অঞ্ঞো পণ্ডিতজাতিকো এৰমাহ – ‘‘নেৰাযং পুণ্ণচন্দো, ন চ কামদেৰো, নাপি দসসতনযনো, ন চাপি ব্রহ্মা, সব্বলোকনাযকো সত্থা এস অচ্ছরিযমনুস্সো’’তি.

এৰং সল্লপন্তেসু এৰ নাগরেসু রাজপুরিসা গন্ত্ৰা তং পৰত্তিং রঞ্ঞো বিম্বিসারস্স আরোচেসুং – ‘‘দেৰ, দেৰো ৰা গন্ধব্বো ৰা উদাহু নাগরাজা ৰা যক্খো ৰা কো নু ৰা অম্হাকং নগরে পিণ্ডায চরতী’’তি. রাজা তং সুত্ৰা উপরিপাসাদতলে ঠত্ৰা মহাপুরিসং দিস্ৰা অচ্ছরিযব্ভুতচিত্তজাতো রাজপুরিসে আণাপেসি – ‘‘গচ্ছথ, ভণে, তং ৰীমংসথ, সচে অমনুস্সো ভৰিস্সতি, নগরা নিক্খমিত্ৰা অন্তরধাযিস্সতি, সচে দেৰতা ভৰিস্সতি, আকাসেন গমিস্সতি, সচে নাগরাজা ভৰিস্সতি, পথৰিযং নিমুজ্জিত্ৰা গমিস্সতি, সচে মনুস্সো ভৰিস্সতি, যথালদ্ধং ভিক্খং পরিভুঞ্জিস্সতী’’তি.

মহাপুরিসোপি সন্তিন্দ্রিযো সন্তমানসো রূপসোভায মহাজনস্স নযনানি আকড্ঢেন্তো ৰিয যুগমত্তং পেক্খমানো মিস্সকভত্তং যাপনমত্তং সংহরিত্ৰা পৰিট্ঠদ্ৰারেনেৰ নগরা নিক্খমিত্ৰা পণ্ডৰপব্বতচ্ছাযায পুরত্থাভিমুখো নিসীদিত্ৰা আহারং পচ্চৰেক্খিত্ৰা নিব্বিকারো পরিভুঞ্জি. ততো রাজপুরিসা গন্ত্ৰা তং পৰত্তিং রঞ্ঞো আরোচেসুং. ততো দূতৰচনং সুত্ৰা মগধাধিপতি রাজা বালজনেহি দুরনুসারো মেরুমন্দারসারো সত্তসারো বিম্বিসারো বোধিসত্তস্স গুণস্সৰনেনেৰ সঞ্জাতদস্সনকুতূহলো ৰেগেন নগরতো নিক্খমিত্ৰা পণ্ডৰপব্বতাভিমুখো গন্ত্ৰা যানা ওরুয্হ বোধিসত্তস্স সন্তিকং গন্ত্ৰা তেন কতানুঞ্ঞো বন্ধুজনসিনেহসীতলে সিলাতলে নিসীদিত্ৰা বোধিসত্তস্স ইরিযাপথে পসীদিত্ৰা কতপটিসন্থারো নামগোত্তাদীনি পুচ্ছিত্ৰা বোধিসত্তস্স সব্বং ইস্সরিযং নিয্যাতেসি. বোধিসত্তো – ‘‘ময্হং, মহারাজ, ৰত্থুকামেহি ৰা কিলেসকামেহি ৰা অত্থো নত্থি. অহঞ্হি পরমাভিসম্বোধিং পত্থযন্তো নিক্খন্তো’’তি আহ. রাজা অনেকপ্পকারেন যাচন্তোপি তস্স চিত্তং অলভিত্ৰা – ‘‘অদ্ধা বুদ্ধো ভৰিস্সতি, বুদ্ধভূতেন পন তযা পঠমং মম ৰিজিতং আগন্তব্ব’’ন্তি ৰত্ৰা নগরং পৰিট্ঠো.

‘‘অথ রাজগহং ৰররাজগহং, নররাজৰরে নগরং তু গতে;

গিরিরাজৰরো মুনিরাজৰরো, মিগরাজগতো সুগতোপি গতো’’.

অথ বোধিসত্তো অনুপুব্বেন চারিকং চরমানো আল়ারঞ্চ কালামং উদকঞ্চ রামপুত্তং উপসঙ্কমিত্ৰা অট্ঠ সমাপত্তিযো নিব্বত্তেত্ৰা – ‘‘নাযং মগ্গো বোধিযা’’তি তং সমাপত্তিভাৰনং অনলঙ্করিত্ৰা মহাপধানং পদহিতুকামো উরুৰেলং গন্ত্ৰা – ‘‘রমণীযো ৰতাযং ভূমিভাগো’’তি তত্থেৰ ৰাসং উপগন্ত্ৰা মহাপধানং পদহি. লক্খণপরিগ্গাহকব্রাহ্মণানং চত্তারো পুত্তা কোণ্ডঞ্ঞো ব্রাহ্মণো চাতি ইমে পঞ্চ জনা পঠমংযেৰ পব্বজিতা গামনিগমরাজধানীসু ভিক্খাচরিযং চরন্তা তত্থ বোধিসত্তং সম্পাপুণিংসু. অথ নং ছব্বস্সানি মহাপধানং পদহন্তং – ‘‘ইদানি বুদ্ধো ভৰিস্সতি, ইদানি বুদ্ধো ভৰিস্সতী’’তি পরিৰেণসম্মজ্জনাদিকায ৰত্তপটিপত্তিযা উপট্ঠহমানা সন্তিকাৰচরাৰস্স অহেসুং. বোধিসত্তোপি – ‘‘কোটিপ্পত্তং দুক্করং করিস্সামী’’তি একতিলতণ্ডুলাদীহি ৰীতিনামেসি. সব্বসোপি আহারুপচ্ছেদং অকাসি. দেৰতাপি লোমকূপেহি দিব্বোজং উপহারযমানা পক্খিপিংসু.

অথস্স তায নিরাহারতায পরমকিসভাৰপ্পত্তকাযস্স সুৰণ্ণৰণ্ণো কাযো কাল়ৰণ্ণো অহোসি, দ্ৰত্তিংসমহাপুরিসলক্খণানি পটিচ্ছন্নানি অহেসুং. অথ বোধিসত্তো দুক্করকারিকায অন্তং গন্ত্ৰা – ‘‘নাযং মগ্গো বোধিযা’’তি ওল়ারিকং আহারং আহারেতুং গামনিগমেসু পিণ্ডায চরিত্ৰা আহারং আহরি. অথস্স দ্ৰত্তিংসমহাপুরিসলক্খণানি পাকতিকানি অহেসুং, কাযো সুৰণ্ণৰণ্ণো অহোসি. অথ পঞ্চৰগ্গিযা ভিক্খূ তং দিস্ৰা – ‘‘অযং ছব্বস্সানি দুক্করকারিকং করোন্তোপি সব্বঞ্ঞুতং পটিৰিজ্ঝিতুং নাসক্খি, ইদানি গামনিগমরাজধানীসু পিণ্ডায চরিত্ৰা ওল়ারিকং আহারং আহরিযমানো কিং সক্খিস্সতি, বাহুল্লিকো এস পধানৰিব্ভন্তো, কিং নো ইমিনা’’তি মহাপুরিসং পহায বারাণসিযং ইসিপতনং অগমংসু.

অথ মহাপুরিসো ৰিসাখপুণ্ণমায উরুৰেলাযং সেনানিগমে সেনাকুটুম্বিকস্স গেহে নিব্বত্তা সুজাতা নাম দারিকা অহোসি. তায সম্পসাদনজাতায দিন্নং পক্খিত্তদিব্বোজং মধুপাযাসং পরিভুঞ্জিত্ৰা সুৰণ্ণপাতিং গহেত্ৰা নেরঞ্জরায পটিসোতং খিপিত্ৰা কাল়নাগরাজং সুপন্তং বোধেসি. অথ বোধিসত্তো নেরঞ্জরাতীরে সুরভিকুসুমসমলঙ্কতে নীলোভাসে মনোরমে সালৰনে দিৰাৰিহারং কত্ৰা সাযন্হসমযে দেৰতাহি অলঙ্কতেন মগ্গেন বোধিরুক্খাভিমুখো পাযাসি. দেৰনাগযক্খসিদ্ধাদযো দিব্বেহি মালাগন্ধৰিলেপনেহি পূজযিংসু. তস্মিং সমযে সোত্থিযো নাম তিণহারকো তিণং আদায পটিপথে আগচ্ছন্তো মহাপুরিসস্স আকারং ঞত্ৰা অট্ঠ তিণমুট্ঠিযো অদাসি. বোধিসত্তো তিণং গহেত্ৰা অসিতঞ্জনগিরিসঙ্কাসং আচরন্তমিৰ দিনকরজালং সকহদযমিৰ করুণাসীতলং সীতচ্ছাযং ৰিৰিধৰিহগগণসম্পাতৰিরহিতং মন্দমারুতেরিতায ঘনসাখায সমলঙ্কতং নচ্চন্তমিৰ পীতিযা রঞ্জমানমিৰ চ তরুগণানং ৰিরোচমানৰিজযতরুমস্সত্থবোধিরুক্খমূলমুপগন্ত্ৰা অস্সত্থদুমরাজং তিক্খত্তুং পদক্খিণং কত্ৰা পুব্বুত্তরদিসাভাগে ঠিতো তানি তিণানি অগ্গে গহেত্ৰা চালেসি. তাৰদেৰ চুদ্দসহত্থো পল্লঙ্কো অহোসি. তানি চ তিণানি চিত্তকারেন লেখাগহিতানি ৰিয অহেসুং. বোধিসত্তো তত্থ চুদ্দসহত্থে তিণসন্থরে তিসন্ধিপল্লঙ্কং আভুজিত্ৰা চতুরঙ্গসমন্নাগতৰীরিযং অধিট্ঠহিত্ৰা সুৰণ্ণপীঠে ঠপিতরজতক্খন্ধং ৰিয চ পঞ্ঞাসহত্থং বোধিক্খন্ধং পিট্ঠিতো কত্ৰা উপরি মণিছত্তেন ৰিয বোধিসাখাহি ধারিযমানো নিসীদি. সুৰণ্ণৰণ্ণে পনস্স চীৰরে বোধিঅঙ্কুরা পতমানা সুৰণ্ণপট্টে পৰাল়া ৰিয নিক্খিত্তা ৰিরোচযিংসু.

বোধিসত্তে পন তত্থ নিসিন্নেযেৰ ৰসৰত্তিমারো দেৰপুত্তো – ‘‘সিদ্ধত্থকুমারো মম ৰিসযমতিক্কমিতুকামো, ন দানাহমতিক্কমিতুমস্স দস্সামী’’তি মারবলস্স তমত্থং আরোচেত্ৰা মারবলমাদায নিক্খমি. সা কির মারসেনা মারস্স পুরতো দ্ৰাদসযোজনা অহোসি, তথা দক্খিণতো চ ৰামপস্সতো চ, পচ্ছতো পন চক্কৰাল়পরিযন্তং কত্ৰা ঠিতা, উদ্ধং নৰযোজনুব্বেধা অহোসি. যস্সা পন উন্নদন্তিযা সদ্দো নৰযোজনসহস্সতো পট্ঠায পথৰিউন্দ্রিযনসদ্দো ৰিয সুয্যতি. তস্মিং সমযে সক্কো দেৰরাজা ৰিজযুত্তরং নাম সঙ্খং ধমমানো অট্ঠাসি. সো কির সঙ্খো ৰীসহত্থসতিকো অহোসি. পঞ্চসিখো গন্ধব্বদেৰপুত্তো তিগাৰুতাযতং বেল়ুৰপণ্ডুৰীণং আদায ৰাদযমানো মঙ্গলযুত্তানি গীতানি গাযমানো অট্ঠাসি. সুযামো দেৰরাজা তিগাৰুতাযতং সরদসমযরজনিকরসস্সিরিকং দিব্বচামরং গহেত্ৰা মন্দং মন্দং বীজযমানো অট্ঠাসি. ব্রহ্মা চ সহম্পতি তিযোজনৰিত্থতং দুতিযমিৰ পুণ্ণচন্দং সেতচ্ছত্তং ভগৰতো উদ্ধং ধারেত্ৰা অট্ঠাসি. মহাকাল়োপি নাগরাজা অসীতিযা নাগনাটকসহস্সেহি পরিৰুতো থুতিসঙ্গীতানি পৰত্তেন্তো মহাসত্তং নমস্সমানো অট্ঠাসি. দসসু চক্কৰাল়সহস্সেসু দেৰতাযো নানাৰিধেহি সুরভিকুসুমদামধূপচুণ্ণাদীহি পূজযমানা সাধুকারং পৰত্তযমানা অট্ঠংসু.

অথ মারো দেৰপুত্তো দিযড্ঢযোজনসতিকং হিমগিরিসিখরসদিসং পরমরুচিরদস্সনং গিরিমেখলং নাম রতনখচিতৰরৰারণং অরিৰারণৰারণং অভিরুহিত্ৰা বাহুসহস্সং মাপেত্ৰা অগ্গহিতগ্গহণেন নানাৰুধানি অগ্গহাপেসি. মারপরিসাপি অসিফরসুসরসত্তিসবলা সমুস্সিতধনুমুসল-ফাল-সঙ্কু-কুন্ত-তোমর-উপল-লগুল়-ৰলয-কণয-কপ্পণ-চক্ককটকধারারুরু- সীহ-খগ্গ-সরভ-ৰরাহ-ব্যগ্ঘ-ৰানরোরগ-মজ্জারোলূকৰদনা মহিংস-পসদ-তুরঙ্গ-দিরদাদিৰদনা চ নানাভীমৰিরূপবীভচ্ছকাযা মনুস্সযক্খপিসাচসদিসকাযা চ মহাসত্তং বোধিসত্তং বোধিমূলে নিসিন্নং অজ্ঝোত্থরমানা গন্ত্ৰা পরিৰারযিত্ৰা মারস্স সন্দেসং সমুদিক্খমানা অট্ঠাসি.

ততো মারবলে বোধিমণ্ডমুপসঙ্কমন্তেযেৰ তেসং সক্কাদীনং একোপি ঠাতুং নাসক্খি. সম্মুখসম্মুখট্ঠানেনেৰ পলাযিংসু. সক্কো পন দেৰরাজা তং ৰিজযুত্তরসঙ্খং পিট্ঠিযং কত্ৰা পলাযিত্ৰা চক্কৰাল়মুখৰট্টিযং অট্ঠাসি. মহাব্রহ্মা সেতচ্ছত্তং চক্কৰাল়কোটিযং ঠপেত্ৰা ব্রহ্মলোকমেৰ অগমাসি. কাল়ো নাগরাজা সব্বনাটকানি ছড্ডেত্ৰা পথৰিযং নিমুজ্জিত্ৰা পঞ্চযোজনসতিকং মঞ্জেরিকনাগভৰনং গন্ত্ৰা হত্থেন মুখং পিদহিত্ৰা নিপজ্জি. একদেৰতাপি তত্থ ঠাতুং সমত্থা নাম নাহোসি. মহাপুরিসো পন সুঞ্ঞৰিমানে মহাব্রহ্মা ৰিয এককোৰ নিসীদি. ‘‘ইদানি মারো আগমিস্সতী’’তি পঠমমেৰ অনেকরূপানি অনিট্ঠানি দুন্নিমিত্তানি পাতুরহেসুং.

‘‘পমত্তবন্ধুস্স চ যুদ্ধকালে, তিলোকবন্ধুস্স চ ৰত্তমানে;

উক্কা সমন্তা নিপতিংসু ঘোরা, ধূমন্ধকারা চ দিসা অহেসুং.

‘‘অচেতনাযম্পি সচেতনা যথা, গতা ৰিযোগং পতিনেৰ কামিনী;

লতেৰ ৰাতাভিহতা সসাগরা, পকম্পি নানাসধরা ধরা মহী.

‘‘অহেসুমুদ্ধূতজলা সমুদ্দা, ৰহিংসু নজ্জো পটিলোমমেৰ;

কূটানি নানাতরুসঙ্ঘটানি, ভেত্ৰা গিরীনং পথৰিং ভজিংসু.

‘‘পৰাযি ৰাতো ফরুসো সমন্তা, নিঘট্টসদ্দো তুমুলো অহোসি;

ভজিত্থ ঘোরং রৰিরন্ধকারং, কবন্ধরূপং গগনে চরিত্থ.

‘‘এৰংপকারং অসিৰং অনিট্ঠং, আকাসগং ভূমিগতঞ্চ ঘোরং;

অনেকরূপং কির দুন্নিমিত্তং, অহোসি মারাগমনে সমন্তা.

‘‘তং দেৰদেৰং অভিহন্তুকামং, কামং তু দিস্ৰা পন দেৰসঙ্ঘা;

হাহাতি সদ্দং অনুকম্পমানা, অকংসু সদ্ধিং অমরঙ্গনাহি.

‘‘পচ্ছাপি পস্সিংসু সুদন্তরূপং, দিসাৰিদিসাসু পলাযমানং;

সঅন্তকং তং সবলং অনেকং, হত্থে চ থরূ চ পাতা তযিংসু.

‘‘ৰিহঙ্গমানং গরুল়োৰ মজ্ঝে, মজ্ঝে মিগানং পরমোৰ সীহো;

মহাযসো মারবলস্স মজ্ঝে, ৰিসারদো ৰীতভযো নিসীদি’’.

অথ মারো – ‘‘সিদ্ধত্থং ভিংসাপেত্ৰা পলাপেস্সামী’’তি ৰাতৰস্সং পহরণৰস্সং পাসাণৰস্সং পুন অঙ্গারকুক্কুল়ৰালুককললন্ধকারৰুট্ঠীহি নৰহি মারইদ্ধীহি বোধিসত্তং পলাপেতুং অসক্কোন্তো কুদ্ধমানসো – ‘‘কিং, ভণে, তিট্ঠথ, ইমং সিদ্ধত্থমসিদ্ধত্থং করোথ, গণ্হথ হনথ ছিন্দথ বন্ধথ ন মুঞ্চথ পলাপেথা’’তি মারপরিসং আণাপেত্ৰা সযঞ্চ গিরিমেখলস্স খন্ধে নিসীদিত্ৰা একেন করেন সরং ভমযন্তো বোধিসত্তং উপসঙ্কমিত্ৰা – ‘‘ভো সিদ্ধত্থ, উট্ঠহ পল্লঙ্কা’’তি আহ. মারপরিসাপি মহাসত্তস্স অতিঘোরং পীল়মকাসি. অথ মহাপুরিসো – ‘‘কদা তে পূরিতা, মার, পল্লঙ্কত্থায পারমী’’তিআদীনি ৰচনানি ৰত্ৰা দক্খিণহত্থং পথৰিং নিন্নামেসি. তঙ্খণঞ্ঞেৰ চুদ্দসসহস্সাধিকানি দসসতসহস্সযোজনবহলানি পথৰিসন্ধারকানি ৰাতুদকানি পঠমং কম্পেত্ৰা তদন্তরং চতুনহুতাধিকদ্ৰিযোজনসতসহস্সবহলা অযং মহাপথৰী ছধা পকম্পিত্থ. উপরি আকাসে অনেকসহস্সানি ৰিজ্জুলতা চ অসনী চ ফলিংসু. অথ গিরিমেখলদিরদো জণ্ণুকেন পতি. মারো গিরিমেখলক্খন্ধে নিসিন্নো ভূমিযং পতি. মারপরিসাপি দিসাৰিদিসাসু ভুসমুট্ঠি ৰিয ৰিকিরিংসু.

অথ মহাপুরিসোপি তং সমারং মারবলং খন্তিমেত্তাৰীরিযপঞ্ঞাদীনং অত্তনো পারমীনমানুভাৰেন ৰিদ্ধংসেত্ৰা পঠমযামে পুব্বেনিৰাসং অনুস্সরিত্ৰা মজ্ঝিমযামে দিব্বচক্খুং ৰিসোধেত্ৰা পচ্চূসসমযে সব্ববুদ্ধানং আচিণ্ণে পচ্চযাকারে ঞাণং ওতারেত্ৰা আনাপানচতুত্থজ্ঝানং নিব্বত্তেত্ৰা তমেৰ পাদকং কত্ৰা ৰিপস্সনং ৰড্ঢেত্ৰা মগ্গপটিপাটিযা অধিগতেন চতুত্থমগ্গেন সব্বকিলেসে খেপেত্ৰা সব্ববুদ্ধগুণে পটিৰিজ্ঝিত্ৰা সব্ববুদ্ধাচিণ্ণং –

‘‘অনেকজাতিসংসারং, সন্ধাৰিস্সং অনিব্বিসং;

গহকারং গৰেসন্তো, দুক্খা জাতি পুনপ্পুনং.

‘‘গহকারক দিট্ঠোসি, পুন গেহং ন কাহসি;

সব্বা তে ফাসুকা ভগ্গা, গহকূটং ৰিসঙ্খতং;

ৰিসঙ্খারগতং চিত্তং, তণ্হানং খযমজ্ঝগা’’তি. (ধ. প. ১৫৩-১৫৪) –

উদানং উদানেসি.

সন্তিকেনিদানকথা

উদানং উদানেত্ৰা নিসিন্নস্স ভগৰতো এতদহোসি – ‘‘অহং কপ্পসতসহস্সাধিকানি চত্তারি অসঙ্খ্যেয্যানি ইমস্স পল্লঙ্কস্স কারণা সন্ধাৰিং, অযং মে পল্লঙ্কো ৰিজযপল্লঙ্কো মঙ্গলপল্লঙ্কো, এত্থ মে নিসিন্নস্স যাৰ সঙ্কপ্পো ন পরিপুণ্ণো, ন তাৰ ইতো ৰুট্ঠহিস্সামী’’তি অনেককোটিসতসহস্সসঙ্খা সমাপত্তিযো সমাপজ্জন্তো সত্তাহং তত্থেৰ নিসীদি. যং সন্ধায ৰুত্তং – ‘‘অথ খো ভগৰা সত্তাহং একপল্লঙ্কেন নিসীদি ৰিমুত্তিসুখপটিসংৰেদী’’তি (মহাৰ. ১).

অথেকচ্চানং দেৰতানং – ‘‘অজ্জাপি তাৰ নূন সিদ্ধত্থস্স কত্তব্বকিচ্চং অত্থি. পল্লঙ্কস্মিঞ্হি আলযং ন ৰিজহতী’’তি পরিৰিতক্কো উদপাদি. অথ সত্থা দেৰতানং ৰিতক্কং ঞত্ৰা তাসং ৰিতক্কূপসমনত্থং ৰেহাসং অব্ভুগ্গন্ত্ৰা যমকপাটিহারিযং দস্সেসি. এৰং ইমিনা পাটিহারিযেন দেৰতানং ৰিতক্কং ৰূপসমেত্ৰা পল্লঙ্কতো ঈসকং পাচীননিস্সিতে উত্তরদিসাভাগে ঠত্ৰা – ‘‘ইমস্মিং ৰত মে পল্লঙ্কে সব্বঞ্ঞুতঞ্ঞাণং পটিৰিদ্ধ’’ন্তি চত্তারি অসঙ্খ্যেয্যানি কপ্পসতসহস্সঞ্চ পূরিতানং পারমীনং ফলাধিগমনট্ঠানং পল্লঙ্কঞ্চ বোধিরুক্খঞ্চ অনিমিসেহি অক্খীহি ওলোকযমানো সত্তাহং ৰীতিনামেসি, তং ঠানং অনিমিসচেতিযং নাম জাতং.

অথ পল্লঙ্কস্স চ ঠিতট্ঠানস্স চ অন্তরা চঙ্কমং মাপেত্ৰা পুরত্থিমপচ্ছিমতো আযতে রতনচঙ্কমে চঙ্কমন্তো সত্তাহং ৰীতিনামেসি, তং ঠানং রতনচঙ্কমচেতিযং নাম জাতং.

চতুত্থে পন সত্তাহে বোধিতো পচ্ছিমুত্তরদিসাভাগে দেৰতা রতনঘরং মাপযিংসু. তত্থ পল্লঙ্কেন নিসীদিত্ৰা অভিধম্মপিটকং ৰিচিনন্তো সত্তাহং ৰীতিনামেসি, তং পন ঠানং রতনঘরচেতিযং নাম জাতং.

এৰং ভগৰা বোধিসমীপেযেৰ চত্তারি সত্তাহানি ৰীতিনামেত্ৰা পঞ্চমে সত্তাহে বোধিরুক্খমূলা যেন অজপালনিগ্রোধো তেনুপসঙ্কমি. তত্রাপি ধম্মং ৰিচিনন্তো ৰিমুত্তিসুখঞ্চ পটিসংৰেদেন্তো নিসীদি.

সত্থা তত্থ সত্তাহং ৰীতিনামেত্ৰা মুচলিন্দমূলং অগমাসি. তত্থ সত্তাহৰদ্দলিকায উপ্পন্নায সীতাদিপটিবাহনত্থং মুচলিন্দেন নাগরাজেন সত্তক্খত্তুং ভোগেহি পরিক্খিত্তো অসম্বাধায গন্ধকুটিযা ৰিহরন্তো ৰিয ৰিমুত্তিসুখং পটিসংৰেদিযমানো তত্থ সত্তাহং ৰীতিনামেত্ৰা রাজাযতনমূলং উপসঙ্কমি. তত্থপি ৰিমুত্তিসুখং পটিসংৰেদিযমানোৰ সত্তাহং নিসীদি. এত্তাৰতা সত্ত সত্তাহানি পরিপুণ্ণানি. এত্থন্তরে ভগৰতো নেৰ মুখধোৰনং ন সরীরপটিজগ্গনং নাহারকিচ্চং অহোসি, ফলসুখেনেৰ ৰীতিৰত্তেসি. অথ সত্তসত্তাহমত্থকে একূনপঞ্ঞাসতিমে দিৰসে সক্কেন দেৰানমিন্দেন উপনীতেন নাগলতাদন্তকট্ঠেন চ অনোতত্তদহোদকেন চ মুখং ধোৰিত্ৰা তত্থেৰ রাজাযতনমূলে নিসীদি.

তস্মিং সমযে তপুস্সভল্লিকা নাম দ্ৰে ৰাণিজা ঞাতিসালোহিতায দেৰতায সত্থু আহারদানে উস্সাহিতা মন্থঞ্চ মধুপিণ্ডিকঞ্চ আদায – ‘‘পটিগ্গণ্হাতু ভগৰা ইমং আহারং অনুকম্পং উপাদাযা’’তি সত্থারং উপসঙ্কমিত্ৰা অট্ঠংসু. ভগৰা পাযাসপটিগ্গহণদিৰসেযেৰ দেৰদত্তিযস্স পত্তস্স অন্তরহিতত্তা – ‘‘ন খো তথাগতা হত্থেসু আহারং পটিগ্গণ্হন্তি, কিম্হি নু খো অহং ইমং পটিগ্গণ্হেয্য’’ন্তি চিন্তেসি. অথস্স ভগৰতো অজ্ঝাসযং ৰিদিত্ৰা চতূহি দিসাহি চত্তারো মহারাজানো ইন্দনীলমণিমযে চত্তারো পত্তে উপনামেসুং. ভগৰা তে পটিক্খিপি. পুন মুগ্গৰণ্ণে সিলামযে চত্তারো পত্তে উপনামেসুং. ভগৰা তেসং চতুন্নম্পি দেৰপুত্তানং অনুকম্পং উপাদায পটিগ্গহেত্ৰা একীভাৰং উপনেত্ৰা তস্মিং পচ্চগ্ঘে সেলমযে পত্তে আহারং পটিগ্গহেত্ৰা পরিভুঞ্জিত্ৰা অনুমোদনমকাসি. তে দ্ৰে ভাতরো ৰাণিজা বুদ্ধঞ্চ ধম্মঞ্চ সরণং গন্ত্ৰা দ্ৰেৰাচিকা উপাসকা অহেসুং.

অথ সত্থা পুন অজপালনিগ্রোধমেৰ গন্ত্ৰা নিগ্রোধমূলে নিসীদি. অথস্স তত্থ নিসিন্নমত্তস্সেৰ অধিগতস্স ধম্মস্স গম্ভীরতং পচ্চৰেক্খন্তস্স সব্ববুদ্ধানং আচিণ্ণো – ‘‘অধিগতো খো ম্যাযং ধম্মো’’তিআদিনা (দী. নি. ২.৬৪; ম. নি. ১.২৮১; ২.৩৩৭; সং. নি. ১.১৭২; মহাৰ. ৭) পরেসং ধম্মং অদেসেতুকামতাকারপ্পত্তো পরিৰিতক্কো উদপাদি. অথ ব্রহ্মা সহম্পতি ‘‘নস্সতি ৰত ভো লোকো, ৰিনস্সতি ৰত ভো লোকো’’তি (দী. নি. ২.৬৬; ম. নি. ১.২৮২; ২.৩৩৮; সং. নি. ১.১৭২; মহাৰ. ৮) দসসু চক্কৰাল়সহস্সেসু সক্কসুযামসন্তুসিতনিম্মানরতিপরনিম্মিতৰসৰত্তিমহাব্রহ্মানো চ গহেত্ৰা সত্থু সন্তিকং আগন্ত্ৰা – ‘‘দেসেতু, ভন্তে, ভগৰা ধম্ম’’ন্তিআদিনা (দী. নি. ২.৬৬; ম. নি. ১.২৮২; ২.৩৩৮; সং. নি. ১.১৭২; মহাৰ. ৮) নযেন ধম্মদেসনং আযাচি.

অথ সত্থা তস্স পটিঞ্ঞং দত্ৰা – ‘‘কস্স নু খো অহং পঠমং ধম্মং দেসেয্য’’ন্তি চিন্তেন্তো আল়ারুদকানং কালঙ্কতভাৰং ঞত্ৰা – ‘‘বহূপকারা খো মে পঞ্চৰগ্গিযা ভিক্খূ’’তি পঞ্চৰগ্গিযে আরব্ভ মনসিকারং কত্ৰা – ‘‘কহং নু খো তে এতরহি ৰিহরন্তী’’তি আৰজ্জেন্তো – ‘‘বারাণসিযং ইসিপতনে মিগদাযে’’তি ঞত্ৰা – ‘‘তত্থ গন্ত্ৰা ধম্মচক্কং পৰত্তেস্সামী’’তি কতিপাহং বোধিমণ্ডসামন্তেযেৰ পিণ্ডায চরন্তো ৰিহরিত্ৰা আসাল়্হিপুণ্ণমিযং বারাণসিং গমিস্সামী’’তি পত্তচীৰরমাদায অট্ঠারসযোজনমগ্গং পটিপজ্জি. অন্তরামগ্গে হট্ঠতুপগং উপকং নাম আজীৰকং দিস্ৰা তস্স অত্তনো বুদ্ধভাৰং আচিক্খিত্ৰা তংদিৰসংযেৰ সাযন্হসমযে ইসিপতনং অগমাসি.

পঞ্চৰগ্গিযা পন তথাগতং দূরতোৰ আগচ্ছন্তং দিস্ৰা – ‘‘অযং, আৰুসো, সমণো গোতমো পচ্চযবাহুল্লায আৰত্তো পরিপুণ্ণকাযো পীণিন্দ্রিযো সুৰণ্ণৰণ্ণো হুত্ৰা আগচ্ছতি, ইমস্স অভিৰাদনাদীনি ন করিস্সাম, আসনমত্তং পন পঞ্ঞাপেয্যামা’’তি কতিকং অকংসু. ভগৰা তেসং চিত্তাচারং ঞত্ৰা সব্বসত্তেসু অনোধিস্সকৰসেন ফরণসমত্থং মেত্তচিত্তং সংখিপিত্ৰা ওধিস্সকৰসেন মেত্তচিত্তেন ফরি. তে ভগৰতো মেত্তচিত্তেন ফুট্ঠা তথাগতে উপসঙ্কমন্তে সকায কতিকায সণ্ঠাতুং অসক্কোন্তা অভিৰাদনাদীনি সব্বকিচ্চানি অকংসু. ৰিত্থারকথা ৰিনযমহাৰগ্গাদীসু ৰুত্তনযেনেৰ ৰেদিতব্বা.

অথ ভগৰা অত্তনো বুদ্ধভাৰং তে ঞাপেত্ৰা পঞ্ঞত্তৰরবুদ্ধাসনে নিসীদিত্ৰা উত্তরাসাল়্হনক্খত্তযোগে ৰত্তমানে অট্ঠারসহি ব্রহ্মকোটীহি পরিৰুতো পঞ্চৰগ্গিযে থেরে আমন্তেত্ৰা ধম্মচক্কপ্পৰত্তনসুত্তন্তং দেসেসি. তেসু অঞ্ঞাসিকোণ্ডঞ্ঞো দেসনানুসারেন ঞাণং পেসেন্তো সুত্তপরিযোসানে অট্ঠারসহি ব্রহ্মকোটীহি সদ্ধিং সোতাপত্তিফলে পতিট্ঠাসি. তেন ৰুত্তং –

১. ‘‘অহমেতরহি সম্বুদ্ধো, গোতমো সক্যৰড্ঢনো;

পধানং পদহিত্ৰান, পত্তো সম্বোধিমুত্তমং.

২. ‘‘ব্রহ্মুনা যাচিতো সন্তো, ধম্মচক্কং পৰত্তযিং;

অট্ঠারসন্নং কোটীনং, পঠমাভিসমযো অহূ’’তি.

তত্থ অহন্তি অত্তানং নিদ্দিসতি. এতরহীতি অস্মিং কালে. সক্যৰড্ঢনোতি সাকিযকুলৰড্ঢনো. ‘‘সক্যপুঙ্গৰো’’তিপি পাঠো. পধানন্তি ৰীরিযং ৰুচ্চতি. পদহিত্ৰানাতি ঘটেত্ৰা ৰাযমিত্ৰা, দুক্করকারিকং কত্ৰাতি অত্থো. অট্ঠারসন্নং কোটীনন্তি বারাণসিযং ইসিপতনে মিগদাযে ধম্মচক্কপ্পৰত্তনসুত্তন্তকথায অঞ্ঞাসিকোণ্ডঞ্ঞত্থেরপ্পমুখানং অট্ঠারসন্নং ব্রহ্মকোটীনং পঠমাভিসমযো অহোসীতি অত্থো.

ইদানি ভগৰা অতীতং কথেত্ৰা অনাগতং অভিসমযং কথেন্তো –