২২. সিখীবুদ্ধৰংসৰণ্ণনা

ৰিপস্সিস্স অপরভাগে অন্তরহিতে চ তস্মিং কপ্পে ততো পরং একূনসট্ঠিযা কপ্পেসু বুদ্ধা লোকে ন উপ্পজ্জিংসু. অপগতবুদ্ধালোকো অহোসি. কিলেসদেৰপুত্তমারানং একরজ্জং অপগতকণ্টকং অহোসি. ইতো পন একত্তিংসকপ্পে সিনিদ্ধসুক্খসারদারুপচিতো পহূতসপ্পিসিত্তো নিধূমো সিখী ৰিয সিখী চ ৰেস্সভূ চাতি দ্ৰে সম্মাসম্বুদ্ধা লোকে উপ্পজ্জিংসু. তত্থ সিখী পন ভগৰা পারমিযো পূরেত্ৰা তুসিতপুরে নিব্বত্তিত্ৰা ততো চৰিত্ৰা কুসলকরণৰতী অরুণৰতীনগরে পরমগুণৰতো অরুণৰতো নাম রঞ্ঞো অগ্গমহেসিযা রত্তকনকপটিবিম্বরুচিরপ্পভায পভাৰতিযা নাম দেৰিযা কুচ্ছিস্মিং পটিসন্ধিং গহেত্ৰা দস মাসে ৰীতিনামেত্ৰা নিসভুয্যানে মাতুকুচ্ছিতো নিক্খমি. নেমিত্তিকা পনস্স নামং করোন্তা উণ্হীসস্স সিখা ৰিয উগ্গতত্তা ‘‘সিখী’’তি নামমকংসু. সো সত্তৰস্সসহস্সানি অগারং অজ্ঝাৰসি. সুচন্দকসিরীগিরিযসনারিৰসভ নামকা তযো পাসাদা অহেসুং. সব্বকামাদেৰিপ্পমুখানি চতুৰীসতি ইত্থিসহস্সানি পচ্চুপট্ঠিতানি অহেসুং.

সো চত্তারি নিমিত্তানি দিস্ৰা সব্বকামাদেৰিযা গুণগণাতুলে অতুলে নাম পুত্তে উপ্পন্নে হত্থিযানেন হত্থিক্খন্ধৰরগতো মহাভিনিক্খমনং নিক্খমিত্ৰা পব্বজি. তং সত্ততিপুরিসসতসহস্সানি অনুপব্বজিংসু. সো তেহি পরিৰুতো অট্ঠমাসং পধানচরিযং চরিত্ৰা ৰিসাখপুণ্ণমায গণসঙ্গণিকং পহায সুদস্সননিগমে পিযদস্সীসেট্ঠিনো ধীতুযা দিন্নং মধুপাযাসং পরিভুঞ্জিত্ৰা তরুণখদিরৰনে দিৰাৰিহারং ৰীতিনামেত্ৰা অনোমদস্সিনা নাম তাপসেন দিন্না অট্ঠ কুসতিণমুট্ঠিযো গহেত্ৰা পুণ্ডরীকবোধিং উপসঙ্কমি. তস্সা কির পুণ্ডরীকবোধিযাপি পাটলিযা পমাণমেৰ পমাণং অহোসি. তংদিৰসমেৰ সো পণ্ণাসরতনক্খন্ধো হুত্ৰা অব্ভুগ্গতো, সাখাপিস্স পণ্ণাসরতনমত্তাৰ. সো দিব্বেহি গন্ধেহি পুপ্ফেহি সঞ্ছন্নো অহোসি. ন কেৰলং পুপ্ফেহেৰ, ফলেহিপি সঞ্ছন্নো অহোসি. তস্স একপস্সতো তরুণানি ফলানি একতো মজ্ঝিমানি একতো নাতিপক্কানি একতো পক্খিত্তদিব্বোজানি ৰিয সুরসানি ৰণ্ণগন্ধরসসম্পন্নানি ততো ততো ওলম্বন্তি. যথা চ সো, এৰং দসসহস্সিচক্কৰাল়েসু পুপ্ফূপগা রুক্খা পুপ্ফেহি ফলূপগা রুক্খা ফলেহি পটিমণ্ডিতা অহেসুং.

সো তত্থ চতুৰীসতিহত্থৰিত্থতং তিণসন্থরং সন্থরিত্ৰা পল্লঙ্কং আভুজিত্ৰা চতুরঙ্গৰীরিযং অধিট্ঠায নিসীদি. এৰং নিসীদিত্ৰা ছত্তিংস যোজনৰিত্থতং সমারং মারবলং ৰিধমিত্ৰা সম্বোধিং পাপুণিত্ৰা – ‘‘অনেকজাতিসংসারং…পে… তণ্হানং খযমজ্ঝগা’’তি উদানং উদানেত্ৰা বোধিসমীপেযেৰ সত্তসত্তাহং ৰীতিনামেত্ৰা ব্রহ্মাযাচনং সম্পটিচ্ছিত্ৰা অত্তনা সহ পব্বজিতানং সত্ততিযা ভিক্খুসতসহস্সানং উপনিস্সযসম্পত্তিং দিস্ৰা সুরপথেন গন্ত্ৰা ৰিৰিধাৰরণৰতিযা অরুণৰতিযা রাজধানিযা সমীপে মিগাজিনুয্যানে ওতরিত্ৰা তেহি মুনিগণেহি পরিৰুতো তেসং মজ্ঝে ধম্মচক্কং পৰত্তেসি. তদা কোটিসতসহস্সানং পঠমো অভিসমযো অহোসি. তেন ৰুত্তং –

১. ‘‘ৰিপস্সিস্স অপরেন, সম্বুদ্ধো দ্ৰিপদুত্তমো;

সিখিৰ্হযো আসি জিনো, অসমো অপ্পটিপুগ্গলো.

২. ‘‘মারসেনং পমদ্দিত্ৰা, পত্তো সম্বোধিমুত্তমং;

ধম্মচক্কং পৰত্তেসি, অনুকম্পায পাণিনং.

৩. ‘‘ধম্মচক্কং পৰত্তেন্তে, সিখিম্হি জিনপুঙ্গৰে;

কোটিসতসহস্সানং, পঠমাভিসমযো অহূ’’তি.

পুনপি অরুণৰতিযা রাজধানিযা সমীপেযেৰ অভিভূরাজপুত্তস্স চ সম্ভৰরাজপুত্তস্স চাতি দ্ৰিন্নং সপরিৰারানং ধম্মং দেসেত্ৰা নৰুতিকোটিসহস্সানি ধম্মামতং পাযেসি. সো দুতিযো অভিসমযো অহোসি. তেন ৰুত্তং –

৪. ‘‘অপরম্পি ধম্মং দেসেন্তে, গণসেট্ঠে নরুত্তমে;

নৰুত্তিকোটিসহস্সানং, দুতিযাভিসমযো অহূ’’তি.

যদা পন সূরিযৰতীনগরদ্ৰারে চম্পকরুক্খমূলে তিত্থিযমদমানভঞ্জনত্থং সব্বজনবন্ধনমোক্খত্থঞ্চ যমকপাটিহারিযং করোন্তো ভগৰা ধম্মং দেসেসি, তদা অসীতিকোটিসহস্সানং ততিযো অভিসমযো অহোসি. তেন ৰুত্তং –

৫. ‘‘যমকপাটিহারিযঞ্চ, দস্সযন্তে সদেৰকে;

অসীতিকোটিসহস্সানং, ততিযাভিসমযো অহূ’’তি.

অভিভুনা চ সম্ভৰেন চ রাজপুত্তেন সদ্ধিং পব্বজিতানং অরহন্তানং সতসহস্সানং মজ্ঝে নিসীদিত্ৰা পাতিমোক্খং উদ্দিসি, সো পঠমো সন্নিপাতো অহোসি, অরুণৰতীনগরে ঞাতিসমাগমে পব্বজিতানং অসীতিযা ভিক্খুসহস্সানং মজ্ঝে নিসীদিত্ৰা পাতিমোক্খং উদ্দিসি, সো দুতিযো সন্নিপাতো অহোসি. ধনঞ্জযনগরে ধনপালকনাগৰিনযনসমযে পব্বজিতানং সত্ততিযা ভিক্খুসহস্সানং মজ্ঝে ভগৰা পাতিমোক্খং উদ্দিসি, সো ততিযো সন্নিপাতো অহোসি. তেন ৰুত্তং –

৬. ‘‘সন্নিপাতা তযো আসুং, সিখিস্সাপি মহেসিনো;

খীণাসৰানং ৰিমলানং, সন্তচিত্তান তাদিনং.

৭. ‘‘ভিক্খুসতসহস্সানং, পঠমো আসি সমাগমো;

অসীতিভিক্খুসহস্সানং, দুতিযো আসি সমাগমো.

৮. ‘‘সত্ততিভিক্খুসহস্সানং, ততিযো আসি সমাগমো;

অনুপলিত্তো পদুমংৰ, তোযম্হি সম্পৰড্ঢিত’’ন্তি.

তত্থ অনুপলিত্তো পদুমংৰাতি তোযে জাতং তোযেৰ ৰড্ঢিতং পদুমং ৰিয তোযেন অনুপলিত্তং, সোপি ভিক্খুসন্নিপাতো লোকে জাতোপি লোকধম্মেহি অনুপলিত্তো অহোসীতি অত্থো.

তদা কির অম্হাকং বোধিসত্তো কত্থচি অসংসট্ঠো পরিভুত্তনগরে অরিন্দমো নাম রাজা হুত্ৰা সিখিম্হি সত্থরি পরিভুত্তনগরমনুপ্পত্তে সপরিৰারো রাজা ভগৰতো পচ্চুগ্গন্ত্ৰা পসাদৰড্ঢিতহদযনযনসোতো দসবলস্স অমলচরণকমলযুগল়েসু সপরিৰারো সিরসা অভিৰন্দিত্ৰা দসবলং নিমন্তেত্ৰা সত্তাহং ইস্সরিযকুলৰিভৰসদ্ধানুরূপং মহাদানং দত্ৰা দুস্সভণ্ডাগারদ্ৰারানি ৰিৰরাপেত্ৰা বুদ্ধপ্পমুখস্স ভিক্খুসঙ্ঘস্স মহগ্ঘানি ৰত্থানি অদাসি. অত্তনো চ বলরূপলক্খণজৰসম্পন্নহেমজালমালাসমলঙ্কতং নৰকনকরুচিরদণ্ডকোসচামরযুগৰিরাজিতং ৰিপুলমুদুকণ্ণং চন্দরাজিৰিরাজিতৰদনসোভং এরাৰণৰারণমিৰ অরিৰারণং ৰরৰারণং দত্ৰা ৰারণপ্পমাণমেৰ কত্ৰা কপ্পিযভণ্ডঞ্চ অদাসি. সোপি নং সত্থা – ‘‘ইতো একত্তিংসকপ্পে বুদ্ধো ভৰিস্সতী’’তি ব্যাকাসি. তেন ৰুত্তং –

৯. ‘‘অহং তেন সমযেন, অরিন্দমো নাম খত্তিযো;

সম্বুদ্ধপ্পমুখং সঙ্ঘং, অন্নপানেন তপ্পযিং.

১০. ‘‘বহুং দুস্সৰরং দত্ৰা, দুস্সকোটিং অনপ্পকং;

অলঙ্কতং হত্থিযানং, সম্বুদ্ধস্স অদাসহং.

১১. ‘‘হত্থিযানং নিম্মিনিত্ৰা, কপ্পিযং উপনামযিং;

পূরযিং মানসং ময্হং, নিচ্চং দল়্হমুপট্ঠিতং.

১২. ‘‘সোপি মং বুদ্ধো ব্যাকাসি, সিখী লোকগ্গনাযকো;

একত্তিংসে ইতো কপ্পে, অযং বুদ্ধো ভৰিস্সতি.

১৩. ‘‘অহু কপিলৰ্হযা রম্মা…পে… হেস্সাম সম্মুখা ইমং.

১৪. ‘‘তস্সাহং ৰচনং সুত্ৰা, ভিয্যো চিত্তং পসাদযিং;

উত্তরিং ৰতমধিট্ঠাসিং, দসপারমিপূরিযা’’তি.

তত্থ নিম্মিনিত্ৰাতি তস্স হত্থিনো পমাণেন তুলযিত্ৰা. কপ্পিযন্তি কপ্পিযভণ্ডং, ভিক্খূনং যং ভণ্ডং কপ্পতি গহেতুং, তং কপ্পিযভণ্ডং নাম. পূরযিং মানসং ময্হন্তি মম চিত্তং দানপীতিযা পূরযিং, ময্হং হাসুপ্পাদনসমত্থং অকাসিন্তি অত্থো. নিচ্চং দল়্হমুপট্ঠিতন্তি নিচ্চকালং দানং দস্সামী’’তি দানৰসেন দল়্হং উপট্ঠিতং চিত্তন্তি অত্থো.

তস্স পন ভগৰতো নগরং অরুণৰতী নাম অহোসি. অরুণৰা নাম রাজা পিতা, পভাৰতী নাম মাতা, অভিভূ চ সম্ভৰো চ দ্ৰে অগ্গসাৰকা, খেমঙ্করো নামুপট্ঠাকো, সখিলা চ মদুমা চ দ্ৰে অগ্গসাৰিকা, পুণ্ডরীকরুক্খো বোধি, সরীরঞ্চস্স সত্ততিহত্থুব্বেধং অহোসি. সরীরপ্পভা নিচ্চকালং যোজনত্তযং ফরিত্ৰা অট্ঠাসি. সত্ততিৰস্সসহস্সানি আযু, সব্বকামা নামস্স অগ্গমহেসী, অতুলো নামস্স পুত্তো, হত্থিযানেন নিক্খমি. তেন ৰুত্তং –

১৫. ‘‘নগরং অরুণৰতী নাম, অরুণো নাম খত্তিযো;

পভাৰতী নাম জনিকা, সিখিস্সাপি মহেসিনো.

২০. ‘‘অভিভূ সম্ভৰো চেৰ, অহেসুং অগ্গসাৰকা;

খেমঙ্করো নামুপট্ঠাকো, সিখিস্সাপি মহেসিনো.

২১. ‘‘সখিলা চ পদুমা চ, অহেসুং অগ্গসাৰিকা;

বোধি তস্স ভগৰতো, পুণ্ডরীকোতি ৰুচ্চতি.

২২. ‘‘সিরিৰড্ঢো চ নন্দো চ, অহেসুং অগ্গুপট্ঠকা;

চিত্তা চেৰ সুগুত্তা চ, অহেসুং অগ্গুপট্ঠিকা.

২৩. ‘‘উচ্চত্তনেন সো বুদ্ধো, সত্ততিহত্থমুগ্গতো;

কঞ্চনগ্ঘিযসঙ্কাসো, দ্ৰত্তিংসৰরলক্খণো.

২৪. ‘‘তস্সাপি ব্যামপ্পভা কাযা, দিৰারত্তিং নিরন্তরং;

দিসোদিসং নিচ্ছরন্তি, তীণি যোজনসো পভা.

২৫. ‘‘সত্ততিৰস্সসহস্সানি, আযু তস্স মহেসিনো;

তাৰতা তিট্ঠমানো সো, তারেসি জনতং বহুং.

২৬. ‘‘ধম্মমেঘং পৰস্সেত্ৰা, তেমযিত্ৰা সদেৰকে;

খেমন্তং পাপযিত্ৰান, নিব্বুতো সো সসাৰকো.

২৭. ‘‘অনুব্যঞ্জনসম্পন্নং, দ্ৰত্তিংসৰরলক্খণং;

সব্বং তমন্তরহিতং, ননু রিত্তা সব্বসঙ্খারা’’তি.

তত্থ পুণ্ডরীকোতি সেতম্বরুক্খো. তীণি যোজনসো পভাতি তীণি যোজনানি পভা নিচ্ছরন্তীতি অত্থো. ধম্মমেঘন্তি ধম্মৰস্সং, ধম্মৰস্সনকো বুদ্ধমেঘো. তেমযিত্ৰাতি ধম্মকথাসলিলেন তেমেত্ৰা, সিঞ্চিত্ৰাতি অত্থো. সদেৰকেতি সদেৰকে সত্তে. খেমন্তন্তি খেমন্তং নিব্বানং. অনুব্যঞ্জনসম্পন্নন্তি তম্বনখতুঙ্গনাসৰট্টঙ্গুলিতাদীহি অসীতিযা অনুব্যঞ্জনেহি সম্পন্নং, দ্ৰত্তিংসমহাপুরিসলক্খণপটিমণ্ডিতং ভগৰতো সরীরন্তি অত্থো. সিখী কির সম্মাসম্বুদ্ধো সীলৰতীনগরে অস্সারামে পরিনিব্বাযি.

‘‘সিখীৰ লোকে তপসা জলিত্ৰা, সিখীৰ মেঘাগমনে নদিত্ৰা;

সিখী মহেসিন্ধনৰিপ্পহীনো, সিখীৰ সন্তিং সুগতো গতো সো’’.

সিখিস্স কির ভগৰতো ধাতুযো একগ্ঘনাৰ হুত্ৰা অট্ঠংসু ন ৰিপ্পকিরিংসু. সকলজম্বুদীপৰাসিনো পন মনুস্সা তিযোজনুব্বেধং সত্তরতনমযং হিমগিরিসদিসসোভং থূপমকংসু. সেসমেত্থ গাথাসু পাকটমেৰাতি.

সিখীবুদ্ধৰংসৰণ্ণনা নিট্ঠিতা.

নিট্ঠিতো ৰীসতিমো বুদ্ধৰংসো.