১৫. পিযদস্সীবুদ্ধৰংসৰণ্ণনা

সুজাতস্স পন অপরভাগে ইতো অট্ঠকপ্পসতাধিকসহস্সকপ্পমত্থকে একস্মিং কপ্পে পিযদস্সী, অত্থদস্সী, ধম্মদস্সীতি তযো বুদ্ধা নিব্বত্তিংসু. তত্থ পিযদস্সী নাম ভগৰা পারমিযো পূরেত্ৰা তুসিতপুরে নিব্বত্তিত্ৰা ততো চৰিত্ৰা সুধঞ্ঞৰতীনগরে সুদত্তস্স নাম রঞ্ঞো অগ্গমহেসিযা চন্দসদিসৰদনায চন্দাদেৰিযা নাম কুচ্ছিস্মিং পটিসন্ধিং গহেত্ৰা দসন্নং মাসানং অচ্চযেন ৰরুণুয্যানে মাতুকুচ্ছিতো নিক্খমি. তস্স পন নামগ্গহণদিৰসে লোকস্স পিযানং পাটিহারিযৰিসেসানং দস্সিতত্তা ‘‘পিযদস্সী’’ত্ৰেৰ নামমকংসু. সো নৰৰস্সসহস্সানি অগারং অজ্ঝাৰসি. তস্স কির সুনিম্মলৰিমলগিরিব্রহানামকা তযো পাসাদা অহেসুং. ৰিমলামহাদেৰিপ্পমুখানি তেত্তিংস ইত্থিসহস্সানি পচ্চুপট্ঠিতানি অহেসুং.

সো চত্তারি নিমিত্তানি দিস্ৰা ৰিমলাদেৰিযা কঞ্চনৰেল়ে নাম পুত্তে উপ্পন্নে আজঞ্ঞরথেন মহাভিনিক্খমনং নিক্খমিত্ৰা পব্বজি. একা চ নং পুরিসকোটি অনুপব্বজি. সো তেহি পরিৰুতো মহাপুরিসো ছ মাসে পধানচরিযং চরিত্ৰা ৰিসাখপুণ্ণমায ৰরুণব্রাহ্মণগামে ৰসভব্রাহ্মণস্স ধীতায দিন্নং মধুপাযাসং পরিভুঞ্জিত্ৰা সালৰনে দিৰাৰিহারং ৰীতিনামেত্ৰা সুজাতাজীৰকেন দিন্না অট্ঠ তিণমুট্ঠিযো গহেত্ৰা ককুধবোধিং উপসঙ্কমিত্ৰা তেপঞ্ঞাসহত্থৰিত্থতং তিণসন্থরং সন্থরিত্ৰা পল্লঙ্কং আভুজিত্ৰা সব্বঞ্ঞুতঞ্ঞাণং পটিৰিজ্ঝিত্ৰা ‘‘অনেকজাতিসংসার’’ন্তি উদানং উদানেত্ৰা তত্থেৰ সত্তসত্তাহং ৰীতিনামেত্ৰা অত্তনা সহ পব্বজিতানং অরিযধম্মপটিৰেধসমত্থতং ঞত্ৰা আকাসেন তত্থ গন্ত্ৰা উসভৰতীনগরসমীপে উসভৰতুয্যানে ওতরিত্ৰা ভিক্খুকোটিপরিৰুতো ধম্মচক্কং পৰত্তেসি. তদা কোটিসতসহস্সানং ধম্মাভিসমযো অহোসি. অযং পঠমো অভিসমযো.

পুন উসভৰতিযা নাম নগরস্স অৰিদূরে সুদস্সনপব্বতে সুদস্সনো নাম দেৰরাজা পটিৰসতি. সো মিচ্ছাদিট্ঠিকো অহোসি. সকলজম্বুদীপে পন মনুস্সা তস্স অনুসংৰচ্ছরং সতসহস্সগ্ঘনিকং বলিং উপসংহরন্তি. সো সুদস্সনো দেৰরাজা নররাজেন সদ্ধিং একাসনে নিসীদিত্ৰা বলিং সম্পটিচ্ছতি. অথ পিযদস্সী ভগৰা ‘‘তস্স সুদস্সনস্স দেৰরাজস্স তং দিট্ঠিগতং ৰিনোদেস্সামী’’তি তস্মিং দেৰরাজে যক্খসমাগমং গতে তস্স ভৰনং পৰিসিত্ৰা সিরিসযনং আরুহিত্ৰা ছব্বণ্ণরংসিযো মুঞ্চন্তো যুগন্ধরপব্বতে সরদসমযে সূরিযো ৰিয নিসীদি. তস্স পরিৰারপরিচারিকা দেৰতাযো মালাগন্ধৰিলেপনাদীহি দসবলং পূজেত্ৰা পরিৰারেত্ৰা অট্ঠংসু.

সুদস্সনোপি দেৰরাজা যক্খসমাগমতো আগচ্ছন্তো অত্তনো ভৰনতো ছব্বণ্ণরস্মিযো নিচ্ছরন্তে দিস্ৰা চিন্তেসি – ‘‘অঞ্ঞেসু পন দিৰসেসু মম ভৰনস্স এদিসী অনেকরংসিজালসমুজ্জলৰিভূতি ন দিট্ঠপুব্বা. কো নু খো ইধ পৰিট্ঠো দেৰো ৰা মনুস্সো ৰা’’তি ওলোকেন্তো উদযগিরিসিখরমত্থকে সরদসমযদিৰসকরমিৰ ছব্বণ্ণরংসিজালেন অভিজ্জলন্তং নিসিন্নং ভগৰন্তং দিস্ৰা চিন্তেসি – ‘‘অযং মুণ্ডকসমণো মম পরিৰারেন পরিজনেন পরিৰুতো ৰরসযনে নিসিন্নো’’তি কোধাভিভূতমানসো – ‘‘হন্দাহং ইমস্স অত্তনো বলং দস্সেস্সামী’’তি চিন্তেত্ৰা সকলং তং পব্বতং একজালমকাসি. ‘‘ইমিনা অগ্গিজালেন ছারিকাভূতো মুণ্ডকসমণো’’তি ওলোকেন্তো অনেকরংসিজালৰিসরৰিপ্ফুরিতৰরসরীরং পসন্নৰদনৰণ্ণসোভং ৰিপ্পসন্নচ্ছৰিরাগং দসবলমভিজ্জলন্তং দিস্ৰা চিন্তেসি – ‘‘অযং সমণো অগ্গিদাহং সহতি, হন্দাহং ইমং সমণং উদকোঘেন ওসাদেত্ৰা মারেস্সামী’’তি অতিগম্ভীরং উদকোঘং ৰিমানাভিমুখং পৰত্তেসি.

ততো উদকোঘেন পুণ্ণে তস্মিং ৰিমানে নিসিন্নস্স তস্স ভগৰতো চীৰরে অংসুমত্তং ৰা সরীরে লোমমত্তং ৰা ন তেমিত্থ. ততো সুদস্সনো দেৰরাজা – ‘‘ইমিনা সমণো নিরস্সাসো মতো ভৰিস্সতী’’তি মন্ত্ৰা উদকং সঙ্খিপিত্ৰা ওলোকেন্তো ভগৰন্তং অসিতজলধরৰিৰরগতং সরদসমযরজনিকরমিৰ ৰিৰিধরংসিজালৰিসরেন ৰিরোচমানং সকপরিসপরিৰুতং নিসিন্নং দিস্ৰা অত্তনো মক্খং অসহমানো – ‘‘হন্দ মারেস্সামি ন’’ন্তি কোধেন নৰৰিধআৰুধৰস্সং ৰস্সেসি. অথস্স ভগৰতো আনুভাৰেন সব্বাৰুধানি নানাৰিধপরমরুচিরদস্সনা সুরভিকুসুমমালা হুত্ৰা দসবলস্স পাদমূলে নিপতিংসু.

ততো তং অচ্ছরিযং দিস্ৰা সুদস্সনো দেৰরাজা পরমকুপিতমানসো ভগৰন্তং উভোহি হত্থেহি পাদেসু গহেত্ৰা অত্তনো ভৰনতো নীহরিতুকামো উক্খিপিত্ৰা মহাসমুদ্দং অতিক্কমিত্ৰা চক্কৰাল়পব্বতং গন্ত্ৰা – ‘‘কিং নু খো সমণো জীৰতি ৰা মতো ৰা’’তি ওলোকেন্তো তস্মিংযেৰ আসনে নিসিন্নং দিস্ৰা – ‘‘অহো মহানুভাৰো অযং সমণো, নাহং ইমং সমণং ইতো নিক্কড্ঢিতুং সক্কোমি. যদি হি মং কোচি জানিস্সতি, অনপ্পকো মে অযসো ভৰিস্সতি. যাৰিমং কোচি ন পস্সতি, তাৰ নং ৰিস্সজ্জেত্ৰা গমিস্সামী’’তি চিন্তেসি.

অথ দসবলো তস্স চিত্তাচারং ঞত্ৰা তথা অধিট্ঠাসি, যথা নং সব্বে দেৰমনুস্সা পস্সন্তি. তস্মিঞ্চ দিৰসে সকলজম্বুদীপে একসতরাজানো তস্সেৰ উপহারদানত্থায সন্নিপতিংসু. তে ভগৰতো পাদে গহেত্ৰা নিসিন্নং সুদস্সনং দেৰরাজানং নররাজানো দিস্ৰা – ‘‘অম্হাকং দেৰরাজা মুনিরাজস্স পিযদস্সিস্স সত্থুনো পাদপরিচরিযং করোতি, অহো বুদ্ধা নাম অচ্ছরিযা, অহো বুদ্ধগুণা ৰিসিট্ঠা’’তি ভগৰতি, পসন্নচিত্তা সব্বে ভগৰন্তং নমস্সমানা সিরস্মিং অঞ্জলিং কত্ৰা অট্ঠংসু. তত্থ পিযদস্সী ভগৰা তং সুদস্সনং দেৰরাজানং পমুখং কত্ৰা ধম্মং দেসেসি. তদা দেৰমনুস্সানং নৰুতিকোটিসহস্সানি অরহত্তং পাপুণিংসু. সো দুতিযো অভিসমযো অহোসি.

যদা পন নৰযোজনপ্পমাণে কুমুদনগরে বুদ্ধপচ্চত্থিকো দেৰদত্তো ৰিয সোণত্থেরো নাম মহাপদুমকুমারেন সদ্ধিং মন্তেত্ৰা তস্স পিতরং ঘাতেত্ৰা পুন পিযদস্সীবুদ্ধস্স ৰধায নানপ্পকারং পযোগং কত্ৰাপি ঘাতেতুং অসক্কোন্তো সো দোণমুখনাগরাজারোহং পক্কোসাপেত্ৰা তং পলোভেত্ৰা তমত্থং আরোচেসি – ‘‘যদা পনাযং সমণো পিযদস্সী ইমং নগরং পিণ্ডায পৰিসতি, তদা দোণমুখং নাম গজৰরং ৰিস্সজ্জেত্ৰা পিযদস্সীসমণং মারেহী’’তি.

অথ সো আরোহো হিতাহিতৰিচারণরহিতো রাজৰল্লভো – ‘‘অযং সমণো ঠানন্তরাপি মং চাৰেয্যা’’তি মন্ত্ৰা ‘‘সাধূ’’তি সম্পটিচ্ছিত্ৰা দুতিযদিৰসে দসবলস্স নগরপ্পৰেসনসমযং সল্লক্খেত্ৰা সুজাতমত্থকপিণ্ডকুম্ভনলাটং ধনুসদিসদীঘসুণ্ডতটং সুৰিপুলমুদুকণ্ণং মধুপিঙ্গলনযনং সুন্দরক্খন্ধাসনং অনুৰট্টঘনজঘনং নিচিতগূল়্হজাণুঅন্তরং ঈসাসদিসরুচিরদন্তং সুৰালধিং অপচিতমেচকং সব্বলক্খণসম্পন্নং অসিতজলধরসদিসচারুদস্সনং সীহৰিক্কন্তললিতগামিনং জঙ্গমমিৰ ধরাধরং সত্তপ্পতিট্ঠং সত্তধা পভিন্নং সব্বসো ৰিস্সৰন্তং ৰিগ্গহৰন্তমিৰ অন্তকং উপসঙ্কমিত্ৰা পিণ্ডকবল়ঞ্জনধূপলেপাদিৰিসেসেহি ভিয্যোপি মত্তপ্পমত্তং কত্ৰা অরিৰারণৰারণং এরাৰণৰারণমিৰ অরিজনৰারণং মুনিৰারণং মারণত্থায পেসেসি. অথ সো দ্ৰিরদৰরো মুত্তমত্তোৰ গজমহিংসতুরঙ্গনরনারিযো হন্ত্ৰা হতরুধিরপরিরঞ্জিতসদন্তকরসরীরো অন্তজালপরিযোনদ্ধনযনো সকটকৰাটকূটাগারদ্ৰারতোরণাদীনি ভঞ্জিত্ৰা কাক-কুলল-গিজ্ঝাদীহি অনুপরিযাযমানো হতমহিংসনরতুরঙ্গদিরদাদীনং অঙ্গানি আলুম্পিত্ৰা মনুস্সভক্খো যক্খো ৰিয ভক্খযন্তো দূরতোৰ দসবলং সিস্সগণপরিৰুতং আগচ্ছন্তং দিস্ৰা অনিলগরুল়সদিসৰেগো ৰেগেন ভগৰন্তমভিগঞ্ছি.

অথ পুরৰাসিনো পন জনা ভযসন্তাপপরিপূরিতমানসা পাসাদপাকারচযতরূপগতা তথাগতাভিমুখমভিধাৰন্তং দিস্ৰা হাহাকারসদ্দমকংসু. কেচি পন উপাসকা তং নানপ্পকারেহি নযেহি নিৰারযিতুমারভিংসু. অথ সো বুদ্ধনাগো হত্থিনাগমাযন্তমোলোকেত্ৰা করুণাৰিপ্ফারসীতলহদযো মেত্তায তং ফরি. ততো সো হত্থিনাগো মেত্তাফরণেন মুদুকতহদযসন্তানো অত্তনো দোসাপরাধং ঞত্ৰা লজ্জায ভগৰতো পুরতো ঠাতুং অসক্কোন্তো পথৰিযং পৰিসন্তো ৰিয সিরসা ভগৰতো পাদেসু নিপতি. এৰং নিপন্নো পন সো তিমিরনিকরসদিসসরীরো সঞ্ছাপ্পভানুরঞ্জিতৰরকনকগিরিসিখরসমীপমুপগতো অসিতসলিলধরনিকরো ৰিয ৰিরোচিত্থ.

অথেৰং মুনিরাজপাদমূলে করিরাজানং সিরসা নিপতন্তং দিস্ৰা নাগরজনা পরমপীতিপূরিতহদযা সাধুকারসীহনাদং উক্কুট্ঠিসদ্দং পৰত্তযিংসু. সুরভিকুসুমমালাচন্দনগন্ধচুণ্ণালঙ্কারাদীহি তং অনেকপ্পকারং পূজেসুং. সমন্ততো চেলুক্খেপা পৰত্তিংসু. গগনতলে সুরদুন্দুভিযো অভিনদিংসু. অথ ভগৰা তমসিতগিরিসিখরমিৰ পাদমূলে নিপন্নং দিরদৰরং ওলোকেত্ৰা অঙ্কুসধজজালসঙ্খচক্কালঙ্কতেন করতলেন গজৰরমত্থকং পরামসিত্ৰা তস্স চিত্তাচারানুকূলায ধম্মদেসনায তং অনুসাসি –

‘‘গজৰর ৰদতো সুণোহি ৰাচং, মম হিতমত্থযুতঞ্চ তং ভজাহি;

তৰ ৰধনিরতং পদুট্ঠভাৰং, অপনয সন্তমুপেহি চারুদন্তি.

‘‘লোভেন দোসেন চ মোহতো ৰা, যো পাণিনো হিংসতি ৰারণিন্দ;

সো পাণঘাতী সুচিরম্পি কালং, দুক্খং সুঘোরং নরকেনুভোতি.

‘‘মাকাসি মাতঙ্গ পুনেৰরূপং, কম্মং পমাদেন মদেন ৰাপি;

অৰীচিযং দুক্খমসয্হ কপ্পং, পপ্পোতি পাণং অতিপাতযন্তো.

‘‘দুক্খং সুঘোরং নরকেনুভোত্ৰা, মনুস্সলোকং যদি যাতি ভিয্যো;

অপ্পাযুকো হোতি ৰিরূপরূপো, ৰিহিংসকো দুক্খৰিসেসভাগী.

‘‘যথা চ পাণা পরমং পিযা তে, মহাজনে কুঞ্জর মন্দনাগ;

তথা পরস্সাপি পিযাতি ঞত্ৰা, পাণাতিপাতো পরিৰজ্জনীযো.

‘‘দোসে চ হিংসানিরতে ৰিদিত্ৰা, পাণাতিপাতা ৰিরতে গুণে চ;

পাণাতিপাতং পরিৰজ্জয ত্ৰং, সগ্গে সুখং ইচ্ছসি চে পরত্থ.

‘‘পাণাতিপাতা ৰিরতো সুদন্তো, পিযো মনাপো ভৰতীধ লোকে;

কাযস্স ভেদা চ পরং পনস্স, সগ্গাধিৰাসং কথযন্তি বুদ্ধা.

‘‘দুক্খাগমং নিচ্ছতি কোচি লোকে, সব্বোপি জাতো সুখমেসতেৰ;

তস্মা মহানাগ ৰিহায হিংসং, ভাৰেহি মেত্তং করুণঞ্চ কালে’’তি.

অথেৰং দসবলেনানুসাসিযমানো দন্তিৰরো সঞ্ঞং পটিলভিত্ৰা পরমৰিনীতো ৰিনযাচারসম্পন্নো সিস্সো ৰিয অহোসি. এৰং সো পিযদস্সী ভগৰা অম্হাকং সত্থা ৰিয ধনপালং দোণমুখং করিৰরং দমিত্ৰা তত্থ মহাজনসমাগমে ধম্মং দেসেসি. তদা অসীতিকোটিসহস্সানং ধম্মাভিসমযো অহোসি. অযং ততিযো অভিসমযো অহোসি. তেন ৰুত্তং –

১. ‘‘সুজাতস্স অপরেন, সযম্ভূ লোকনাযকো;

দুরাসদো অসমসমো, পিযদস্সী মহাযসো.

২. ‘‘সোপি বুদ্ধো অমিতযসো, আদিচ্চোৰ ৰিরোচতি;

সব্বং তমং নিহন্ত্ৰান, ধম্মচক্কং পৰত্তযি.

৩. ‘‘তস্সাপি অতুলতেজস্স, অহেসুং অভিসমযা তযো;

কোটিসতসহস্সানং, পঠমাভিসমযো অহু.

৪. ‘‘সুদস্সনো দেৰরাজা, মিচ্ছাদিট্ঠিমরোচযি;

তস্স দিট্ঠিং ৰিনোদেন্তো, সত্থা ধম্মমদেসযি.

৫. ‘‘জনসন্নিপাতো অতুলো, মহাসন্নিপতী তদা;

নৰুতিকোটিসহস্সানং, দুতিযাভিসমযো অহু.

৬. ‘‘যদা দোণমুখং হত্থিং, ৰিনেসি নরসারথি;

অসীতিকোটিসহস্সানং, ততিযাভিসমযো অহূ’’তি.

সুমঙ্গলনগরে পালিতো নাম রাজপুত্তো চ পুরোহিতপুত্তো সব্বদস্সিকুমারো চাতি দ্ৰে সহাযকা অহেসুং. তে পিযদস্সিম্হি সম্মাসম্বুদ্ধে চারিকং চরন্তে ‘‘অত্তনো নগরং সম্পত্তো’’তি সুত্ৰা কোটিসতসহস্সপরিৰারা পচ্চুগ্গমনং কত্ৰা তস্স ধম্মং সুত্ৰা সত্তাহং মহাদানং দত্ৰা সত্তমে দিৰসে ভগৰতো ভত্তানুমোদনাৰসানে কোটিসতসহস্সেহি সদ্ধিং পব্বজিত্ৰা অরহত্তং পাপুণিংসু. তেসং পন মজ্ঝে ভগৰা পাতিমোক্খং উদ্দিসি, সো পঠমো সন্নিপাতো অহোসি. অথাপরেন সমযেন সুদস্সনদেৰরাজস্স সমাগমে নৰুতিকোটিযো অরহত্তং পাপুণিংসু. তেহি পরিৰুতো সত্থা পাতিমোক্খং উদ্দিসি, অযং দুতিযো সন্নিপাতো অহোসি. পুন দোণমুখৰিনযনে অসীতিকোটিযো পব্বজিত্ৰা অরহত্তং পাপুণিংসু. তেসং মজ্ঝে ভগৰা পাতিমোক্খং উদ্দিসি, অযং ততিযো সন্নিপাতো অহোসি. তেন ৰুত্তং –

৭. ‘‘সন্নিপাতা তযো আসুং, তস্সাপি পিযদস্সিনো;

কোটিসতসহস্সানং, পঠমো আসি সমাগমো.

৮. ‘‘ততো পরং নৰুতিকোটী, সমিংসু একতো মুনী;

ততিযে সন্নিপাতম্হি, অসীতিকোটিযো অহূ’’তি.

তদা অম্হাকং বোধিসত্তো কস্সপো নাম ব্রাহ্মণমাণৰো ইতিহাসপঞ্চমানং তিণ্ণং ৰেদানং পারগূ হুত্ৰা সত্থু ধম্মদেসনং সুত্ৰা কোটিসতসহস্সপরিচ্চাগেন পরমারামং সঙ্ঘারামং কারেত্ৰা সরণেসু চ পঞ্চসীলেসু চ পতিট্ঠাসি. অথ নং সত্থা – ‘‘ইতো অট্ঠারসকপ্পসতচ্চযেন গোতমো নাম বুদ্ধো লোকে ভৰিস্সতী’’তি ব্যাকাসি. তেন ৰুত্তং –

৯. ‘‘অহং তেন সমযেন, কস্সপো নাম ব্রাহ্মণো;

অজ্ঝাযকো মন্তধরো, তিণ্ণং ৰেদান পারগূ.

১০. ‘‘তস্স ধম্মং সুণিত্ৰান, পসাদং জনযিং অহং;

কোটিসতসহস্সেহি, সঙ্ঘারামং অমাপযিং.

১১. ‘‘তস্স দত্ৰান আরামং, হট্ঠো সংৰিগ্গমানসো;

সরণে পঞ্চসীলে চ, দল়হং কত্ৰা সমাদিযিং.

১২. ‘‘সোপি মং বুদ্ধো ব্যাকাসি, সঙ্ঘমজ্ঝে নিসীদিয;

অট্ঠারসে কপ্পসতে, অযং বুদ্ধো ভৰিস্সতি.

১৩. ‘‘পধানং পদহিত্ৰান…পে… হেস্সাম সম্মুখা ইমং.

১৪. ‘‘তস্সাপি ৰচনং সুত্ৰা, ভিয্যো চিত্তং পসাদযিং;

উত্তরিং ৰতমধিট্ঠাসিং, দসপারমিপূরিযা’’তি.

তত্থ সরণে পঞ্চসীলে চাতি তীণি সরণানি পঞ্চ সীলানি চাতি অত্থো. অট্ঠারসে কপ্পসতেতি ইতো অট্ঠসতাধিকস্স কপ্পসহস্সস্স অচ্চযেনাতি অত্থো.

তস্স পন ভগৰতো সুধঞ্ঞং নাম নগরং অহোসি. পিতা সুদত্তো নাম রাজা, মাতা সুচন্দা নাম দেৰী, পালিতো চ সব্বদস্সী চ দ্ৰে অগ্গসাৰকা, সোভিতো নামুপট্ঠাকো, সুজাতা চ ধম্মদিন্না চ দ্ৰে অগ্গসাৰিকা, ককুধরুক্খো বোধি, সরীরং অসীতিহত্থুব্বেধং অহোসি, নৰুতিৰস্সসহস্সানি আযু, ৰিমলা নামস্স অগ্গমহেসী অহোসি, কঞ্চনাৰেল়ো নাম পুত্তো, সো আজঞ্ঞরথেন নিক্খমীতি. তেন ৰুত্তং –

১৫. ‘‘সুধঞ্ঞং নাম নগরং, সুদত্তো নাম খত্তিযো;

চন্দা নামাসি জনিকা, পিযদস্সিস্স সত্থুনো.

২০. ‘‘পালিতো সব্বদস্সী চ, অহেসুং অগ্গসাৰকা;

সোভিতো নামুপট্ঠাকো, পিযদস্সিস্স সত্থুনো.

২১. ‘‘সুজাতা ধম্মদিন্না চ, অহেসুং অগ্গসাৰিকা;

বোধি তস্স ভগৰতো, ককুধোতি পৰুচ্চতি.

২৩. ‘‘সোপি বুদ্ধো অমিতযসো, দ্ৰত্তিংসৰরলক্খণো;

অসীতিহত্থমুব্বেধো, সালরাজাৰ দিস্সতি.

২৪. ‘‘অগ্গিচন্দসূরিযানং, নত্থি তাদিসিকা পভা;

যথা অহু পভা তস্স, অসমস্স মহেসিনো.

২৫. ‘‘তস্সাপি দেৰদেৰস্স, আযু তাৰতকং অহু;

নৰুতিৰস্সসহস্সানি, লোকে অট্ঠাসি চক্খুমা.

২৬. ‘‘সোপি বুদ্ধো অসমসমো, যুগানিপি তানি অতুলিযানি;

সব্বং তমন্তরহিতং, ননু রিত্তা সব্বসঙ্খারা’’তি.

তত্থ সালরাজা ৰাতি সব্বফালিফুল্লো পরমরমণীযদস্সনো সমৰট্টক্খন্ধো সালরাজা ৰিয দিস্সতি. যুগানিপি তানীতি অগ্গসাৰকযুগাদীনি যুগল়ানি. সেসগাথাসু সব্বত্থ উত্তানমেৰাতি.

পিযদস্সীবুদ্ধৰংসৰণ্ণনা নিট্ঠিতা.

নিট্ঠিতো তেরসমো বুদ্ধৰংসো.