১৪. সুজাতবুদ্ধৰংসৰণ্ণনা

ততো তস্সাপরভাগে তস্মিংযেৰ মণ্ডকপ্পে অনুপুব্বেন অপরিমিতাযুকেসু সত্তেসু অনুক্কমেন পরিহাযিত্ৰা নৰুতিৰস্সসহস্সাযুকেসু জাতেসু সুজাতরূপকাযো পরিসুদ্ধজাতো সুজাতো নাম সত্থা লোকে উদপাদি. সোপি পারমিযো পূরেত্ৰা তুসিতপুরে নিব্বত্তিত্ৰা ততো চৰিত্ৰা সুমঙ্গলনগরে উগ্গতস্স নাম রঞ্ঞো কুলে পভাৰতিযা নাম অগ্গমহেসিযা কুচ্ছিস্মিং পটিসন্ধিং গহেত্ৰা দসন্নং মাসানং অচ্চযেন মাতুকুচ্ছিতো নিক্খমি. নামগ্গহণদিৰসে চস্স নামং করোন্তো সকলজম্বুদীপে সব্বসত্তানং সুখং জনযন্তো জাতোতি ‘‘সুজাতো’’ ত্ৰেৰস্স নামমকংসু. সো নৰৰস্সসহস্সানি অগারং অজ্ঝাৰসি. সিরী উপসিরী সিরিনন্দো চাতি তস্স তযো পাসাদা অহেসুং. সিরীনন্দাদেৰিপ্পমুখানি তেৰীসতি ইত্থিসহস্সানি পচ্চুপট্ঠিতানি অহেসুং.

সো চত্তারি নিমিত্তানি দিস্ৰা সিরীনন্দাদেৰিযা উপসেনে নাম পুত্তে উপ্পন্নে হংসৰহং নাম ৰরতুরঙ্গমারুয্হ মহাভিনিক্খমনং নিক্খমিত্ৰা পব্বজি. তং পন পব্বজন্তং মনুস্সানং কোটি অনুপব্বজি. অথ সো তেহি পরিৰুতো নৰ মাসে পধানচরিযং চরিত্ৰা ৰিসাখপুণ্ণমায সিরীনন্দননগরে সিরীনন্দনসেট্ঠিস্স ধীতায দিন্নং পরমমধুরং মধুপাযাসং পরিভুঞ্জিত্ৰা সালৰনে দিৰাৰিহারং ৰীতিনামেত্ৰা সাযন্হসমযে সুনন্দাজীৰকেন দিন্না অট্ঠ তিণমুট্ঠিযো গহেত্ৰা ৰেল়ুবোধিং উপসঙ্কমিত্ৰা তেত্তিংসহত্থৰিত্থতং তিণসন্থরং সন্থরিত্ৰা সূরিযে ধরমানেযেৰ সমারং মারবলং ৰিধমিত্ৰা সম্মাসম্বোধিং পটিৰিজ্ঝিত্ৰা সব্ববুদ্ধানুচিণ্ণং উদানং উদানেত্ৰা সত্তসত্তাহং বোধিসমীপেযেৰ ৰীতিনামেত্ৰা ব্রহ্মুনা আযাচিতো অত্তনো কনিট্ঠভাতিকং সুদস্সনকুমারং পুরোহিতপুত্তং দেৰকুমারঞ্চ চতুসচ্চধম্মপটিৰেধসমত্থে দিস্ৰা আকাসেন গন্ত্ৰা সুমঙ্গলনগরসমীপে সুমঙ্গলুয্যানে ওতরিত্ৰা উয্যানপালেন অত্তনো ভাতিকং সুদস্সনকুমারং পুরোহিতপুত্তং দেৰকুমারঞ্চ পক্কোসাপেত্ৰা তেসং সপরিৰারানং মজ্ঝে নিসিন্নো ধম্মচক্কং পৰত্তেসি. তত্থ অসীতিযা কোটীনং ধম্মাভিসমযো অহোসি. অযং পঠমাভিসমযো অহোসি.

যদা পন ভগৰা সুদস্সনুয্যানদ্ৰারে মহাসালমূলে যমকপাটিহারিযং কত্ৰা দেৰেসু তাৰতিংসেসু ৰস্সাৰাসং উপাগমি, তদা সত্তত্তিংসসতসহস্সানং ধম্মাভিসমযো অহোসি. অযং দুতিযো অভিসমযো অহোসি. যদা পন সুজাতো দসবলো পিতুসন্তিকং অগমাসি, তদা সট্ঠিসতসহস্সানং ধম্মাভিসমযো অহোসি. অযং ততিযো অভিসমযো অহোসি. তেন ৰুত্তং –

১. ‘‘তত্থেৰ মণ্ডকপ্পম্হি, সুজাতো নাম নাযকো;

সীহহনুসভক্খন্ধো, অপ্পমেয্যো দুরাসদো.

২. ‘‘চন্দোৰ ৰিমলো বুদ্ধো, সতরংসীৰ পতাপৰা;

এৰং সোভতি সম্বুদ্ধো, জলন্তো সিরিযা সদা.

৩. ‘‘পাপুণিত্ৰান সম্বুদ্ধো, কেৰলং বোধিমুত্তমং;

সুমঙ্গলম্হি নগরে, ধম্মচক্কং পৰত্তযি.

৪. ‘‘দেসেন্তে পৰরং ধম্মং, সুজাতে লোকনাযকে;

অসীতিকোটী অভিসমিংসু, পঠমে ধম্মদেসনে.

৫. ‘‘যদা সুজাতো অমিতযসো, দেৰে ৰস্সং উপাগমি;

সত্তত্তিংসসতসহস্সানং, দুতিযাভিসমযো অহু.

৬. ‘‘যদা সুজাতো অসমসমো, উপগচ্ছি পিতুসন্তিকং;

সট্ঠিসতসহস্সানং, ততিযাভিসমযো অহূ’’তি.

তত্থ তত্থেৰ মণ্ডকপ্পম্হীতি যস্মিং মণ্ডকপ্পে সুমেধো ভগৰা উপ্পন্নো, তত্থেৰ কপ্পে সুজাতোপি ভগৰা উপ্পন্নোতি অত্থো. সীহহনূতি সীহস্স ৰিয হনু অস্সাতি সীহহনু. সীহস্স পন হেট্ঠিমহনুমেৰ পুণ্ণং হোতি, ন উপরিমং. অস্স পন মহাপুরিসস্স সীহস্স হেট্ঠিমহনু ৰিয দ্ৰেপি পরিপুণ্ণানি দ্ৰাদসিযং পক্খস্স চন্দসদিসানি হোন্তি. তেন ৰুত্তং ‘‘সীহহনূ’’তি. উসভক্খন্ধোতি উসভস্সেৰ সমপ্পৰট্টক্খন্ধো, সুৰট্টিতসুৰণ্ণালিঙ্গসদিসক্খন্ধোতি অত্থো. সতরংসীৰাতি দিৰসকরো ৰিয. সিরিযাতি বুদ্ধসিরিযা. বোধিমুত্তমন্তি উত্তমং সম্বোধিং.

সুধম্মৰতীনগরে সুধম্মুয্যানে আগতানং মনুস্সানং ধম্মং দেসেত্ৰা সট্ঠিসতসহস্সানি এহিভিক্খুভাৰেন পব্বাজেত্ৰা তেসং মজ্ঝে পাতিমোক্খং উদ্দিসি, সো পঠমো সন্নিপাতো অহোসি. ততো পরং তিদিৰোরোহণে ভগৰতো পঞ্ঞাসসতসহস্সানং দুতিযো সন্নিপাতো অহোসি. পুন ‘‘সুদস্সনকুমারো ভগৰতো সন্তিকে পব্বজিত্ৰা অরহত্তং পত্তো’’তি সুত্ৰা ‘‘মযম্পি পব্বজিস্সামা’’তি আগতানি চত্তারি পুরিসসতসহস্সানি গহেত্ৰা সুদস্সনত্থেরো সুজাতং নরাসভং উপসঙ্কমি. তেসং ভগৰা ধম্মং দেসেত্ৰা এহিভিক্খুপব্বজ্জায পব্বাজেত্ৰা চতুরঙ্গসমন্নাগতে সন্নিপাতে পাতিমোক্খং উদ্দিসি, সো ততিযো সন্নিপাতো অহোসি. তেন ৰুত্তং –

৭. ‘‘সন্নিপাতা তযো আসুং, সুজাতস্স মহেসিনো;

খীণাসৰানং ৰিমলানং, সন্তচিত্তান তাদিনং.

৮. ‘‘অভিঞ্ঞাবলপ্পত্তানং, অপ্পত্তানং ভৰাভৰে;

সট্ঠিসতসহস্সানি, পঠমং সন্নিপতিংসু তে.

৯. ‘‘পুনাপরং সন্নিপাতে, তিদিৰোরোহণে জিনে;

পঞ্ঞাসসতসহস্সানং, দুতিযো আসি সমাগমো.

১০. ‘‘উপসঙ্কমন্তো নরাসভং, সুদস্সনো অগ্গসাৰকো;

চতূহি সতসহস্সেহি, সম্বুদ্ধং উপসঙ্কমী’’তি.

তত্থ অপ্পত্তানন্তি ভৰাভৰে অসম্পত্তানন্তি অত্থো. ‘‘অপ্পৰত্তা ভৰাভৰে’’তিপি পাঠো, সোযেৰত্থো. তিদিৰোরোহণেতি সগ্গলোকতো ওতরন্তে কত্তুকারকে দট্ঠব্বো. কারকৰিপল্লাসেন ৰুত্তং. অথ ৰা তিদিৰোরোহণেতি তিদিৰতো ওতরণে. জিনেতি জিনস্স, সামিঅত্থে ভুম্মং দট্ঠব্বং.

তদা কির অম্হাকং বোধিসত্তো চক্কৰত্তিরাজা হুত্ৰা ‘‘বুদ্ধো লোকে উপ্পন্নো’’তি সুত্ৰা ভগৰন্তং উপসঙ্কমিত্ৰা ধম্মকথং সুত্ৰা বুদ্ধপ্পমুখস্স ভিক্খুসঙ্ঘস্স সত্তহি রতনেহি সদ্ধিং চতুমহাদীপরজ্জং দত্ৰা সত্থু সন্তিকে পব্বজি. সকলদীপৰাসিনো জনা রট্ঠুপ্পাদং গহেত্ৰা আরামিককিচ্চং সাধেত্ৰা বুদ্ধপ্পমুখস্স সঙ্ঘস্স নিচ্চং মহাদানমদংসু. সোপি নং সত্থা – ‘‘অনাগতে গোতমো নাম বুদ্ধো ভৰিস্সতী’’তি ব্যাকাসি. তেন ৰুত্তং –

১১. ‘‘অহং তেন সমযেন, চতুদীপম্হি ইস্সরো;

অন্তলিক্খচরো আসিং, চক্কৰত্তী মহব্বলো.

১৩. ‘‘চতুদীপে মহারজ্জং রতনে সত্ত উত্তমে;

বুদ্ধে নিয্যাতযিত্ৰান, পব্বজিং তস্স সন্তিকে.

১৪. ‘‘আরামিকা জনপদে, উট্ঠানং পটিপিণ্ডিয;

উপনেন্তি ভিক্খুসঙ্ঘস্স, পচ্চযং সযনাসনং.

১৫. ‘‘সোপি মং বুদ্ধো ব্যাকাসি, দসসহস্সিম্হি ইস্সরো;

তিংসকপ্পসহস্সম্হি, অযং বুদ্ধো ভৰিস্সতি.

১৬. ‘‘পধানং পদহিত্ৰান…পে… হেস্সাম সম্মুখা ইমং.

১৭. ‘‘তস্সাপি চৰনং সুত্ৰা, ভিয্যো হাসং জনেসহং;

অধিট্ঠহিং ৰতং উগ্গং, দসপারমিপূরিযা.

১৮. ‘‘সুত্তন্তং ৰিনযঞ্চাপি, নৰঙ্গং সত্থুসাসনং;

সব্বং পরিযাপুণিত্ৰান, সোভযিং জিনসাসনং.

১৯. ‘‘তত্থপ্পমত্তো ৰিহরন্তো, ব্রহ্মং ভাৰেত্ৰ ভাৰনং;

অভিঞ্ঞাপারমিং গন্ত্ৰা, ব্রহ্মলোকমগঞ্ছহ’’ন্তি.

তত্থ চতুদীপম্হীতি সপরিৰারদীপানং চতুন্নং মহাদীপানন্তি অত্থো. অন্তলিক্খচরোতি চক্করতনং পুরক্খত্ৰা আকাসচরো. রতনে সত্তাতি হত্থিরতনাদীনি সত্ত রতনানি. উত্তমেতি উত্তমানি. অথ ৰা উত্তমে বুদ্ধেতি অত্থো দট্ঠব্বো. নিয্যাতযিত্ৰানাতি দত্ৰান. উট্ঠানন্তি রট্ঠুপ্পাদং, আযন্তি অত্থো. পটিপিণ্ডিযাতি রাসিং কত্ৰা সংকড্ঢিত্ৰা. পচ্চযন্তি চীৰরাদিৰিৰিধং পচ্চযং. দসসহস্সিম্হি ইস্সরোতি দসসহস্সিলোকধাতুযং ইস্সরো, তদেতং জাতিক্খেত্তং সন্ধায ৰুত্তন্তি ৰেদিতব্বং. অনন্তানং লোকধাতূনং ইস্সরো ভগৰা. তিংসকপ্পসহস্সম্হীতি ইতো পট্ঠায তিংসকপ্পসহস্সানং মত্থকেতি অত্থো.

তস্স পন সুজাতস্স ভগৰতো সুমঙ্গলং নাম নগরং অহোসি, উগ্গতো নাম রাজা পিতা, পভাৰতী নাম মাতা, সুদস্সনো চ সুদেৰো চ দ্ৰে অগ্গসাৰকা, নারদো নামুপট্ঠাকো, নাগা চ নাগসমালা চ দ্ৰে অগ্গসাৰিকা, মহাৰেল়ুরুক্খো বোধি, সো কির মন্দচ্ছিদ্দো ঘনক্খন্ধো পরমরমণীযো ৰেল়ুরিযমণিৰণ্ণেহি ৰিমলেহি পত্তেহি সঞ্ছন্নৰিপুলসাখো মযূরপিঞ্ছকলাপো ৰিয ৰিরোচিত্থ. তস্স পন ভগৰতো সরীরং পণ্ণাসহত্থুব্বেধং অহোসি, আযু নৰুতিৰস্সসহস্সানি, সিরীনন্দা নামস্স অগ্গমহেসী, উপসেনো নাম পুত্তো. তুরঙ্গৰরযানেন নিক্খমি. সো পন চন্দৰতীনগরে সিলারামে পরিনিব্বাযি. তেন ৰুত্তং –

২০. ‘‘সুমঙ্গলং নাম নগরং, উগ্গতো নাম খত্তিযো;

মাতা পভাৰতী নাম, সুজাতস্স মহেসিনো.

২৫. ‘‘সুদস্সনো সুদেৰো চ, অহেসুং অগ্গসাৰকা;

নারদো নামুপট্ঠাকো, সুজাতস্স মহেসিনো.

২৬. ‘‘নাগো চ নাগসমালা চ, অহেসুং অগ্গসাৰিকা;

বোধি তস্স ভগৰতো, মহাৰেল়ূতি ৰুচ্চতি.

২৭. ‘‘সো চ রুক্খো ঘনক্খন্ধো, অচ্ছিদ্দো হোতি পত্তিকো;

উজু ৰংসো ব্রহা হোতি, দস্সনীযো মনোরমো.

২৮. ‘‘একক্খন্ধো পৰড্ঢিত্ৰা, ততো সাখা পভিজ্জতি;

যথা সুবদ্ধো মোরহত্থো, এৰং সোভতি সো দুমো.

২৯. ‘‘ন তস্স কণ্টকা হোন্তি, নাপি ছিদ্দং মহা অহু;

ৰিত্থিণ্ণসাখো অৰিরলো, সন্দচ্ছাযো মনোরমো.

৩১. ‘‘পঞ্ঞাসরতনো আসি, উচ্চত্তনেন সো জিনো;

সব্বাকারৰরূপেতো, সব্বগুণমুপাগতো.

৩২. ‘‘তস্স পভা অসমসমা, নিদ্ধাৰতি সমন্ততো;

অপ্পমাণো অতুলিযো, ওপম্মেহি অনূপমো.

৩৩. ‘‘নৰুতিৰস্সসহস্সানি, আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

৩৪. ‘‘যথাপি সাগরে ঊমী, গগনে তারকা যথা;

এৰং তদা পাৰচনং, অরহন্তেহি চিত্তিতং.

৩৫. ‘‘সো চ বুদ্ধো অসমসমো, গুণানি চ তানি অতুলিযানি;

সব্বং তমন্তরহিতং, ননু রিত্তা সব্বসঙ্খারা’’তি.

তত্থ অচ্ছিদ্দোতি অপ্পচ্ছিদ্দো. ‘‘অনুদরা কঞ্ঞা’’তিআদীসু ৰিয দট্ঠব্বং. কেচি ‘‘ছিদ্দং হোতি পরিত্তক’’ন্তি পঠন্তি. পত্তিকোতি বহুপত্তো, কাচমণিৰণ্ণেহি পত্তেহি সঞ্ছন্নোতি অত্থো. উজূতি অৰঙ্কো অকুটিলো. ৰংসোতি ৰেল়ু. ব্রহাতি সমন্ততো মহা. একক্খন্ধোতি অৰনিরুহো একো অদুতিযো চাতি অত্থো. পৰড্ঢিত্ৰাতি ৰড্ঢিত্ৰা. ততো সাখা পভিজ্জতীতি ততো ৰংসগ্গতো পঞ্চৰিধা সাখা নিক্খমিত্ৰা পভিজ্জিত্থ. ‘‘ততো সাখা পভিজ্জথা’’তিপি পাঠো. সুবদ্ধোতি সুট্ঠু পঞ্চবন্ধনাকারেন বদ্ধো. মোরহত্থোতি আতপসন্নিৰারণত্থং কতো বদ্ধো মোরপিঞ্ছকলাপো ৰুচ্চতি.

ন তস্স কণ্টকা হোন্তীতি তস্স ৰংসস্স কণ্টকিনোপি রুক্খস্স কণ্টকা নাহেসুং. অৰিরলোতি অৰিরলসাখাসঞ্ছন্নো. সন্দচ্ছাযোতি ঘনচ্ছাযো, অৰিরলত্তাৰ সন্দচ্ছাযোতি ৰুত্তো. পঞ্ঞাসরতনো আসীতি পঞ্ঞাসহত্থো অহোসি. সব্বাকারৰরূপেতোতি সব্বেন আকারেন ৰরেহিযেৰ উপেতো সব্বাকারৰরূপেতো নাম. সব্বগুণমুপাগতোতি অনন্তরপদস্সেৰ ৰেৰচনমত্তং.

অপ্পমাণোতি পমাণরহিতো, পমাণং গহেতুং অসক্কুণেয্যত্তা ৰা অপ্পমাণো. অতুলিযোতি অতুলো, কেনচি অসদিসোতি অত্থো. ওপম্মেহীতি উপমিতব্বেহি. অনূপমোতি উপমারহিতো, ‘‘ইমিনা চ ইমিনা চ সদিসো’’তি ৰত্তুং অসক্কুণেয্যভাৰতো অনূপমোতি অত্থো. গুণানি চ তানীতি গুণা চ তে, সব্বঞ্ঞুতঞ্ঞাণাদযো গুণাতি অত্থো. লিঙ্গৰিপল্লাসেন ৰুত্তং. সেসং সব্বত্থ উত্তানত্থমেৰাতি.

সুজাতবুদ্ধৰংসৰণ্ণনা নিট্ঠিতা.

নিট্ঠিতো দ্ৰাদসমো বুদ্ধৰংসো.