১৩. সুমেধবুদ্ধৰংসৰণ্ণনা

পদুমুত্তরে পন সম্মাসম্বুদ্ধে পরিনিব্বুতে সাসনেপিস্স অন্তরহিতে সত্ততিকপ্পসহস্সানি বুদ্ধা নুপ্পজ্জিংসু, বুদ্ধসুঞ্ঞানি অহেসুং. ইতো পট্ঠায তিংসকপ্পসহস্সানং মত্থকে একস্মিং কপ্পে সুমেধো সুজাতো চাতি দ্ৰে সম্মাসম্বুদ্ধা নিব্বত্তিংসু. তত্থ অধিগতমেধো সুমেধো নাম বোধিসত্তো পারমিযো পূরেত্ৰা তুসিতপুরে নিব্বত্তিত্ৰা ততো চৰিত্ৰা সুদস্সননগরে সুদত্তস্স নাম রঞ্ঞো অগ্গমহেসিযা সুদত্তায নাম দেৰিযা কুচ্ছিস্মিং পটিসন্ধিং গহেত্ৰা দসন্নং মাসানং অচ্চযেন সুদস্সনুয্যানে তরুণদিৰসকরো ৰিয সলিলধরৰিৰরগতো মাতুকুচ্ছিতো নিক্খমি. সো নৰৰস্সসহস্সানি অগারং অজ্ঝাৰসি. তস্স কির সুচন্দন-কঞ্চন-সিরিৰড্ঢননামকা তযো পাসাদা অহেসুং. সুমনমহাদেৰিপ্পমুখানি অট্ঠচত্তালীসইত্থিসহস্সানি পচ্চুপট্ঠিতানি অহেসুং.

সো চত্তারি নিমিত্তানি দিস্ৰা সুমনদেৰিযা পুনব্বসুমিত্তে নাম পুত্তে জাতে হত্থিযানেন মহাভিনিক্খমনং নিক্খমিত্ৰা পব্বজি. মনুস্সানঞ্চ কোটিসতমনুপব্বজি. সো তেহি পরিৰুতো অড্ঢমাসং পধানচরিযং চরিত্ৰা ৰিসাখপুণ্ণমায নকুলনিগমে নকুলসেট্ঠিধীতায দিন্নং মধুপাযাসং পরিভুঞ্জিত্ৰা সালৰনে দিৰাৰিহারং ৰীতিনামেত্ৰা সিরিৰড্ঢাজীৰকেন দিন্না অট্ঠ তিণমুট্ঠিযো গহেত্ৰা নীপবোধিমূলে ৰীসতিহত্থৰিত্থতং তিণসন্থরং সন্থরিত্ৰা সমারং মারবলং ৰিধমিত্ৰা অভিসম্বোধিং পাপুণিত্ৰা ‘‘অনেকজাতিসংসারং…পে… তণ্হানং খযমজ্ঝগা’’তি উদানং উদানেত্ৰা সত্তসত্তাহং বোধিসমীপেযেৰ ৰীতিনামেত্ৰা অট্ঠমে সত্তাহে ব্রহ্মুনো ধম্মদেসনাযাচনং সম্পটিচ্ছিত্ৰা ভব্বপুগ্গলে ওলোকেন্তো অত্তনো কনিট্ঠভাতিকং সরণকুমারঞ্চ সব্বকামিকুমারঞ্চ অত্তনা সদ্ধিং পব্বজিতানং ভিক্খূনঞ্চ কোটিসতং চতুসচ্চধম্মপটিৰেধসমত্থে দিস্ৰা আকাসেন গন্ত্ৰা সুদস্সননগরসমীপে সুদস্সনুয্যানে ওতরিত্ৰা উয্যানপালেন অত্তনো ভাতিকে পক্কোসাপেত্ৰা তেসং পরিৰারানং মজ্ঝে ধম্মচক্কং পৰত্তেসি. তদা কোটিসতসহস্সানং ধম্মাভিসমযো অহোসি, অযং পঠমো অভিসমযো. তেন ৰুত্তং –

১. ‘‘পদুমুত্তরস্স অপরেন, সুমেধো নাম নাযকো;

দুরাসদো উগ্গতেজো, সব্বলোকুত্তমো মুনি.

২. ‘‘পসন্ননেত্তো সুমুখো, ব্রহা উজু পতাপৰা;

হিতেসী সব্বসত্তানং, বহূ মোচেসি বন্ধনা.

৩. ‘‘যদা বুদ্ধো পাপুণিত্ৰা, কেৰলং বোধিমুত্তমং;

সুদস্সনম্হি নগরে, ধম্মচক্কং পৰত্তযি.

৪. ‘‘তস্সাভিসমযা তীণি, অহেসুং ধম্মদেসনে;

কোটিসতসহস্সানং, পঠমাভিসমযো অহূ’’তি.

তত্থ উগ্গতেজোতি উগ্গততেজো. পসন্ননেত্তোতি সুট্ঠু পসন্ননযনো, ধোৰিত্ৰা মজ্জিত্ৰা ঠপিতমণিগুল়িকা ৰিয পসন্নানি নেত্তানি হোন্তি. তস্মা সো ‘‘পসন্ননেত্তো’’তি ৰুত্তো. মুদুসিনিদ্ধনীলৰিমলসুখুমপখুমাচিতসুপ্পসন্ননযনোতি অত্থো. ‘‘সুপ্পসন্নপঞ্চনযনো’’তিপি ৰত্তুং ৰট্টতি. সুমুখোতি পরিপুণ্ণসরদসমযচন্দসদিসৰদনো. ব্রহাতি অট্ঠাসীতিহত্থপ্পমাণসরীরত্তা ব্রহা মহন্তো, অঞ্ঞেহি অসাধারণসরীরপ্পমাণোতি অত্থো. উজূতি ব্রহ্মুজুগত্তো উজুমেৰ উগ্গতসরীরো দেৰনগরে সমুস্সিতসুৰণ্ণতোরণসদিসৰরসরীরোতি অত্থো. পতাপৰাতি ৰিজ্জোতমানসরীরো. হিতেসীতি হিতগৰেসী. অভিসমযা তীণীতি অভিসমযা তযো, লিঙ্গৰিপল্লাসো কতোতি.

যদা পন ভগৰা কুম্ভকণ্ণসদিসানুভাৰং কুম্ভকণ্ণং নাম মনুস্সভক্খং যক্খং মহাঅটৰিমুখে সন্দিস্সমানঘোরসরীরং ৰত্তনিঅটৰিসঞ্চারং পচ্ছিন্দিত্ৰা পৰত্তমানং পচ্চূসসমযে মহাকরুণাসমাপত্তিং সমাপজ্জিত্ৰা ততো ৰুট্ঠায লোকং ওলোকেন্তো দিস্ৰা এককোৰ অসহাযো তস্স যক্খস্স ভৰনং গন্ত্ৰা অন্তো পৰিসিত্ৰা পঞ্ঞত্তে সিরিসযনে নিসীদি. অথ খো সো যক্খো মক্খং অসহমানো দণ্ডাহতো ঘোরৰিসো আসিৰিসো ৰিয সংকুদ্ধো দসবলং ভিংসাপেতুকামো অত্তনো অত্তভাৰং ঘোরতরং কত্ৰা পব্বতসদিসং সীসং কত্ৰা সূরিযমণ্ডলসদিসানি অক্খীনি নিম্মিনিত্ৰা নঙ্গলসীসসদিসাতিদীঘৰিপুলতিখিণদাঠাযো কত্ৰা ওলম্বনীলৰিপুলৰিসমোদরো তালক্খন্ধসদিসবাহুচিপিটকৰিরূপৰঙ্কনাসো পব্বতবিলসদিসৰিপুলরত্তমুখো থূলপিঙ্গলখরফরুসকেসো অতিভযানকদস্সনো হুত্ৰা আগন্ত্ৰা সুমেধস্স ভগৰতো পুরতো ঠত্ৰা পধূপাযন্তো পজ্জলন্তো পাসাণপব্বতগ্গিজাল-সলিল-কদ্দম-ছারিকাযুধঙ্গার-ৰালুকপ্পকারা নৰৰিধা ৰস্সৰুট্ঠিযো ৰস্সেত্ৰাপি ভগৰতো লোমগ্গমত্তম্পি চালেতুং অসক্কোন্তো ‘‘ভগৰন্তং পঞ্হং পুচ্ছিত্ৰা মারেস্সামী’’তি আল়ৰকো ৰিয পঞ্হং পুচ্ছি. অযং ভগৰা পঞ্হাব্যাকরণেন তং যক্খং ৰিনযমুপনেসি. ততো দুতিযদিৰসে কিরস্স রট্ঠৰাসিনো মনুস্সা সকটভরিতেন ভত্তেন সহ রাজকুমারং আহরিত্ৰা যক্খস্স অদংসু. অথ যক্খো রাজকুমারং বুদ্ধস্স অদাসি. অটৰিদ্ৰারে ঠিতমনুস্সা ভগৰন্তং উপসঙ্কমিংসু. তদা তস্মিং সমাগমে দসবলো যক্খস্স মনোনুকূলং ধম্মং দেসেন্তো. নৰুতিকোটিসহস্সানং পাণীনং ধম্মচক্খুং উপ্পাদেসি, সো দুতিযো ধম্মাভিসমযো অহোসি. তেন ৰুত্তং –

৫. ‘‘পুনাপরং কুম্ভকণ্ণং, যক্খং সো দমযী জিনো;

নৰুতিকোটিসহস্সানং, দুতিযাভিসমযো অহূ’’তি.

যদা পন উপকারিনগরে সিরিনন্দনুয্যানে চত্তারি সচ্চানি পকাসযি, তদা অসীতিকোটিসতসহস্সানং ততিযো ধম্মাভিসমযো অহোসি. তেন ৰুত্তং –

৬. ‘‘পুনাপরং অমিতযসো, চতুসচ্চং পকাসযি;

অসীতিকোটিসহস্সানং, ততিযাভিসমযো অহূ’’তি.

সুমেধস্সাপি ভগৰতো তযো সাৰকসন্নিপাতা অহেসুং. পঠমসন্নিপাতে সুদস্সননগরে কোটিসতখীণাসৰা অহেসুং. পুন দেৰকূটে পব্বতে কথিনত্থতে দুতিযে নৰুতিকোটিযো. পুন ততিযে ভগৰতি চারিকং চরমানে অসীতিকোটিযো অহেসুং. তেন ৰুত্তং –

৭. ‘‘সন্নিপাতা তযো আসুং, সুমেধস্স মহেসিনো;

খীণাসৰানং ৰিমলানং, সন্তচিত্তান তাদিনং.

৮. ‘‘সুদস্সনং নাম নগরং, উপগঞ্ছি জিনো যদা;

তদা খীণাসৰা ভিক্খূ, সমিংসু সতকোটিযো.

৯. ‘‘পুনাপরং দেৰকূটে, ভিক্খূনং কথিনত্থতে;

তদা নৰুতিকোটীনং, দুতিযো আসি সমাগমো.

১০. ‘‘পুনাপরং দসবলো, যদা চরতি চারিকং;

তদা অসীতিকোটীনং, ততিযো আসি সমাগমো’’তি.

তদা অম্হাকং বোধিসত্তো উত্তরো নাম সব্বজনুত্তরো মাণৰো হুত্ৰা নিদহিত্ৰা ঠপিতংযেৰ অসীতিকোটিধনং ৰিস্সজ্জেত্ৰা বুদ্ধপ্পমুখস্স সঙ্ঘস্স মহাদানং দত্ৰা তদা দসবলস্স ধম্মং সুত্ৰা সরণেসু পতিট্ঠায নিক্খমিত্ৰা পব্বজি. সোপি নং সত্থা ভোজনানুমোদনং করোন্তো – ‘‘অনাগতে গোতমো নাম বুদ্ধো ভৰিস্সতী’’তি ব্যাকাসি. তেন ৰুত্তং –

১১. ‘‘অহং তেন সমযেন, উত্তরো নাম মাণৰো;

অসীতিকোটিযো ময্হং, ঘরে সন্নিচিতং ধনং.

১২. ‘‘কেৰলং সব্বং দত্ৰান, সসঙ্ঘে লোকনাযকে;

সরণং তস্সূপগঞ্ছিং, পব্বজ্জঞ্চাভিরোচযিং.

১৩. ‘‘সোপি মং বুদ্ধো ব্যাকাসি, করোন্তো অনুমোদনং;

তিংসকপ্পসহস্সম্হি, অযং বুদ্ধো ভৰিস্সতি.

১৪. ‘‘পধানং পদহিত্ৰান…পে… হেস্সাম সম্মুখা ইমং’’.

ব্যাকরণগাথা ৰিত্থারেতব্বা.

১৫. ‘‘তস্সাপি ৰচনং সুত্ৰা, ভিয্যো চিত্তং পসাদযিং;

উত্তরিং ৰতমধিট্ঠাসিং, দসপারমিপূরিযা.

১৬. ‘‘সুত্তন্তং ৰিনযং চাপি, নৰঙ্গং সত্থুসাসনং;

সব্বং পরিযাপুণিত্ৰান, সোভযিং জিনসাসনং.

১৭. ‘‘তত্থপ্পমত্তো ৰিহরন্তো, নিসজ্জট্ঠানচঙ্কমে;

অভিঞ্ঞাপারমিং গন্ত্ৰা, ব্রহ্মলোকমগঞ্ছহ’’ন্তি.

তত্থ সন্নিচিতন্তি নিদহিতং নিধানৰসেন. কেৰলন্তি সকলন্তি অত্থো. সব্বন্তি অসেসতো দত্ৰা. সসঙ্ঘেতি সসঙ্ঘস্স. তস্সূপগঞ্ছিন্তি তং উপগঞ্ছিং, উপযোগত্থে সামিৰচনং. অভিরোচযিন্তি পব্বজিং. তিংসকপ্পসহস্সম্হীতি তিংসকপ্পসহস্সেসু অতিক্কন্তেসূতি অত্থো.

তস্স পন সুমেধস্স ভগৰতো সুদস্সনং নাম নগরং অহোসি, সুদত্তো নাম রাজা পিতা, মাতা সুদত্তা নাম, সরণো চ সব্বকামো চ দ্ৰে অগ্গসাৰকা, সাগরো নামুপট্ঠাকো, রামা চ সুরামা চ দ্ৰে অগ্গসাৰিকা, মহানীপরুক্খো বোধি, সরীরং অট্ঠাসীতিহত্থুব্বেধং অহোসি, আযু নৰুতিৰস্সসহস্সানি, নৰৰস্সসহস্সানি অগারং অজ্ঝাৰসি, সুমনা নামস্স অগ্গমহেসী, পুনব্বসুমিত্তো নাম পুত্তো, হত্থিযানেন নিক্খমি. সেসং গাথাসু দিস্সতি. তেন ৰুত্তং –

১৮. ‘‘সুদস্সনং নাম নগরং, সুদত্তো নাম খত্তিযো;

সুদত্তা নাম জনিকা, সুমেধস্স মহেসিনো.

২৩. ‘‘সরণো সব্বকামো চ, অহেসুং অগ্গসাৰকা;

সাগরো নামুপট্ঠাকো, সুমেধস্স মহেসিনো.

২৪. ‘‘রামা চেৰ সুরামা চ, অহেসুং অগ্গসাৰিকা;

বোধি তস্স ভগৰতো, মহানীপোতি ৰুচ্চতি.

২৬. ‘‘অট্ঠাসীতিরতনানি, অচ্চুগ্গতো মহামুনি;

ওভাসেতি দিসা সব্বা, চন্দো তারগণে যথা.

২৭. ‘‘চক্কৰত্তিমণী নাম, যথা তপতি যোজনং;

তথেৰ তস্স রতনং, সমন্তা ফরতি যোজনং.

২৮. ‘‘নৰুতিৰস্সসহস্সানি, আযু ৰিজ্জতি তাৰদে;

তাৰতা তিট্ঠমানো সো, তারেসি জনতং বহুং.

২৯. ‘‘তেৰিজ্জছল়ভিঞ্ঞেহি, বলপ্পত্তেহি তাদিহি;

সমাকুলমিদং আসি, অরহন্তেহি সাধুহি.

৩০. ‘‘তেপি সব্বে অমিতযসা, ৰিপ্পমুত্তা নিরূপধী;

ঞাণালোকং দস্সযিত্ৰা, নিব্বুতা তে মহাযসা’’তি.

তত্থ চন্দো তারগণে যথাতি যথা নাম গগনে পরিপুণ্ণচন্দো তারাগণে ওভাসেতি পকাসেতি, এৰমেৰ সব্বাপি দিসা ওভাসেতীতি অত্থো. কেচি ‘‘চন্দো পন্নরসো যথা’’তি পঠন্তি, সো উত্তানত্থোৰ.

চক্কৰত্তিমণী নামাতি যথা নাম চক্কৰত্তিরঞ্ঞো মণিরতনং চতুহত্থাযামং সকটনাভিসমপরিণাহং চতুরাসীতিমণিসহস্সপরিৰারং তারাগণপরিৰুতস্স সরদসমযপরিপুণ্ণরজনিকরস্স সিরিসমুদযসোভং অৰ্হযন্তমিৰ ৰেপুল্লপব্বততো পরমরমণীযদস্সনং মণিরতনমাগচ্ছতি, তস্সেৰং আগচ্ছন্তস্স সমন্ততো যোজনপ্পমাণং ওকাসং আভা ফরতি, এৰমেৰ তস্স সুমেধস্সাপি ভগৰতো সরীরতো আভারতনং সমন্ততো যোজনং ফরতীতি অত্থো.

তেৰিজ্জছল়ভিঞ্ঞেহীতি তেৰিজ্জেহি ছল়ভিঞ্ঞেহি চাতি অত্থো. বলপ্পত্তেহীতি ইদ্ধিবলপ্পত্তেহি. তাদিহীতি তাদিভাৰপ্পত্তেহি. সমাকুলন্তি সঙ্কিণ্ণং এককাসাৰপজ্জোতং. ইদন্তি সাসনং সন্ধাযাহ, মহীতলং ৰা. অমিতযসাতি অমিতপরিৰারা, অতুলকিত্তিঘোসো ৰা. নিরূপধীতি চতুরূপধিৰিরহিতা. সেসমেত্থ গাথাসু সব্বত্থ পাকটমেৰাতি.

সুমেধবুদ্ধৰংসৰণ্ণনা নিট্ঠিতা.

নিট্ঠিতো একাদসমো বুদ্ধৰংসো.