৭. সকচিন্তনিযৰগ্গো

১. সকচিন্তনিযত্থেরঅপদানৰণ্ণনা

পৰনং কাননং দিস্ৰাতিআদিকং আযস্মতো সকচিন্তনিযত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ৰিপস্সিস্স ভগৰতো কালে একস্মিং কুলগেহে নিব্বত্তো ৰুদ্ধিমন্ৰায তস্স ভগৰতো আযুপরিযোসানে উপ্পন্নো ধরমানং ভগৰন্তং অপাপুণিত্ৰা পরিনিব্বুতকালে ইসিপব্বজ্জং পব্বজিত্ৰা হিমৰন্তে ৰসন্তো ৰিৰেকং রমণীযং একং ৰনং পত্ৰা তত্থেৰেকায কন্দরায পুলিনচেতিযং কত্ৰা ভগৰতি সঞ্ঞং কত্ৰা সধাতুকসঞ্ঞঞ্চ কত্ৰা ৰনপুপ্ফেহি পূজেত্ৰা নমস্সমানো পরিচরি. সো তেন পুঞ্ঞকম্মেন দেৰমনুস্সেসু সংসরন্তো দ্ৰীসু অগ্গং অগ্গসম্পত্তিং অগ্গঞ্চ চক্কৰত্তিসম্পত্তিং অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰিভৰসম্পন্নো সদ্ধাসম্পন্নো সত্থরি পসীদিত্ৰা পব্বজিত্ৰা অরহা ছল়ভিঞ্ঞো অহোসি.

১. সো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো পৰনং কাননং দিস্ৰাতিআদিমাহ. তত্থ পৰনন্তি পকারেন ৰনং পত্থটং ৰিত্থিণ্ণং গহনভূতন্তি পৰনং. কাননং অৰকুচ্ছিতং আননং অৰহনং সততং সীহব্যগ্ঘযক্খরক্খসমদ্দহত্থিঅস্সসুপণ্ণউরগেহি ৰিহঙ্গগণসদ্দকুক্কুটকোকিলেহি ৰা বহলন্তি কাননং, তং কাননসঙ্খাতং পৰনং মনুস্সসদ্দৰিরহিতত্তা অপ্পসদ্দং নিস্সদ্দন্তি অত্থো. অনাৰিলন্তি ন আৰিলং উপদ্দৰরহিতন্তি অত্থো. ইসীনং অনুচিণ্ণন্তি বুদ্ধপচ্চেকবুদ্ধঅরহন্তখীণাসৰসঙ্খাতানং ইসীনং অনুচিণ্ণং নিসেৰিতন্তি অত্থো. আহুতীনং পটিগ্গহন্তি আহুনং ৰুচ্চতি পূজাসক্কারং পটিগ্গহং গেহসদিসন্তি অত্থো.

২. থূপং কত্ৰান ৰেল়ুনাতি ৰেল়ুপেসিকাহি চেতিযং কত্ৰাতি অত্থো. নানাপুপ্ফং সমোকিরিন্তি চম্পকাদীহি অনেকেহি পুপ্ফেহি সমোকিরিং পূজেসিন্তি অত্থো. সম্মুখা ৰিয সম্বুদ্ধন্তি সজীৰমানস্স সম্বুদ্ধস্স সম্মুখা ইৰ নিম্মিতং উপ্পাদিতং চেতিযং অহং অভি ৰিসেসেন ৰন্দিং পণামমকাসিন্তি অত্থো. সেসং সুৰিঞ্ঞেয্যমেৰাতি.

সকচিন্তনিযত্থেরঅপদানৰণ্ণনা সমত্তা.

২. অৰোপুপ্ফিযত্থেরঅপদানৰণ্ণনা

ৰিহারা অভিনিক্খম্মাতিআদিকং আযস্মতো অৰোপুপ্ফিযত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিখিস্স ভগৰতো কালে কুলগেহে নিব্বত্তো ৰিঞ্ঞুতং পত্তো সদ্ধাসম্পন্নো ধম্মং সুত্ৰা সোমনস্সপ্পত্তো নানাপুপ্ফানি উভোহি হত্থেহি গহেত্ৰা বুদ্ধস্স উপরি অব্ভুক্কিরি. সো তেন পুঞ্ঞেন দেৰমনুস্সেসু সংসরন্তো সগ্গসম্পত্তিঞ্চ চক্কৰত্তিসম্পত্তিঞ্চ অনুভৰিত্ৰা সব্বত্থ পূজিতো ইমস্মিং বুদ্ধুপ্পাদে একস্মিং কুলগেহে নিব্বতো ৰুদ্ধিপ্পত্তো সাসনে পসীদিত্ৰা পব্বজিত্ৰা নচিরস্সেৰ অরহা অহোসি. আ সমন্ততো কাসতি দিপ্পতীতি আকাসো, তস্মিং আকাসে পুপ্ফানং অৰকিরিতত্তা অৰোপুপ্ফিযত্থেরোতি পাকটো.

৭. এৰং পত্তসন্তিপদো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো ৰিহারা অভিনিক্খম্মাতিআদিমাহ. তত্থ ৰিহারাতি ৰিসেসেন হরতি চতূহি ইরিযাপথেহি অপতন্তং অত্তভাৰং আহরতি পৰত্তেতি এত্থাতি ৰিহারো, তস্মা ৰিহারা অভি ৰিসেসেন নিক্খম্ম নিক্খমিত্ৰা. অব্ভুট্ঠাসি চ চঙ্কমেতি চঙ্কমনত্থায সট্ঠিরতনে চঙ্কমে অভিৰিসেসেন উট্ঠাসি, অভিরুহীতি অত্থো. চতুসচ্চং পকাসেন্তোতি তস্মিং চঙ্কমে চঙ্কমন্তো দুক্খসমুদযনিরোধমগ্গসচ্চসঙ্খাতং চতুসচ্চং পকাসেন্তো পাকটং করোন্তো অমতং পদং নিব্বানং দেসেন্তো ৰিভজন্তো উত্তানীকরোন্তো তস্মিং চঙ্কমেতি সম্বন্ধো.

৮. সিখিস্স গিরমঞ্ঞায, বুদ্ধসেট্ঠস্স তাদিনোতি সেট্ঠস্স তাদিগুণসমঙ্গিস্স সিখিস্স বুদ্ধস্স গিরং সদ্দং ঘোসং অঞ্ঞায জানিত্ৰা. নানাপুপ্ফং গহেত্ৰানাতি নাগপুন্নাগাদিঅনেকানি পুপ্ফানি গহেত্ৰা আহরিত্ৰা. আকাসম্হি সমোকিরিন্তি চঙ্কমন্তস্স ভগৰতো মুদ্ধনি আকাসে ওকিরিং পূজেসিং.

৯. তেন কম্মেন দ্ৰিপদিন্দাতি দ্ৰিপদানং দেৰব্রহ্মমনুস্সানং ইন্দ পধানভূত. নরাসভ নরানং আসভভূত. পত্তোম্হি অচলং ঠানন্তি তুম্হাকং সন্তিকে পব্বজিত্ৰা অচলং ঠানং নিব্বানং পত্তো অম্হি ভৰামি. হিত্ৰা জযপরাজযন্তি দিব্বমনুস্সসম্পত্তিসঙ্খাতং জযঞ্চ চতুরাপাযদুক্খসঙ্খাতং পরাজযঞ্চ হিত্ৰা ছড্ডেত্ৰা নিব্বানং পত্তোস্মীতি অত্থো. সেসং সুৰিঞ্ঞেয্যমেৰাতি.

অৰোপুপ্ফিযত্থেরঅপদানৰণ্ণনা সমত্তো.

৩. পচ্চাগমনিযত্থেরঅপদানৰণ্ণনা

সিন্ধুযা নদিযা তীরেতিআদিকং আযস্মতো পচ্চাগমনিযত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ৰিপস্সিস্স ভগৰতো কালে সিন্ধুযা গঙ্গায সমীপে চক্কৰাকযোনিযং নিব্বত্তো পুব্বসম্ভারযুত্তত্তা পাণিনো অখাদন্তো সেৰালমেৰ ভক্খযন্তো চরতি. তস্মিং সমযে ৰিপস্সিভগৰা সত্তানুগ্গহং করোন্তো তত্থ অগমাসি. তস্মিং খণে সো চক্কৰাকো ৰিজ্জোতমানং ভগৰন্তং দিস্ৰা পসন্নমানসো তুণ্ডেন সালরুক্খতো সালপুপ্ফং ছিন্দিত্ৰা আগম্ম পূজেসি. সো তেনেৰ চিত্তপ্পসাদেন ততো চুতো দেৰলোকে উপ্পন্নো অপরাপরং ছকামাৰচরসম্পত্তিং অনুভৰিত্ৰা ততো চুতো মনুস্সলোকে উপ্পজ্জিত্ৰা চক্কৰত্তিসম্পত্তিআদযো অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰিঞ্ঞুতং পত্তো পুব্বচরিতৰসেন সত্থরি পসন্নো পব্বজিত্ৰা নচিরস্সেৰ অরহা অহোসি, চক্কৰাকো হুত্ৰা ভগৰন্তং দিস্ৰা কত্থচি গন্ত্ৰা পুপ্ফমাহরিত্ৰা পূজিতত্তা পুব্বপুঞ্ঞনামেন পচ্চাগমনিযত্থেরোতি পাকটো.

১৩. অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো সিন্ধুযা নদিযা তীরেতিআদিমাহ. সীতি সদ্দং কুরুমানা ধুনাতি কম্পতীতি সিন্ধু, নদতি সদ্দং করোন্তো গচ্ছতীতি নদি. চক্কৰাকো অহং তদাতি চক্কং সীঘং গচ্ছন্তং ইৰ উদকে ৰা থলে ৰা আকাসে ৰা সীঘং ৰাতি গচ্ছতীতি চক্কৰাকো. তদা ৰিপস্সিং ভগৰন্তং দস্সনকালে অহং চক্কৰাকো অহোসিন্তি অত্থো. সুদ্ধসেৰালভক্খোহন্তি অঞ্ঞগোচরঅমিস্সত্তা সুদ্ধসেৰালমেৰ খাদন্তো অহং ৰসামি. পাপেসু চ সুসঞ্ঞতোতি পুব্বৰাসনাৰসেন পাপকরণে সুট্ঠু সঞ্ঞতো তীহি দ্ৰারেহি সঞ্ঞতো সুসিক্খিতো.

১৪. অদ্দসং ৰিরজং বুদ্ধন্তি রাগদোসমোহৰিরহিতত্তা ৰিরজং নিক্কিলেসং বুদ্ধং অদ্দসং অদ্দক্খিং. গচ্ছন্তং অনিলঞ্জসেতি অনিলঞ্জসে আকাসপথে গচ্ছন্তং বুদ্ধং. তুণ্ডেন ময্হং মুখতুণ্ডেন তালং সালপুপ্ফং পগ্গয্হ পগ্গহেত্ৰা ৰিপস্সিস্সাভিরোপযিং ৰিপস্সিস্স ভগৰতো পূজেসিন্তি অত্থো. সেসং সুৰিঞ্ঞেয্যমেৰাতি.

পচ্চাগমনিযত্থেরঅপদানৰণ্ণনা সমত্তা.

৪. পরপ্পসাদকত্থেরঅপদানৰণ্ণনা

উসভং পৰরং ৰীরন্তিআদিকং আযস্মতো পরপ্পসাদকত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৰতো কালে ব্রাহ্মণকুলে নিব্বত্তো তিণ্ণং ৰেদানং পারগূ ইতিহাসপঞ্চমানং পদকো ৰেয্যাকরণো সনিঘণ্ডুকেটুভানং সাক্খরপ্পভেদানং লোকাযতমহাপুরিসলক্খণেসু অনৰযো নামেন সেলব্রাহ্মণোতি পাকটো সিদ্ধত্থং ভগৰন্তং দিস্ৰা দ্ৰত্তিংসমহাপুরিসলক্খণেহি অসীতিঅনুব্যঞ্জনেহি চাতি সযং সোভমানং দিস্ৰা পসন্নমানসো অনেকেহি কারণেহি অনেকাহি উপমাহি থোমনং পকাসেসি. সো তেন পুঞ্ঞকম্মেন দেৰলোকে সক্কমারাদযো ছ কামাৰচরসম্পত্তিযো অনুভৰিত্ৰা মনুস্সেসু চক্কৰত্তিসম্পত্তিং অনুভৰিত্ৰা ইমস্মিং বুদ্ধুপ্পাদে ৰিভৰসম্পন্নে একস্মিং কুলগেহে নিব্বত্তো ৰিঞ্ঞুতং পত্তো সত্থরি পসীদিস্ৰা পব্বজিতো নচিরস্সেৰ চতুপটিসম্ভিদাছল়ভিঞ্ঞপ্পত্তো মহাখীণাসৰো অহোসি, বুদ্ধস্স থুতিযা সত্তানং সব্বেসং চিত্তপ্পসাদকরণতো পরপ্পসাদকত্থেরোতি পাকটো.

২০. একদিৰসং অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো উসভং পৰরং ৰীরন্তিআদিমাহ. তত্থ উসভন্তি ৰসভো নিসভো ৰিসভো আসভোতি চত্তারো জেট্ঠপুঙ্গৰা. তত্থ গৰসতজেট্ঠকো ৰসভো, গৰসহস্সজেট্ঠকো নিসভো, গৰসতসহস্সজেট্ঠকো ৰিসভো, গৰকোটিসতসহস্সজেট্ঠকো আসভোতি চ যস্স কস্সচি থুতিং করোন্তা ব্রাহ্মণপণ্ডিতা বহুস্সুতা অত্তনো অত্তনো পঞ্ঞাৰসেন থুতিং করোন্তি, বুদ্ধানং পন সব্বাকারেন থুতিং কাতুং সমত্থো একোপি নত্থি. অপ্পমেয্যো হি বুদ্ধো. ৰুত্তঞ্হেতং –

‘‘বুদ্ধোপি বুদ্ধস্স ভণেয্য ৰণ্ণং, কপ্পম্পি চে অঞ্ঞমভাসমানো;

খীযেথ কপ্পো চিরদীঘমন্তরে, ৰণ্ণো ন খীযেথ তথাগতস্সা’’তি. (দী. নি. অট্ঠ. ১.৩০৪; ৩.১৪১; ম. নি. অট্ঠ. ২.৪২৫; উদা. অট্ঠ. ৫৩) –

আদিকং. অযম্পি ব্রাহ্মণো মুখারূল়্হৰসেন একপসীদনৰসেন ‘‘আসভ’’ন্তি ৰত্তব্বে ‘‘উসভ’’ন্তিআদিমাহ. ৰরিতব্বো পত্থেতব্বোতি ৰরো. অনেকেসু কপ্পসতসহস্সেসু কতৰীরিযত্তা ৰীরো. মহন্তং সীলক্খন্ধাদিকং এসতি গৰেসতীতি মহেসী, তং মহেসিং বুদ্ধং. ৰিসেসেন কিলেসখন্ধমারাদযো মারে জিতৰাতি ৰিজিতাৰী, তং ৰিজিতাৰিনং সম্বুদ্ধং. সুৰণ্ণস্স ৰণ্ণো ইৰ ৰণ্ণো যস্স সম্বুদ্ধস্স সো সুৰণ্ণৰণ্ণো, তং সুৰণ্ণৰণ্ণং সম্বুদ্ধং দিস্ৰা কো নাম সত্তো নপ্পসীদতীতি.

পরপ্পসাদকত্থেরঅপদানৰণ্ণনা সমত্তা.

৫. ভিসদাযকত্থেরঅপদানৰণ্ণনা

ৰেস্সভূ নাম নামেনাতিআদিকং আযস্মতো ভিসদাযকত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ৰেস্সভুস্স ভগৰতো কালে হিমৰন্তস্মিং হত্থিযোনিযং নিব্বত্তো তস্মিং পটিৰসতি. তস্মিং সমযে ৰেস্সভূ ভগৰা ৰিৰেককামো হিমৰন্তমগমাসি. তং দিস্ৰা সো হত্থিনাগো পসন্নমানসো ভিসমুল়ালং গহেত্ৰা ভগৰন্তং ভোজেসি. সো তেন পুঞ্ঞকম্মেন হত্থিযোনিতো চুতো দেৰলোকে উপ্পজ্জিত্ৰা তত্থ ছ কামাৰচরসম্পত্তিযো অনুভৰিত্ৰা মনুস্সত্তমাগতো মনুস্সেসু চক্কৰত্তিসম্পত্তিআদযো অনুভৰিত্ৰা ইমস্মিং বুদ্ধুপ্পাদে মহাভোগে অঞ্ঞতরস্মিং কুলে নিব্বত্তো পুব্বৰাসনাবলেন সত্থরি পসন্নো পব্বজিত্ৰা নচিরস্সেৰ অরহা অহোসি, সো পুব্বে কতকুসলনামেন ভিসদাযকত্থেরোতি পাকটো.

২৯. সো অত্তনো পুব্বকম্মং সরিত্ৰা পুব্বচরিতাপদানং দস্সেন্তো ৰেস্সভূ নাম নামেনাতিআদিমাহ. তত্থ ৰেস্সভূতি ৰেস্সং ভুনাতি অতিক্কমতীতি ৰেস্সভূ. অথ ৰা ৰেস্সে ৰাণিজকম্মে ৰা কামরাগাদিকে ৰা কুসলাদিকম্মে ৰা ৰত্থুকামকিলেসকামে ৰা ভুনাতি অভিভৰতীতি ৰেস্সভূ, সো নামেন ৰেস্সভূ নাম ভগৰা. ইসীনং ততিযো অহূতি কুসলধম্মে এসতি গৰেসতীতি ইসি, ‘‘ৰিপস্সী, সিখী, ৰেস্সভূ’’তি ৰুত্তত্তা ততিযো ইসি ততিযো ভগৰা অহু অহোসীতি অত্থো. কাননং ৰনমোগ্গয্হাতি কাননসঙ্খাতং ৰনং ওগয্হ ওগহেত্ৰা পাৰিসীতি অত্থো.

৩০. ভিসমুল়ালং গণ্হিত্ৰাতি দ্ৰিপদচতুপ্পদানং ছাতকং ভিসতি হিংসতি ৰিনাসেতীতি ভিসং, কো সো? পদুমকন্দো, ভিসঞ্চ মুল়ালঞ্চ ভিসমুল়ালং, তং ভিসমুল়ালং গহেত্ৰাতি অত্থো.

৩১. করেন চ পরামট্ঠোতি তং মযা দিন্নদানং, ৰেস্সভূৰরবুদ্ধিনা উত্তমবুদ্ধিনা ৰেস্সভুনা করেন হত্থতলেন পরামট্ঠো কতসম্ফস্সো অহোসি. সুখাহং নাভিজানামি, সমং তেন কুতোত্তরিন্তি তেন সুখেন সমং সুখং নাভিজানামি, ততো উত্তরিং ততো পরং ততো অধিকং সুখং কুতোতি অত্থো. সেসং নযানুসারেন সুৰিঞ্ঞেয্যন্তি.

ভিসদাযকত্থেরঅপদানৰণ্ণনা সমত্তা.

৬. সুচিন্তিতত্থেরঅপদানৰণ্ণনা

গিরিদুগ্গচরো আসিন্তিআদিকং আযস্মতো সুচিন্তিতত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো অত্থদস্সিস্স ভগৰতো কালে হিমৰন্তপ্পদেসে নেসাদকুলে উপ্পন্নো মিগসূকরাদযো ৰধিত্ৰা খাদন্তো ৰিহরতি. তদা লোকনাথো লোকানুগ্গহং সত্তানুদ্দযতঞ্চ পটিচ্চ হিমৰন্তমগমাসি. তদা সো নেসাদো ভগৰন্তং দিস্ৰা পসন্নমানসো অত্তনো খাদনত্থায আনীতং ৰরমধুরমংসং অদাসি. পটিগ্গহেসি ভগৰা তস্সানুকম্পায, তং ভুঞ্জিত্ৰা অনুমোদনং ৰত্ৰা পক্কামি. সো তেনেৰ পুঞ্ঞেন তেনেৰ সোমনস্সেন ততো চুতো সুগতীসু সংসরন্তো ছ কামাৰচরসম্পত্তিযো অনুভৰিত্ৰা মনুস্সেসু চক্কৰত্তিসম্পত্তিআদযো অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো সত্থরি পসীদিত্ৰা পব্বজিতো নচিরস্সেৰ অরহা অহোসি.

৩৬. চতুপটিসম্ভিদাপঞ্চাভিঞ্ঞাদিভেদং পত্ৰা অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো গিরিদুগ্গচরো আসিন্তিআদিমাহ. গিরতি সদ্দং করোতীতি গিরি, কো সো? সিলাপংসুমযপব্বতো, দুট্ঠু দুক্খেন গমনীযং দুগ্গং, গিরীহি দুগ্গং গিরিদুগ্গং, দুগ্গমোতি অত্থো. তস্মিং গিরিদুগ্গে পব্বতন্তরে চরো চরণসীলো আসিং অহোসিং. অভিজাতোৰ কেসরীতি অভি ৰিসেসেন জাতো নিব্বত্তো কেসরীৰ কেসরসীহো ইৰ গিরিদুগ্গস্মিং চরামীতি অত্থো.

৪০. গিরিদুগ্গং পৰিসিং অহন্তি অহং তদা তেন মংসদানেন পীতিসোমনস্সজাতো পব্বতন্তরং পাৰিসিং. সেসং উত্তানত্থমেৰাতি.

সুচিন্তিতত্থেরঅপদানৰণ্ণনা সমত্তা.

৭. ৰত্থদাযকত্থেরঅপদানৰণ্ণনা

পক্খিজাতো তদা আসিন্তিআদিকং আযস্মতো ৰত্থদাযকত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো অত্থদস্সিস্স ভগৰতো কালে সুপণ্ণযোনিযং নিব্বত্তো গন্ধমাদনপব্বতং গচ্ছন্তং অত্থদস্সিং ভগৰন্তং দিস্ৰা পসন্নমানসো সুপণ্ণৰণ্ণং ৰিজহিত্ৰা মাণৰকৰণ্ণং নিম্মিনিত্ৰা মহগ্ঘং দিব্বৰত্থং আদায ভগৰন্তং পূজেসি. সোপি ভগৰা পটিগ্গহেত্ৰা অনুমোদনং ৰত্ৰা পক্কামি. সো তেনেৰ সোমনস্সেন ৰীতিনামেত্ৰা যাৰতাযুকং ঠত্ৰা ততো চুতো দেৰলোকে নিব্বত্তো তত্থ অপরাপরং সংসরন্তো পুঞ্ঞানি অনুভৰিত্ৰা ততো মনুস্সেসু মনুস্সসম্পত্তিন্তি সব্বত্থ মহগ্ঘং ৰত্থাভরণং লদ্ধং, ততো উপ্পন্নুপ্পন্নভৰে ৰত্থচ্ছাযায গতগতট্ঠানে ৰসন্তো ইমস্মিং বুদ্ধুপ্পাদে একস্মিং কুলগেহে নিব্বত্তো ৰিঞ্ঞুতং পত্তো সত্থরি পসীদিত্ৰা পব্বজিতো নচিরস্সেৰ ছল়ভিঞ্ঞপ্পত্তখীণাসৰো অহোসি, পুব্বে কতপুঞ্ঞনামেন ৰত্থদাযকত্থেরোতি পাকটো.

৪৫. সো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো পক্খিজাতো তদা আসিন্তিআদিমাহ. তত্থ পক্খিজাতোতি পক্খন্দতি উপলৰতি সকুণো এতেনাতি পক্খং, পক্খমস্স অত্থীতি পক্খী, পক্খিযোনিযং জাতো নিব্বত্তোতি অত্থো. সুপণ্ণোতি সুন্দরং পণ্ণং পত্তং যস্স সো সুপণ্ণো, ৰাতগ্গাহসুৰণ্ণৰণ্ণজলমানপত্তমহাভারোতি অত্থো. গরুল়াধিপোতি নাগে গণ্হনত্থায গরুং ভারং পাসাণং গিল়ন্তীতি গরুল়া, গরুল়ানং অধিপো রাজাতি গরুল়াধিপো, ৰিরজং বুদ্ধং অদ্দসাহন্তি সম্বন্ধো.

ৰত্থদাযকত্থেরঅপদানৰণ্ণনা সমত্তা.

৮. অম্বদাযকত্থেরঅপদানৰণ্ণনা

অনোমদস্সী ভগৰাতিআদিকং আযস্মতো অম্বদাযকত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো অনোমদস্সিস্স ভগৰতো কালে ৰানরযোনিযং নিব্বত্তো হিমৰন্তে কপিরাজা হুত্ৰা পটিৰসতি. তস্মিং সমযে অনোমদস্সী ভগৰা তস্সানুকম্পায হিমৰন্তমগমাসি. অথ সো কপিরাজা ভগৰন্তং দিস্ৰা পসন্নমানসো সুমধুরং অম্বফলং খুদ্দমধুনা অদাসি. অথ ভগৰা তস্স পস্সন্তস্সেৰ তং সব্বং পরিভুঞ্জিত্ৰা অনুমোদনং ৰত্ৰা পক্কামি. অথ সো সোমনস্সসম্পন্নহদযো তেনেৰ পীতিসোমনস্সেন যাৰতাযুকং ঠত্ৰা ততো চুতো দেৰলোকে নিব্বত্তো অপরাপরং তত্থ দিব্বসুখমনুভৰিত্ৰা মনুস্সেসু চ মনুস্সসম্পত্তিং অনুভৰিত্ৰা ইমস্মিং বুদ্ধুপ্পাদে ৰিভৰসম্পন্নে একস্মিং কুলগেহে নিব্বত্তো সত্থরি পসীদিত্ৰা পব্বজিত্ৰা নচিরস্সেৰ ছল়ভিঞ্ঞপ্পত্তো অহোসি. পুব্বপুঞ্ঞনামেন অম্বদাযকত্থেরোতি পাকটো.

৫৩. সো অপরভাগে অত্তনা কতকুসলবীজং দিস্ৰা সোমনস্সজাতো অত্তনো পুব্বচরিতাপদানং পকাসেন্তো অনোমদস্সী ভগৰাতিআদিমাহ. মেত্তায অফরি লোকে, অপ্পমাণে নিরূপধীতি সো ভগৰা সব্বলোকে অপ্পমাণে সত্তে ‘‘সুখী হোন্তূ’’তিআদিনা নিরুপধি উপধিৰিরহিতং কত্ৰা মেত্তায মেত্তচিত্তেন অফরি পত্থরি ৰড্ঢেসীতি অত্থো.

৫৪. কপি অহং তদা আসিন্তি তদা তস্সাগমনকালে কপিরাজা অহোসিন্তি অত্থো.

অম্বদাযকত্থেরঅপদানৰণ্ণনা সমত্তা.

৯. সুমনত্থেরঅপদানৰণ্ণনা

সুমনো নাম নামেনাতিআদিকং আযস্মতো সুমনত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিখিস্স ভগৰতো কালে মালাকারস্স কুলগেহে নিব্বত্তো ৰুদ্ধিমন্ৰায সদ্ধাজাতো ভগৰতি পসন্নমানসো সুমনমালামুট্ঠিযো গহেত্ৰা উভোহি হত্থেহি পূজেসি. সো তেন পুঞ্ঞেন দেৰমনুস্সেসু দ্ৰে সম্পত্তিযো অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰুদ্ধিমন্ৰায পুত্তদারেহি ৰড্ঢিত্ৰা সুমননামেন পাকটো সত্থরি পসীদিত্ৰা পব্বজিতো নচিরস্সেৰ অরহা অহোসি.

৬২. সো অরহা হুত্ৰা অত্তনো পুব্বকম্মং সরিত্ৰা সোমনস্সজাতো অত্তনো পুব্বচরিতাপদানং পকাসেন্তো সুমনো নাম নামেনাতিআদিমাহ. সুন্দরং মনং চিত্তং যস্স সো সুমনো. সদ্ধাপসাদবহুমানেন যুত্তো নামেন সুমনো নাম মালাকারো তদা অহং অহোসিং.

৬৩. সিখিনো লোকবন্ধুনোতি সিখা মুদ্ধা কাসতীতি সিখী. অথ ৰা সম্পযুত্তসম্পযোগে খাদতি ৰিদ্ধংসেতীতি সিখী, কা সা? অগ্গিসিখা, অগ্গিসিখা ৰিয সিখায দিপ্পনতো সিখী. যথা অগ্গিসিখা জোততি পাকটা হোতি, সিখী পত্ততিণকট্ঠপলাসাদিকে দহতি, এৰমযম্পি ভগৰা নীলপীতাদিরংসীহি জোততি সকললোকসন্নিৰাসে পাকটো হোতি. সকসন্তানগতসব্বকিলেসে সোসেতি ৰিদ্ধংসেতি ঝাপেতীতি ৰোহারনামং নামকম্মং নামধেয্যং, তস্স সিখিনো. সকললোকস্স বন্ধুঞাতকোতি লোকবন্ধু, তস্স সিখিনো লোকবন্ধুনো ভগৰতো সুমনপুপ্ফং অভিরোপযিং পূজেসিন্তি অত্থো.

সুমনত্থেরঅপদানৰণ্ণনা সমত্তা.

১০. পুপ্ফচঙ্কোটিযত্থেরঅপদানৰণ্ণনা

অভীতরূপং সীহং ৰাতিআদিকং আযস্মতো পুপ্ফচঙ্কোটিযত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিখিস্স ভগৰতো কালে একস্মিং কুলগেহে নিব্বত্তো ৰিঞ্ঞুতং পত্তো মহাৰিভৰসম্পন্নো সত্থরি পসীদিত্ৰা পসন্নাকারং দস্সেন্তো সুৰণ্ণৰণ্ণং অনোজপুপ্ফমোচিনিত্ৰা চঙ্কোটকং পূরেত্ৰা ভগৰন্তং পূজেত্ৰা ‘‘ভগৰা, ইমস্স নিস্সন্দেন নিব্বত্তনিব্বত্তট্ঠানে সুৰণ্ণৰণ্ণো পূজনীযো হুত্ৰা নিব্বানং পাপুণেয্য’’ন্তি পত্থনমকাসি. সো তেন পুঞ্ঞকম্মেন দেৰমনুস্সেসু নিব্বত্তো সব্বত্থ পূজিতো সুৰণ্ণৰণ্ণো অভিরূপো অহোসি. সো অপরভাগে ইমস্মিং বুদ্ধুপ্পাদে ৰিভৰসম্পন্নে একস্মিং কুলগেহে নিব্বত্তো ৰুদ্ধিপ্পত্তো সত্থরি পসীদিত্ৰা পব্বজিতো ৰিপস্সনং ৰড্ঢেত্ৰা নচিরস্সেৰ অরহা অহোসি.

৬৮-৯. সো পত্তঅরহত্তফলো অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো অভীতরূপং সীহং ৰাতিআদিমাহ. তত্থ সীহন্তি দ্ৰিপদচতুপ্পদাদযো সত্তে অভিভৰতি অজ্ঝোত্থরতীতি সীহো, অভীতরূপো অভীতসভাৰো, তং অভীতরূপং সীহং ইৰ নিসিন্নং পূজেসিন্তি সম্বন্ধো. পক্খীনং অগ্গং গরুল়রাজং ইৰ পৰরং উত্তমং ব্যগ্ঘরাজং ইৰ অভি ৰিসেসেন জাতং সব্বসীহানং ৰিসেসং কেসরসীহং ইৰ তিলোকস্স সরণং সিখিং সম্মাসম্বুদ্ধং. কিং ভূতং? অনেজং নিক্কিলেসং খন্ধমারাদীহি অপরাজিতং নিসিন্নং সিখিন্তি সম্বন্ধো. মারণানগ্গন্তি সব্বকিলেসানং মারণে সোসনে ৰিদ্ধংসনে অগ্গং সেট্ঠং কিলেসে মারেন্তানং পচ্চেকবুদ্ধবুদ্ধসাৰকানং ৰিজ্জমানানম্পি তেসং অগ্গন্তি অত্থো. ভিক্খুসঙ্ঘপুরক্খতং পরিৰারিতং পরিৰারেত্ৰা নিসিন্নং সিখিন্তি সম্বন্ধো.

৭০. চঙ্কোটকে ঠপেত্ৰানাতি উত্তমং অনোজপুপ্ফং করণ্ডকে পূরেত্ৰা সিখীসম্বুদ্ধং সেট্ঠং সমোকিরিং পূজেসিন্তি অত্থো.

পুপ্ফচঙ্কোটিযত্থেরঅপদানৰণ্ণনা সমত্তা.

সত্তমৰগ্গৰণ্ণনা সমত্তা.