৯. পদুমত্থেরঅপদানৰণ্ণনা

চতুসচ্চং পকাসেন্তোতিআদিকং আযস্মতো পদুমত্থেরস্স অপদানং. অযম্পি পুরিমবুদ্ধেসু কতকুসলসম্ভারো পদুমুত্তরমুনিনা ধম্মপজ্জোতে জোতমানে একস্মিং কুলগেহে নিব্বত্তো ঘরাৰাসং সণ্ঠপেত্ৰা ভোগসম্পন্নোতি পাকটো. সো সত্থরি পসীদিত্ৰা মহাজনেন সদ্ধিং ধম্মং সুণন্তো ধজেন সহ পদুমকলাপং গহেত্ৰা অট্ঠাসি, সধজং তং পদুমকলাপং আকাসমুক্খিপিং, তং অচ্ছরিযং দিস্ৰা অতিৰিয সোমনস্সজাতো অহোসি. সো যাৰজীৰং কুসলং কত্ৰা জীৰিতপরিযোসানে সগ্গে নিব্বত্তো ধজমিৰ ছকামাৰচরে পাকটো পূজিতো চ দিব্বসম্পত্তিমনুভৰিত্ৰা মনুস্সেসু চ চক্কৰত্তিসম্পত্তিমনুভৰিত্ৰা ইমস্মিং বুদ্ধুপ্পাদে ৰিভৰসম্পন্নে সদ্ধাসম্পন্নে একস্মিং কুলগেহে নিব্বত্তো ৰুদ্ধিমন্ৰায সদ্ধাজাতো পঞ্চৰস্সিকোৰ পব্বজিত্ৰা নচিরস্সেৰ অরহা হুত্ৰা কতপুঞ্ঞনামেন পদুমত্থেরোতি পাকটো.

৬৭. অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো চতুসচ্চং পকাসেন্তোতিআদিমাহ. তত্থ সচ্চন্তি তথং অৰিতথং অৰিপরীতং সচ্চং, দুক্খসমুদযনিরোধমগ্গৰসেন চত্তারি সচ্চানি সমাহটানীতি চতুসচ্চং, তং চতুসচ্চং পকাসেন্তো লোকে পাকটং করোন্তোতি অত্থো. ৰরধম্মপ্পৰত্তকোতি উত্তমধম্মপ্পৰত্তকো পকাসকোতি অত্থো. অমতং ৰুট্ঠিন্তি অমতমহানিব্বানৰুট্ঠিধারং পৰস্সন্তো পগ্ঘরন্তো সদেৰকং লোকং তেমেন্তো সব্বকিলেসপরিল়াহং নিব্বাপেন্তো ধম্মৰস্সং ৰস্সতীতি অত্থো.

৬৮. সধজং পদুমং গয্হাতি ধজেন সহ একতো কত্ৰা পদুমং পদুমকলাপং গহেত্ৰাতি অত্থো. অড্ঢকোসে ঠিতো অহন্তি উভো উক্খিপিত্ৰা ঠিতো অহন্তি অত্থো. সেসং সব্বত্থ উত্তানত্থমেৰাতি.

পদুমত্থেরঅপদানৰণ্ণনা সমত্তা.