৫. ওপৰয্হত্থেরঅপদানৰণ্ণনা

পদুমুত্তরবুদ্ধস্সাতিআদিকং আযস্মতো ওপৰয্হত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো পদুমুত্তরজিনাদিচ্চে লোকে পাতুভূতে একস্মিং ৰিভৰসম্পন্নকুলে নিব্বত্তো ৰুদ্ধিমন্ৰায মহদ্ধনো মহাভোগো ঘরাৰাসং ৰসমানো সাসনে পসন্নো সত্থরি পসাদবহুমানো আজানীযেন সিন্ধৰেন পূজং অকাসি, পূজেত্ৰা চ পন ‘‘বুদ্ধাদীনং সমণানং হত্থিঅস্সাদযো ন কপ্পন্তি, কপ্পিযভণ্ডং দস্সামী’’তি চিন্তেত্ৰা তং অগ্ঘাপেত্ৰা তদগ্ঘনকেন কহাপণেন কপ্পিযং কপ্পাসিককম্বলকোজৰাদিকং চীৰরং কপ্পূরতক্কোলাদিকং ভেসজ্জপরিক্খারঞ্চ অদাসি. সো তেন পুঞ্ঞকম্মেন যাৰতাযুকং ঠত্ৰা ততো চুতো দেৰেসু চ মনুস্সেসু চ হত্থিঅস্সাদিঅনেকৰাহনসম্পন্নো সুখং অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰিঞ্ঞুতং পত্তো সদ্ধাসম্পন্নো সাসনে পব্বজিত্ৰা কম্মট্ঠানং গহেত্ৰা ৰিপস্সনং ৰড্ঢেত্ৰা মগ্গপটিপাটিযা অরহত্তে পতিট্ঠাসি, পুব্বে কতপুঞ্ঞসম্ভারৰসেন ওপৰয্হত্থেরোতি পাকটো অহোসি.

৩৩. সো ‘‘কেন নু খো কারণেন ইদং মযা সন্তিপদং অধিগত’’ন্তি উপধারেন্তো পুব্বকম্মং ঞাণেন পচ্চক্খতো ঞত্ৰা সোমনস্সজাতো পুব্বচরিতাপদানং উদানৰসেন পকাসেন্তো পদুমুত্তরবুদ্ধস্সাতিআদিমাহ. তং ৰুত্তত্থমেৰ. আজানীযমদাসহন্তি আজানীযং উত্তমজাতিসিন্ধৰং অহং অদাসিং পূজেসিন্তি অত্থো.

৩৫. সপত্তভারোতি সস্স অত্তনো পত্তানি অট্ঠ পরিক্খারানি ভারানি যস্স সো সপত্তভারো, অট্ঠপরিক্খারযুত্তোতি অত্থো.

৩৬. খমনীযমদাসহন্তি খমনীযযোগ্গং চীৰরাদিকপ্পিযপরিক্খারন্তি অত্থো.

৪০. চরিমোতি পরিযোসানো কোটিপ্পত্তো ভৰোতি অত্থো. সেসং সুৰিঞ্ঞেয্যমেৰাতি.

ওপৰয্হত্থেরঅপদানৰণ্ণনা সমত্তা.