৫. উপালিৰগ্গো

১. ভাগিনেয্যুপালিত্থেরঅপদানৰণ্ণনা

খীণাসৰসহস্সেহীতিআদিকং আযস্মতো উপালিত্থেরস্স ভাগিনেয্যুপালিত্থেরস্স অপদানং. এসো হি থেরো পুরিমবুদ্ধেসু কতাধিকারো তস্মিং তস্মিং ভৰে পুঞ্ঞানি উপচিনন্তো পদুমুত্তরস্স ভগৰতো কালে একস্মিং কুলে নিব্বত্তো ৰুদ্ধিমন্ৰায ঘরাৰাসে আদীনৰং দিস্ৰা গেহং পহায ইসিপব্বজ্জং পব্বজিত্ৰা পঞ্চাভিঞ্ঞাঅট্ঠসমাপত্তিলাভী হুত্ৰা হিমৰন্তে ৰাসং কপ্পেসি. তস্মিং সমযে পদুমুত্তরো ভগৰা ৰিৰেককামো হিমৰন্তং পাৰিসি. তাপসো ভগৰন্তং পুণ্ণচন্দমিৰ ৰিরোচমানং দূরতোৰ দিস্ৰা পসন্নমানসো অজিনচম্মং অংসে কত্ৰা অঞ্জলিং পগ্গয্হ ৰন্দিত্ৰা ঠিতকোৰ দসনখসমোধানঞ্জলিং সিরসি পতিট্ঠপেত্ৰা অনেকাহি উপমাহি অনেকেহি থুতিৰচনেহি ভগৰন্তং থোমেসি. তং সুত্ৰা ভগৰা – ‘‘অযং তাপসো অনাগতে গোতমস্স নাম ভগৰতো সাসনে পব্বজিত্ৰা ৰিনযে তিখিণপঞ্ঞানং অগ্গো ভৰিস্সতী’’তি ব্যাকরণমদাসি. সো যাৰতাযুকং ঠত্ৰা অপরিহীনজ্ঝানো ব্রহ্মলোকে নিব্বত্তি. ততো চুতো দেৰমনুস্সেসু সংসরন্তো সম্পত্তিযো অনুভৰিত্ৰা ইমস্মিং বুদ্ধুপ্পাদে কপিলৰত্থুনগরে উপালিত্থেরস্স ভাগিনেয্যো হুত্ৰা নিব্বত্তি. সো কমেন ৰুদ্ধিপ্পত্তো মাতুলস্স উপালিত্থেরস সন্তিকে পব্বজিত্ৰা কম্মট্ঠানং গহেত্ৰা ৰিপস্সনং ৰড্ঢেত্ৰা নচিরস্সেৰ অরহা অহোসি. সো অত্তনো আচরিযস্স সমীপে ৰসিতত্তা ৰিনযপঞ্হে তিখিণঞাণো অহোসি. অথ ভগৰা ‘‘এতদগ্গং, ভিক্খৰে, মম সাৰকানং ভিক্খূনং ৰিনযপঞ্হে তিখিণপঞ্ঞানং ভিক্খূনং যদিদং ভাগিনেয্যুপালী’’তি তং এতদগ্গট্ঠানে ঠপেসি.

১. সো এৰং এতদগ্গট্ঠানং পত্ৰা অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো খীণাসৰসহস্সেহীতিআদিমাহ. তত্থ আ সমন্ততো যাৰভৰগ্গা সৰন্তি পৰত্তন্তীতি আসৰা. কামাসৰাদযো চত্তারো আসৰা, তে খীণা সোসিতা ৰিসোসিতা ৰিদ্ধংসিতা যেহি তেতি খীণাসৰা, তেযেৰ সহস্সা খীণাসৰসহস্সা, তেহি খীণাসৰসহস্সেহি. পরেতো পরিৰুতো লোকনাযকো লোকস্স নিব্বানপাপনকো ৰিৰেকং অনুযুত্তো পটিসল্লিতুং একীভৰিতুং গচ্ছতেতি সম্বন্ধো.

২. অজিনেন নিৰত্থোহন্তি অহং অজিনমিগচম্মেন পটিচ্ছন্নো, অজিনচম্মৰসনোতি অত্থো. তিদণ্ডপরিধারকোতি কুণ্ডিকট্ঠপনত্থায তিদণ্ডং গহেত্ৰা ধারেন্তোতি অত্থো. ভিক্খুসঙ্ঘেন পরিব্যূল়্হং পরিৰারিতং লোকনাযকং অদ্দসন্তি সম্বন্ধো. সেসং পাকটমেৰাতি.

ভাগিনেয্যুপালিত্থেরঅপদানৰণ্ণনা সমত্তা.

২. সোণকোল়িৰিসত্থেরঅপদানৰণ্ণনা

অনোমদস্সিস্স মুনিনোতিআদিকং আযস্মতো কোল়িৰিসত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো অনোমদস্সিস্স ভগৰতো কালে একস্মিং কুলগেহে নিব্বত্তো ৰযপ্পত্তো পুত্তদারেহি ৰড্ঢিতো ৰিভৰসম্পন্নো ভগৰতো চঙ্কমনত্থায সোভনং চঙ্কমং কারেত্ৰা সুধাপরিকম্মং কারেত্ৰা আদাসতলমিৰ সমং ৰিজ্জোতমানং কত্ৰা দীপধূপপুপ্ফাদীহি সজ্জেত্ৰা ভগৰতো নিয্যাদেত্ৰা বুদ্ধপ্পমুখং ভিক্খুসঙ্ঘং পণীতেনাহারেন পূজেসি. সো এৰং যাৰজীৰং পুঞ্ঞানি কত্ৰা ততো চৰিত্ৰা দেৰলোকে নিব্বত্তো. তত্থ পাল়িযা ৰুত্তনযেন দিব্বসম্পত্তিং অনুভৰিত্ৰা অন্তরা ওক্কাককুলপ্পসুতোতি তং সব্বং পাল়িযা ৰুত্তানুসারেন ৰেদিতব্বং. পচ্ছিমভৰে পন কোলিযরাজৰংসে জাতো ৰযপ্পত্তো কোটিঅগ্ঘনকস্স কণ্ণপিল়ন্ধনস্স ধারিতত্তা কোটিকণ্ণোতি, কুটিকণ্ণোতি চ পাকটো অহোসি. সো ভগৰতি পসন্নো ধম্মং সুত্ৰা পটিলদ্ধসদ্ধো পব্বজিত্ৰা ৰিপস্সনং ৰড্ঢেত্ৰা নচিরস্সেৰ অরহত্তং পাপুণি.

২৫. সো অরহা হুত্ৰা অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো অনোমদস্সিস্স মুনিনোতিআদিমাহ. তত্থ অনোমদস্সিস্সাতি অনোমং অলামকং সুন্দরং দস্সনং দ্ৰত্তিংসমহাপুরিসলক্খণপটিমণ্ডিতত্তা ব্যামপ্পভামণ্ডলোপসোভিতত্তা আরোহপরিণাহেন সমন্নাগতত্তা চ দস্সনীযং সরীরং যস্স ভগৰতো সো অনোমদস্সী, তস্স অনোমদস্সিস্স মুনিনোতি অত্থো. তাদিনোতি ইট্ঠানিট্ঠেসু অকম্পিযসভাৰস্স. সুধায লেপনং কত্ৰাতি সুধায অৰলিত্তং কত্ৰা দীপধূপপুপ্ফধজপটাকাদীহি চ অলঙ্কতং চঙ্কমং কারযিং অকাসিন্তি অত্থো. সেসগাথানং অত্থো পাল়িযা অনুসারেন সুৰিঞ্ঞেয্যোৰ.

৩৫. পরিৰারসম্পত্তিধনসম্পত্তিসঙ্খাতং যসং ধারেতীতি যসোধরো, সব্বে এতে সত্তসত্ততিচক্কৰত্তিরাজানো যসোধরনামেন একনামকাতি সম্বন্ধো.

৫২. অঙ্গীরসোতি অঙ্গতো সরীরতো নিগ্গতা রস্মি যস্স সো অঙ্গীরসো, ছন্দদোসমোহভযাগতীহি ৰা পাপাচারৰসেন ৰা চতুরাপাযং ন গচ্ছতীতি নাগো, মহন্তো পূজিতো চ সো নাগো চেতি মহানাগো. সেসং উত্তানত্থমেৰাতি.

কোল়িৰিসত্থেরঅপদানৰণ্ণনা সমত্তা.

৩. কাল়িগোধাপুত্তভদ্দিযত্থেরঅপদানৰণ্ণনা

পদুমুত্তরসম্বুদ্ধন্তিআদিকং আযস্মতো ভদ্দিযস্স কাল়িগোধাপুত্তত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো পদুমুত্তরস্স ভগৰতো কালে ৰিভৰসম্পন্নে একস্মিং কুলে নিব্বত্তো ৰুদ্ধিপ্পত্তো পুত্তদারেহি ৰড্ঢিতো নগরৰাসিনো পুঞ্ঞানি করোন্তে দিস্ৰা সযম্পি পুঞ্ঞানি কাতুকামো বুদ্ধপ্পমুখং ভিক্খুসঙ্ঘং নিমন্তেত্ৰা থূলপটলিকাদিঅনেকানি মহারহানি সযনানি পঞ্ঞাপেত্ৰা তত্থ নিসিন্নে ভগৰতি সসঙ্ঘে পণীতেনাহারেন ভোজেত্ৰা মহাদানং অদাসি. সো এৰং যাৰতাযুকং পুঞ্ঞানি কত্ৰা দেৰমনুস্সেসু উভযসম্পত্তিযো অনুভৰিত্ৰা অপরভাগে ইমস্মিং বুদ্ধুপ্পাদে কাল়িগোধায নাম দেৰিযা পুত্তো হুত্ৰা নিব্বত্তি. সো ৰিঞ্ঞুতং পত্তো আরোহপরিণাহহত্থপাদরূপসম্পত্তিযা ভদ্দত্তা চ কাল়িগোধায দেৰিযা পুত্তত্তা চ ভদ্দিযো কাল়িগোধাপুত্তোতি পাকটো. সত্থরি পসীদিত্ৰা মাতাপিতরো আরাধেত্ৰা পব্বজিত্ৰা নচিরস্সেৰ অরহা অহোসি.

৫৪. সো অরহা হুত্ৰা অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো পদুমুত্তরসম্বুদ্ধন্তিআদিমাহ. তং হেট্ঠা ৰুত্তত্থমেৰ. মেত্তচিত্তন্তি মিজ্জতি সিনেহতি নন্দতি সব্বসত্তেতি মেত্তা, মেত্তায সহগতং চিত্তং মেত্তচিত্তং, তং যস্স ভগৰতো অত্থীতি মেত্তচিত্তো, তং মেত্তচিত্তং. মহামুনিন্তি সকলভিক্খূনং মহন্তত্তা মহামুনি, তং পদুমুত্তরং সম্বুদ্ধন্তি সম্বন্ধো. জনতা সব্বাতি সব্বো জনকাযো, সব্বনগরৰাসিনোতি অত্থো. সব্বলোকগ্গনাযকন্তি সকললোকস্স অগ্গং সেট্ঠং নিব্বানস্স নযনতো পাপনতো নাযকং পদুমুত্তরসম্বুদ্ধং জনতা উপেতি সমীপং গচ্ছতীতি সম্বন্ধো.

৫৫. সত্তুকঞ্চ বদ্ধকঞ্চাতি বদ্ধসত্তুঅবদ্ধসত্তুসঙ্খাতং আমিসং. অথ ৰা ভত্তপূপখজ্জভোজ্জযাগুআদযো যাৰকালিকত্তা আমিসং পানভোজনঞ্চ গহেত্ৰা পুঞ্ঞক্খেত্তে অনুত্তরে সত্থুনো দদন্তীতি সম্বন্ধো.

৫৮. আসনং বুদ্ধযুত্তকন্তি বুদ্ধযোগ্গং বুদ্ধারহং বুদ্ধানুচ্ছৰিকং সত্তরতনমযং আসনন্তি অত্থো. সেসং নযানুযোগেন সুৰিঞ্ঞেয্যমেৰাতি.

কাল়িগোধাপুত্তভদ্দিযত্থেরঅপদানৰণ্ণনা সমত্তা.

৪. সন্নিট্ঠাপকত্থেরঅপদানৰণ্ণনা

অরঞ্ঞে কুটিকং কত্ৰাতিআদিকং আযস্মতো সন্নিট্ঠাপকত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো পদুমুত্তরস্স ভগৰতো কালে কুলগেহে নিব্বত্তো ৰিঞ্ঞুতং পত্তো ঘরবন্ধনেন বদ্ধো ঘরাৰাসে আদীনৰং দিস্ৰা ৰত্থুকামকিলেসকামে পহায হিমৰন্তস্স অৰিদূরে পব্বতন্তরে অরঞ্ঞৰাসং কপ্পেসি. তস্মিং কালে পদুমুত্তরো ভগৰা ৰিৰেককামতায তং ঠানং পাপুণি. অথ সো তাপসো ভগৰন্তং দিস্ৰা পসন্নমানসো ৰন্দিত্ৰা নিসীদনত্থায তিণসন্থরং পঞ্ঞাপেত্ৰা অদাসি. তত্থ নিসিন্নং ভগৰন্তং অনেকেহি মধুরেহি তিণ্ডুকাদীহি ফলাফলেহি সন্তপ্পেসি. সো তেন পুঞ্ঞকম্মেন ততো চুতো দেৰেসু চ মনুস্সেসু চ অপরাপরং সংসরন্তো দ্ৰে সম্পত্তিযো অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো সদ্ধাসম্পন্নো পব্বজিতো ৰিপস্সনং ৰড্ঢেত্ৰা নচিরস্সেৰ অরহা অহোসি. খুরগ্গে অরহত্তফলপ্পত্তিযং ৰিয নিরুস্সাহেনেৰ সন্তিপদসঙ্খাতে নিব্বানে সুট্ঠু ঠিতত্তা সন্নিট্ঠাপকত্থেরোতি পাকটো.

৭০. অরহা পন হুত্ৰা অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো অরঞ্ঞে কুটিকং কত্ৰাতিআদিমাহ. তত্থ অরঞ্ঞেতি সীহব্যগ্ঘাদীনং ভযেন মনুস্সা এত্থ ন রজ্জন্তি ন রমন্তি ন অল্লীযন্তীতি অরঞ্ঞং, তস্মিং অরঞ্ঞে. কুটিকন্তি তিণচ্ছদনকুটিকং কত্ৰা পব্বতন্তরে ৰসামি ৰাসং কপ্পেসিন্তি অত্থো. লাভেন চ অলাভেন চ যসেন চ অযসেন চ সন্তুট্ঠো ৰিহাসিন্তি সম্বন্ধো.

৭২. জলজুত্তমনামকন্তি জলে জাতং জলজং, পদুমং, জলজং উত্তমং জলজুত্তমং, জলজুত্তমেন সমানং নামং যস্স সো জলজুত্তমনামকো, তং জলজুত্তমনামকং বুদ্ধন্তি অত্থো. সেসং পাল়িনযানুযোগেন সুৰিঞ্ঞেয্যমেৰাতি.

সন্নিট্ঠাপকত্থেরঅপদানৰণ্ণনা সমত্তা.

৫. পঞ্চহত্থিযত্থেরঅপদানৰণ্ণনা

সুমেধো নাম সম্বুদ্ধোতিআদিকং আযস্মতো পঞ্চহত্থিযত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সুমেধস্স ভগৰতো কালে একস্মিং কুলগেহে নিব্বত্তো ৰিঞ্ঞুতং পত্ৰা রতনত্তযে পসন্নো ৰিহাসি. তস্মিং সমযে পঞ্চউপ্পলহত্থানি আনেসুং. সো তেহি পঞ্চউপ্পলহত্থেহি ৰীথিযং চরমানং সুমেধং ভগৰন্তং পূজেসি. তানি গন্ত্ৰা আকাসে ৰিতানং হুত্ৰা ছাযং কুরুমানানি তথাগতেনেৰ সদ্ধিং গচ্ছিংসু. সো তং দিস্ৰা সোমনস্সজাতো পীতিযা ফুট্ঠসরীরো যাৰজীৰং তদেৰ পুঞ্ঞং অনুস্সরিত্ৰা ততো চুতো দেৰলোকে নিব্বত্তো অপরাপরং সংসরন্তো ইমস্মিং বুদ্ধুপ্পাদে একস্মিং কুলগেহে নিব্বত্তো ৰিঞ্ঞুতং পত্তো সদ্ধাজাতো পব্বজিত্ৰা ৰিপস্সনং ৰড্ঢেত্ৰা নচিরস্সেৰ অরহা অহোসি. কতকুসলনামেন পঞ্চহত্থিযত্থেরোতি পাকটো.

৭৭. সো অত্তনো পুব্বকম্মং সরিত্ৰা পচ্চক্খতো পঞ্ঞায দিট্ঠপুব্বচরিতাপদানং পকাসেন্তো সুমেধো নাম সম্বুদ্ধোতিআদিমাহ. তত্থ সুমেধোতি সুন্দরা মেধা চতুসচ্চপটিৰেধপটিসম্ভিদাদযো পঞ্ঞা যস্স সো ভগৰা সুমেধো সম্বুদ্ধো অন্তরাপণে অন্তরৰীথিযং গচ্ছতীতি সম্বন্ধো. ওক্খিত্তচক্খূতি অধোখিত্তচক্খু. মিতভাণীতি পমাণং ঞত্ৰা ভণনসীলো, পমাণং জানিত্ৰা ধম্মং দেসেসীতি অত্থো. সেসং সুৰিঞ্ঞেয্যমেৰাতি.

পঞ্চহত্থিযত্থেরঅপদানৰণ্ণনা সমত্তা.

৬. পদুমচ্ছদনিযত্থেরঅপদানৰণ্ণনা

নিব্বুতে লোকনাথম্হীতিআদিকং আযস্মতো পদুমচ্ছদনিযত্থেরস্স অপদানং. অযম্পি পুরিমবুদ্ধেসু কতপুঞ্ঞসম্ভারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ৰিপস্সিস্স ভগৰতো কালে একস্মিং কুলগেহে নিব্বত্তো ৰিঞ্ঞুতং পত্তো রতনত্তযে পসন্নো পরিনিব্বুতস্স ৰিপস্সিস্স ভগৰতো চিতকং পদুমপুপ্ফেহি পূজেসি. সো তেনেৰ চিত্তপ্পসাদেন যাৰতাযুকং ঠত্ৰা ততো সুগতীসুযেৰ সংসরন্তো দিব্বসম্পত্তিং মনুস্সসম্পত্তিঞ্চাতি দ্ৰে সম্পত্তিযো অনেকক্খত্তুং অনুভৰিত্ৰা ইমস্মিং অম্হাকং সম্মাসম্বুদ্ধকালে একস্মিং কুলগেহে নিব্বত্তো ৰিঞ্ঞুতং পত্তো সত্থরি পসীদিত্ৰা সাসনে পব্বজিতো ঘটেন্তো ৰাযমন্তো নচিরস্সেৰ অরহা অহোসি. তস্স রত্তিট্ঠানদিৰাট্ঠানাদীসু তত্থ তত্থ ৰিহরন্তস্স ৰিহারো পদুমপুপ্ফেহি ছাদীযতি, তেন সো পদুমচ্ছদনিযত্থেরোতি পাকটো.

৮৩. অত্তনো পুব্বকম্মং সরিত্ৰা সোমনস্সৰসেন পুব্বচরিতাপদানং পকাসেন্তো নিব্বুতে লোকনাথম্হীতিআদিমাহ. তত্থ নিব্বুতেতি খন্ধপরিনিব্বানেন পরিনিব্বুতে সত্থরি, ৰিপস্সিস্স সম্মাসম্বুদ্ধস্স সরীরে চিতমানিযমানে চিতকে আরোপিতে সুফুল্লং পদুমকলাপং অহং গহেত্ৰা চিতকং আরোপযিং পূজেসিন্তি অত্থো. সেসগাথাসু হেট্ঠা ৰুত্তনযত্তা উত্তানত্থমেৰাতি.

পদুমচ্ছদনিযত্থেরঅপদানৰণ্ণনা সমত্তা.

৭. সযনদাযকত্থেরঅপদানৰণ্ণনা

সিদ্ধত্থস্স ভগৰতোতিআদিকং আযস্মতো সযনদাযকত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৰতো কালে অঞ্ঞতরস্মিং কুলে নিব্বত্তো ৰিঞ্ঞুতং পত্তো সত্থরি পসীদিত্ৰা হত্থিদণ্ডসুৰণ্ণাদীহি সযনত্থায মঞ্চং কারেত্ৰা অনগ্ঘেহি ৰিচিত্তত্থরণেহি অত্থরিত্ৰা ভগৰন্তং পূজেসি. সো ভগৰা তস্সানুকম্পায পটিগ্গহেত্ৰা অনুভৰি. সো তেন পুঞ্ঞকম্মেন দিব্বমনুস্সসম্পত্তিযো অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰিঞ্ঞুতং পত্ৰা সত্থু সাসনে পসন্নো পব্বজিত্ৰা ৰিপস্সনং আরভিত্ৰা নচিরস্সেৰ অরহা অহোসি. পুব্বে কতপুঞ্ঞনামেন সযনদাযকত্থেরোতি পাকটো.

৮৮. সো একদিৰসং অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো সিদ্ধত্থস্স ভগৰতোতিআদিমাহ. তং সব্বং পাল়িনযানুসারেন সুৰিঞ্ঞেয্যমেৰাতি.

সযনদাযকত্থেরঅপদানৰণ্ণনা সমত্তা.

৮. চঙ্কমনদাযকত্থেরঅপদানৰণ্ণনা

অত্থদস্সিস্স মুনিনোতিআদিকং আযস্মতো চঙ্কমনদাযকত্থেরস্স অপদানং. অযম্পাযস্মা পুরিমবুদ্ধেসু কতাধিকারো তেসু তেসু ভৰেসু ৰিৰট্টূপনিস্সযানি পুঞ্ঞানি উপচিনন্তো অত্থদস্সিস্স ভগৰতো কালে একস্মিং কুলগেহে নিব্বত্তো ৰিঞ্ঞুতং পত্তো সত্থরি পসীদিত্ৰা উচ্চৰত্থুকং সুধাপরিকম্মকতং রজতরাসিসদিসং সোভমানং চঙ্কমং কারেত্ৰা মুত্তদলসদিসং সেতপুলিনং অত্থরিত্ৰা ভগৰতো অদাসি. পটিগ্গহেসি ভগৰা, চঙ্কমং পটিগ্গহেত্ৰা চ পন সুখং কাযচিত্তসমাধিং অপ্পেত্ৰা ‘‘অযং অনাগতে গোতমস্স ভগৰতো সাসনে সাৰকো ভৰিস্সতী’’তি ব্যাকাসি. সো তেন পুঞ্ঞকম্মেন দেৰমনুস্সেসু অপরাপরং সংসরন্তো দ্ৰে সম্পত্তিযো অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰুদ্ধিপ্পত্তো সদ্ধাসম্পন্নো সাসনে পব্বজিত্ৰা নচিরস্সেৰ অরহত্তং পত্ৰা কতপুঞ্ঞনামেন চঙ্কমনদাযকত্থেরোতি পাকটো অহোসি.

৯৩. সো একদিৰসং অত্তনা পুব্বে কতপুঞ্ঞকম্মং সরিত্ৰা সোমনস্সজাতো পুব্বচরিতাপদানং পকাসেন্তো অত্থদস্সিস্স মুনিনোতিআদিমাহ. তত্থ অত্থদস্সিস্সাতি অত্থং পযোজনং ৰুদ্ধিং ৰিরূল়্হিং নিব্বানং দক্খতি পস্সতীতি অত্থদস্সী, অথ ৰা অত্থং নিব্বানং দস্সনসীলো জাননসীলোতি অত্থদস্সী, তস্স অত্থদস্সিস্স মুনিনো মোনেন ঞাণেন সমন্নাগতস্স ভগৰতো মনোরমং মনল্লীনং ভাৰনীযং মনসি কাতব্বং চঙ্কমং কারেসিন্তি সম্বন্ধো. সেসং ৰুত্তনযানুসারেনেৰ সুৰিঞ্ঞেয্যমেৰাতি.

চঙ্কমনদাযকত্থেরঅপদানৰণ্ণনা সমত্তা.

৯. সুভদ্দত্থেরঅপদানৰণ্ণনা

পদুমুত্তরো লোকৰিদূতিআদিকং আযস্মতো সুভদ্দত্থেরস্স অপদানং. অযম্পি পুরিমবুদ্ধেসু কতাধিকারো তত্থ তত্থ ভৰে নিব্বানাধিগমনত্থায পুঞ্ঞানি উপচিনন্তো পদুমুত্তরস্স ভগৰতো কালে ৰিভৰসম্পন্নে সদ্ধাসম্পন্নে একস্মিং কুলগেহে নিব্বতো ৰিঞ্ঞুতং পত্ৰা ঘরবন্ধনেন বদ্ধো রতনত্তযে পসন্নো পরিনিব্বানমঞ্চে নিপন্নং পদুমুত্তরং ভগৰন্তং দিস্ৰা সন্নিপতিতা দসসহস্সচক্কৰাল়দেৰতাযো চ দিস্ৰা পসন্নমানসো নিগ্গুণ্ডিকেটকনীলকাসোকাসিতাদিঅনেকেহি সুগন্ধপুপ্ফেহি পূজেসি. সো তেন পুঞ্ঞকম্মেন যাৰতাযুকং ঠত্ৰা ততো চৰিত্ৰা তুসিতাদীসু দিব্বসম্পত্তিযো অনুভৰিত্ৰা ততো মনুস্সেসু মনুস্সসম্পত্তিযো অনুভৰিত্ৰা নিব্বত্তনিব্বত্তট্ঠানেসু চ সুগন্ধেহি পুপ্ফেহি পূজিতো অহোসি. ইমস্মিং পন বুদ্ধুপ্পাদে একস্মিং ৰিভৰসম্পন্নে কুলে নিব্বত্তিত্ৰা ৰিঞ্ঞুতং পত্তো কামেসু আদীনৰং দিস্ৰাপি যাৰ বুদ্ধস্স ভগৰতো পরিনিব্বানকালো তাৰ অলদ্ধবুদ্ধদস্সনো ভগৰতো পরিনিব্বানমঞ্চে নিপন্নকালেযেৰ পব্বজিত্ৰা অরহত্তং পাপুণি. পুব্বে কতপুঞ্ঞনামেন সুভদ্দোতি পাকটো অহোসি.

১০১. সো অত্তনো পুব্বকম্মং সরিত্ৰা সোমনস্সৰসেন পুব্বচরিতাপদানং পকাসেন্তো পদুমুত্তরো লোকৰিদূতিআদিমাহ. তং উত্তানত্থমেৰ. সুণাথ মম ভাসতো…পে… নিব্বাযিস্সতিনাসৰোতি ইদং পরিনিব্বানমঞ্চে নিপন্নোৰ পদুমুত্তরো ভগৰা ব্যাকাসি.

পঞ্চমভাণৰারৰণ্ণনা সমত্তা.

১১৫. সো অত্তনো পটিপত্তিং দস্সেন্তো পুব্বকম্মেন সংযুত্তোতিআদিমাহ. একগ্গোতি একগ্গচিত্তো. সুসমাহিতোতি সুট্ঠু সমাহিতো, সন্তকাযচিত্তোতি অত্থো. বুদ্ধস্স ওরসো পুত্তোতি বুদ্ধস্স উরসা হদযেন নিগ্গতওৰাদানুসাসনিং সুত্ৰা পত্তঅরহত্তফলোতি অত্থো. ধম্মজোম্হি সুনিম্মিতোতি ধম্মতো কম্মট্ঠানধম্মতো জাতো অরিযায জাতিযা সুনিম্মিতো সুট্ঠু নিপ্ফাদিতসব্বকিচ্চো অম্হি ভৰামীতি অত্থো.

১১৬. ধম্মরাজং উপগম্মাতি ধম্মেন সব্বসত্তানং রাজানং ইস্সরভূতং ভগৰন্তং উপগন্ত্ৰা সমীপং গন্ত্ৰাতি অত্থো. অপুচ্ছিং পঞ্হমুত্তমন্তি উত্তমং খন্ধাযতনধাতুসচ্চসমুপ্পাদাদিপটিসংযুত্তং পঞ্হং অপুচ্ছিন্তি অত্থো. কথযন্তো চ মে পঞ্হন্তি এসো অম্হাকং ভগৰা মে ময্হং পঞ্হং কথযন্তো ব্যাকরোন্তো. ধম্মসোতং উপানযীতি অনুপাদিসেসনিব্বানধাতুসঙ্খাতং ধম্মসোতং ধম্মপৰাহং উপানযি পাৰিসীতি অত্থো.

১১৮. জলজুত্তমনাযকোতি পদুমুত্তরনামকো ম-কারস্স য-কারং কত্ৰা কতৰোহারো. নিব্বাযি অনুপাদানোতি উপাদানে পঞ্চক্খন্ধে অগ্গহেত্ৰা নিব্বাযি ন পঞ্ঞাযি অদস্সনং অগমাসি, মনুস্সলোকাদীসু কত্থচিপি অপতিট্ঠিতোতি অত্থো. দীপোৰ তেলসঙ্খযাতি ৰট্টিতেলানং সঙ্খযা অভাৰা পদীপো ইৰ নিব্বাযীতি সম্বন্ধো.

১১৯. সত্তযোজনিকং আসীতি তস্স পরিনিব্বুতস্স পদুমুত্তরস্স ভগৰতো রতনমযং থূপং সত্তযোজনুব্বেধং আসি অহোসীতি অত্থো. ধজং তত্থ অপূজেসিন্তি তত্থ তস্মিং চেতিযে সব্বভদ্দং সব্বতো ভদ্দং সব্বসো মনোরমং ধজং পূজেসিন্তি অত্থো.

১২০. কস্সপস্স চ বুদ্ধস্সাতি পদুমুত্তরস্স ভগৰতো কালতো পট্ঠায আগতস্স দেৰমনুস্সেসু সংসরতো মে ময্হং ওরসো পুত্তো তিস্সো নাম কস্সপস্স সম্মাসম্বুদ্ধস্স অগ্গসাৰকো জিনসাসনে বুদ্ধসাসনে দাযাদো আসি অহোসীতি সম্বন্ধো.

১২১. তস্স হীনেন মনসাতি তস্স মম পুত্তস্স তিস্সস্স অগ্গসাৰকস্স হীনেন লামকেন মনসা চিত্তেন অভদ্দকং অসুন্দরং অযুত্তকং ‘‘অন্তকো পচ্ছিমো’’তি ৰাচং ৰচনং অভাসিং কথেসিন্তি অত্থো. তেন কম্মৰিপাকেনাতি তেন অরহন্তভক্খানসঙ্খাতস্স অকুসলকম্মস্স ৰিপাকেন. পচ্ছিমে অদ্দসং জিনন্তি পচ্ছিমে পরিযোসানে পরিনিব্বানকালে মল্লানং উপৰত্তনে সালৰনে পরিনিব্বানমঞ্চে নিপন্নং জিনং জিতসব্বমারং অম্হাকং গোতমসম্মাসম্বুদ্ধং অদ্দসং অহন্তি অত্থো. ‘‘পচ্ছা মে আসি ভদ্দক’’ন্তিপি পাঠো. তস্স পচ্ছা তস্স ভগৰতো অৰসানকালে নিব্বানাসন্নকালে মে ময্হং ভদ্দকং সুন্দরং চতুসচ্চপটিৰিজ্ঝনং আসি অহোসীতি অত্থো.

১২২. পব্বাজেসি মহাৰীরোতি মহাৰীরিযো সব্বসত্তহিতো করুণাযুত্তো জিতমারো মুনি মল্লানং উপৰত্তনে সালৰনে পচ্ছিমে সযনে পরিনিব্বানমঞ্চে সযিতোৰ মং পব্বাজেসীতি সম্বন্ধো.

১২৩. অজ্জেৰ দানি পব্বজ্জাতি অজ্জ এৰ ভগৰতো পরিনিব্বানদিৰসেযেৰ মম পব্বজ্জা, তথা অজ্জ এৰ উপসম্পদা, অজ্জ এৰ দ্ৰিপদুত্তমস্স সম্মুখা পরিনিব্বানং অহোসীতি সম্বন্ধো. সেসং সুৰিঞ্ঞেয্যমেৰাতি.

সুভদ্দত্থেরঅপদানৰণ্ণনা সমত্তা.

১০. চুন্দত্থেরঅপদানৰণ্ণনা

সিদ্ধত্থস্স ভগৰতোতিআদিকং আযস্মতো চুন্দত্থেরস্স অপদানং. অযম্পি পুরিমবুদ্ধেসু কতপুঞ্ঞসম্ভারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৰতো কালে ৰিভৰসম্পন্নে কুলে নিব্বত্তো ৰিঞ্ঞুতং পত্ৰা সত্থরি পসীদিত্ৰা সত্তরতনমযং সুৰণ্ণগ্ঘিযং কারেত্ৰা সুমনপুপ্ফেহি ছাদেত্ৰা ভগৰন্তং পূজেসি. তানি পুপ্ফানি আকাসং সমুগ্গন্ত্ৰা ৰিতানাকারেন অট্ঠংসু. অথ নং ভগৰা ‘‘অনাগতে গোতমস্স নাম ভগৰতো সাসনে চুন্দো নাম সাৰকো ভৰিস্সতী’’তি ব্যাকাসি. সো তেন পুঞ্ঞকম্মেন ততো চুতো দেৰলোকে উপপন্নো কমেন ছসু কামাৰচরদেৰেসু সুখং অনুভৰিত্ৰা মনুস্সেসু চক্কৰত্তিআদিসম্পত্তিযো চ অনুভৰিত্ৰা ইমস্মিং বুদ্ধুপ্পাদে ব্রাহ্মণকুলে রূপসারিযা পুত্তো সারিপুত্তত্থেরস্স কনিট্ঠো হুত্ৰা নিব্বত্তি. তস্স ৰিঞ্ঞুতং পত্তস্স আরোহপরিণাহরূপৰযানং সুন্দরতায সকারস্স চকারং কত্ৰা চুন্দোতি নামং করিংসু. সো ৰযপ্পত্তো ঘরাৰাসে আদীনৰং পব্বজ্জায চ আনিসংসং দিস্ৰা ভাতুত্থেরস্স সন্তিকে পব্বজিত্ৰা ৰিপস্সনং ৰড্ঢেত্ৰা নচিরস্সেৰ অরহত্তং পাপুণি.

১২৫. সো পত্তঅরহত্তফলো একদিৰসং অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো সিদ্ধত্থস্স ভগৰতোতিআদিমাহ. তং হেট্ঠা ৰুত্তত্থমেৰ. অগ্ঘিযন্তিআদযোপি উত্তানত্থাযেৰ.

১২৮. ৰিতিণ্ণকঙ্খো সম্বুদ্ধোতি ৰিসেসেন মগ্গাধিগমেন ৰিচিকিচ্ছায খেপিতত্তা ৰিতিণ্ণকঙ্খো অসংসযো সম্বুদ্ধো. তিণ্ণোঘেহি পুরক্খতোতি কামোঘাদীনং চতুন্নং ওঘানং তিণ্ণত্তা অতিক্কন্তত্তা ওঘতিণ্ণেহি খীণাসৰেহি পুরক্খতো পরিৰারিতোতি অত্থো. ব্যাকরণগাথা উত্তানত্থাযেৰ.

১৩৯. উপট্ঠহিং মহাৰীরন্তি উত্তমত্থস্স নিব্বানস্স পত্তিযা পাপুণনত্থায কপ্পসতসহস্সাধিকেসু চতুরাসঙ্খ্যেয্যেসু কপ্পেসু পারমিযো পূরেন্তেন কতৰীরিযত্তা মহাৰীরং বুদ্ধং উপট্ঠহিং উপট্ঠানং অকাসিন্তি অত্থো. অঞ্ঞে চ পেসলে বহূতি ন কেৰলমেৰ বুদ্ধং উপট্ঠহিং, পেসলে পিযসীলে সীলৰন্তে অঞ্ঞে চ বহুঅগ্গপ্পত্তে সাৰকে, মে ময্হং ভাতরং সারিপুত্তত্থেরঞ্চ উপট্ঠহিন্তি সম্বন্ধো.

১৪০. ভাতরং মে উপট্ঠহিত্ৰাতি ময্হং ভাতরং উপট্ঠহিত্ৰা ৰত্তপটিৰত্তং কত্ৰা তস্স পরিনিব্বুতকালে ভগৰতো পঠমং পরিনিব্বুতত্তা তস্স ধাতুযো গহেত্ৰা পত্তম্হি ওকিরিত্ৰা লোকজেট্ঠস্স নরানং আসভস্স বুদ্ধস্স উপনামেসিং অদাসিন্তি অত্থো.

১৪১. উভো হত্থেহি পগ্গয্হাতি তং মহা দিন্নং ধাতুং সো ভগৰা অত্তনো উভোহি হত্থেহি পকারেন গহেত্ৰা তং ধাতুং সংসুট্ঠু দস্সযন্তো অগ্গসাৰকং সারিপুত্তত্থেরং কিত্তযি পকাসেসীতি অত্থো. সেসং উত্তানত্থমেৰাতি.

চুন্দত্থেরঅপদানৰণ্ণনা সমত্তা.

পঞ্চমৰগ্গৰণ্ণনা সমত্তা.