১-১০. পংসুকূলসঞ্ঞকত্থেরঅপদানাদিৰণ্ণনা

একূনপঞ্ঞাসমৰগ্গে পঠমাপদানং সুৰিঞ্ঞেয্যমেৰ.

১৪. দুতিযাপদানে অধিচ্চুপ্পত্তিকা বুদ্ধাতি অধিচ্চেন অকারণেন উপ্পত্তিকা সযম্ভূতা, অঞ্ঞেহি দেৰব্রহ্মমারাদীহি উপদেসদাযকেহি রহিতা সযম্ভূঞাণেন উপ্পন্না জাতা পাতুভূতাতি অত্থো.

১৬. ওদুম্বরিকপুপ্ফং ৰাতি উদুম্বররুক্খে পুপ্ফং দুল্লভং দুল্লভুপ্পত্তিকং ইৰ. চন্দম্হি সসকং যথাতি চন্দমণ্ডলে সসলেখায রূপং দুল্লভং যথা. ৰাযসানং যথা খীরন্তি কাকানং নিচ্চং রত্তিন্দিৰং খুদ্দাপীল়িতভাৰেন খীরং দুল্লভং যথা, এৰং দুল্লভং লোকনাযকং চতুরাসঙ্খ্যেয্যং ৰা অট্ঠাসঙ্খ্যেয্যং ৰা সোল়সাসঙ্খ্যেয্যং ৰা কপ্পসতসহস্সং পারমিযো পূরেত্ৰা বুদ্ধভাৰতো দুল্লভো লোকনাযকোতি অত্থো.

৩০. ততিযাপদানে মধুং ভিসেহি সৰতীতি পোক্খরমধুপদুমকেসরেহি সৰতি পগ্ঘরতি. খীরং সপ্পিং মুল়ালিভীতি খীরঞ্চ সপ্পিরসঞ্চ পদুমমুল়ালেহি সৰতি পগ্ঘরতি. তস্মা তদুভযং মম সন্তকং বুদ্ধো পটিগ্গণ্হতূতি অত্থো.

চতুত্থপঞ্চমছট্ঠাপদানানি উত্তানানেৰ.

১১৯. সত্তমাপদানে চত্তালীসদিজাপি চাতি দ্ৰিক্খত্তুং জাতাতি দিজা. কুমারৰযে উট্ঠিতদন্তানং পতিতত্তা পুন উট্ঠিতদন্তা দিজা, তে চ দন্তা. ব্যাকরণঞ্চ হেট্ঠা নিদানকথাযং ৰুত্তমেৰ.

অট্ঠমাপদানং উত্তানমেৰাতি.

১৭১. নৰমাপদানে তদাহং মাণৰো আসিন্তি যদা সুমেধপণ্ডিতো দীপঙ্করভগৰতো সন্তিকা ব্যাকরণং লভি, তদা অহং মেঘো নাম ব্রাহ্মণমাণৰো হুত্ৰা সুমেধতাপসেন সহ ইসিপব্বজ্জং পব্বজিত্ৰা সিক্খাপদেসু সিক্খিতো কেনচি পাপসহাযেন সংসট্ঠো সংসগ্গদোসেন পাপৰিতক্কাদিৰসং গতো মাতুঘাতকম্মৰসেন নরকে অগ্গিজালাদিদুক্খমনুভৰিত্ৰা ততো চুতো সমুদ্দে তিমিঙ্গলমহামচ্ছো হুত্ৰা নিব্বত্তো, সমুদ্দমজ্ঝে গচ্ছন্তং মহানাৰং গিলিতুকামো গতো. দিস্ৰা মং ৰাণিজা ভীতা ‘‘অহো গোতমো ভগৰা’’তি সদ্দমকংসু. অথ মহামচ্ছো পুব্বৰাসনাৰসেন বুদ্ধগারৰং উপ্পাদেত্ৰা ততো চুতো সাৰত্থিযং ৰিভৰসম্পন্নে ব্রাহ্মণকুলে নিব্বত্তো সদ্ধো পসন্নো সত্থু ধম্মদেসনং সুত্ৰা পব্বজিত্ৰা সহ পটিসম্ভিদাহি অরহত্তং পাপুণিত্ৰা দিৰসস্স তিক্খত্তুং উপট্ঠানং গন্ত্ৰা সরমানো ৰন্দতি. তদা ভগৰা ‘‘চিরং ধম্মরুচী’’তি মং আহ.

১৮৪. অথ সো থেরো ‘‘সুচিরং সতপুঞ্ঞলক্খণ’’ন্তিআদীহি গাথাহি থোমেসি. ভন্তে, সতপুঞ্ঞলক্খণধর গোতম. পতিপুব্বেন ৰিসুদ্ধপচ্চযন্তি পুব্বে দীপঙ্করপাদমূলে পরিপুণ্ণপারমীপচ্চযসম্ভারো সুট্ঠু চিরং কালং মযা ন দিট্ঠো অসীতি অত্থো. অহমজ্জসুপেক্খনন্তি অজ্জ ইমস্মিং দিৰসে অহং সুপেক্খনং সুন্দরদস্সনং, সুন্দরদিট্ঠং ৰা নিরুপমং ৰিগ্গহং উপমারহিতসরীরং গোতমং ৰত একন্তেন পস্সামি দক্খামীতি অত্থো.

১৮৫-১৮৬. সুচিরং ৰিহততমো মযাতি ৰিসেসেন হততমো ৰিদ্ধংসিতমোহো ত্ৰং মযাপি সুট্ঠু চিরং থোমিতোতি অত্থো. সুচিরক্খেন নদী ৰিসোসিতাতি এসা তণ্হানদী সুন্দররক্খেন গোপনেন ৰিসেসেন সোসিতা, অভব্বুপ্পত্তিকতা তযাতি অত্থো. সুচিরং অমলং ৰিসোধিতন্তি সুট্ঠু চিরং দীঘেন অদ্ধুনা অমলং নিব্বানং ৰিসেসেন সোধিতং, সুট্ঠু কতং অধিগতং তযাতি অত্থো. নযনং ঞাণমযং মহামুনে. চিরকালসমঙ্গিতোতি মহামুনে মহাসমণ ঞাণমযং নযনং দিব্বচক্খুং চিরকালং সমধিগতো সম্পত্তো ত্ৰন্তি অত্থো. অৰিনট্ঠো পুনরন্তরন্তি অহং পুন অন্তরং অন্তরাভৰে মজ্ঝে পরিনট্ঠো পরিহীনো অহোসিন্তি অত্থো. পুনরজ্জসমাগতো তযাতি অজ্জ ইমস্মিং কালে তযা সদ্ধিং পুনপি সমাগতো একীভূতো সহ ৰসামীতি অত্থো. ন হি নস্সন্তি কতানি গোতমাতি গোতম সব্বঞ্ঞুবুদ্ধ, তযা সদ্ধিং কতানি সমাগমাদীনি ন হি নস্সন্তি যাৰ খন্ধপরিনিব্বানা ন ৰিনা ভৰিস্সন্তীতি অত্থো. সেসং উত্তানমেৰাতি.

ধম্মরুচিযত্থেরঅপদানৰণ্ণনা সমত্তা.

দসমাপদানং সুৰিঞ্ঞেয্যমেৰাতি.

একূনপঞ্ঞাসমৰগ্গৰণ্ণনা সমত্তা.