৮. মণিপূজকত্থেরঅপদানৰণ্ণনা

ওরেন হিমৰন্তস্সাতিআদিকং আযস্মতো মণিপূজকত্থেরস্স অপদানং. অযম্পি থেরো পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো পদুমুত্তরস্স ভগৰতো কালে একস্মিং কুলে নিব্বত্তো ঘরাৰাসং সণ্ঠপেত্ৰা তত্থাদীনৰং দিস্ৰা ঘরাৰাসং পহায তাপসপব্বজ্জং পব্বজিত্ৰা হিমৰন্তওরভাগে একিস্সা নদিযা সমীপে পণ্ণসালং কারেত্ৰা ৰসন্তো ৰিৰেককামতায তস্সানুকম্পায চ তত্থ উপগতং পদুমুত্তরং ভগৰন্তং দিস্ৰা পসন্নমানসো মণিপল্লঙ্কং ভগৰতো পূজেসি. ভগৰা তস্স পসাদৰড্ঢনত্থায তত্থ নিসীদি. সো ভিয্যোসোমত্তায পসন্নো নিব্বানাধিগমত্থায পত্থনং অকাসি. ভগৰা অনুমোদনং ৰত্ৰা পক্কামি. সো তেন পুঞ্ঞেন দেৰমনুস্সেসু সংসরন্তো সব্বত্থ পূজিতো সুখং অনুভৰিত্ৰা ইমস্মিং বুদ্ধুপ্পাদে সাৰত্থিযং ৰিভৰসম্পন্নে কুলে নিব্বত্তো ঘরাৰাসং ৰসন্তো একদিৰসং সত্থু ধম্মদেসনং সুত্ৰা পটিলদ্ধসদ্ধো পব্বজিত্ৰা নচিরস্সেৰ অরহা অহোসি.

৩৪. সো একদিৰসং অত্তনা কতকুসলং সরিত্ৰা সঞ্জাতসোমনস্সো পুব্বচরিতাপদানং পকাসেন্তো ওরেন হিমৰন্তস্সাতিআদিমাহ. তত্থ ওরেনাতি হিমৰন্তস্স অপরং ভাগং ৰিহায ওরেন, ভুম্মত্থে করণৰচনং, ওরস্মিং দিসাভাগেতি অত্থো. নদিকা সম্পৰত্তথাতি অপাকটনামধেয্যা একা নদী সংসুট্ঠু পৰত্তানী ৰহানী সন্দমানা অহোসীতি অত্থো. তস্সা চানুপখেত্তম্হীতি তস্সা নদিযা অনুপখেত্তম্হি তীরসমীপেতি অত্থো. সযম্ভূ ৰসতে তদাতি যদা অহং মণিপল্লঙ্কং পূজেসিং, তদা অনাচরিযকো হুত্ৰা সযমেৰ বুদ্ধভূতো ভগৰা ৰসতে ৰিহরতীতি অত্থো.

৩৫. মণিং পগ্গয্হ পল্লঙ্কন্তি মণিন্তি চিত্তং আরাধেতি সোমনস্সং করোতীতি মণি, অথ ৰা মাতি পমাণং করোতি আভরণন্তি মণি, অথ ৰা মরন্তাপি রাজযুৰরাজাদযো তং ন পরিচ্চজন্তি তদত্থায সঙ্গামং করোন্তীতি মণি, তং মণিং মণিমযং পল্লঙ্কং মনোরমং সাধু চিত্তং সুট্ঠু ৰিচিত্তং পগ্গয্হ গহেত্ৰা বুদ্ধসেট্ঠস্স অভিরোপযিং পূজেসিন্তি অত্থো. সেসং সব্বং উত্তানত্থমেৰাতি.

মণিপূজকত্থেরঅপদানৰণ্ণনা সমত্তা.