১০. সঙ্ঘুপট্ঠাকত্থেরঅপদানৰণ্ণনা

ৰেস্সভুম্হি ভগৰতীতিআদিকং আযস্মতো সঙ্ঘুপট্ঠাকত্থেরস্স অপদানং. অযম্পি থেরো পুরিমবুদ্ধেসু কতকুসলসম্ভারো অনেকেসু ভৰেসু ৰিৰট্টূপনিস্সযানি পুঞ্ঞানি উপচিনন্তো ৰেস্সভুস্স ভগৰতো কালে তস্সারামিকস্স পুত্তো হুত্ৰা নিব্বত্তো ৰিঞ্ঞুতং পত্ৰা সদ্ধো পসন্নো ৰিহারেসু আরামিককম্মং করোন্তো সক্কচ্চং সঙ্ঘং উপট্ঠাসি. সো তেনেৰ কুসলকম্মেন দেৰমনুস্সেসু সংসরন্তো উভযসম্পত্তিযো অনুভৰিত্ৰা ইমস্মিং বুদ্ধুপ্পাদে সাৰত্থিযং গহপতিকুলে নিব্বত্তো ৰুদ্ধিপ্পত্তো ৰিভৰসম্পন্নো সুখপ্পত্তো পাকটো সত্থু ধম্মদেসনং সুত্ৰা সাসনে পসন্নো পব্বজিত্ৰা ৰত্তসম্পন্নো সাসনং সোভযমানো ৰিপস্সনং ৰড্ঢেন্তো নচিরস্সেৰ সহ পটিসম্ভিদাহি অরহত্তং পত্তো ছল়ভিঞ্ঞো পুব্বে কতকুসলকম্মৰসেন সঙ্ঘুপট্ঠাকত্থেরোতি পাকটো অহোসি.

৪৫. সো একদিৰসং ‘‘পুব্বে মযা কিং নাম কম্মং কত্ৰা অযং লোকুত্তরসম্পত্তি লদ্ধা’’তি অত্তনো পুব্বকম্মং সরিত্ৰা পচ্চক্খতো জানিত্ৰা সোমনস্সজাতো পুব্বচরিতাপদানং পাকটং করোন্তো ৰেস্সভুম্হি ভগৰতীতিআদিমাহ. তত্থ অহোসারামিকো অহন্তি অহং ৰেস্সভুস্স ভগৰতো সাসনে আরামিকো অহোসিন্তি অত্থো. সেসং হেট্ঠা ৰুত্তনযত্তা উত্তানত্থত্তা চ সুৰিঞ্ঞেয্যমেৰাতি.

সঙ্ঘুপট্ঠাকত্থেরঅপদানৰণ্ণনা সমত্তা.

অট্ঠারসমৰগ্গৰণ্ণনা সমত্তা.