১৭. সুপারিচরিযৰগ্গো

১. সুপারিচরিযত্থেরঅপদানৰণ্ণনা

পদুমো নাম নামেনাতিআদিকং আযস্মতো সুপারিচরিযত্থেরস্স অপদানং. অযম্পি পুরিমমুনিপুঙ্গৰেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো পদুমুত্তরস্স ভগৰতো কালে যক্খযোনিযং নিব্বত্তো হিমৰতি যক্খসমাগমং গতো ভগৰতো দেৰযক্খগন্ধব্বনাগানং ধম্মদেসনং সুত্ৰা পসন্নমানসো উভো হত্থে আভুজিত্ৰা অপ্ফোটেসি নমস্সি চ. সো তেন পুঞ্ঞেন ততো চুতো উপরি দেৰলোকে উপ্পন্নো তত্থ দিব্বসুখং অনুভৰিত্ৰা মনুস্সেসু চ চক্কৰতিআদিসম্পত্তিযো অনুভৰিত্ৰা ইমস্মিং বুদ্ধুপ্পাদে সাৰত্থিযং গহপতিকুলে নিব্বত্তো অড্ঢো মহদ্ধনো মহাভোগো রতনত্তযে পসন্নো সত্থু ধম্মদেসনং সুত্ৰা সদ্ধাজাতো পব্বজিত্ৰা নচিরস্সেৰ অরহত্তং পাপুণি.

১. সো একদিৰসং অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো পদুমো নাম নামেনাতিআদিমাহ. তত্থ পদুমোতি যস্স পাদনিক্খেপসমযে পথৰিং ভিন্দিত্ৰা পদুমং উগ্গন্ত্ৰা পাদতলং সম্পটিচ্ছতি, তেন সঞ্ঞাণেন সো ভগৰা পদুমোতি সঙ্খং গতো, ইধ পদুমুত্তরো ভগৰা অধিপ্পেতো. সো ভগৰা পৰনা ৰসনৰিহারা অভিনিক্খম্ম ৰনমজ্ঝং পৰিসিত্ৰা ধম্মং দেসেতীতি সম্বন্ধো.

যক্খানং সমযোতি দেৰানং সমাগমো আসি অহোসীতি অত্থো. অজ্ঝাপেক্খিংসু তাৰদেতি তস্মিং দেসনাকালে অধিঅপেক্খিংসু, ৰিসেসেন পস্সনসীলা অহেসুন্তি অত্থো. সেসং পাকটমেৰাতি.

সুপারিচরিযত্থেরঅপদানৰণ্ণনা সমত্তা.

২. কণৰেরপুপ্ফিযত্থেরঅপদানৰণ্ণনা

সিদ্ধত্থো নাম ভগৰাতিআদিকং আযস্মতো কণৰেরপুপ্ফিযত্থেরস্স অপদানং. অযম্পি পুরিমবুদ্ধেসু কতাধিকারো সিদ্ধত্থস্স ভগৰতো কালে সুদ্দকুলে নিব্বত্তো ৰুদ্ধিমন্ৰায রঞ্ঞো অন্তেপুরপালকো অহোসি. তস্মিং সমযে সিদ্ধত্থো ভগৰা ভিক্খুসঙ্ঘপরিৰুতো রাজৰীথিং পটিপজ্জি. অথ সো অন্তেপুরপালকো চরমানং ভগৰন্তং দিস্ৰা পসন্নমানসো হুত্ৰা কণৰেরপুপ্ফেন ভগৰন্তং পূজেত্ৰা নমস্সমানো অট্ঠাসি. সো তেন পুঞ্ঞেন সুগতিসম্পত্তিযোযেৰ অনুভৰিত্ৰা ইমস্মিং বুদ্ধুপ্পাদে একস্মিং কুলে নিব্বত্তিত্ৰা ৰুদ্ধিপ্পত্তো সত্থু ধম্মদেসনং সুত্ৰা পটিলদ্ধসদ্ধো পব্বজিত্ৰা নচিরস্সেৰ অরহা অহোসি.

৭. সো পত্তঅগ্গফলো পুব্বে কতকুসলং সরিত্ৰা সঞ্জাতসোমনস্সো পুব্বচরিতাপদানং পকাসেন্তো সিদ্ধত্থো নাম ভগৰাতিআদিমাহ. তং সব্বং হেট্ঠা ৰুত্তত্তা উত্তানত্থমেৰাতি.

কণৰেরপুপ্ফিযত্থেরঅপদানৰণ্ণনা সমত্তা.

৩. খজ্জকদাযকত্থেরঅপদানৰণ্ণনা

তিস্সস্স খো ভগৰতোতিআদিকং আযস্মতো খজ্জকদাযকত্থেরস্স অপদানং. অযম্পি পুরিমজিনৰরেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো তিস্সস্স ভগৰতো কালে সুদ্দকুলে নিব্বত্তো ভগৰন্তং দিস্ৰা পসন্নমানসো অম্বজম্বুআদিমনেকং মধুরফলাফলং নাল়িকেরং পূৰখজ্জকঞ্চ অদাসি. ভগৰা তস্স পসাদৰড্ঢনত্থায পস্সন্তস্সেৰ পরিভুঞ্জি. সো তেন পুঞ্ঞেন সুগতিসম্পত্তিযোযেৰ অনুভৰিত্ৰা ইমস্মিং বুদ্ধুপ্পাদে সাৰত্থিযং কুলগেহে নিব্বত্তো ৰিঞ্ঞুতং পত্ৰা সত্থু ধম্মদেসনং সুত্ৰা সঞ্জাতসদ্ধো পসাদবহুমানো পব্বজিত্ৰা ৰত্তপটিপত্তিযা সাসনং সোভেন্তো সীলালঙ্কারপটিমণ্ডিতো নচিরস্সেৰ অরহত্তং পাপুণি.

১৩. সো পুব্বকম্মং সরন্তো ‘‘পুব্বে মযা সুখেত্তে কুসলং কতং সুন্দর’’ন্তি সোমনস্সজাতো পুব্বচরিতাপদানং পকাসেন্তো তিস্সস্স খো ভগৰতোতিআদিমাহ. তত্থ তিস্সোপি ভৰসম্পত্তিযো দদমানো জাতোতি মাতাপিতূহি কতনামৰসেন তিস্সো. অথ ৰা তীহি সরণগমনেহি অস্সাসেন্তো ওৰদন্তো হেতুসম্পন্নপুগ্গলে সগ্গমোক্খদ্ৰযে পতিট্ঠাপেন্তো বুদ্ধো জাতোতি তিস্সো. সমাপত্তিগুণাদীহি ভগেহি যুত্তোতি ভগৰা, তস্স তিস্সস্স ভগৰতো পুব্বে অহং ফলং অদাসিন্তি সম্বন্ধো. নাল়িকেরঞ্চ পাদাসিন্তি নাল়িকাকারেন পৰত্তং ফলং নাল়িকেরং, তঞ্চ ফলং অদাসিন্তি অত্থো. খজ্জকং অভিসম্মতন্তি খাদিতব্বং খজ্জকং অভি ৰিসেসেন মধুসক্করাদীহি সম্মিস্সং কত্ৰা নিপ্ফাদিতং সুন্দরং মধুরন্তি সম্মতং ঞাতং অভিসম্মতং খজ্জকঞ্চ অদাসিন্তি অত্থো. সেসং সুৰিঞ্ঞেয্যমেৰাতি.

খজ্জকদাযকত্থেরঅপদানৰণ্ণনা সমত্তা.

৪. দেসপূজকত্থেরঅপদানৰণ্ণনা

অত্থদস্সী তু ভগৰাতিআদিকং আযস্মতো দেসপূজকত্থেরস্স অপদানং. অযম্পি থেরো পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো অত্থদস্সিস্স ভগৰতো কালে কুলগেহে নিব্বত্তো ৰুদ্ধিমন্ৰায সদ্ধো পসন্নো বুদ্ধমামকো ধম্মমামকো সঙ্ঘমামকো অহোসি. তদা অত্থদস্সী ভগৰা ভিক্খুসঙ্ঘপরিৰুতো চন্দো ৰিয সূরিযো ৰিয চ আকাসেন গচ্ছতি. সো উপাসকো ভগৰতো গতদিসাভাগং গন্ধমালাদীহি পূজেন্তো অঞ্জলিং পগ্গয্হ নমস্সমানো অট্ঠাসি.

১৮. সো তেন পুঞ্ঞেন দেৰলোকে নিব্বত্তো সগ্গসম্পত্তিং অনুভৰিত্ৰা মনুস্সেসু চ মনুস্সসম্পত্তিং অনুভৰিত্ৰা ইমস্মিং বুদ্ধুপ্পাদে একস্মিং কুলে নিব্বত্তো ৰুদ্ধিপ্পত্তো উপভোগপরিভোগসম্পন্নো সত্থু ধম্মদেসনং সুত্ৰা পসন্নমানসো ঘরাৰাসে অনল্লীনো পব্বজিত্ৰা ৰত্তসম্পন্নো নচিরস্সেৰ অরহা হুত্ৰা অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো অত্থদস্সী তু ভগৰাতিআদিমাহ. তং হেট্ঠা ৰুত্তত্থমেৰ. অনিলঞ্জসেতি ‘‘মগ্গো পন্থো পথো পজ্জো, অঞ্জসং ৰটুমাযন’’ন্তি (চূল়নি. পারাযনত্থুতিগাথানিদ্দেস ১০১) পরিযাযস্স ৰুত্তত্তা অনিলস্স ৰাতস্স অঞ্জসং গমনমগ্গোতি অনিলঞ্জসং, তস্মিং অনিলঞ্জসে, আকাসেতি অত্থো. সেসং উত্তানত্থমেৰাতি.

দেসপূজকত্থেরঅপদানৰণ্ণনা সমত্তা.

৫. কণিকারছত্তিযত্থেরঅপদানৰণ্ণনা

ৰেস্সভূ নাম সম্বুদ্ধোতিআদিকং আযস্মতো কণিকারছত্তিযত্থেরস্স অপদানং. অযম্পি থেরো পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ৰেস্সভুস্স ভগৰতো কালে কুলগেহে নিব্বত্তো ৰিঞ্ঞুতং পত্তো সদ্ধাসম্পন্নো অহোসি. তস্মিং সমযে ৰেস্সভূ ভগৰা ৰিৰেককামো মহাৰনং পৰিসিত্ৰা নিসীদি. অথ সোপি উপাসকো কেনচিদেৰ করণীযেন তত্থ গন্ত্ৰা ভগৰন্তং অগ্গিক্খন্ধং ৰিয জলমানং নিসিন্নং দিস্ৰা পসন্নমানসো কণিকারপুপ্ফং ওচিনিত্ৰা ছত্তং কত্ৰা ভগৰতো নিসিন্নট্ঠানে ৰিতানং কত্ৰা পূজেসি, তং ভগৰতো আনুভাৰেন সত্তাহং অমিলাতং হুত্ৰা তথেৰ অট্ঠাসি. ভগৰাপি ফলসমাপত্তিং নিরোধসমাপত্তিঞ্চ সমাপজ্জিত্ৰা ৰিহাসি, সো তং অচ্ছরিযং দিস্ৰা সোমনস্সজাতো ভগৰন্তং ৰন্দিত্ৰা অঞ্জলিং পগ্গয্হ অট্ঠাসি. ভগৰা সমাপত্তিতো ৰুট্ঠহিত্ৰা ৰিহারমেৰ অগমাসি.

২৩. সো তেন পুঞ্ঞেন দেৰমনুস্সেসু সম্পত্তিযো অনুভৰিত্ৰা ইমস্মিং বুদ্ধুপ্পাদে সাৰত্থিযং কুলগেহে নিব্বত্তো ৰুদ্ধিমন্ৰায সদ্ধাসম্পন্নো সত্থু ধম্মদেসনং সুত্ৰা ঘরাৰাসে অনল্লীনো পব্বজিত্ৰা ৰত্তপটিপত্তিযা জিনসাসনং সোভেন্তো নচিরস্সেৰ অরহা হুত্ৰা অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো ৰেস্সভূ নাম সম্বুদ্ধোতিআদিমাহ. তত্থ ৰেস্সভূতি ৰেস্সে ৰেস্সজনে ভুনাতি অভিভৰতীতি ৰেস্সভূ. অথ ৰা ৰেস্সে পঞ্চৰিধমারে অভিভুনাতি অজ্ঝোত্থরতীতি ৰেস্সভূ. সামংযেৰ বুজ্ঝিতা সচ্চানীতি সম্বুদ্ধো, নামেন ৰেস্সভূ নাম সম্বুদ্ধোতি অত্থো. দিৰাৰিহারায মুনীতি দিব্বতি পকাসেতি তং তং ৰত্থুং পাকটং করোতীতি দিৰা. সূরিযুগ্গমনতো পট্ঠায যাৰ অত্থঙ্গমো, তাৰ পরিচ্ছিন্নকালো, ৰিহরণং চতূহি ইরিযাপথেহি পৰত্তনং ৰিহারো, দিৰায ৰিহারো দিৰাৰিহারো, তস্স দিৰাৰিহারায লোকজেট্ঠো নরাসভো বুদ্ধমুনি মহাৰনং ওগাহিত্ৰা পৰিসিত্ৰাতি অত্থো. সেসং উত্তানত্থমেৰাতি.

কণিকারছত্তিযত্থেরঅপদানৰণ্ণনা সমত্তা.

৬. সপ্পিদাযকত্থেরঅপদানৰণ্ণনা

ফুস্সো নামাথ ভগৰাতিআদিকং আযস্মতো সপ্পিদাযকত্থেরস্স অপদানং. অযম্পি পুরিমবুদ্ধেসু কতাধিকারো অনেকেসু ভৰেসু ৰিৰট্টূপনিস্সযানি পুঞ্ঞানি উপচিনন্তো ফুস্সস্স ভগৰতো কালে কুলগেহে নিব্বত্তো অহোসি. তদা ভগৰা ভিক্খুসঙ্ঘপরিৰুতো ৰীথিযং চরমানো তস্স উপাসকস্স গেহদ্ৰারং সম্পাপুণি. অথ সো উপাসকো ভগৰন্তং দিস্ৰা পসন্নমানসো ৰন্দিত্ৰা পত্তপূরং সপ্পিতেলং অদাসি, ভগৰা অনুমোদনং কত্ৰা পক্কামি. সো তেনেৰ সোমনস্সেন যাৰতাযুকং ঠত্ৰা ততো চুতো তেন পুঞ্ঞেন দেৰলোকে উপ্পন্নো তত্থ দিব্বসুখং অনুভৰিত্ৰা মনুস্সেসু চ নিব্বত্তো উপ্পন্নুপ্পন্নভৰে সপ্পিতেলমধুফাণিতাদিমধুরাহারসমঙ্গী সুখং অনুভৰিত্ৰা ইমস্মিং বুদ্ধুপ্পাদে সাৰত্থিযং একস্মিং কুলে নিব্বত্তো ৰুদ্ধিপ্পত্তো সদ্ধো বুদ্ধিসম্পন্নো সত্থু ধম্মদেসনং সুত্ৰা পসন্নমানসো পব্বজিত্ৰা ৰত্তসম্পন্নো নচিরস্সেৰ অরহা অহোসি.

২৮. সো অত্তনো পুব্বকম্মং সরিত্ৰা জাতসোমনস্সো পুব্বচরিতাপদানং পকাসেন্তো ফুস্সো নামাথ ভগৰাতিআদিমাহ. তত্থ ফুস্সোতি ফুস্সনক্খত্তযোগেন জাতত্তা মাতাপিতূহি কতনামধেয্যেন ফুস্সো. অথ ৰা নিব্বানং ফুসি পস্সি সচ্ছি অকাসীতি ফুস্সো. অথ ৰা সমতিংসপারমিতাসত্ততিংসবোধিপক্খিযধম্মে সকলে চ তেপিটকে পরিযত্তিধম্মে ফুসি পস্সি অঞ্ঞাসীতি ফুস্সো. ভগ্গৰা ভগ্যৰা যুত্তোতিআদিপুঞ্ঞকোট্ঠাসসমঙ্গিতায ভগৰা. আহুতীনং পটিগ্গহোতি আহুতিনো ৰুচ্চন্তি পূজাসক্কারা, তেসং আহুতীনং পটিগ্গহেতুং অরহতীতি আহুতীনং পটিগ্গহো. মহাজনং নিব্বাপেন্তো ৰীরো ফুস্সো নাম ভগৰা ৰীথিযং অথ তদা গচ্ছতেতি সম্বন্ধো. সেসং পাকটমেৰাতি.

সপ্পিদাযকত্থেরঅপদানৰণ্ণনা সমত্তা.

৭. যূথিকাপুপ্ফিযত্থেরঅপদানৰণ্ণনা

চন্দভাগানদীতীরেতিআদিকং আযস্মতো যূথিকাপুপ্ফিযত্থেরস্স অপদানং. অযম্পি আযস্মা পুরিমমুনিন্দেসু কতাধিকারো অনেকেসু চ জাতিসতেসু ৰিৰট্টূপনিস্সযানি পুঞ্ঞানি উপচিনন্তো ফুস্সস্সেৰ ভগৰতো কালে সুদ্দকুলে নিব্বত্তো ৰুদ্ধিপ্পত্তো চন্দভাগায নদিযা তীরে কেনচিদেৰ করণীযেন অনুসোতং চরমানো ফুস্সং ভগৰন্তং ন্হাযিতুকামং অগ্গিক্খন্ধং ৰিয জলমানং দিস্ৰা সোমনস্সজাতো তত্থ জাতং যূথিকাপুপ্ফং ওচিনিত্ৰা ভগৰন্তং পূজেসি. ভগৰা তস্স অনুমোদনমকাসি.

৩৩. সো তত্থ তেন পুঞ্ঞকোট্ঠাসেন দেৰমনুস্সেসু সংসরন্তো উভযসম্পত্তিযো অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰুদ্ধিপ্পত্তো ভগৰতো ধম্মদেসনং সুত্ৰা পসন্নমানসো পব্বজিত্ৰা ৰত্তপটিপত্তিযা সাসনং সোভেন্তো নচিরস্সেৰ অরহা হুত্ৰা অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো চন্দভাগানদীতীরেতিআদিমাহ. তং সব্বং উত্তানত্থমেৰাতি.

যূথিকাপুপ্ফিযত্থেরঅপদানৰণ্ণনা সমত্তা.

৮. দুস্সদাযকত্থেরঅপদানৰণ্ণনা

তিৰরাযং পুরে রম্মেতিআদিকং আযস্মতো দুস্সদাযকত্থেরস্স অপদানং. অযম্পাযস্মা পুরিমজিনৰরেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৰতো কালে রাজকুলে নিব্বত্তো ৰুদ্ধিপ্পত্তকালে যুৰরাজভাৰং পত্ৰা পাকটো একং জনপদং লভিত্ৰা তত্রাধিপতিভূতো সকলজনপদৰাসিনো দানপিযৰচনঅত্থচরিযাসমানত্থতাসঙ্খাতেহি চতূহি সঙ্গহৰত্থূহি সঙ্গণ্হাতি. তস্মিং সমযে সিদ্ধত্থো ভগৰা তং জনপদং সম্পাপুণি. অথ সো যুৰরাজা পণ্ণাকারং লভিত্ৰা তত্থ সুখুমৰত্থেন ভগৰন্তং পূজেসি. ভগৰা তং ৰত্থং হত্থেন পরামসিত্ৰা আকাসং পক্খন্দি. তম্পি ৰত্থং ভগৰন্তমেৰ অনুবন্ধি. অথ সো যুৰরাজা তং অচ্ছরিযং দিস্ৰা অতীৰ পসন্নো অঞ্জলিং পগ্গয্হ অট্ঠাসি. ভগৰতো সম্পত্তসম্পত্তট্ঠানে সব্বে জনা তং অচ্ছরিযং দিস্ৰা অচ্ছরিযব্ভুতচিত্তা অঞ্জলিং পগ্গয্হ অট্ঠংসু. ভগৰা ৰিহারমেৰ অগমাসি. যুৰরাজা তেনেৰ কুসলকম্মেন ততো চুতো দেৰলোকে উপ্পন্নো তত্থ দিব্বসম্পত্তিং অনুভৰিত্ৰা মনুস্সেসু চক্কৰত্তিআদিসম্পত্তিযো অনুভৰিত্ৰা ইমস্মিং বুদ্ধুপ্পাদে ৰিভৰসম্পন্নে একস্মিং কুলে নিব্বত্তো ৰিঞ্ঞুতং পত্তো ঘরাৰাসং সণ্ঠপেত্ৰা রতনত্তযে পসন্নো ভগৰতো ধম্মদেসনং সুত্ৰা পটিলদ্ধসদ্ধো পব্বজিত্ৰা ৰাযমন্তো নচিরস্সেৰ অরহা অহোসি.

৩৮. সো একদিৰসং অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো তিৰরাযং পুরে রম্মেতিআদিমাহ. তত্থ তিৰরনামকে নগরে রমণীযে অহং রাজপুত্তো হুত্ৰা সিদ্ধত্থং ভগৰন্তং ৰত্থেন পূজেসিন্তি অত্থো. সেসং সুৰিঞ্ঞেয্যমেৰাতি.

দুস্সদাযকত্থেরঅপদানৰণ্ণনা সমত্তা.

৯. সমাদপকত্থেরঅপদানৰণ্ণনা

নগরে বন্ধুমতিযাতিআদিকং আযস্মতো সমাদপকত্থেরস্স অপদানং. অযম্পি থেরো পুরিমবুদ্ধানং সন্তিকে কতকুসলসম্ভারো অনেকেসু ভৰেসু ৰিৰট্টূপনিস্সযানি পুঞ্ঞানি উপচিনন্তো ৰিপস্সিস্স ভগৰতো কালে কুলগেহে নিব্বত্তো ৰুদ্ধিমন্ৰায ঘরাৰাসং সণ্ঠপেত্ৰা পুঞ্ঞানি করোন্তো ৰসমানো সদ্ধো পসন্নো বহূ উপাসকে সন্নিপাতেত্ৰা গণজেট্ঠকো হুত্ৰা ‘‘মাল়কং করিস্সামা’’তি তে সব্বে সমাদপেত্ৰা একং মাল়কং সমং কারেত্ৰা পণ্ডরপুলিনং ওকিরিত্ৰা ভগৰতো নিয্যাদেসি. সো তেন পুঞ্ঞেন দেৰলোকে উপ্পন্নো ছ কামাৰচরসম্পত্তিযো অনুভৰিত্ৰা মনুস্সেসু চ চক্কৰত্তিআদিসম্পত্তিযো অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰিঞ্ঞুতং পত্তো ভগৰতি পসন্নো ধম্মং সুত্ৰা পসন্নমানসো সদ্ধাজাতো পব্বজিত্ৰা সীলসম্পন্নো ৰত্তসম্পন্নো নচিরস্সেৰ অরহত্তং পাপুণি.

৪৪. সো অপরভাগে অত্তনো কতকুসলং সরিত্ৰা সঞ্জাতসোমনস্সো পুব্বচরিতাপদানং পকাসেন্তো নগরে বন্ধুমতিযাতিআদিমাহ. তত্থ বন্ধন্তি ঞাতিগোত্তাদিৰসেন একসম্বন্ধা হোন্তি সকলনগরৰাসিনোতি বন্ধূ, বন্ধূ এতস্মিং ৰিজ্জন্তীতি বন্ধুমতী, তস্সা বন্ধুমতিযা নাম নগরে মহাপূগগণো উপাসকসমূহো অহোসীতি অত্থো. মাল়ং কস্সাম সঙ্ঘস্সাতি এত্থ মাতি গণ্হাতি সম্পত্তসম্পত্তজনানং চিত্তন্তি মাল়ং, অথ ৰা সম্পত্তযতিগণানং চিত্তস্স ৰিৰেককরণে অলন্তি মাল়ং, মাল়মেৰ মাল়কং, ভিক্খুসঙ্ঘস্স ফাসুৰিহারত্থায মাল়কং করিস্সামাতি অত্থো. সেসং পাকটমেৰাতি.

সমাদপকত্থেরঅপদানৰণ্ণনা সমত্তা.

১০. পঞ্চঙ্গুলিযত্থেরঅপদানৰণ্ণনা

তিস্সো নামাসি ভগৰাতিআদিকং আযস্মতো পঞ্চঙ্গুলিযত্থেরস্স অপদানং. অযম্পি পুরিমবুদ্ধেসু কতাধিকারে তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো তিস্সস্স ভগৰতো কালে একস্মিং কুলে নিব্বত্তো ৰুদ্ধিমন্ৰায ঘরাৰাসং সণ্ঠপেত্ৰা ৰিভৰসম্পন্নো সদ্ধো পসন্নো ৰীথিতো ৰিহারং পটিপন্নং ভগৰন্তং দিস্ৰা জাতিসুমনাদিঅনেকানি সুগন্ধপুপ্ফানি চন্দনাদীনি চ ৰিলেপনানি গাহাপেত্ৰা ৰিহারং গতো পুপ্ফেহি ভগৰন্তং পূজেত্ৰা ৰিলেপনেহি ভগৰতো সরীরে পঞ্চঙ্গুলিকং কত্ৰা ৰন্দিত্ৰা পক্কামি.

৫০. সো তেন পুঞ্ঞেন দেৰমনুস্সেসু উভযসম্পত্তিযো অনুভৰিত্ৰা ইমস্মিং বুদ্ধুপ্পাদে ৰিভৰসম্পন্নে একস্মিং কুলে নিব্বত্তিত্ৰা ৰুদ্ধিমন্ৰায সত্থু ধম্মদেসনং সুত্ৰা পসন্নমানসো পব্বজিত্ৰা ৰিপস্সনং ৰড্ঢেত্ৰা নচিরস্সেৰ অরহা হুত্ৰা পুব্বকম্মং সরন্তো পচ্চক্খতো ঞত্ৰা ‘‘ইমং নাম কুসলকম্মং কত্ৰা ঈদিসং লোকুত্তরসম্পত্তিং পত্তোম্হী’’তি পুব্বচরিতাপদানং পকাসেন্তো তিস্সো নামাসি ভগৰাতিআদিমাহ. তং সব্বং উত্তানত্থমেৰাতি.

পঞ্চঙ্গুলিযত্থেরঅপদানৰণ্ণনা সমত্তা.

সত্তরসমৰগ্গৰণ্ণনা সমত্তা.