৯. পুন্নাগপুপ্ফিযত্থেরঅপদানৰণ্ণনা

কাননং ৰনমোগয্হাতিআদিকং আযস্মতো পুন্নাগপুপ্ফিযত্থেরস্স অপদানং. অযম্পি পুরিমজিনৰরেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ফুস্সস্স ভগৰতো কালে নেসাদকুলে নিব্বত্তো মহাৰনং পৰিট্ঠো তত্থ সুপুপ্ফিতপুন্নাগপুপ্ফং দিস্ৰা হেতুসম্পন্নত্তা বুদ্ধারম্মণপীতিৰসেন ভগৰন্তং সরিত্ৰা তং পুপ্ফং সহ কণ্ণিকাহি ওচিনিত্ৰা ৰালুকাহি চেতিযং কত্ৰা পূজেসি.

৪৬. সো তেন পুঞ্ঞেন দ্ৰেনৰুতিকপ্পে নিরন্তরং দেৰমনুস্সসম্পত্তিযোযেৰ অনুভৰিত্ৰা ইমস্মিং বুদ্ধুপ্পাদে সাৰত্থিযং ৰিভৰসম্পন্নে কুলে নিব্বত্তো ৰুদ্ধিমন্ৰায পুব্বৰাসনাবলেন সাসনে পসন্নো পব্বজিত্ৰা ৰাযমন্তো নচিরস্সেৰ অরহা হুত্ৰা পুব্বে কতকুসলং সরিত্ৰা সোমনস্সজাতো পুব্বচরিতাপদানং পকাসেন্তো কাননং ৰনমোগয্হাতিআদিমাহ. তং সব্বং হেট্ঠা ৰুত্তত্তা উত্তানত্থমেৰাতি.

পুন্নাগপুপ্ফিযত্থেরঅপদানৰণ্ণনা সমত্তা.