১. বন্ধুজীৰকত্থেরঅপদানৰণ্ণনা

চন্দংৰ ৰিমলং সুদ্ধন্তিআদিকং আযস্মতো বন্ধুজীৰকত্থেরস্স অপদানং. অযম্পাযস্মা পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো সিখিস্স ভগৰতো কালে কুলগেহে নিব্বত্তো ৰিঞ্ঞুতং পত্তো ঘরাৰাসং সণ্ঠপেত্ৰা ৰসন্তো সিখিস্স ভগৰতো রূপকাযসম্পত্তিং দিস্ৰা পসন্নমানসো বন্ধুজীৰকপুপ্ফানি গহেত্ৰা ভগৰতো পাদমূলে পূজেসি. ভগৰা তস্স চিত্তপ্পসাদৰড্ঢনত্থায অনুমোদনমকাসি. সো যাৰতাযুতং ঠত্ৰা তেনেৰ পুঞ্ঞেন দেৰলোকে নিব্বত্তো ছ কামাৰচরসম্পত্তিযো অনুভৰিত্ৰা মনুস্সেসু চ চক্কৰত্তিআদিসম্পত্তিযো অনুভৰিত্ৰা ইমস্স অম্হাকং সম্মাসম্বুদ্ধস্স উপ্পন্নকালে গহপতিকুলে নিব্বত্তো রূপগ্গযসগ্গপ্পত্তো সত্থু ধম্মদেসনং সুত্ৰা সদ্ধাজাতো গেহং পহায পব্বজিতো অরহত্তং পাপুণি.

১. সো পুব্বেনিৰাসঞাণেন পুব্বে কতকুসলকম্মং অনুস্সরিত্ৰা সোমনস্সজাতো পুব্বচরিতাপদানং পকাসেন্তো চন্দংৰ ৰিমলং সুদ্ধন্তিআদিমাহ. তত্থ চন্দংৰ ৰিমলং সুদ্ধন্তি অব্ভা, মহিকা, ধুমো, রজো, রাহূতি ইমেহি উপক্কিলেসমলেহি ৰিমুত্তং চন্দং ইৰ দিযড্ঢসহস্সুপক্কিলেসমলানং পহীনত্তা ৰিমলং নিক্কিলেসত্তা সুদ্ধং পসন্নং সিখিং সম্বুদ্ধন্তি সম্বন্ধো. কিলেসকদ্দমানং অভাৰেন অনাৰিলং. নন্দীভৰসঙ্খাতায বলৰস্নেহায পরিসমন্ততো খীণত্তা নন্দীভৰপরিক্খীণং. তিণ্ণং লোকেতি লোকত্তযতো তিণ্ণং উত্তিণ্ণং অতিক্কন্তং. ৰিসত্তিকন্তি ৰিসত্তিকং ৰুচ্চতি তণ্হা, নিত্তণ্হন্তি অত্থো.

২. নিব্বাপযন্তং জনতন্তি ধম্মৰস্সং ৰস্সন্তো জনতং জনসমূহং কিলেসপরিল়াহাভাৰেন নিব্বাপযন্তং ৰূপসমেন্তং. সযং সংসারতো তিণ্ণং, সব্বসত্তে সংসারতো তারযন্তং অতিক্কমেন্তং চতুন্নং সচ্চানং মুননতো জাননতো মুনিং সিখিং সম্বুদ্ধন্তি সম্বন্ধো. ৰনস্মিং ঝাযমানন্তি আরম্মণূপনিজ্ঝানলক্খণূপনিজ্ঝানেহি ঝাযন্তং চিন্তেন্তং চিত্তেন ভাৰেন্তং ৰনমজ্ঝেতি অত্থো. একগ্গং একগ্গচিত্তং সুসমাহিতং সুট্ঠু আরম্মণে আহিতং ঠপিতচিত্তং সিখিং মুনিং দিস্ৰাতি সম্বন্ধো.

৩. বন্ধুজীৰকপুপ্ফানীতি বন্ধূনং ঞাতীনং জীৰকং জীৰিতনিস্সযং হদযমংসলোহিতং বন্ধুজীৰকং হদযমংসলোহিতসমানৰণ্ণং পুপ্ফং বন্ধুজীৰকপুপ্ফং গহেত্ৰা সিখিনো লোকবন্ধুনো পূজেসিন্তি অত্থো. সেসং উত্তানত্থমেৰাতি.

বন্ধুজীৰকত্থেরঅপদানৰণ্ণনা সমত্তা.