১. সেরেয্যকত্থেরঅপদানৰণ্ণনা

অজ্ঝাযকো মন্তধরোতিআদিকং আযস্মতো সেরেয্যকত্থেরস্স অপদানং. অযম্পি পুরিমজিনৰরেসু কতাধিকারো ততো পরেসু অত্তভাৰসহস্সেসু ৰিৰট্টূপনিস্সযানি পুঞ্ঞানি উপচিনন্তো ৰিপস্সিস্স ভগৰতো কালে ব্রাহ্মণকুলে নিব্বত্তো ৰিঞ্ঞুতং পত্ৰা তিণ্ণং ৰেদানং পারং গন্ত্ৰা ইতিহাসাদিসকলব্রাহ্মণধম্মেসু কোটিপ্পত্তো একস্মিং দিৰসে অব্ভোকাসে সপরিৰারো ঠিতো ভগৰন্তং দিস্ৰা পসন্নমানসো সেরেয্যপুপ্ফং গহেত্ৰা আকাসে খিপন্তো পূজেসি. তানি পুপ্ফানি আকাসে ৰিতানং হুত্ৰা সত্তাহং ঠত্ৰা পচ্ছা অন্তরধাযিংসু. সো তং অচ্ছরিযং দিস্ৰা অতীৰ পসন্নমানসো তেনেৰ পীতিসোমনস্সেন কালং কত্ৰা তুসিতাদীসু নিব্বত্তো তত্থ দিব্বসুখমনুভৰিত্ৰা ততো মনুস্সসুখমনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰিঞ্ঞুতং পাপুণিত্ৰা পুব্বৰাসনাবলেন সত্থরি পসন্নো পব্বজিত্ৰা নচিরস্সেৰ অরহা অহোসি.

১. সো অপরভাগে পুরাকতকুসলং সরিত্ৰা সোমনস্সজাতো পুব্বচরিতাপদানং পকাসেন্তো অজ্ঝাযকো মন্তধরোতিআদিমাহ. তং হেট্ঠা ৰুত্তত্থমেৰ.

৩. সেরেয্যকং গহেত্ৰানাতি সিরিসে ভৰং জাতিপুপ্ফং সেরেয্যং, সেরেয্যমেৰ সেরেয্যকং, তং সেরেয্যকং গহেত্ৰানাতি সম্বন্ধো. ভগৰতি পসন্নো জাতিসুমনমকুল়চম্পকাদীনি পুপ্ফানি পতিট্ঠপেত্ৰা পূজেতুং কালং নত্থিতায তত্থ সম্পত্তং তং সেরেয্যকং পুপ্ফং গহেত্ৰা পূজেসিন্তি অত্থো. সেসং সব্বত্থ উত্তানমেৰাতি.

সেরেয্যকত্থেরঅপদানৰণ্ণনা সমত্তা.