৬. পাসাদিকসুত্তৰণ্ণনা

নিগণ্ঠনাটপুত্তকালঙ্কিরিযৰণ্ণনা

১৬৪. এৰং মে সুতন্তি পাসাদিকসুত্তং. তত্রাযমনুত্তানপদৰণ্ণনা – ৰেধঞ্ঞা নাম সক্যাতি ধনুম্হি কতসিক্খা ৰেধঞ্ঞনামকা একে সক্যা. তেসং অম্বৰনে পাসাদেতি তেসং অম্বৰনে সিপ্পং উগ্গণ্হত্থায কতো দীঘপাসাদো অত্থি, তত্থ ৰিহরতি. অধুনা কালঙ্কতোতি সম্পতি কালঙ্কতো. দ্ৰেধিকজাতাতি দ্ৰেজ্ঝজাতা, দ্ৰেভাগা জাতা. ভণ্ডনাদীসু ভণ্ডনং পুব্বভাগকলহো, তং দণ্ডাদানাদিৰসেন পণ্ণত্তিৰীতিক্কমৰসেন চ ৰড্ঢিতং কলহো. ‘‘ন ত্ৰং ইমং ধম্মৰিনযং আজানাসী’’তিআদিনা নযেন ৰিরুদ্ধৰচনং ৰিৰাদো. ৰিতুদন্তাতি ৰিজ্ঝন্তা. সহিতং মেতি মম ৰচনং অত্থসঞ্হিতং. অধিচিণ্ণং তে ৰিপরাৰত্তন্তি যং তৰ অধিচিণ্ণং চিরকালাসেৰনৰসেন পগুণং, তং মম ৰাদং আগম্ম নিৰত্তং. আরোপিতো তে ৰাদোতি তুয্হং উপরি মযা দোসো আরোপিতো. চর ৰাদপ্পমোক্খাযাতি ভত্তপুটং আদায তং তং উপসঙ্কমিত্ৰা ৰাদপ্পমোক্খত্থায উত্তরি পরিযেসমানো ৰিচর. নিব্বেঠেহি ৰাতি অথ ৰা মযা আরোপিতদোসতো অত্তানং মোচেহি. সচে পহোসীতি সচে সক্কোসি. ৰধোযেৰাতি মরণমেৰ. নাটপুত্তিযেসূতি নাটপুত্তস্স অন্তেৰাসিকেসু. নিব্বিন্নরূপাতি উক্কণ্ঠিতসভাৰা অভিৰাদনাদীনিপি ন করোন্তি. ৰিরত্তরূপাতি ৰিগতপেমা. পটিৰানরূপাতি তেসং সক্কচ্চকিরিযতো নিৰত্তনসভাৰা. যথা তন্তি যথা দুরক্খাতাদিসভাৰে ধম্মৰিনযে নিব্বিন্নৰিরত্তপ্পটিৰানরূপেহি ভৰিতব্বং, তথেৰ জাতাতি অত্থো. দুরক্খাতেতি দুক্কথিতে. দুপ্পৰেদিতেতি দুৰিঞ্ঞাপিতে. অনুপসমসংৰত্তনিকেতি রাগাদীনং উপসমং কাতুং অসমত্থে. ভিন্নথূপেতি ভিন্দপ্পতিট্ঠে. এত্থ হি নাটপুত্তোৰ নেসং পতিট্ঠট্ঠেন থূপো. সো পন ভিন্নো মতো. তেন ৰুত্তং ‘‘ভিন্নথূপে’’তি. অপ্পটিসরণেতি তস্সেৰ অভাৰেন পটিসরণৰিরহিতে.

ননু চাযং নাটপুত্তো নাল়ন্দৰাসিকো, সো কস্মা পাৰাযং কালঙ্কতোতি? সো কির উপালিনা গহপতিনা পটিৰিদ্ধসচ্চেন দসহি গাথাহি ভাসিতে বুদ্ধগুণে সুত্ৰা উণ্হং লোহিতং ছড্ডেসি. অথ নং অফাসুকং গহেত্ৰা পাৰং অগমংসু. সো তত্থ কালমকাসি. কালং কুরুমানো চ চিন্তেসি – ‘‘মম লদ্ধি অনিয্যানিকা সারৰিরহিতা, মযং তাৰ নট্ঠা, অৰসেসজনোপি মা অপাযপূরকো অহোসি, সচে পনাহং ‘মম সাসনং অনিয্যানিক’ন্তি ৰক্খামি, ন সদ্দহিস্সন্তি, যংনূনাহং দ্ৰেপি জনে ন একনীহারেন উগ্গণ্হাপেয্যং, তে মমচ্চযেন অঞ্ঞমঞ্ঞং ৰিৰদিস্সন্তি, সত্থা তং ৰিৰাদং পটিচ্চ একং ধম্মকথং কথেস্সতি, ততো তে সাসনস্স মহন্তভাৰং জানিস্সন্তী’’তি.

অথ নং একো অন্তেৰাসিকো উপসঙ্কমিত্ৰা আহ – ‘‘ভন্তে তুম্হে দুব্বলা, ময্হম্পি ইমস্মিং ধম্মে সারং আচিক্খথ, আচরিযপ্পমাণ’’ন্তি. ‘‘আৰুসো, ত্ৰং মমচ্চযেন সস্সতন্তি গণ্হেয্যাসী’’তি. অপরোপি উপসঙ্কমি, তং উচ্ছেদং গণ্হাপেসি. এৰং দ্ৰেপি জনে একলদ্ধিকে অকত্ৰা বহূ নানানীহারেন উগ্গণ্হাপেত্ৰা কালমকাসি. তে তস্স সরীরকিচ্চং কত্ৰা সন্নিপতিত্ৰা অঞ্ঞমঞ্ঞং পুচ্ছিংসু – ‘‘কস্সাৰুসো, আচরিযো সারং আচিক্খী’’তি? একো উট্ঠহিত্ৰা ময্হন্তি আহ. কিং আচিক্খীতি? সস্সতন্তি. অপরো তং পটিবাহিত্ৰা ‘‘ময্হং সারং আচিক্খী’’তি আহ. এৰং সব্বে ‘‘ময্হং সারং আচিক্খি, অহং জেট্ঠকো’’তি অঞ্ঞমঞ্ঞং ৰিৰাদং ৰড্ঢেত্ৰা অক্কোসে চেৰ পরিভাসে চ হত্থপাদপ্পহারাদীনি চ পৰত্তেত্ৰা একমগ্গেন দ্ৰে অগচ্ছন্তা নানাদিসাসু পক্কমিংসু.

১৬৫. অথ খো চুন্দো সমণুদ্দেসোতি অযং থেরো ধম্মসেনাপতিস্স কনিট্ঠভাতিকো. তং ভিক্খূ অনুপসম্পন্নকালে ‘‘চুন্দো সমণুদ্দেসো’’তি সমুদাচরিত্ৰা থেরকালেপি তথেৰ সমুদাচরিংসু. তেন ৰুত্তং – ‘‘চুন্দো সমণুদ্দেসো’’তি.

‘‘পাৰাযং ৰস্সংৰুট্ঠো যেন সামগামো, যেনাযস্মা আনন্দো তেনুপসঙ্কমী’’তি কস্মা উপসঙ্কমি? নাটপুত্তে কির কালঙ্কতে জম্বুদীপে মনুস্সা তত্থ তত্থ কথং পৰত্তযিংসু ‘‘নিগণ্ঠো নাটপুত্তো একো সত্থাতি পঞ্ঞাযিত্থ, তস্স কালঙ্কিরিযায সাৰকানং এৰরূপো ৰিৰাদো জাতো. সমণো পন গোতমো জম্বুদীপে চন্দো ৰিয সূরিযো ৰিয চ পাকটো, সাৰকাপিস্স পাকটাযেৰ. কীদিসো নু খো সমণে গোতমে পরিনিব্বুতে সাৰকানং ৰিৰাদো ভৰিস্সতী’’তি. থেরো তং কথং সুত্ৰা চিন্তেসি – ‘‘ইমং কথং গহেত্ৰা দসবলস্স আরোচেস্সামি, সত্থা এতং অট্ঠুপ্পত্তিং কত্ৰা একং দেসনং কথেস্সতী’’তি. সো নিক্খমিত্ৰা যেন সামগামো, যেনাযস্মা আনন্দো তেনুপসঙ্কমি.

সামগামোতি সামাকানং উস্সন্নত্তা তস্স গামস্স নামং. যেনাযস্মা আনন্দোতি উজুমেৰ ভগৰতো সন্তিকং অগন্ত্ৰা যেনস্স উপজ্ঝাযো আযস্মা আনন্দো তেনুপসঙ্কমি.

বুদ্ধকালে কির সারিপুত্তত্থেরো চ আনন্দত্থেরো চ অঞ্ঞমঞ্ঞং মমাযিংসু. সারিপুত্তত্থেরো ‘‘মযা কাতব্বং সত্থু উপট্ঠানং করোতী’’তি আনন্দত্থেরং মমাযি. আনন্দত্থেরো ‘‘ভগৰতো সাৰকানং অগ্গো’’তি সারিপুত্তত্থেরং মমাযি. কুলদারকে চ পব্বাজেত্ৰা সারিপুত্তত্থেরস্স সন্তিকে উপজ্ঝং গণ্হাপেসি. সারিপুত্তত্থেরোপি তথেৰ অকাসি. এৰং একমেকেন অত্তনো পত্তচীৰরং দত্ৰা পব্বাজেত্ৰা উপজ্ঝং গণ্হাপিতানি পঞ্চ পঞ্চ ভিক্খুসতানি অহেসুং. আযস্মা আনন্দো পণীতানি চীৰরাদীনিপি লভিত্ৰা থেরস্স অদাসি.

ধম্মরতনপূজা

একো কির ব্রাহ্মণো চিন্তেসি – ‘‘বুদ্ধরতনস্স চ সঙ্ঘরতনস্স চ পূজা পঞ্ঞাযতি, কথং নু খো ধম্মরতনং পূজিতং হোতী’’তি? সো ভগৰন্তং উপসঙ্কমিত্ৰা এতমত্থং পুচ্ছি. ভগৰা আহ – ‘‘সচেপি ব্রাহ্মণ ধম্মরতনং পূজেতুকামো, একং বহুস্সুতং পূজেহী’’তি. বহুস্সুতং, ভন্তে, আচিক্খথাতি. ভিক্খুসঙ্ঘং পুচ্ছাতি. সো ভিক্খুসঙ্ঘং উপসঙ্কমিত্ৰা ‘‘বহুস্সুতং, ভন্তে, আচিক্খথা’’তি আহ. আনন্দত্থেরো ব্রাহ্মণাতি. ব্রাহ্মণো থেরং সহস্সগ্ঘনিকেন তিচীৰরেন পূজেসি. থেরো তং গহেত্ৰা ভগৰতো সন্তিকং অগমাসি. ভগৰা ‘‘কুতো, আনন্দ, লদ্ধ’’ন্তি আহ? একেন, ভন্তে, ব্রাহ্মণেন দিন্নং, ইদং পনাহং আযস্মতো সারিপুত্তস্স দাতুকামোতি. দেহি, আনন্দাতি. চারিকং পক্কন্তো ভন্তেতি. আগতকালে দেহীতি, সিক্খাপদং ভন্তে, পঞ্ঞত্তন্তি. কদা পন সারিপুত্তো আগমিস্সতীতি? দসাহমত্তেন ভন্তেতি. ‘‘অনুজানামি, আনন্দ, দসাহপরমং অতিরেকচীৰরং নিক্খিপিতু’’ন্তি সিক্খাপদং পঞ্ঞাপেসি.

সারিপুত্তত্থেরোপি তথেৰ যংকিঞ্চি মনাপং লভতি, তং আনন্দত্থেরস্স দেতি. সো ইমম্পি অত্তনো কনিট্ঠভাতিকং থেরস্সেৰ সদ্ধিৰিহারিকং অদাসি. তেন ৰুত্তং – ‘‘যেনস্স উপজ্ঝাযো আযস্মা আনন্দো তেনুপসঙ্কমী’’তি. এৰং কিরস্স অহোসি – ‘‘উপজ্ঝাযো মে মহাপঞ্ঞো, সো ইমং কথং সত্থু আরোচেস্সতি, অথ সত্থা তদনুরূপং ধম্মং দেসেস্সতী’’তি. কথাপাভতন্তি কথায মূলং. মূলঞ্হি ‘‘পাভত’’ন্তি ৰুচ্চতি. যথাহ –

‘‘অপ্পকেনাপি মেধাৰী, পাভতেন ৰিচক্খণো;

সমুট্ঠাপেতি অত্তানং, অণুং অগ্গিংৰ সন্ধম’’ন্তি. (জা. ১.১.৪);

ভগৰন্তং দস্সনাযাতি ভগৰন্তং দস্সনত্থায. কিং পনানেন ভগৰা ন দিট্ঠপুব্বোতি? নো ন দিট্ঠপুব্বো. অযঞ্হি আযস্মা দিৰা নৰ ৰারে, রত্তিং নৰ ৰারেতি একাহং অট্ঠারস ৰারে উপট্ঠানমেৰ গচ্ছতি. দিৰসস্স পন সতৰারং ৰা সহস্সৰারং ৰা গন্তুকামো সমানোপি ন অকারণা গচ্ছতি, একং পঞ্হুদ্ধারং গহেত্ৰাৰ গচ্ছতি. সো তং দিৰসং তেন কথাপাভতেন গন্তুকামো এৰমাহ.

অসম্মাসম্বুদ্ধপ্পৰেদিতধম্মৰিনযৰণ্ণনা

১৬৬. এৰঞ্হেতং, চুন্দ, হোতীতি ভগৰা আনন্দত্থেরেন আরোচিতেপি যস্মা ন আনন্দত্থেরো ইমিস্সা কথায সামিকো, চুন্দত্থেরো পন সামিকো. সোৰ তস্সা আদিমজ্ঝপরিযোসানং জানাতি. তস্মা ভগৰা তেন সদ্ধিং কথেন্তো ‘‘এৰঞ্হেতং, চুন্দ, হোতী’’তিআদিমাহ. তস্সত্থো – চুন্দ এৰঞ্হেতং হোতি দুরক্খাতাদিসভাৰে ধম্মৰিনযে সাৰকা দ্ৰেধিকজাতা ভণ্ডনাদীনি কত্ৰা মুখসত্তীহি ৰিতুদন্তা ৰিহরন্তি.

ইদানি যস্মা অনিয্যানিকসাসনেনেৰ নিয্যানিকসাসনং পাকটং হোতি, তস্মা আদিতো অনিয্যানিকসাসনমেৰ দস্সেন্তো ইধ চুন্দ সত্থা চ হোতি অসম্মাসম্বুদ্ধোতিআদিমাহ. তত্থ ৰোক্কম্ম চ তম্হা ধম্মা ৰত্ততীতি ন নিরন্তরং পূরেতি, ওক্কমিত্ৰা ওক্কমিত্ৰা অন্তরন্তরং কত্ৰা ৰত্ততীতি অত্থো. তস্স তে, আৰুসো, লাভাতি তস্স তুয্হং এতে ধম্মানুধম্মপ্পটিপত্তিআদযো লাভা. সুলদ্ধন্তি মনুস্সত্তম্পি তে সুলদ্ধং. তথা পটিপজ্জতূতি এৰং পটিপজ্জতু. যথা তে সত্থারা ধম্মো দেসিতোতি যেন তে আকারেন সত্থারা ধম্মো কথিতো. যো চ সমাদপেতীতি যো চ আচরিযো সমাদপেতি. যঞ্চ সমাদপেতীতি যং অন্তেৰাসিং সমাদপেতি. যো চ সমাদপিতোতি যো চ এৰং সমাদপিতো অন্তেৰাসিকো. যথা আচরিযেন সমাদপিতং, তথত্থায পটিপজ্জতি. সব্বে তেতি তযোপি তে. এত্থ হি আচরিযো সমাদপিতত্তা অপুঞ্ঞং পসৰতি, সমাদিন্নন্তেৰাসিকো সমাদিন্নত্তা, পটিপন্নকো পটিপন্নত্তা. তেন ৰুত্তং – ‘‘সব্বে তে বহুং অপুঞ্ঞং পসৰন্তী’’তি. এতেনুপাযেন সব্বৰারেসু অত্থো ৰেদিতব্বো.

১৬৭. অপিচেত্থ ঞাযপ্পটিপন্নোতি কারণপ্পটিপন্নো. ঞাযমারাধেস্সতীতি কারণং নিপ্ফাদেস্সতি. ৰীরিযং আরভতীতি অত্তনো দুক্খনিব্বত্তকং ৰীরিযং করোতি. ৰুত্তঞ্হেতং ‘‘দুরক্খাতে, ভিক্খৰে, ধম্মৰিনযে যো আরদ্ধৰীরিযো, সো দুক্খং ৰিহরতি. যো কুসীতো, সো সুখং ৰিহরতী’’তি (অ. নি. ১.৩১৮).

সম্মাসম্বুদ্ধপ্পৰেদিতধম্মৰিনযাদিৰণ্ণনা

১৬৮. এৰং অনিয্যানিকসাসনং দস্সেত্ৰা ইদানি নিয্যানিকসাসনং দস্সেন্তো ইধ পন, চুন্দ, সত্থা চ হোতি সম্মাসম্বুদ্ধোতিআদিমাহ. তত্থ নিয্যানিকোতি মগ্গত্থায ফলত্থায চ নিয্যাতি.

১৬৯. ৰীরিযং আরভতীতি অত্তনো সুখনিপ্ফাদকং ৰীরিযং আরভতি. ৰুত্তঞ্হেতং ‘‘স্ৰাক্খাতে, ভিক্খৰে, ধম্মৰিনযে যো কুসীতো, সো দুক্খং ৰিহরতি. যো আরদ্ধৰীরিযো, সো সুখং ৰিহরতী’’তি (অ. নি. ১.৩১৯).

১৭০. ইতি ভগৰা নিয্যানিকসাসনে সম্মাপটিপন্নস্স কুলপুত্তস্স পসংসং দস্সেত্ৰা পুন দেসনং ৰড্ঢেন্তো ইধ, চুন্দ, সত্থা চ লোকে উদপাদীতিআদিমাহ. তত্থ অৰিঞ্ঞাপিতত্থাতি অবোধিতত্থা. সব্বসঙ্গাহপদকতন্তি সব্বসঙ্গহপদেহি কতং, সব্বসঙ্গাহিকং কতং ন হোতীতি অত্থো. ‘‘সব্বসঙ্গাহপদগত’’ন্তিপি পাঠো, ন সব্বসঙ্গাহপদেসু গতং, ন একসঙ্গহজাতন্তি অত্থো. সপ্পাটিহীরকতন্তি নিয্যানিকং. যাৰ দেৰমনুস্সেহীতি দেৰলোকতো যাৰ মনুস্সলোকা সুপ্পকাসিতং. অনুতপ্পো হোতীতি অনুতাপকরো হোতি. সত্থা চ নো লোকেতি ইদং তেসং অনুতাপকারদস্সনত্থং ৰুত্তং. নানুতপ্পো হোতীতি সত্থারং আগম্ম সাৰকেহি যং পত্তব্বং, তস্স পত্তত্তা অনুতাপকরো ন হোতি.

১৭২. থেরোতি থিরো থেরকারকেহি ধম্মেহি সমন্নাগতো. ‘‘রত্তঞ্ঞূ’’তিআদীনি ৰুত্তত্থানেৰ. এতেহি চে পীতি এতেহি হেট্ঠা ৰুত্তেহি.

১৭৩. পত্তযোগক্খেমাতি চতূহি যোগেহি খেমত্তা অরহত্তং ইধ যোগক্খেমং নাম, তং পত্তাতি অত্থো. অলং সমক্খাতুং সদ্ধম্মস্সাতি সম্মুখা গহিতত্তা অস্স সদ্ধম্মং সম্মা আচিক্খিতুং সমত্থা.

১৭৪. ব্রহ্মচারিনোতি ব্রহ্মচরিযৰাসং ৰসমানা অরিযসাৰকা. কামভোগিনোতি গিহিসোতাপন্না. ‘‘ইদ্ধঞ্চেৰা’’তিআদীনি মহাপরিনিব্বানে ৰিত্থারিতানেৰ. লাভগ্গযসগ্গপত্তন্তি লাভগ্গঞ্চেৰ যসগ্গঞ্চ পত্তং.

১৭৫. সন্তি খো পন মে, চুন্দ, এতরহি থেরা ভিক্খূ সাৰকাতি সারিপুত্তমোগ্গল্লানাদযো থেরা. ভিক্খুনিযোতি খেমাথেরীউপ্পলৰণ্ণথেরীআদযো. উপাসকা সাৰকা গিহী ওদাতৰত্থৰসনা ব্রহ্মচারিনোতি চিত্তগহপতিহত্থকআল়ৰকাদযো. কামভোগিনোতি চূল়অনাথপিণ্ডিকমহাঅনাথপিণ্ডিকাদযো. ব্রহ্মচারিনিযোতি নন্দমাতাদযো. কামভোগিনিযোতি খুজ্জুত্তরাদযো.

১৭৬. সব্বাকারসম্পন্নন্তি সব্বকারণসম্পন্নং. ইদমেৰ তন্তি ইদমেৰ ব্রহ্মচরিযং, ইমমেৰ ধম্মং সম্মা হেতুনা নযেন ৰদমানো ৰদেয্য. উদকাস্সুদন্তি উদকো সুদং. পস্সং ন পস্সতীতি পস্সন্তো ন পস্সতি. সো কির ইমং পঞ্হং মহাজনং পুচ্ছি. তেহি ‘‘ন জানাম, আচরিয, কথেহি নো’’তি ৰুত্তো সো আহ – ‘‘গম্ভীরো অযং পঞ্হো আহারসপ্পাযে সতি থোকং চিন্তেত্ৰা সক্কা কথেতু’’ন্তি. ততো তেহি চত্তারো মাসে মহাসক্কারে কতে তং পঞ্হং কথেন্তো কিঞ্চ পস্সং ন পস্সতীতিআদিমাহ. তত্থ সাধুনিসিতস্সাতি সুট্ঠুনিসিতস্স তিখিণস্স, সুনিসিতখুরস্স কির তলং পঞ্ঞাযতি, ধারা ন পঞ্ঞাযতীতি অযমেত্থ অত্থো.

সঙ্গাযিতব্বধম্মাদিৰণ্ণনা

১৭৭. সঙ্গম্ম সমাগম্মাতি সঙ্গন্ত্ৰা সমাগন্ত্ৰা. অত্থেন অত্থং, ব্যঞ্জনেন ব্যঞ্জনন্তি অত্থেন সহ অত্থং, ব্যঞ্জনেনপি সহ ব্যঞ্জনং সমানেন্তেহীতি অত্থো. সঙ্গাযিতব্বন্তি ৰাচেতব্বং সজ্ঝাযিতব্বং. যথযিদং ব্রহ্মচরিযন্তি যথা ইদং সকলং সাসনব্রহ্মচরিযং.

১৭৮. তত্র চেতি তত্র সঙ্ঘমজ্ঝে, তস্স ৰা ভাসিতে. অত্থঞ্চেৰ মিচ্ছা গণ্হাতি, ব্যঞ্জনানি চ মিচ্ছা রোপেতীতি ‘‘চত্তারো সতিপট্ঠানা’’তি এত্থ আরম্মণং ‘‘সতিপট্ঠান’’ন্তি অত্থং গণ্হাতি. ‘‘সতিপট্ঠানানী’’তি ব্যঞ্জনং রোপেতি. ইমস্স নু খো, আৰুসো, অত্থস্সাতি ‘‘সতিযেৰ সতিপট্ঠান’’ন্তি. অত্থস্স ‘‘চত্তারো সতিপট্ঠানা’’তি কিং নু খো ইমানি ব্যঞ্জনানি, উদাহু চত্তারি সতিপট্ঠানানী’’তি এতানি ৰা ব্যঞ্জনানি. কতমানি ওপাযিকতরানীতি ইমস্স অত্থস্স কতমানি ব্যঞ্জনানি উপপন্নতরানি অল্লীনতরানি. ইমেসঞ্চ ব্যঞ্জনানন্তি ‘‘চত্তারো সতিপট্ঠানা’’তি ব্যঞ্জনানং ‘‘সতিযেৰ সতিপট্ঠান’’ন্তি কিং নু খো অযং অত্থো, উদাহু ‘‘আরম্মণং সতিপট্ঠান’’ন্তি এসো অত্থোতি? ইমস্স খো, আৰুসো, অত্থস্সাতি ‘‘আরম্মণং সতিপট্ঠান’’ন্তি ইমস্স অত্থস্স. যা চেৰ এতানীতি যানি চেৰ এতানি মযা ৰুত্তানি. যা চেৰ এসোতি যো চেৰ এস মযা ৰুত্তো. সো নেৰ উস্সাদেতব্বোতি তুম্হেহি তাৰ সম্মা অত্থে চ সম্মা ব্যঞ্জনে চ ঠাতব্বং. সো পন নেৰ উস্সাদেতব্বো, ন অপসাদেতব্বো. সঞ্ঞাপেতব্বোতি জানাপেতব্বো. তস্স চ অত্থস্সাতি ‘‘সতিযেৰ সতিপট্ঠান’’ন্তি অত্থস্স চ. তেসঞ্চ ব্যঞ্জনানন্তি ‘‘সতিপট্ঠানা’’তি ব্যঞ্জনানং. নিসন্তিযাতি নিসামনত্থং ধারণত্থং. ইমিনা নযেন সব্বৰারেসু অত্থো ৰেদিতব্বো.

১৮১. তাদিসন্তি তুম্হাদিসং. অত্থুপেতন্তি অত্থেন উপেতং অত্থস্স ৰিঞ্ঞাতারং. ব্যঞ্জনুপেতন্তি ব্যঞ্জনেহি উপেতং ব্যঞ্জনানং ৰিঞ্ঞাতারং. এৰং এতং ভিক্খুং পসংসথ. এসো হি ভিক্খু ন তুম্হাকং সাৰকো নাম, বুদ্ধো নাম এস চুন্দাতি. ইতি ভগৰা বহুস্সুতং ভিক্খুং অত্তনো ঠানে ঠপেসি.

পচ্চযানুঞ্ঞাতকারণাদিৰণ্ণনা

১৮২. ইদানি ততোপি উত্তরিতরং দেসনং ৰড্ঢেন্তো ন ৰো অহং, চুন্দাতিআদিমাহ. তত্থ দিট্ঠধম্মিকা আসৰা নাম ইধলোকে পচ্চযহেতু উপ্পজ্জনকা আসৰা. সম্পরাযিকা আসৰা নাম পরলোকে ভণ্ডনহেতু উপ্পজ্জনকা আসৰা. সংৰরাযাতি যথা তে ন পৰিসন্তি, এৰং পিদহনায. পটিঘাতাযাতি মূলঘাতেন পটিহননায. অলং ৰো তং যাৰদেৰ সীতস্স পটিঘাতাযাতি তং তুম্হাকং সীতস্স পটিঘাতায সমত্থং. ইদং ৰুত্তং হোতি, যং ৰো মযা চীৰরং অনুঞ্ঞাতং, তং পারুপিত্ৰা দপ্পং ৰা মানং ৰা কুরুমানা ৰিহরিস্সথাতি ন অনুঞ্ঞাতং, তং পন পারুপিত্ৰা সীতপ্পটিঘাতাদীনি কত্ৰা সুখং সমণধম্মং যোনিসো মনসিকারং করিস্সথাতি অনুঞ্ঞাতং. যথা চ চীৰরং, এৰং পিণ্ডপাতাদযোপি. অনুপদসংৰণ্ণনা পনেত্থ ৰিসুদ্ধিমগ্গে ৰুত্তনযেনেৰ ৰেদিতব্বা.

সুখল্লিকানুযোগাদিৰণ্ণনা

১৮৩. সুখল্লিকানুযোগন্তি সুখল্লিযনানুযোগং, সুখসেৰনাধিমুত্তন্তি অত্থো. সুখেতীতি সুখিতং করোতি. পীণেতীতি পীণিতং থূলং করোতি.

১৮৬. অট্ঠিতধম্মাতি নট্ঠিতসভাৰা. জিৰ্হা নো অত্থীতি যং যং ইচ্ছন্তি, তং তং কথেন্তি, কদাচি মগ্গং কথেন্তি, কদাচি ফলং কদাচি নিব্বানন্তি অধিপ্পাযো. জানতাতি সব্বঞ্ঞুতঞ্ঞাণেন জানন্তেন. পস্সতাতি পঞ্চহি চক্খূহি পস্সন্তেন. গম্ভীরনেমোতি গম্ভীরভূমিং অনুপৰিট্ঠো. সুনিখাতোতি সুট্ঠু নিখাতো. এৰমেৰ খো, আৰুসোতি এৰং খীণাসৰো অভব্বো নৰ ঠানানি অজ্ঝাচরিতুং. তস্মিং অনজ্ঝাচারো অচলো অসম্পৰেধী. তত্থ সঞ্চিচ্চ পাণং জীৰিতা ৰোরোপনাদীসু সোতাপন্নাদযোপি অভব্বা. সন্নিধিকারকং কামে পরিভুঞ্জিতুন্তি ৰত্থুকামে চ কিলেসকামে চ সন্নিধিং কত্ৰা পরিভুঞ্জিতুং. সেয্যথাপি পুব্বে অগারিকভূতোতি যথা পুব্বে গিহিভূতো পরিভুঞ্জতি, এৰং পরিভুঞ্জিতুং অভব্বো.

পঞ্হব্যাকরণৰণ্ণনা

১৮৭. অগারমজ্ঝে ৰসন্তা হি সোতাপন্নাদযো যাৰজীৰং গিহিব্যঞ্জনেন তিট্ঠন্তি. খীণাসৰো পন অরহত্তং পত্ৰাৰ মনুস্সভূতো পরিনিব্বাতি ৰা পব্বজতি ৰা. চাতুমহারাজিকাদীসু কামাৰচরদেৰেসু মুহুত্তম্পি ন তিট্ঠতি. কস্মা? ৰিৰেকট্ঠানস্স অভাৰা. ভুম্মদেৰত্তভাৰে পন ঠিতো অরহত্তং পত্ৰাপি তিট্ঠতি. তস্স ৰসেন অযং পঞ্হো আগতো. ভিন্নদোসত্তা পনস্স ভিক্খুভাৰো ৰেদিতব্বো. অতীরকন্তি অতীরং অপরিচ্ছেদং মহন্তং. নো চ খো অনাগতন্তি অনাগতং পন অদ্ধানং আরব্ভ এৰং ন পঞ্ঞপেতি, অতীতমেৰ মঞ্ঞে সমণো গোতমো জানাতি, ন অনাগতং. তথা হিস্স অতীতে অড্ঢছট্ঠসতজাতকানুস্সরণং পঞ্ঞাযতি. অনাগতে এৰং বহুং অনুস্সরণং ন পঞ্ঞাযতীতি ইমমত্থং মঞ্ঞমানা এৰং ৰদেয্যুং. তযিদং কিং সূতি অনাগতে অপঞ্ঞাপনং কিং নু খো? কথংসূতি কেন নু খো কারণেন অজানন্তোযেৰ নু খো অনাগতং নানুস্সরতি, অননুস্সরিতুকামতায নানুস্সরতীতি. অঞ্ঞৰিহিতকেন ঞাণদস্সনেনাতি পচ্চক্খং ৰিয কত্ৰা দস্সনসমত্থতায দস্সনভূতেন ঞাণেন অঞ্ঞত্থৰিহিতকেন ঞাণেন অঞ্ঞং আরব্ভ পৰত্তেন, অঞ্ঞৰিহিতকং অঞ্ঞং আরব্ভ পৰত্তমানং ঞাণদস্সনং সঙ্গাহেতব্বং পঞ্ঞাপেতব্বং মঞ্ঞন্তি. তে হি চরতো চ তিট্ঠতো চ সুত্তস্স চ জাগরস্স চ সততং সমিতং ঞাণদস্সনং পচ্চুপট্ঠিতং মঞ্ঞন্তি, তাদিসঞ্চ ঞাণং নাম নত্থি. তস্মা যথরিৰ বালা অব্যত্তা, এৰং মঞ্ঞন্তীতি ৰেদিতব্বো.

সতানুসারীতি পুব্বেনিৰাসানুস্সতিসম্পযুত্তকং. যাৰতকং আকঙ্খতীতি যত্তকং ঞাতুং ইচ্ছতি, তত্তকং জানিস্সামীতি ঞাণং পেসেসি. অথস্স দুব্বলপত্তপুটে পক্খন্দনারাচো ৰিয অপ্পটিহতং অনিৰারিতং ঞাণং গচ্ছতি, তেন যাৰতকং আকঙ্খতি তাৰতকং অনুস্সরতি. বোধিজন্তি বোধিমূলে জাতং. ঞাণং উপ্পজ্জতীতি চতুমগ্গঞাণং উপ্পজ্জতি. অযমন্তিমা জাতীতি তেন ঞাণেন জাতিমূলস্স পহীনত্তা পুন অযমন্তিমা জাতি. নত্থিদানি পুনব্ভৰোতি অপরম্পি ঞাণং উপ্পজ্জতি. অনত্থসংহিতন্তি ন ইধলোকত্থং ৰা পরলোকত্থং ৰা নিস্সিতং. ন তং তথাগতো ব্যাকরোতীতি তং ভারতযুদ্ধসীতাহরণসদিসং অনিয্যানিককথং তথাগতো ন কথেতি. ভূতং তচ্ছং অনত্থসংহিতন্তি রাজকথাদিতিরচ্ছানকথং. কালঞ্ঞূ তথাগতো হোতীতি কালং জানাতি. সহেতুকং সকারণং কত্ৰা যুত্তপত্তকালেযেৰ কথেতি.

১৮৮. তস্মা তথাগতোতি ৰুচ্চতীতি যথা যথা গদিতব্বং, তথা তথেৰ গদনতো দকারস্স তকারং কত্ৰা তথাগতোতি ৰুচ্চতীতি অত্থো. দিট্ঠন্তি রূপাযতনং. সুতন্তি সদ্দাযতনং. মুতন্তি মুত্ৰা পত্ৰা গহেতব্বতো গন্ধাযতনং রসাযতনং ফোট্ঠব্বাযতনং. ৰিঞ্ঞাতন্তি সুখদুক্খাদিধম্মাযতনং. পত্তন্তি পরিযেসিত্ৰা ৰা অপরিযেসিত্ৰা ৰা পত্তং. পরিযেসিতন্তি পত্তং ৰা অপত্তং ৰা পরিযেসিতং. অনুৰিচরিতং মনসাতি চিত্তেন অনুসঞ্চরিতং. ‘‘তথাগতেন অভিসম্বুদ্ধ’’ন্তি ইমিনা এতং দস্সেতি, যঞ্হি অপরিমাণাসু লোকধাতূসু ইমস্স সদেৰকস্স লোকস্স নীলং পীতকন্তিআদি রূপারম্মণং চক্খুদ্ৰারে আপাথমাগচ্ছতি, ‘‘অযং সত্তো ইমস্মিং খণে ইমং নাম রূপারম্মণং দিস্ৰা সুমনো ৰা দুম্মনো ৰা মজ্ঝত্তো ৰা জাতো’’তি সব্বং তং তথাগতস্স এৰং অভিসম্বুদ্ধং. তথা যং অপরিমাণাসু লোকধাতূসু ইমস্স সদেৰকস্স লোকস্স ভেরিসদ্দো মুদিঙ্গসদ্দোতিআদি সদ্দারম্মণং সোতদ্ৰারে আপাথমাগচ্ছতি. মূলগন্ধো তচগন্ধোতিআদি গন্ধারম্মণং ঘানদ্ৰারে আপাথমাগচ্ছতি. মূলরসো খন্ধরসোতিআদি রসারম্মণং জিৰ্হাদ্ৰারে আপাথমাগচ্ছতি. কক্খল়ং মুদুকন্তিআদি পথৰীধাতুতেজোধাতুৰাযোধাতুভেদং ফোট্ঠব্বারম্মণং কাযদ্ৰারে আপাথমাগচ্ছতি. ‘‘অযং সত্তো ইমস্মিং খণে ইমং নাম ফোট্ঠব্বারম্মণং ফুসিত্ৰা সুমনো ৰা দুম্মনো ৰা মজ্ঝত্তো ৰা জাতো’’তি সব্বং তং তথাগতস্স এৰং অভিসম্বুদ্ধং. তথা যং অপরিমাণাসু লোকধাতূসু ইমস্স সদেৰকস্স লোকস্স সুখদুক্খাদিভেদং ধম্মারম্মণং মনোদ্ৰারস্স আপাথমাগচ্ছতি, ‘‘অযং সত্তো ইমস্মিং খণে ইদং নাম ধম্মারম্মণং ৰিজানিত্ৰা সুমনো ৰা দুম্মনো ৰা মজ্ঝত্তো ৰা জাতো’’তি সব্বং তং তথাগতস্স এৰং অভিসম্বুদ্ধং.

যঞ্হি, চুন্দ, ইমেসং সত্তানং দিট্ঠং সুতং মুতং ৰিঞ্ঞাতং তত্থ তথাগতেন অদিট্ঠং ৰা অসুতং ৰা অমুতং ৰা অৰিঞ্ঞাতং ৰা নত্থি. ইমস্স মহাজনস্স পরিযেসিত্ৰা পত্তম্পি অত্থি, পরিযেসিত্ৰা অপ্পত্তম্পি অত্থি. অপরিযেসিত্ৰা পত্তম্পি অত্থি, অপরিযেসিত্ৰা অপ্পত্তম্পি অত্থি. সব্বম্পি তং তথাগতস্স অপ্পত্তং নাম নত্থি, ঞাণেন অসচ্ছিকতং নাম. ‘‘তস্মা তথাগতোতি ৰুচ্চতী’’তি. যং যথা লোকেন গতং তস্স তথেৰ গতত্তা ‘‘তথাগতো’’তি ৰুচ্চতি. পাল়িযং পন অভিসম্বুদ্ধন্তি ৰুত্তং, তং গতসদ্দেন একত্থং. ইমিনা নযেন সব্বৰারেসু ‘‘তথাগতো’’তি নিগমনস্স অত্থো ৰেদিতব্বো, তস্স যুত্তি ব্রহ্মজালে তথাগতসদ্দৰিত্থারে ৰুত্তাযেৰ.

অব্যাকতট্ঠানৰণ্ণনা

১৮৯. এৰং অত্তনো অসমতং অনুত্তরতং সব্বঞ্ঞুতং ধম্মরাজভাৰং কথেত্ৰা ইদানি ‘‘পুথুসমণব্রাহ্মণানং লদ্ধীসু মযা অঞ্ঞাতং অদিট্ঠং নাম নত্থি, সব্বং মম ঞাণস্স অন্তোযেৰ পরিৰত্ততী’’তি সীহনাদং নদন্তো ঠানং খো পনেতং, চুন্দ, ৰিজ্জতীতিআদিমাহ. তত্থ তথাগতোতি সত্তো. ন হেতং, আৰুসো, অত্থসংহিতন্তি ইধলোকপরলোকঅত্থসংহিতং ন হোতি. ন চ ধম্মসংহিতন্তি নৰলোকুত্তরধম্মনিস্সিতং ন হোতি. ন আদিব্রহ্মচরিযকন্তি সিক্খত্তযসঙ্গহিতস্স সকলসাসনব্রহ্মচরিযস্স আদিভূতং ন হোতি.

১৯০. ইদং দুক্খন্তি খোতিআদীসু তণ্হং ঠপেত্ৰা অৰসেসা তেভুম্মকা ধম্মা ইদং দুক্খন্তি ব্যাকতং. তস্সেৰ দুক্খস্স পভাৰিকা জনিকা তণ্হা দুক্খসমুদযোতি ব্যাকতং. উভিন্নং অপ্পৰত্তি দুক্খনিরোধোতি ব্যাকতং. দুক্খপরিজাননো সমুদযপজহনো নিরোধসচ্ছিকরণো অরিযমগ্গো দুক্খনিরোধগামিনী পটিপদাতি ব্যাকতং. ‘‘এতঞ্হি, আৰুসো, অত্থসংহিত’’ন্তিআদীসু এতং ইধলোকপরলোকঅত্থনিস্সিতং নৰলোকুত্তরধম্মনিস্সিতং সকলসাসনব্রহ্মচরিযস্স আদি পধানং পুব্বঙ্গমন্তি অযমত্থো.

পুব্বন্তসহগতদিট্ঠিনিস্সযৰণ্ণনা

১৯১. ইদানি যং তং মযা ন ব্যাকতং, তং অজানন্তেন ন ব্যাকতন্তি মা এৰং সঞ্ঞমকংসু. জানন্তোৰ অহং এৰং ‘‘এতস্মিং ব্যাকতেপি অত্থো নত্থী’’তি ন ব্যাকরিং. যং পন যথা ব্যাকাতব্বং, তং মযা ব্যাকতমেৰাতি সীহনাদং নদন্তো পুন যেপি তে, চুন্দাতিআদিমাহ. তত্থ দিট্ঠিযোৰ দিট্ঠিনিস্সযা, দিট্ঠিনিস্সিতকা দিট্ঠিগতিকাতি অত্থো. ইদমেৰ সচ্চন্তি ইদমেৰ দস্সনং সচ্চং. মোঘমঞ্ঞন্তি অঞ্ঞেসং ৰচনং মোঘং. অসযংকারোতি অসযং কতো.

১৯২. তত্রাতি তেসু সমণব্রাহ্মণেসু. অত্থি নু খো ইদং আৰুসো ৰুচ্চতীতি, আৰুসো, যং তুম্হেহি সস্সতো অত্তা চ লোকো চাতি ৰুচ্চতি, ইদমত্থি নু খো উদাহু নত্থীতি এৰমহং তে পুচ্ছামীতি অত্থো. যঞ্চ খো তে এৰমাহংসূতি যং পন তে ‘‘ইদমেৰ সচ্চং মোঘমঞ্ঞ’’ন্তি ৰদন্তি, তং তেসং নানুজানামি. পঞ্ঞত্তিযাতি দিট্ঠিপঞ্ঞত্তিযা. সমসমন্তি সমেন ঞাণেন সমং. যদিদং অধিপঞ্ঞত্তীতি যা অযং অধিপঞ্ঞত্তি নাম. এত্থ অহমেৰ ভিয্যো উত্তরিতরো ন মযা সমো অত্থি. তত্থ যঞ্চ ৰুত্তং ‘‘পঞ্ঞত্তিযাতি যঞ্চ অধিপঞ্ঞত্তী’’তি উভযমেতং অত্থতো একং. ভেদতো হি পঞ্ঞত্তি অধিপঞ্ঞত্তীতি দ্ৰযং হোতি. তত্থ পঞ্ঞত্তি নাম দিট্ঠিপঞ্ঞত্তি. অধিপঞ্ঞত্তি নাম খন্ধপঞ্ঞত্তি ধাতুপঞ্ঞত্তি আযতনপঞ্ঞত্তি ইন্দ্রিযপঞ্ঞত্তি সচ্চপঞ্ঞত্তি পুগ্গলপঞ্ঞত্তীতি এৰং ৰুত্তা ছ পঞ্ঞত্তিযো. ইধ পন পঞ্ঞত্তিযাতি এত্থাপি পঞ্ঞত্তি চেৰ অধিপঞ্ঞত্তি চ অধিপ্পেতা, অধিপঞ্ঞত্তীতি এত্থাপি. ভগৰা হি পঞ্ঞত্তিযাপি অনুত্তরো, অধিপঞ্ঞত্তিযাপি অনুত্তরো. তেনাহ – ‘‘অহমেৰ তত্থ ভিয্যো যদিদং অধিপঞ্ঞত্তী’’তি.

১৯৬. পহানাযাতি পজহনত্থং. সমতিক্কমাযাতি তস্সেৰ ৰেৰচনং. দেসিতাতি কথিতা. পঞ্ঞত্তাতি ঠপিতা. সতিপট্ঠানভাৰনায হি ঘনৰিনিব্ভোগং কত্ৰা সব্বধম্মেসু যাথাৰতো দিট্ঠেসু ‘‘সুদ্ধসঙ্খারপুঞ্জোযং নযিধ সত্তূপলব্ভতী’’তি সন্নিট্ঠানতো সব্বদিট্ঠিনিস্সযানং পহানং হোতীতি. তেন ৰুত্তং. দিট্ঠিনিস্সযানং পহানায সমতিক্কমায এৰং মযা ইমে চত্তারো সতিপট্ঠানা দেসিতা পঞ্ঞত্তা’’তি. সেসং সব্বত্থ উত্তানত্থমেৰাতি.

সুমঙ্গলৰিলাসিনিযা দীঘনিকাযট্ঠকথায

পাসাদিকসুত্তৰণ্ণনা নিট্ঠিতা.