১০. সুভসুত্তৰণ্ণনা

সুভমাণৰকৰত্থুৰণ্ণনা

৪৪৪. এৰং মে সুতং…পে… সাৰত্থিযন্তি সুভসুত্তং. তত্রাযং অনুত্তানপদৰণ্ণনা. অচিরপরিনিব্বুতে ভগৰতীতি অচিরং পরিনিব্বুতে ভগৰতি, পরিনিব্বানতো উদ্ধং মাসমত্তে কালে. নিদানৰণ্ণনাযং ৰুত্তনযেনেৰ ভগৰতো পত্তচীৰরং আদায আগন্ত্ৰা খীরৰিরেচনং পিৰিত্ৰা ৰিহারে নিসিন্নদিৰসং সন্ধাযেতং ৰুত্তং. তোদেয্যপুত্তোতি তোদেয্যব্রাহ্মণস্স পুত্তো, সো কির সাৰত্থিযা অৰিদূরে তুদিগামো নাম অত্থি, তস্স অধিপতিত্তা তোদেয্যোতি সঙ্খ্যং গতো. মহদ্ধনো পন হোতি পঞ্চচত্তালীসকোটিৰিভৰো, পরমমচ্ছরী – ‘‘দদতো ভোগানং অপরিক্খযো নাম নত্থী’’তি চিন্তেত্ৰা কস্সচি কিঞ্চি ন দেতি, পুত্তম্পি আহ –

‘‘অঞ্জনানং খযং দিস্ৰা, ৰম্মিকানঞ্চ সঞ্চযং;

মধূনঞ্চ সমাহারং, পণ্ডিতো ঘরমাৰসে’’তি.

এৰং অদানমেৰ সিক্খাপেত্ৰা কাযস্স ভেদা তস্মিংযেৰ ঘরে সুনখো হুত্ৰা নিব্বত্তো. সুভো তং সুনখং অতিৰিয পিযাযতি. অত্তনো ভুঞ্জনকভত্তংযেৰ ভোজেতি, উক্খিপিত্ৰা ৰরসযনে সযাপেতি. অথ ভগৰা একদিৰসং নিক্খন্তে মাণৰে তং ঘরং পিণ্ডায পাৰিসি. সুনখো ভগৰন্তং দিস্ৰা ভুক্কারং করোন্তো ভগৰতো সমীপং গতো. ততো নং ভগৰা অৰোচ ‘‘তোদেয্য ত্ৰং পুব্বেপি মং ‘ভো, ভো’তি পরিভৰিত্ৰা সুনখো জাতো, ইদানিপি ভুক্কারং কত্ৰা অৰীচিং গমিস্সসী’’তি. সুনখো তং কথং সুত্ৰা ৰিপ্পটিসারী হুত্ৰা উদ্ধনন্তরে ছারিকায নিপন্নো, মনুস্সা নং উক্খিপিত্ৰা সযনে সযাপেতুং নাসক্খিংসু.

সুভো আগন্ত্ৰা ‘‘কেনাযং সুনখো সযনা ওরোপিতো’’তি আহ. মনুস্সা ‘‘ন কেনচী’’তি ৰত্ৰা তং পৰত্তিং আরোচেসুং. মাণৰো সুত্ৰা ‘‘মম পিতা ব্রহ্মলোকে নিব্বত্তো, সমণো পন গোতমো মে পিতরং সুনখং করোতি যং কিঞ্চি এস মুখারূল়্হং ভাসতী’’তি কুজ্ঝিত্ৰা ভগৰন্তং মুসাৰাদেন চোদেতুকামো ৰিহারং গন্ত্ৰা তং পৰত্তিং পুচ্ছি. ভগৰা তস্স তথেৰ ৰত্ৰা অৰিসংৰাদনত্থং আহ – ‘‘অত্থি পন তে, মাণৰ, পিতরা ন অক্খাতং ধন’’ন্তি. অত্থি, ভো গোতম, সতসহস্সগ্ঘনিকা সুৰণ্ণমালা, সতসহস্সগ্ঘনিকা সুৰণ্ণপাদুকা, সতসহস্সগ্ঘনিকা সুৰণ্ণপাতি, সতসহস্সঞ্চ কহাপণন্তি. গচ্ছ তং সুনখং অপ্পোদকং মধুপাযাসং ভোজেত্ৰা সযনং আরোপেত্ৰা ঈসকং নিদ্দং ওক্কন্তকালে পুচ্ছ, সব্বং তে আচিক্খিস্সতি, অথ নং জানেয্যাসি – ‘‘পিতা মে এসো’’তি. সো তথা অকাসি. সুনখো সব্বং আচিক্খি, তদা নং – ‘‘পিতা মে’’তি ঞত্ৰা ভগৰতি পসন্নচিত্তো গন্ত্ৰা ভগৰন্তংচুদ্দস পঞ্হে পুচ্ছিত্ৰা ৰিস্সজ্জনপরিযোসানে ভগৰন্তং সরণং গতো, তং সন্ধায ৰুত্তং ‘‘সুভো মাণৰো তোদেয্যপুত্তো’’তি. সাৰত্থিযং পটিৰসতীতি অত্তনো ভোগগামতো আগন্ত্ৰা ৰসতি.

৪৪৫-৪৪৬. অঞ্ঞতরং মাণৰকং আমন্তেসীতি সত্থরি পরিনিব্বুতে ‘‘আনন্দত্থেরো কিরস্স পত্তচীৰরং গহেত্ৰা আগতো, মহাজনো তং দস্সনত্থায উপসঙ্কমতী’’তি সুত্ৰা ‘‘ৰিহারং খো পন গন্ত্ৰা মহাজনমজ্ঝে ন সক্কা সুখেন পটিসন্থারং ৰা কাতুং, ধম্মকথং ৰা সোতুং গেহং আগতংযেৰ নং দিস্ৰা সুখেন পটিসন্থারং করিস্সামি, একা চ মে কঙ্খা অত্থি, তম্পি নং পুচ্ছিস্সামী’’তি চিন্তেত্ৰা অঞ্ঞতরং মাণৰকং আমন্তেসি. অপ্পাবাধন্তিআদীসু আবাধোতি ৰিসভাগৰেদনা ৰুচ্চতি, যা একদেসে উপ্পজ্জিত্ৰা চত্তারো ইরিযাপথে অযপট্টেন আবন্ধিত্ৰা ৰিয গণ্হতি, তস্সা অভাৰং পুচ্ছাতি ৰদতি. অপ্পাতঙ্কোতি কিচ্ছজীৰিতকরো রোগো ৰুচ্চতি, তস্সাপি অভাৰং পুচ্ছাতি ৰদতি. গিলানস্সেৰ চ উট্ঠানং নাম গরুকং হোতি, কাযে বলং ন হোতি, তস্মা নিগ্গেলঞ্ঞভাৰঞ্চ বলঞ্চ পুচ্ছাতি ৰদতি. ফাসুৰিহারন্তি গমনঠাননিসজ্জসযনেসু চতূসু ইরিযাপথেসু সুখৰিহারং পুচ্ছাতি ৰদতি. অথস্স পুচ্ছিতব্বাকারং দস্সেন্তো ‘‘সুভো’’তিআদিমাহ.

৪৪৭. কালঞ্চ সমযঞ্চ উপাদাযাতি কালঞ্চ সমযঞ্চ পঞ্ঞায গহেত্ৰা উপধারেত্ৰাতি অত্থো. সচে অম্হাকং স্ৰে গমনকালো ভৰিস্সতি, কাযে বলমত্তা চেৰ ফরিস্সতি, গমনপচ্চযা চ অঞ্ঞো অফাসুৰিহারো ন ভৰিস্সতি, অথেতং কালঞ্চ গমনকারণসমৰাযসঙ্খাতং সমযঞ্চ উপধারেত্ৰা – ‘‘অপি এৰ নাম স্ৰে আগচ্ছেয্যামা’’তি ৰুত্তং হোতি.

৪৪৮. চেতকেন ভিক্খুনাতি চেতিরট্ঠে জাতত্তা চেতকোতি এৰং লদ্ধনামেন. সম্মোদনীযং কথং সারণীযন্তি ভো, আনন্দ, দসবলস্স কো নাম আবাধো অহোসি, কিং ভগৰা পরিভুঞ্জি. অপি চ সত্থু পরিনিব্বানেন তুম্হাকং সোকো উদপাদি, সত্থা নাম ন কেৰলং তুম্হাকংযেৰ পরিনিব্বুতো, সদেৰকস্স লোকস্স মহাজানি, কো দানি অঞ্ঞো মরণা মুচ্চিস্সতি, যত্র সো সদেৰকস্স লোকস্স অগ্গপুগ্গলো পরিনিব্বুতো, ইদানি কং অঞ্ঞং দিস্ৰা মচ্চুরাজা লজ্জিস্সতীতি এৰমাদিনা নযেন মরণপটিসংযুত্তং সম্মোদনীযং কথং সারণীযং ৰীতিসারেত্ৰা থেরস্স হিয্যো পীতভেসজ্জানুরূপং আহারং দত্ৰা ভত্তকিচ্চাৰসানে একমন্তং নিসীদি.

উপট্ঠাকো সন্তিকাৰচরোতি উপট্ঠাকো হুত্ৰা সন্তিকাৰচরো, ন রন্ধগৰেসী. ন ৰীমংসনাধিপ্পাযো. সমীপচারীতি ইদং পুরিমপদস্সেৰ ৰেৰচনং. যেসং সো ভৰং গোতমোতি কস্মা পুচ্ছতি? তস্স কির এৰং অহোসি ‘‘যেসু ধম্মেসু ভৰং গোতমো ইমং লোকং পতিট্ঠপেসি, তে তস্স অচ্চযেন নট্ঠা নু খো, ধরন্তি নু খো, সচে ধরন্তি, আনন্দো জানিস্সতি, হন্দ নং পুচ্ছামী’’তি, তস্মা পুচ্ছি.

৪৪৯. অথস্স থেরো তীণি পিটকানি তীহি খন্ধেহি সঙ্গহেত্ৰা দস্সেন্তো ‘‘তিণ্ণং খো’’তিআদিমাহ. মাণৰো সঙ্খিত্তেন কথিতং অসল্লক্খেন্তো – ‘‘ৰিত্থারতো পুচ্ছিস্সামী’’তি চিন্তেত্ৰা ‘‘কতমেসং তিণ্ণ’’ন্তিআদিমাহ.

সীলক্খন্ধৰণ্ণনা

৪৫০-৪৫৩. ততো থেরেন ‘‘অরিযস্স সীলক্খন্ধস্সা’’তি তেসু দস্সিতেসু পুন ‘‘কতমো পন সো, ভো আনন্দ, অরিযো সীলক্খন্ধো’’তি একেকং পুচ্ছি. থেরোপিস্স বুদ্ধুপ্পাদং দস্সেত্ৰা তন্তিধম্মং দেসেন্তো অনুক্কমেন ভগৰতা ৰুত্তনযেনেৰ সব্বং ৰিস্সজ্জেসি. তত্থ অত্থি চেৰেত্থ উত্তরিকরণীযন্তি এত্থ ভগৰতো সাসনে ন সীলমেৰ সারো, কেৰলঞ্হেতং পতিট্ঠামত্তমেৰ হোতি. ইতো উত্তরি পন অঞ্ঞম্পি কত্তব্বং অত্থি যেৰাতি দস্সেসি. ইতো বহিদ্ধাতি বুদ্ধসাসনতো বহিদ্ধা.

সমাধিক্খন্ধৰণ্ণনা

৪৫৪. কথঞ্চ, মাণৰ, ভিক্খু ইন্দ্রিযেসু গুত্তদ্ৰারো হোতীতি ইদমাযস্মা আনন্দো ‘‘কতমো পন সো, ভো আনন্দ, অরিযো সমাধিক্খন্ধো’’তি এৰং সমাধিক্খন্ধং পুট্ঠোপি যে তে ‘‘সীলসম্পন্নো ইন্দ্রিযেসু গুত্তদ্ৰারো সতিসম্পজঞ্ঞেন সমন্নাগতো সন্তুট্ঠো’’তি এৰং সীলানন্তরং ইন্দ্রিযসংৰরাদযো সীলসমাধীনং অন্তরে উভিন্নম্পি উপকারকধম্মা উদ্দিট্ঠা, তে নিদ্দিসিত্ৰা সমাধিক্খন্ধং দস্সেতুকামো আরভি. এত্থ চ রূপজ্ঝানানেৰ আগতানি, ন অরূপজ্ঝানানি, আনেত্ৰা পন দীপেতব্বানি. চতুত্থজ্ঝানেন হি অসঙ্গহিতা অরূপসমাপত্তি নাম নত্থিযেৰ.

৪৭১-৪৮০. অত্থি চেৰেত্থ উত্তরিকরণীযন্তি এত্থ ভগৰতো সাসনে ন চিত্তেকগ্গতামত্তকেনেৰ পরিযোসানপ্পত্তি নাম অত্থি, ইতোপি উত্তরি পন অঞ্ঞং কত্তব্বং অত্থি যেৰাতি দস্সেতি. নত্থি চেৰেত্থ উত্তরিকরণীযন্তি এত্থ ভগৰতো সাসনে ইতো উত্তরি কাতব্বং নাম নত্থিযেৰ, অরহত্তপরিযোসানঞ্হি ভগৰতো সাসনন্তি দস্সেতি. সেসং সব্বত্থ উত্তানত্থমেৰাতি.

ইতি সুমঙ্গলৰিলাসিনিযা দীঘনিকাযট্ঠকথাযং

সুভসুত্তৰণ্ণনা নিট্ঠিতা.