৩. পঞ্হাপুচ্ছকৰণ্ণনা

১৫০. ইদানি পঞ্হাপুচ্ছকং হোতি. তত্থ পঞ্হাপুচ্ছনে পঞ্চন্নং খন্ধানং ‘‘কতিকুসলা? কতিঅকুসলা? কতিঅব্যাকতা’’তিআদিনা নযেন যং লব্ভতি, যঞ্চ ন লব্ভতি, তং সব্বং পুচ্ছিত্ৰা ৰিস্সজ্জনে ‘‘রূপক্খন্ধো অব্যাকতো’’তিআদিনা নযেন যং লব্ভতি তদেৰ উদ্ধটন্তি ৰেদিতব্বং. যত্থ যত্থ চ ‘একো খন্ধো’তি ৰা ‘দ্ৰে খন্ধা’তি ৰা পরিচ্ছেদং অকত্ৰা ‘‘সিযা উপ্পন্না, সিযা অনুপ্পন্না’’তিআদিনা নযেন তন্তি ঠপিতা, তত্থ তত্থ পঞ্চন্নম্পি খন্ধানং গহণং ৰেদিতব্বং. সেসো তেসং তেসং খন্ধানং কুসলাদিৰিভাগো হেট্ঠা ধম্মসঙ্গহট্ঠকথাযং (ধ. স. অট্ঠ. ৯৮৫) ৰুত্তোযেৰ.

আরম্মণত্তিকেসু পন চত্তারো খন্ধা পঞ্চপণ্ণাস কামাৰচরধম্মে আরব্ভ রজ্জন্তস্স দুস্সন্তস্স মুয্হন্তস্স সংৰরন্তস্স সম্মসন্তস্স পচ্চৰেক্খন্তস্স চ পরিত্তারম্মণা হোন্তি, সত্তৰীসতি রূপারূপাৰচরধম্মে আরব্ভ রজ্জন্তস্স দুস্সন্তস্স মুয্হন্তস্স সংৰরন্তস্স পরিগ্গহং পট্ঠপেন্তস্স মহগ্গতারম্মণা, মগ্গফলনিব্বানানি পচ্চৰেক্খন্তস্স অপ্পমাণারম্মণা, পঞ্ঞত্তিং পচ্চৰেক্খণকালে নৰত্তব্বারম্মণাতি.

তেযেৰ সেক্খাসেক্খানং মগ্গপচ্চৰেক্খণকালে মগ্গারম্মণা হোন্তি, মগ্গকালে সহজাতহেতুনা মগ্গহেতুকা, মগ্গং গরুং কত্ৰা পচ্চৰেক্খণকালে আরম্মণাধিপতিনা মগ্গাধিপতিনো, ৰীরিযজেট্ঠকং ৰা ৰীমংসজেট্ঠকং ৰা মগ্গং ভাৰেন্তস্স সহজাতাধিপতিনা মগ্গাধিপতিনো, ছন্দজেট্ঠকং পন চিত্তজেট্ঠকং ৰা ভাৰেন্তস্স নৰত্তব্বারম্মণা নাম হোন্তি.

অতীতানি পন খন্ধধাতুআযতনানি আরব্ভ রজ্জন্তস্স দুস্সন্তস্স মুয্হন্তস্স সংৰরন্তস্স পরিগ্গহং পট্ঠপেন্তস্স অতীতারম্মণা হোন্তি, অনাগতানি আরব্ভ অনাগতারম্মণা হোন্তি, পচ্চুপ্পন্নানি আরব্ভ পচ্চুপ্পন্নারম্মণা হোন্তি, পঞ্ঞত্তিং ৰা নিব্বানং ৰা পচ্চৰেক্খন্তস্স নৰত্তব্বারম্মণা হোন্তি.

তথা অত্তনো খন্ধধাতুআযতনানি আরব্ভ রজ্জন্তস্স দুস্সন্তস্স মুয্হন্তস্স সংৰরন্তস্স পরিগ্গহং পট্ঠপেন্তস্স অজ্ঝত্তারম্মণা হোন্তি, পরেসং খন্ধধাতুআযতনানি আরব্ভ এৰং পৰত্তেন্তস্স বহিদ্ধারম্মণা, পণ্ণত্তিনিব্বানপচ্চৰেক্খণকালেপি বহিদ্ধারম্মণাযেৰ, কালেন অজ্ঝত্তং কালেন বহিদ্ধা ধম্মেসু এৰং পৰত্তেন্তস্স অজ্ঝত্তবহিদ্ধারম্মণা, আকিঞ্চঞ্ঞাযতনকালে নৰত্তব্বারম্মণাতি ৰেদিতব্বা.

ইতি ভগৰা ইমং খন্ধৰিভঙ্গং সুত্তন্তভাজনীযাদিৰসেন তযো পরিৰট্টে নীহরিত্ৰা ভাজেন্তো দস্সেসি. তীসুপি হি পরিৰট্টেসু একোৰ পরিচ্ছেদো. রূপক্খন্ধো হি সব্বত্থ কামাৰচরোযেৰ. চত্তারো খন্ধা চতুভূমকা লোকিযলোকুত্তরমিস্সকা কথিতাতি.

সম্মোহৰিনোদনিযা ৰিভঙ্গট্ঠকথায

খন্ধৰিভঙ্গৰণ্ণনা নিট্ঠিতা.