৩. দুকতিকপট্ঠানৰণ্ণনা

দুকতিকপট্ঠানে হেতুং কুসলং ধম্মং পটিচ্চ হেতু কুসলো ধম্মো উপ্পজ্জতি হেতুপচ্চযাতি এৰং পঞ্হামত্তুদ্ধারৰসেনেৰ সঙ্খেপতো দেসনা কতা. ‘‘কুসলং অলোভং পটিচ্চ অদোসো অমোহো’’তিআদিনা পন নযেন ৰিত্থারো ৰত্তব্বো সিযা, সো হেট্ঠা দস্সিতনযেন সক্কা অৰুত্তোপি জানিতুন্তি একপদেপি একপচ্চযো ৰা ন ৰুত্তো. যা পনেসা সঙ্খেপতো দেসনা কতা, সা এৰং কতাতি ৰেদিতব্বা. হেতুদুকেন হি সদ্ধিং কুসলপদং যোজেত্ৰা পটিচ্চৰারে অনুলোমস্স চেৰ পচ্চনীযস্স চ ৰসেন সব্বে লব্ভমানকপচ্চযা দস্সিতা, অনুলোমপচ্চনীযপচ্চনীযানুলোমনযা চেৰ সহজাতৰারাদযো চ ন দস্সিতা, কেৰলং ‘‘পটিচ্চৰারসদিসংযেৰ ৰিত্থারেতব্ব’’ন্তি ৰুত্তং. পঞ্হাৰারে পঞ্হম্পি অৰিস্সজ্জেত্ৰা কেৰলং পঞ্হুদ্ধারমত্তং কত্ৰা অনুলোমপচ্চনীযৰসেনেৰ লব্ভমানপচ্চযা দস্সিতা. যথা চ কুসলপদং, এৰং অকুসলঅব্যাকতপদানিপি হেতুদুকেন সদ্ধিং যোজেত্ৰা হেতুকুসলদুকতিকং নিদ্দিসিতব্বন্তি ৰুত্তং.

ততো পরং হেতুং সুখায ৰেদনায সম্পযুত্তং ধম্মন্তিআদিনা নযেন হেতুৰেদনাদুকতিকাদীনি একৰীসতি দুকতিকানি দস্সিতানি. যস্মা পন হেতু নাম সনিদস্সনসপ্পটিঘো অনিদস্সনসপ্পটিঘো ৰা নত্থি, তস্মা হেতুপদেন সদ্ধিং সনিদস্সনসপ্পটিঘঅনিদস্সনসপ্পটিঘপদানি ন যোজিতানি. এৰং হেতুদুকেন সদ্ধিং লব্ভমানকৰসেন দ্ৰাৰীসতি তিকে যোজেত্ৰা পুন তে সহেতুকদুকাদীহি সরণদুকপরিযোসানেহি সব্বদুকেহি সদ্ধিং যোজিতা. তত্থ যং যং পদং যেন যেন পদেন সদ্ধিং যোজনং ন গচ্ছতি, তং তং পাল়িযংযেৰ ন লব্ভতীতি ৰুত্তং. এৰমেত্থ একেন দুকেন সদ্ধিং বাৰীসতি তিকে যোজেত্ৰা পুন অপরেন বাৰীসতি, অপরেন বাৰীসতীতি পটিপাটিযা দুকসতে লব্ভমানদুকপদেহি সদ্ধিং দ্ৰাৰীসতি তিকা যোজিতাতি দ্ৰাৰীসতি তিকে গহেত্ৰা দুকসতে পক্খিপিত্ৰা দুকতিকপট্ঠানং নাম দেসিতং. তত্থ যেসু যেসু ঠানেসু নযং দস্সেত্ৰা পাল়িযা সঙ্খেপো কতো, তেসু তেসু ঠানেসু দস্সিতনযানুরূপেন তস্সা ৰিত্থারো ৰেদিতব্বোতি.

দুকতিকপট্ঠানৰণ্ণনা.