৩. ব্রহ্মচরিযকথা

১. সুদ্ধব্রহ্মচরিযকথাৰণ্ণনা

২৬৯. ইদানি ব্রহ্মচরিযকথা হোতি. তত্থ দ্ৰে ব্রহ্মচরিযৰাসা, মগ্গভাৰনা চ পব্বজ্জা চ. পব্বজ্জা সব্বদেৰেসু নত্থি. মগ্গভাৰনা ঠপেত্ৰা অসঞ্ঞসত্তে সেসেসু অপ্পটিসিদ্ধা. তত্থ যে পরনিম্মিতৰসৰত্তিদেৰে উপাদায তদুপরিদেৰেসু মগ্গভাৰনম্পি ন ইচ্ছন্তি সেয্যথাপি সম্মিতিযা, তে সন্ধায নত্থি দেৰেসূতি পুচ্ছা সকৰাদিস্স. ‘‘তীহি, ভিক্খৰে, ঠানেহি জম্বুদীপকা মনুস্সা উত্তরকুরুকে চ মনুস্সে অধিগ্গণ্হন্তি দেৰে চ তাৰতিংসে. কতমেহি তীহি? সূরা সতিমন্তো ইধ ব্রহ্মচরিযৰাসো’’তি (অ. নি. ৯.২১) ইদং সুত্তং নিস্সায দ্ৰেপি ব্রহ্মচরিযৰাসা নত্থি দেৰেসূতি উপ্পন্নলদ্ধিৰসেন পটিঞ্ঞা পরৰাদিস্স. পুন দ্ৰিন্নম্পি ব্রহ্মচরিযানং অন্তরাযিকধম্মৰসেনেৰ সব্বে দেৰা জল়াতি পুচ্ছা সকৰাদিস্স. তত্থ হত্থসংৰাচিকাতি মূগা ৰিয হত্থমুদ্ধায ৰত্তারো. পরতো অত্থি দেৰেসূতি পুচ্ছা পরৰাদিস্স, মগ্গভাৰনং সন্ধায পটিঞ্ঞা সকৰাদিস্স. পটিঞ্ঞায অধিপ্পাযং অসল্লক্খেত্ৰা পব্বজ্জাৰসেন অনুযোগো পরৰাদিস্স.

২৭০. যত্থ নত্থি পব্বজ্জাতি পঞ্হে গিহীনঞ্চেৰ একচ্চানঞ্চ দেৰানং মগ্গপটিলাভং সন্ধায পটিক্খেপো তস্সেৰ. পুন পুট্ঠো পচ্চন্তৰাসিনো চেৰ অসঞ্ঞসত্তে চ সন্ধায পটিঞ্ঞা তস্সেৰ. যো পব্বজতীতিআদীসু পুচ্ছাসুপি এসেৰ নযো. পুন ‘‘অত্থি দেৰেসূ’’তি পঞ্হেপি মগ্গভাৰনং সন্ধাযেৰ পটিঞ্ঞা সকৰাদিস্স, ‘‘সব্বদেৰেসূ’’তি ৰুত্তে অসঞ্ঞসত্তে সন্ধায পটিক্খেপো তস্সেৰ.

২৭১. মনুস্সেসূতি পঞ্হদ্ৰযে জম্বুদীপকে সন্ধায পটিঞ্ঞা. পচ্চন্তৰাসিনো সন্ধায পটিক্খেপো ৰেদিতব্বো.

অত্থি যত্থ অত্থীতি অত্থি তে দেৰা, অত্থি ৰা সো পদেসো, যত্থ অত্থীতি এৰং সত্তপদেসৰিভাগমুখেন ৰিস্সজ্জনং সকৰাদিস্স. ইমিনা নযেন সব্বে একন্তরিকপঞ্হা ৰেদিতব্বা.

২৭২. সুত্তানুযোগে কুহিং ফলুপ্পত্তীতি তস্স অনাগামিনো অরহত্তফলুপ্পত্তি কুহিন্তি পুচ্ছা সকৰাদিস্স. তত্থেৰাতি সুদ্ধাৰাসেসূতি অত্থো.

হন্দ হীতি কারণত্থে নিপাতো. ইদং ৰুত্তং হোতি – যস্মা অনাগামিপুগ্গলো ইধ লোকে ভাৰিতেন মগ্গেন তত্থ সুদ্ধাৰাসেসু ফলং সচ্ছিকরোতি, ন তত্থ অঞ্ঞং মগ্গং ভাৰেতি, তস্মা নত্থি দেৰেসু ব্রহ্মচরিযৰাসোতি.

২. সংসন্দনব্রহ্মচরিযৰণ্ণনা

২৭৩. ইদানি যদি অঞ্ঞত্থ ভাৰিতেন মগ্গেন অঞ্ঞত্থ ফলসচ্ছিকিরিযা হোতি, সোতাপন্নাদীনম্পি সিযাতি এতমত্থং দস্সেতুং পুন অনাগামীতিআদীনং সংসন্দনপুচ্ছা সকৰাদিস্স. তত্থ অনাগামিস্স ফলসচ্ছিকিরিযায পটিঞ্ঞা, সেসানং ফলসচ্ছিকিরিযায পটিক্খেপো পরৰাদিস্স. ইধ ভাৰিতমগ্গো হি অনাগামী ইধৰিহাযনিট্ঠো নাম হোতি. সো ইধ অনাগামিমগ্গং ভাৰেত্ৰা ‘‘ওপপাতিকো তত্থপরিনিব্বাযী’’তি ৰচনতো ‘‘পুন মগ্গভাৰনং ৰিনা উপপত্তিৰসেনেৰ অরহত্তফলং সচ্ছিকরোতী’’তি তস্স লদ্ধি. সোতাপন্নসকদাগামিনো পন তত্থ মগ্গং ভাৰেত্ৰা তত্রুপপত্তিকা নাম হোন্তীতি তেসং ইধাগমনঞ্ঞেৰ নত্থি. ইতি সো অনাগামিস্স ফলসচ্ছিকিরিযং পুট্ঠো পটিজানাতি. ইতরেসং পটিক্খিপতি.

অনাগামী পুগ্গলো তত্থ ভাৰিতেন মগ্গেনাতি পঞ্হে ‘‘অনাগামিনো তত্থ মগ্গভাৰনাৰ নত্থী’’তি লদ্ধিযা পটিক্খিপতি. মগ্গো চ ভাৰীযতি, ন চ কিলেসা পহীযন্তীতি পুচ্ছা সকৰাদিস্স, রূপাৰচরমগ্গং সন্ধায পটিঞ্ঞা ইতরস্স. রূপাৰচরমগ্গেন হি সো ইধৰিহাযনিট্ঠো নাম জাতো.

অনাগামী পুগ্গলো কতকরণীযোতি পঞ্হে ‘‘ওপপাতিকো তত্থপরিনিব্বাযী’’তি ৰচনতো উপপত্তিযাৰস্স কতকরণীযাদিভাৰং সন্ধায পটিজানাতি. অরহাতি পঞ্হে ইধপরিনিব্বাযিনো অরহতো ৰসেনেৰ পটিক্খিপতি. পুন পুট্ঠো তত্থপরিনিব্বাযিনো ৰসেন পটিজানাতি.

অত্থি অরহতো পুনব্ভৰোতিআদীসুপি তত্থপরিনিব্বাযী ইধপরিনিব্বাযীনং ৰসেনেৰ অত্থো ৰেদিতব্বো. অপ্পটিৰিদ্ধাকুপ্পোৰ তত্থপরিনিব্বাযতীতি পুট্ঠো ইধেৰ ভাৰিতেন মগ্গেন তস্স অকুপ্পপটিৰেধং ইচ্ছন্তো পটিক্খিপতি.

যথা মিগোতি পঠমং উদাহরণং পরৰাদিস্স, দুতিযং সকৰাদিস্স. সেসং সব্বত্থ উত্তানত্থমেৰাতি.

ব্রহ্মচরিযকথা নিট্ঠিতা.

৩. ওধিসোকথাৰণ্ণনা

২৭৪. ইদানি ওধিসোকথা নাম হোতি. তত্থ যে সোতাপন্নাদীনং নানাভিসমযৰসেন দুক্খদস্সনাদীহি ওধিসো ওধিসো একদেসেন একদেসেন কিলেসপ্পহানং ইচ্ছন্তি সেয্যথাপি এতরহি সম্মিতিযাদযো, তেসং তং লদ্ধিং ভিন্দিতুং ওধিসোতি পুচ্ছা সকৰাদিস্স, পটিঞ্ঞা পরৰাদিস্স. পুন অনুযোগো সকৰাদিস্স, একদেসেন সোতাপন্নাদিভাৰস্স অভাৰতো পটিক্খেপো পরৰাদিস্স. ইমিনা উপাযেন সব্বৰারেসু অত্থো ৰেদিতব্বোতি.

ওধিসোকথাৰণ্ণনা.