৩. ৰিপাকত্তিকৰণ্ণনা

১-২৩. ৰিপাকত্তিকে ৰিপাকং ধম্মং পটিচ্চ ৰিপাকো ধম্মো উপ্পজ্জতি হেতুপচ্চযাতি যে হেতুপচ্চযে তেরস ৰারা ৰুত্তা, তে সঙ্খিপিত্ৰা গণনায দস্সেতুং হেতুযা তেরসাতি ৰুত্তং. আরম্মণে পঞ্চাতিআদীসুপি এসেৰ নযো. এৰমেত্থ তেরস পঞ্চ নৰ সত্ত তীণি দ্ৰেতি ছ গণনপরিচ্ছেদা, তেসং ৰসেন পচ্চযসংসন্দনে হেট্ঠা ৰুত্তনযেনেৰ গণনা ৰেদিতব্বা.

২৪-৫২. পচ্চনীযেপি ৰিপাকং ধম্মং পটিচ্চ ৰিপাকো ধম্মো উপ্পজ্জতি নহেতুপচ্চযাতি যে নহেতুপচ্চযে দস ৰারা ৰুত্তা, তে সঙ্খিপিত্ৰা গণনায দস্সেতুং নহেতুযা দসাতি ৰুত্তং. ন আরম্মণে পঞ্চাতিআদীসুপি এসেৰ নযো. এৰমেত্থ দস পঞ্চ তেরস দ্ৰাদস দ্ৰে একং নৰ তীণীতি অট্ঠ গণনপরিচ্ছেদা, তেসং ৰসেন পচ্চযসংসন্দনে হেট্ঠা ৰুত্তনযেনেৰ ৰিত্থারতো গণনা ৰেদিতব্বা. পাল়ি পন সঙ্খিত্তা, এতেসঞ্ঞেৰ পন লদ্ধগণনরপরিচ্ছেদানং ৰারানং ৰসেন সংসন্দিত্ৰা অনুলোমপচ্চনীযং পচ্চনীযানুলোমঞ্চ ৰেদিতব্বং.

সহজাতৰারো ইমিনাৰ একগতিকো. পচ্চযনিস্সযসংসট্ঠসম্পযুত্তৰারা যথাপাল়িমেৰ নিয্যন্তি.

৯২. পঞ্হাৰারে কুসলাকুসলে নিরুদ্ধেতি এতস্মিং ৰিপস্সনাৰসেন পৰত্তে কুসলে সারজ্জনাদিৰসেন পৰত্তে অকুসলে চ নিরুদ্ধে. ৰিপাকো তদারম্মণতা উপ্পজ্জতীতি কামাৰচরৰিপাকো তদারম্মণতায উপ্পজ্জতি. যে পন ‘‘ৰিপস্সনাজৰনানং ৰিচিকিচ্ছুদ্ধচ্চানঞ্চ পরিযোসানে তদারম্মণং নত্থী’’তি ৰদন্তি, তে ইমায তন্তিযা পটিসেধেতব্বা. আকাসানঞ্চাযতনকুসলং ৰিঞ্ঞাণঞ্চাযতনস্স কিরিযস্স আরম্মণপচ্চযেন পচ্চযোতি অরহত্তং পত্ৰা অসমাপন্নপুব্বা সমাপত্তিযো পটিলোমতো সমাপজ্জন্তস্স ৰসেনেতং ৰুত্তং. ইমিনা উপাযেন সব্বৰিস্সজ্জনেসু সাধুকং পাল়িং উপপরিক্খিত্ৰা অত্থো ৰেদিতব্বো.

১২০. হেতুযা সত্ত, আরম্মণে নৰ, অধিপতিযা দসাতিআদীসুপি সহজাতাধিপতিৰসেন আরম্মণাধিপতিৰসেন সহজাতনিস্সযৰসেন পুরেজাতনিস্সযৰসেন অনন্তরূপনিস্সযৰসেন আরম্মণূপনিস্সযৰসেন পকতূপনিস্সযৰসেন সহজাতৰিপ্পযুত্তৰসেন পুরেজাতপচ্ছাজাতৰিপ্পযুত্তৰসেনাতি যত্থ যত্থ যথা যথা যত্তকানি ৰিস্সজ্জনানি লব্ভন্তি, তত্থ তত্থ তথা তথা তানি সব্বানি সল্লক্খেতব্বানি. তথা পচ্চনীযাদীসু অনুলোমৰসেন ৰারুদ্ধরণং, অনুলোমতো লদ্ধৰারানং পচ্চনীযতো গণনা, পচ্চযসংসন্দনং, অনুলোমপচ্চনীযে পচ্চনীযানুলোমে চ সুদ্ধিকেসু চেৰ সংসন্দনৰসেন চ পৰত্তেসু হেতুমূলকাদীসু লব্ভমানৰারগণনা, অলব্ভমানানং অলব্ভমানতাতি সব্বং হেট্ঠা ৰুত্তনযেনেৰ ৰেদিতব্বং.

যথা চেত্থ, এৰং ইতো পরেসুপি তিকদুকেসু. পট্ঠানপকরণঞ্হি পাল়িতোৰ অনন্তং অপরিমাণং. তস্স পদপটিপাটিযা অত্থং ৰণ্ণযিস্সামীতি পটিপন্নস্স অতিদীঘাযুকস্সাপি আযু নপ্পহোতি. ন চস্স একদেসং ৰণ্ণেত্ৰা সেসম্হি নযতো দস্সিযমানে ন সক্কা অত্থো জানিতুং, তস্মা ইতো পরং এত্তকম্পি অৰত্ৰা সেসেসু তিকদুকেসু হেট্ঠা অৰুত্তপ্পকারত্তা যং যং অৰস্সং ৰত্তব্বং, তং তদেৰ ৰক্খাম. যং পন অৰত্ৰা গমিস্সাম, তং পাল়িনযেনেৰ ৰেদিতব্বন্তি.

ৰিপাকত্তিকৰণ্ণনা.