৮. সতিপট্ঠানকথাৰণ্ণনা

৩০১. ইদানি সতিপট্ঠানকথা হোতি. ‘‘তত্থ – চতুন্নং, ভিক্খৰে, সতিপট্ঠানানং সমুদযঞ্চ অত্থঙ্গমঞ্চ দেসেস্সামী’’তি (সং. নি. ৫.৪০৮) সতিপট্ঠানসংযুত্তে ৰুত্তনযেনেৰ যেসং কাযাদযো সতিযা আরম্মণধম্মে গহেত্ৰা ‘‘সব্বে ধম্মা সতিপট্ঠানা’’তি লদ্ধি, সেয্যথাপি এতরহি অন্ধকানং. অন্ধকা নাম পুব্বসেলিযা, অপরসেলিযা, রাজগিরিযা, সিদ্ধত্থিকাতি ইমে পচ্ছা উপ্পন্ননিকাযা. তেসং লদ্ধিৰিৰেচনত্থং পুচ্ছা সকৰাদিস্স, পটিঞ্ঞা পরৰাদিস্স. তত্থ যস্মা ‘‘পতিট্ঠাতি এতেসূতি পট্ঠানা. কা পতিট্ঠাতি? সতি. সতিযা পট্ঠানা সতিপট্ঠানা’’তি ইমিনা অত্থেন সতিগোচরাপি সতিপট্ঠানা. ‘‘পতিট্ঠহন্তীতি পট্ঠানা. কা পতিট্ঠহন্তি? সতিযো. সতিযোৰ পট্ঠানা সতিপট্ঠানা’’তি ইমিনা অত্থেন সতিযোৰ সতিপট্ঠানা. তস্মা দ্ৰেপি ৰাদা পরিযাযেন যুজ্জন্তি. যে পন তং পরিযাযং পহায একন্তেনেৰ ‘‘সব্বে ধম্মা সতিপট্ঠানা’’তি ৰদন্তি, তে সন্ধায পুচ্ছা সকৰাদিস্স, আরম্মণৰসেন পটিঞ্ঞা পরৰাদিস্স. সব্বে ধম্মা সতীতি অনুযুত্তস্স পন সব্বেসং সতিসভাৰাভাৰতো পটিক্খেপো তস্সেৰ. তত্থ খযগামীতিআদীনি মগ্গৰিসেসনানি. একাযনমগ্গো হি কিলেসানং খযভূতং নিব্বানং গচ্ছতীতি খযগামী. চত্তারি সচ্চানি বুজ্ঝন্তো গচ্ছতীতি বোধগামী. ৰট্টং অপচিনন্তো গচ্ছতীতি অপচযগামী. এৰমেতেহি পদেহি ‘‘কিং তে সব্বে ধম্মা এৰরূপো তে একাযনো মগ্গো হোতী’’তি পুচ্ছতি. অনাসৰা অসংযোজনিযাতিআদীনিপি লোকুত্তরভাৰং পুচ্ছনত্থায ৰুত্তানি. বুদ্ধানুস্সতীতিআদীনি পভেদপুচ্ছাৰসেন ৰুত্তানি.

চক্খাযতনং সতিপট্ঠানন্তিআদি সব্বধম্মানং পভেদপুচ্ছাৰসেন ৰুত্তং. তত্থাপি সতিৰসেন পটিক্খেপো, আরম্মণৰসেন পটিঞ্ঞাতি. এৰং সব্বপঞ্হেসু অত্থো ৰেদিতব্বো. সুত্তসাধনা উত্তানত্থাযেৰাতি.

সতিপট্ঠানকথাৰণ্ণনা নিট্ঠিতা.