৩. তিকনিদ্দেসৰণ্ণনা

৯১. তিকনিদ্দেসে – দুস্সীলোতি নিস্সীলো. পাপধম্মোতি লামকধম্মো. সীলৰিপত্তিযা ৰা দুস্সীলো, দিট্ঠিৰিপত্তিযা পাপধম্মো. কাযৰচীসংৰরভেদেন দুস্সীলো, সেসসংৰরভেদেন পাপধম্মো. অসুদ্ধপযোগতায দুস্সীলো, অসুদ্ধাসযতায পাপধম্মো. কুসলসীলৰিরহেন দুস্সীলো; অকুসলসীলসমন্নাগমেন পাপধম্মো. অসুচীতি অসুচীহি কাযকম্মাদীহি সমন্নাগতো. সঙ্কস্সরসমাচারোতি সঙ্কায পরেহি সরিতব্বসমাচারো. কিঞ্চিদেৰ অসারুপ্পং দিস্ৰা ‘ইদং ইমিনা কতং ভৰিস্সতী’তি এৰং পরেহি আসঙ্কনীযসমাচারো, অত্তনোযেৰ ৰা সঙ্কায সরিতব্বসমাচারো – সাসঙ্কসমাচারোতি অত্থো. তস্স হি দিৰাট্ঠানাদীসু সন্নিপতিত্ৰা কিঞ্চিদেৰ মন্তযন্তে ভিক্খূ দিস্ৰা ‘ইমে একতো হুত্ৰা মন্তেন্তি, কচ্চি নু খো মযা কতকম্মং জানিত্ৰা মন্তেন্তী’তি এৰং সাসঙ্কসমাচারো হোতি.

পটিচ্ছন্নকম্মন্তোতি পটিচ্ছাদেতব্বযুত্তকেন পাপকম্মেন সমন্নাগতো. অস্সমণো সমণপটিঞ্ঞোতি অস্সমণো হুত্ৰাৰ সমণপতিরূপকতায ‘সমণো অহ’ন্তি এৰং পটিঞ্ঞো. অব্রহ্মচারী ব্রহ্মচারিপটিঞ্ঞোতি অঞ্ঞে ব্রহ্মচারিনো সুনিৰত্থে সুপারুতে সুম্ভকপত্তধরে গামনিগমজনপদরাজধানীসু পিণ্ডায চরিত্ৰা জীৰিকং কপ্পেন্তে দিস্ৰা সযম্পি তাদিসেন আকারেন তথা পটিপজ্জনতো ‘অহং ব্রহ্মচারী’তি পটিঞ্ঞং দেন্তো ৰিয হোতি. ‘অহং ভিক্খূ’তি ৰত্ৰা উপোসথগ্গাদীনি পৰিসন্তো পন ব্রহ্মচারিপটিঞ্ঞো হোতিযেৰ, তথা সঙ্ঘিকং লাভং গণ্হন্তো. অন্তোপূতীতি পূতিনা কম্মেন অন্তো অনুপৰিট্ঠো, নিগ্গুণতায ৰা গুণসারৰিরহিতত্তা অন্তোপূতি. অৰস্সুতোতি রাগাদীহি তিন্তো. কসম্বুজাতোতি সঞ্জাতরাগাদিকচৰরো. অথ ৰা কসম্বু ৰুচ্চতি তিন্তকুণপগতং কসটউদকং. ইমস্মিঞ্চ সাসনে দুস্সীলো নাম জিগুচ্ছনীযত্তা তিন্তকুণপকসটউদকসদিসো. তস্মা কসম্বু ৰিয জাতোতি কসম্বুজাতো.

তস্স ন এৰং হোতীতি কস্মা ন হোতি? যত্থ পতিট্ঠিতেন সক্কা ভৰেয্য অরহত্তং লদ্ধুং, তস্সা পতিট্ঠায ভিন্নত্তা. যথা হি চণ্ডালকুমারকস্স ‘অসুকো নাম খত্তিযকুমারো রজ্জে অভিসিত্তো’তি সুত্ৰাপি, যস্মিং কুলে পচ্চাজাতা অভিসেকং পাপুণন্তি, তস্মিং কুলে অপচ্চাজাতত্তা ন এৰং হোতি – ‘কুদাস্সু নামাহম্পি সো খত্তিযকুমারো ৰিয অভিসেকং পাপুণেয্য’ন্তি; এৰমেৰ দুস্সীলস্স ‘অসুকো নাম ভিক্খু অরহত্তং পত্তো’তি সুত্ৰাপি, যস্মিং সীলে পতিট্ঠিতেন অরহত্তং পত্তব্বং, তস্স অভাৰতো ‘কুদাস্সু নামাহম্পি সো সীলৰা ৰিয অরহত্তং পাপুণেয’ন্তি ন এৰং হোতি. অযং ৰুচ্চতীতি অযং এৰরূপো পুগ্গলো অরহত্তাসায অভাৰা নিরাসোতি ৰুচ্চতি.

৯২. তস্স এৰং হোতীতি কস্মা হোতি? যস্মিং পতিট্ঠিতেন সক্কা ভৰেয্য অরহত্তং পাপুণিতুং, তস্সা পতিট্ঠায থিরত্তা. যথা হি সুজাতস্স খত্তিযকুমারস্স ‘অসুকো নাম খত্তিযকুমারো রজ্জে অভিসিত্তো’তি সুত্ৰাৰ যস্মিং কুলে পচ্চাজাতা অভিসেকং পাপুণন্তি, তস্মিং পচ্চাজাতস্স এৰং হোতি – ‘কুদাস্সু নামাহম্পি, সো কুমারো ৰিয অভিসেকং পাপুণেয্য’ন্তি এৰমেৰ সীলৰতো ‘অসুকো নাম ভিক্খু অরহত্তং পত্তো’তি সুত্ৰাৰ যস্মিং সীলে পতিট্ঠিতেন অরহত্তং পত্তব্বং, তস্সা পতিট্ঠায থিরত্তা – ‘কুদাস্সু নামাহম্পি সো ভিক্খু ৰিয অরহত্তং পাপুণেয্য’ন্তি এৰং হোতি. অযং ৰুচ্চতীতি অযং এৰরূপো পুগ্গলো আসংসো নাম ৰুচ্চতি. সো হি অরহত্তং আসংসতি পত্থেতীতি আসংসো.

৯৩. যা হিস্স পুব্বে অৰিমুত্তস্সাতি যা তস্স খীণাসৰস্স পুব্বে অরহত্তৰিমুত্তিযা অৰিমুত্তস্স ৰিমুত্তাসা অহোসি, সা পটিপ্পস্সদ্ধা, তস্মা ন এৰং হোতি. যথা হি অভিসিত্তস্স খত্তিযস্স ‘অসুকো নাম খত্তিযকুমারো রজ্জে অভিসিত্তো’তি সুত্ৰা একস্স রঞ্ঞো দ্ৰিন্নং রজ্জাভিসেকানং দ্ৰিন্নং সেতচ্ছত্তানং অভাৰা ন এৰং হোতি – ‘‘কুদাস্সু নামাহম্পি সো কুমারো ৰিয অভিসেকং পাপুণেয্য’’ন্তি; এৰমেৰ খীণাসৰস্স ‘অসুকো নাম ভিক্খু অরহত্তং পত্তো’তি সুত্ৰা, দ্ৰিন্নং অরহত্তানং অভাৰা – ‘কুদাস্সু নামাহম্পি সো ভিক্খু ৰিয অরহত্তং পাপুণেয্য’ন্তি ন এৰং হোতি. অযং ৰুচ্চতীতি অযং এৰরূপো পুগ্গলো অরহত্তাসায ৰিগতত্তা ৰিগতাসোতি ৰুচ্চতি.

৯৪. গিলানূপমনিদ্দেসে – যায উপমায তে গিলানূপমাতি ৰুচ্চন্তি, তং তাৰ উপমং দস্সেতুং তযো গিলানাতিআদি ৰুত্তং. তত্থ সপ্পাযানীতি হিতানি ৰুদ্ধিকরানি. পতিরূপন্তি অনুচ্ছৰিকং. নেৰ ৰুট্ঠাতি তম্হা আবাধাতি ইমিনা অতেকিচ্ছেন ৰাতাপমারাদিনা রোগেন সমন্নাগতো নিট্ঠপ্পত্তো গিলানো কথিতো. ৰুট্ঠাতি তম্হা আবাধাতি ইমিনা খিপিতকচ্ছুতিণপুপ্ফকজরাদিপ্পভেদো অপ্পমত্তকাবাধো কথিতো.

লভন্তো সপ্পাযানি ভোজনানি নো অলভন্তোতি ইমিনা পন যেসং পটিজগ্গনেন ফাসুকং হোতি, সব্বেপি তে আবাধা কথিতা. এত্থ চ পতিরূপো উপট্ঠাকো নাম গিলানুপট্ঠাকঅঙ্গেহি সমন্নাগতো পণ্ডিতো দক্খো অনলসো ৰেদিতব্বো.

গিলানুপট্ঠাকো অনুঞ্ঞাতোতি ‘ভিক্খুসঙ্ঘেন দাতব্বো’তি অনুঞ্ঞাতো. তস্মিঞ্হি গিলানে অত্তনো ধম্মতায যাপেতুং অসক্কোন্তে ভিক্খুসঙ্ঘেন তস্স ভিক্খুনো ‘একো ভিক্খু চ সামণেরো চ ইমং পটিজগ্গথা’তি অপলোকেত্ৰা দাতব্বা. যাৰ পন তে তং পটিজগ্গন্তি, তাৰ গিলানস্স চ তেসঞ্চ দ্ৰিন্নং যেনত্থো সব্বং ভিক্খুসঙ্ঘস্সেৰ ভারো. অঞ্ঞেপি গিলানা উপট্ঠাতব্বাতি ইতরেপি দ্ৰে গিলানা উপট্ঠাতব্বা. কিং কারণা? যোপি হি নিট্ঠপ্পত্তগিলানো, সো অনুপট্ঠিযমানো ‘সচে মং পটিজগ্গেয্যুং, ফাসুকং মে ভৰেয্য, ন খো পন মং পটিজগ্গন্তী’তি মনোপদোসং কত্ৰা অপাযে নিব্বত্তেয্য. পটিজগ্গিযমানস্স পন এৰং হোতি – ‘ভিক্খুসঙ্ঘেন যং কত্তব্বং তং সব্বং কতং, ময্হং পন কম্মৰিপাকো ঈদিসো’তি সো ভিক্খুসঙ্ঘে মেত্তং পচ্চুপট্ঠপেত্ৰা সগ্গে নিব্বত্ততি. যো পন অপ্পমত্তকেন ব্যাধিনা সমন্নাগতো লভন্তোপি অলভন্তোপি ৰুট্ঠাতিযেৰ, তস্স ৰিনাপি ভেসজ্জেন ৰূপসমনকব্যাধি ভেসজ্জে কতে খিপ্পতরং ৰূপসম্মতি. ততো সো বুদ্ধৰচনং ৰা উগ্গণ্হিতুং সমণধম্মং ৰা কাতুং সক্খিস্সতি. ইমিনা কারণেন অঞ্ঞেপি গিলানা উপট্ঠাতব্বাতি ৰুত্তং.

নেৰ ওক্কমতীতি নেৰ পৰিসতি. নিযামং কুসলেসু ধম্মেসু সম্মত্তন্তি কুসলেসু ধম্মেসু মগ্গনিযামসঙ্খাতং সম্মত্তং. ইমিনা পদপরমো পুগ্গলো কথিতো. দুতিযৰারেন উগ্ঘটিতঞ্ঞূ গহিতো সাসনে নাল়কত্থেরসদিসো. বুদ্ধন্তরে একৰারং পচ্চেকবুদ্ধানং সন্তিকে ওৰাদং লভিত্ৰা পটিৰিদ্ধপচ্চেকবোধিঞাণো চ. ততিযৰারেন ৰিপঞ্চিতঞ্ঞূ পুগ্গলো কথিতো. নেয্যো পন তন্নিস্সিতোৰ হোতি.

ধম্মদেসনা অনুঞ্ঞাতাতি মাসস্স অট্ঠ ৰারে ধম্মকথা অনুঞ্ঞাতা. অঞ্ঞেসম্পি ধম্মো দেসেতব্বোতি ইতরেসম্পি ধম্মো কথেতব্বো. কিং কারণা? পদপরমস্স হি ইমস্মিং অত্তভাৰে ধম্মং পটিৰিজ্ঝিতুং অসক্কোন্তস্সাপি অনাগতে পচ্চযো ভৰিস্সতি. যো পন তথাগতস্স রূপদস্সনং লভন্তোপি অলভন্তোপি ধম্মৰিনযঞ্চ সৰনায লভন্তোপি অলভন্তোপি ধম্মং অভিসমেতি; সো অলভন্তো ন তাৰ অভিসমেতি, লভন্তো পন খিপ্পমেৰ অভিসমেস্সতীতি ইমিনা কারণেন তেসং ধম্মো দেসেতব্বো. ততিযস্স পন পুনপ্পুনং দেসেতব্বোৰ. কাযসক্খিদিট্ঠপ্পত্তসদ্ধাৰিমুত্তা হেট্ঠা কথিতাযেৰ.

৯৮. গূথভাণীআদীসু – সভগ্গতোতি সভাযং ঠিতো. পরিসগ্গতোতি গামপরিসায ঠিতো. ঞাতিমজ্ঝগতোতি দাযাদানং মজ্ঝে ঠিতো. পূগমজ্ঝগতোতি সেণীনং মজ্ঝে ঠিতো. রাজকুলমজ্ঝগতোতি রাজকুলস্স মজ্ঝে মহাৰিনিচ্ছযে ঠিতো. অভিনীতোতি পুচ্ছনত্থায নীতো. সক্খিপুট্ঠোতি সক্খিং কত্ৰা পুচ্ছিতো. এহম্ভো পুরিসাতি আলপনমেতং. অত্তহেতু ৰা পরহেতু ৰাতি অত্তনো ৰা পরস্স ৰা হত্থপাদাদিহেতু ৰা ধনহেতু ৰা. আমিসকিঞ্চিক্খহেতু ৰাতি এত্থ আমিসন্তি লাভো অধিপ্পেতো. কিঞ্চিক্খন্তি যং ৰা তং ৰা অপ্পমত্তকং. অন্তমসো তিত্তিরৰট্টকসপ্পিপিণ্ডনৰনীতপিণ্ডাদিঅপ্পমত্তকস্সাপি লঞ্জস্স হেতূতি অত্থো. সম্পজানমুসা ভাসিতা হোতীতি জানন্তোযেৰ মুসাৰাদং কত্তা হোতি. অযং ৰুচ্চতীতি অযং এৰরূপো পুগ্গলো গূথসদিসৰচনত্তা গূথভাণীতি ৰুচ্চতি. যথা হি গূথং নাম মহাজনস্স অনিট্ঠং হোতি অকন্তং; এৰমেৰ ইমস্স পুগ্গলস্স ৰচনং দেৰমনুস্সানং অনিট্ঠং হোতি অকন্তং.

৯৯. অযং ৰুচ্চতীতি অযং এৰরূপো পুগ্গলো পুপ্ফসদিসৰচনত্তা পুপ্ফভাণীতি ৰুচ্চতি. যথা হি ফুল্লানি ৰস্সিকানি ৰা অধিমুত্তকানি ৰা মহাজনস্স ইট্ঠানি কন্তানি হোন্তি; এৰমেৰ ইমস্স পুগ্গলস্স ৰচনং দেৰমনুস্সানং ইট্ঠং হোতি কন্তং.

১০০. নেলাতি এলং ৰুচ্চতি দোসো. নাস্সা এলন্তি নেলা. নিদ্দোসাতি অত্থো, ‘‘নেলঙ্গো সেতপচ্ছাদো’’তি (উদা. ৬৫) এত্থ ৰুত্তনেলং ৰিয. কণ্ণসুখাতি ব্যঞ্জনমধুরতায কণ্ণানং সুখা. সূচিৰিজ্ঝনং ৰিয কণ্ণসূলং ন জনেতি. অত্থমধুরতায সকলসরীরে কোপং অজনেত্ৰা পেমং জনেতীতি পেমনীযা. হদযং গচ্ছতি অপ্পটিহঞ্ঞমানা সুখেন চিত্তং পৰিসতীতি হদযঙ্গমা. গুণপরিপুণ্ণতায পুরে ভৰাতি পোরী. পুরে সংৰড্ঢনারী ৰিয সুকুমারাতিপি পোরী. পুরস্স এসাতিপি পোরী. নগরৰাসীনং কথাতি অত্থো. নগরৰাসিনো হি যুত্তকথা হোন্তি. পিতিমত্তং পিতাতি, মাতিমত্তং মাতাতি, ভাতিমত্তং ভাতাতি ৰদন্তি. এৰরূপী কথা বহুনো জনস্স কন্তা হোতীতি বহুজনকন্তা. বহুজনস্স কন্তভাৰেনেৰ বহুনো জনস্স মনাপা চিত্তৰুদ্ধিকরাতি বহুজনমনাপা. অযং ৰুচ্চতীতি অযং এৰরূপো পুগ্গলো মধুভাণীতি ৰুচ্চতি. মুদুভাণীতিপি পাঠো. উভযত্থাপি মধুরৰচনোতি অত্থো. যথা হি চতুমধুরং নাম মধুরং পণীতং; এৰমেৰ ইমস্স পুগ্গলস্স ৰচনং দেৰমনুস্সানং মধুরং হোতি.

১০১. অরুকূপমচিত্তাদীসু – অভিসজ্জতীতি লগ্গতি. কুপ্পতীতি কোপৰসেন কুপ্পতি. ব্যাপজ্জতীতি পকতিভাৰং পজহতি, পূতিকো হোতি. পতিত্থীযতীতি থিনভাৰং থদ্ধভাৰঞ্চ আপজ্জতি. কোপন্তি দুব্বলকোধং. দোসন্তি দুস্সনৰসেন ততো বলৰতরং. অপ্পচ্চযন্তি অতুট্ঠাকারং দোমনস্সং. দুট্ঠারুকোতি পুরাণৰণো. কট্ঠেনাতি দণ্ডককোটিযা. কঠলাযাতি কপালেন. আসৰং দেতীতি অপরাপরং সৰতি. পুরাণৰণো হি অত্তনো ধম্মতায এৰ পুব্বং লোহিতং যূসন্তি ইমানি তীণি সৰতি, ঘট্টিতো পন তানি অধিকতরং সৰতি. এৰমেৰং খোতি এত্থ ইদং ওপম্মসংসন্দনং, দুট্ঠারুকো ৰিয হি কোধনো পুগ্গলো. তস্স অত্তনো ধম্মতায সৰনং ৰিয কোধনস্সপি অত্তনো ধম্মতায উদ্ধুমাতকস্স ৰিয চণ্ডিকতস্স চরণং. কট্ঠেন ৰা কঠলায ৰা ঘট্টনং ৰিয অপ্পমত্তকম্পি ৰচনং ভিয্যোসো মত্তায সৰনং ৰিয ‘মাদিসং নাম এস এৰং ৰদতী’তি ভিয্যোসো মত্তায উদ্ধুমাযনভাৰো দট্ঠব্বো. অযং ৰুচ্চতীতি অযং এৰরূপো পুগ্গলো অরুকূপমচিত্তোতি ৰুচ্চতি. পুরাণৰণসদিসচিত্তোতি অত্থো.

১০২. রত্তন্ধকারতিমিসাযাতি রত্তিং চক্খুৰিঞ্ঞাণুপ্পত্তিনিৰারণেন অন্ধভাৰকরণে বহলতমে. ৰিজ্জন্তরিকাযাতি ৰিজ্জুপ্পত্তিক্খণে. ইধাপি ইদং ওপম্মসংসন্দনং – চক্খুমা পুরিসো ৰিয হি যোগাৰচরো দট্ঠব্বো. অন্ধকারং ৰিয সোতাপত্তিমগ্গৰজ্ঝা কিলেসা. ৰিজ্জুসঞ্চরণং ৰিয সোতাপত্তিমগ্গঞাণস্স উপ্পত্তিকালো. ৰিজ্জন্তরিকায চক্খুমতো পুরিসস্স সামন্তা রূপদস্সনং ৰিয সোতাপত্তিমগ্গক্খণে নিব্বানদস্সনং. পুন অন্ধকারাৰত্থরণং ৰিয সকদাগামিমগ্গৰজ্ঝা কিলেসা. পুন ৰিজ্জুসঞ্চরণং ৰিয সকদাগামিমগ্গঞাণস্স উপ্পাদো. ৰিজ্জন্তরিকায চক্খুমতো পুরিসস্স সামন্তা রূপদস্সনং ৰিয সকদাগামিমগ্গক্খণে নিব্বানদস্সনং. পুন অন্ধকারাৰত্থরণং ৰিয অনাগামিমগ্গৰজ্ঝা কিলেসা. পুন ৰিজ্জুসঞ্চরণং ৰিয অনাগামিমগ্গঞাণস্স উপ্পাদো. ৰিজ্জন্তরিকায চক্খুমতো পুরিসস্স সামন্তা রূপদস্সনং ৰিয অনাগামিমগ্গক্খণে নিব্বানদস্সনং ৰেদিতব্বং. অযং ৰুচ্চতীতি অযং এৰরূপো পুগ্গলো ৰিজ্জূপমচিত্তোতি ৰুচ্চতি. ইত্তরকালোভাসেন ৰিজ্জুসদিসচিত্তোতি অত্থো.

১০৩. ৰজিরূপমচিত্ততাযপি ইদং ওপম্মসংসন্দনং – ৰজিরং ৰিয হি অরহত্তমগ্গঞাণং দট্ঠব্বং. মণিগণ্ঠিপাসাণগণ্ঠি ৰিয অরহত্তমগ্গৰজ্ঝা কিলেসা. ৰজিরস্স মণিগণ্ঠিং ৰা পাসাণগণ্ঠিং ৰা ৰিনিৰিজ্ঝিত্ৰা অগমনভাৰস্স নত্থিভাৰো ৰিয অরহত্তমগ্গঞাণেন অচ্ছেজ্জানং কিলেসানং নত্থিভাৰো. ৰজিরেন নিব্বিদ্ধৰেধস্স পুন অপটিপূরণং ৰিয অরহত্তমগ্গেন ছিন্নানং কিলেসানং পুন অনুপ্পাদো দট্ঠব্বো. অযং ৰুচ্চতীতি অযং এৰরূপো পুগ্গলো ৰজিরূপমচিত্তোতি ৰুচ্চতি. কিলেসানং মূলঘাতকরণসমত্থতায ৰজিরেন সদিসচিত্তোতি অত্থো.

১০৪. অন্ধাদীসু তথারূপং চক্খু ন হোতীতি তথাজাতিকং তথাসভাৰং পঞ্ঞাচক্খু ন হোতি. ফাতিং করেয্যাতি ফীতং ৰড্ঢিতং করেয্য. সাৰজ্জানৰজ্জেতি সদোসনিদ্দোসে. হীনপ্পণীতেতি অধমুত্তমে. কণ্হসুক্কসপ্পটিভাগেতি কণ্হসুক্কাযেৰ অঞ্ঞমঞ্ঞপটিবাহনতো পটিপক্খৰসেন সপ্পটিভাগাতি ৰুচ্চন্তি. অযং পনেত্থ সঙ্খেপো – কুসলে ধম্মে ‘কুসলা ধম্মা’তি যেন পঞ্ঞাচক্খুনা জানেয্য, অকুসলে ধম্মে ‘অকুসলা ধম্মা’তি, সাৰজ্জাদীসুপি এসেৰ নযো. কণ্হসুক্কসপ্পটিভাগেসু পন কণ্হধম্মে ‘সুক্কসুপ্পটিভাগা’তি, সুক্কধম্মে ‘কণ্হসপ্পটিভাগা’তি যেন পঞ্ঞাচক্খুনা জানেয্য. তথারূপম্পিস্স চক্খু ন হোতীতি ইমিনা নযেন সেসট্ঠানেসুপি অত্থো ৰেদিতব্বো. অযং ৰুচ্চতীতি অযং এৰরূপো পুগ্গলো দিট্ঠধম্মিকভোগসংহরণপঞ্ঞাচক্খুনো চ সম্পরাযিকত্থসোধনপঞ্ঞাচক্খুনো চ অভাৰা অন্ধোতি ৰুচ্চতি. দুতিযো দিট্ঠধম্মিকভোগসংহরণপঞ্ঞাচক্খুনো ভাৰা, সম্পরাযিকত্থসোধনপঞ্ঞাচক্খুনো পন অভাৰা একচক্খূতি ৰুচ্চতি. ততিযো দ্ৰিন্নম্পি ভাৰা দ্ৰিচক্খূতি ৰুচ্চতি.

১০৭. অৰকুজ্জপঞ্ঞাদীসু ধম্মং দেসেন্তীতি উপাসকো ধম্মস্সৰনত্থায আগতোতি অত্তনো কম্মং পহায ধম্মং দেসেন্তি. আদিকল্যাণন্তি আদিম্হি কল্যাণং ভদ্দকং অনৰজ্জং নিদ্দোসং কত্ৰা দেসেন্তি. সেসপদেসুপি এসেৰ নযো. এত্থ পন আদীতি পুব্বপট্ঠপনা. মজ্ঝন্তি কথাৰেমজ্ঝং. পরিযোসানন্তি সন্নিট্ঠানং. ইতিস্স ধম্মং কথেন্তা পুব্বপট্ঠপনেপি কল্যাণং ভদ্দকং অনৰজ্জমেৰ কত্ৰা কথেন্তি, ৰেমজ্ঝেপি, পরিযোসানেপি. এত্থ চ অত্থি দেসনায আদিমজ্ঝপরিযোসানানি, অত্থি সাসনস্স. তত্থ দেসনায তাৰ – চতুপ্পদিকগাথায পঠমপদং আদি, দ্ৰে পদানি মজ্ঝং, অৰসানপদং পরিযোসানং. একানুসন্ধিকসুত্তস্স – নিদানং আদি, অনুসন্ধি মজ্ঝং, ইদমৰোচাতি অপ্পনা পরিযোসানং. অনেকানুসন্ধিকস্স – পঠমো অনুসন্ধি আদি, ততো পরং একো ৰা অনেকা ৰা মজ্ঝং, পচ্ছিমো পরিযোসানং. অযং তাৰ দেসনায নযো.

সাসনস্স পন সীলং আদি, সমাধি মজ্ঝং, ৰিপস্সনা পরিযোসানং. সমাধি ৰা আদি, ৰিপস্সনা মজ্ঝং, মগ্গো পরিযোসানং. ৰিপস্সনা ৰা আদি, মগ্গো মজ্ঝং, ফলং পরিযোসানং. মগ্গো ৰা আদি, ফলং মজ্ঝং, নিব্বানং পরিযোসানং. দ্ৰে দ্ৰে ৰা করিযমানে সীলসমাধযো আদি, ৰিপস্সনামগ্গা মজ্ঝং, ফলনিব্বানানি পরিযোসানং. সাত্থন্তি সাত্থকং কত্ৰা দেসেন্তি. সব্যঞ্জনন্তি অক্খরপারিপূরিং কত্ৰা দেসেন্তি. কেৰলপরিপুণ্ণন্তি সকলপরিপুণ্ণং অনূনং কত্ৰা দেসেন্তি. পরিসুদ্ধন্তি পরিসুদ্ধং নিজ্জটং নিগ্গণ্ঠিং কত্ৰা দেসেন্তি. ব্রহ্মচরিযং পকাসেন্তীতি এৰং দেসেন্তা চ সেট্ঠচরিযভূতং সিক্খত্তযসঙ্গহিতং অরিযং অট্ঠঙ্গিকং মগ্গং পকাসেন্তি. নেৰ আদিং মনসি করোতীতি নেৰ পুব্বপট্ঠপনং মনসি করোতি. কুম্ভোতি ঘটো. নিক্কুজ্জোতি অধোমুখো ঠপিতো. এৰমেৰন্তি এত্থ কুম্ভো নিক্কুজ্জো ৰিয অৰকুজ্জপঞ্ঞো পুগ্গলো দট্ঠব্বো. উদকাসিঞ্চনকালো ৰিয ধম্মদেসনায লদ্ধকালো. উদকস্স ৰিৰট্টনকালো ৰিয তস্মিং আসনে নিসিন্নস্স উগ্গহেতুং অসমত্থকালো. উদকস্স অসণ্ঠানকালো ৰিয উট্ঠহিত্ৰা অসল্লক্খণকালো ৰেদিতব্বো. অযং ৰুচ্চতীতি অযং এৰরূপো পুগ্গলো অৰকুজ্জপঞ্ঞোতি ৰুচ্চতি. অধোমুখপঞ্ঞোতি অত্থো.

১০৮. আকিণ্ণানীতি পক্খিত্তানি. সতিসম্মোসা পকিরেয্যাতি মুট্ঠস্সতিতায ৰিকিরেয্য. এৰমেৰন্তি এত্থ উচ্ছঙ্গো ৰিয উচ্ছঙ্গপঞ্ঞো পুগ্গলো দট্ঠব্বো. নানাখজ্জকানি ৰিয নানপ্পকারং বুদ্ধৰচনং. উচ্ছঙ্গে নানাখজ্জকানি খাদন্তস্স নিসিন্নকালো ৰিয তস্মিং আসনে নিসিন্নস্স উগ্গহণকালো. ৰুট্ঠহন্তস্স সতিসম্মোসা ৰিকিরণকালো ৰিয তস্মা আসনা ৰুট্ঠায গচ্ছন্তস্স অসল্লক্খণকালো ৰেদিতব্বো. অযং ৰুচ্চতীতি অযং এৰরূপো পুগ্গলো উচ্ছঙ্গপঞ্ঞোতি ৰুচ্চতি. উচ্ছঙ্গসদিসপঞ্ঞোতি অত্থো.

১০৯. উক্কুজ্জোতি উপরিমুখো ঠপিতো. সণ্ঠাতীতি পতিট্ঠহতি. এৰমেৰ খোতি এত্থ উপরিমুখো ঠপিতো কুম্ভো ৰিয পুথুপঞ্ঞো পুগ্গলো দট্ঠব্বো. উদকস্স আসিত্তকালো ৰিয দেসনায লদ্ধকালো. উদকস্স সণ্ঠানকালো ৰিয তত্থ নিসিন্নস্স উগ্গহণকালো. নো ৰিৰট্টনকালো ৰিয উট্ঠায গচ্ছন্তস্স সল্লক্খণকালো ৰেদিতব্বো. অযং ৰুচ্চতীতি অযং এৰরূপো পুগ্গলো পুথুপঞ্ঞোতি ৰুচ্চতি. ৰিত্থারিকপঞ্ঞোতি অত্থো.

১১০. অৰীতরাগাদীসু – যথা সোতাপন্নসকদাগামিনো, এৰং পুথুজ্জনোপি পঞ্চসু কামগুণেসু, তীসু চ ভৰেসু অৰীতরাগো. অদব্বতায পন ন গহিতো. যথা হি ছেকো ৰড্ঢকী দব্বসম্ভারত্থং ৰনং পৰিট্ঠো ন আদিতো পট্ঠায সম্পত্তসম্পত্তরুক্খে ছিন্দতি, যে পনস্স দব্বসম্ভারূপগা হোন্তি, তেযেৰ ছিন্দতি; এৰমিধাপি ভগৰতা দব্বজাতিকা অরিযাৰ গহিতা, পুথুজ্জনা পন অদব্বতায ন গহিতাতি ৰেদিতব্বা. কামেসু ৰীতরাগোতি পঞ্চসু কামগুণেসু ৰীতরাগো. ভৰেসু অৰীতরাগোতি রূপারূপভৰেসু অৰীতরাগো.

১১৩. পাসাণলেখূপমাদীসু – অনুসেতীতি অপ্পহীনতায অনুসেতি. ন খিপ্পং লুজ্জতীতি ন অন্তরা নস্সতি, কপ্পুট্ঠানেনেৰ নস্সতি. এৰমেৰন্তি এৰং তস্সাপি পুগ্গলস্স কোধো ন অন্তরা পুনদিৰসে ৰা অপরদিৰসে ৰা নিব্বাতি, অদ্ধনিযো পন হোতি. মরণেনেৰ নিব্বাতীতি অত্থো. অযং ৰুচ্চতীতি অযং এৰরূপো পুগ্গলো পাসাণলেখা ৰিয কুজ্ঝনভাৰেন চিরট্ঠিতিকতো পাসাণলেখূপমোতি ৰুচ্চতি.

১১৪. সো চ খ্ৰস্স কোধোতি সো অপ্পমত্তকেপি কারণে সহসা কুদ্ধস্স কোধো. ন চিরন্তি অচিরং অপ্পহীনতায নানুসেতি. যথা পন পথৰিযং আকড্ঢিত্ৰা কতলেখা ৰাতাদীহি খিপ্পং নস্সতি, এৰমস্স সহসা উপ্পন্নোপি কোধো খিপ্পমেৰ নিব্বাতীতি অত্থো. অযং ৰুচ্চতীতি অযং এৰরূপো পুগ্গলো পথৰিযং লেখা ৰিয কুজ্ঝনভাৰেন অচিরট্ঠিতিকতো পথৰীলেখূপমোতি ৰুচ্চতি.

১১৫. আগাল়্হেনাতি অতিগাল়্হেন মম্মচ্ছেদকেন থদ্ধৰচনেন. ফরুসেনাতি ন সোতসুখেন. অমনাপেনাতি ন চিত্তসুখেন. সংসন্দতীতি একীভৰতি. সন্ধিযতীতি ঘটযতি. সম্মোদতীতি নিরন্তরো হোতি. অথ ৰা – সংসন্দতীতি চিত্তকিরিযাদীসু চিত্তেন সমোধানং গচ্ছতি. খীরোদকং ৰিয একীভাৰং উপেতীতি অত্থো. সন্ধিযতীতি ঠানগমনাদীসু কাযকিরিযাদীসু কাযেন সমোধানং গচ্ছতি. তিলতণ্ডুলা ৰিয মিস্সীভাৰং উপেতীতি অত্থো. সম্মোদতীতি উদ্দেসপরিপুচ্ছাদীসু ৰচীকিরিযাসু ৰাচায সমোধানং গচ্ছতি. ৰিপ্পৰাসগতোপি পিযসহাযকো ৰিয পিযতরভাৰং উপেতীতি অত্থো. অপিচ – কিচ্চকরণীযেসু তেহি সদ্ধিং আদিতোৰ এককিরিযভাৰং উপগচ্ছন্তো সংসন্দতি. যাৰ মজ্ঝা পৰত্তন্তো সন্ধিযতি, যাৰ পরিযোসানা অনিৰত্তন্তো সম্মোদতীতিপি ৰেদিতব্বো. অযং ৰুচ্চতীতি অযং এৰরূপো পুগ্গলো উদকলেখা ৰিয খিপ্পং সংসন্দনতো উদকলেখূপমোতি ৰুচ্চতি.

১১৬. পোত্থকূপমেসু – যায উপমায তে পোত্থকূপমাতি ৰুচ্চন্তি, তং তাৰ উপমং দস্সেতুং তযো পোত্থকাতিআদি ৰুত্তং. তত্থ নৰোতি নৰৰাযিমো. পোত্থকোতি সাণৰাকসাটকো. দুব্বণ্ণোতি ৰিৰণ্ণো. দুক্খসম্ফস্সোতি খরসম্ফস্সো. অপ্পগ্ঘোতি অতিবহুং অগ্ঘন্তো কহাপণগ্ঘনকো হোতি. মজ্ঝিমোতি পরিভোগমজ্ঝিমো. সো হি নৰভাৰং অতিক্কমিত্ৰা জিণ্ণভাৰং অপ্পত্তো মজ্ঝে পরিভোগকালেপি দুব্বণ্ণো চ দুক্খসম্ফস্সো চ অপ্পগ্ঘোযেৰ চ হোতি. অতিবহুং অগ্ঘন্তো অড্ঢং অগ্ঘতি. জিণ্ণকালে পন অড্ঢমাসকং ৰা কাকণিকং ৰা অগ্ঘতি. উক্খলিপরিমজ্জনন্তি কাল়ুক্খলিপরিপুঞ্ছনং.

নৰোতি উপসম্পদায পঞ্চৰস্সকালতো হেট্ঠা জাতিযা সট্ঠিৰস্সোপি নৰোযেৰ. দুব্বণ্ণতাযাতি সরীরৰণ্ণেনপি গুণৰণ্ণেনপি দুব্বণ্ণতায. দুস্সীলস্স হি পরিসমজ্ঝে নিসিন্নস্স নিত্তেজতায সরীরৰণ্ণোপি ন সম্পজ্জতি, গুণৰণ্ণে ৰত্তব্বমেৰ নত্থি. যে খো পনস্সাতি যে খো পন তস্স উপট্ঠাকা ৰা ঞাতিমিত্তাদযো ৰা এতং পুগ্গলং সেৰন্তি. তেসং তন্তি তেসং পুগ্গলানং ছ সত্থারে সেৰন্তানং মিচ্ছাদিট্ঠিকানং ৰিয, দেৰদত্তং সেৰন্তানং কোকালিকাদীনং ৰিয চ তং সেৰনং দীঘরত্তং অহিতায দুক্খায হোতি. মজ্ঝিমোতি পঞ্চৰস্সকালতো পট্ঠায যাৰ নৰৰস্সকালা মজ্ঝিমো নাম. থেরোতি দসৰস্সকালতো পট্ঠায থেরো নাম. এৰমাহংসূতি এৰং ৰদন্তি. কিং নু খো তুয্হন্তি তুয্হং বালস্স ভণিতেন কো অত্থোতি ৰুত্তং হোতি. তথারূপন্তি তথাজাতিকং তথাসভাৰং উক্খেপনীযকম্মস্স কারণভূতং.

১১৭. কাসিকৰত্থূপমেসু – কাসিকৰত্থং নাম তযো কপ্পাসংসূ গহেত্ৰা কন্তিতসুত্তেন ৰাযিতং সুখুমৰত্থং. তং নৰৰাযিমং অনগ্ঘং হোতি. পরিভোগমজ্ঝিমং ৰীসম্পি তিংসম্পি সহস্সানি অগ্ঘতি. জিণ্ণকালে পন অট্ঠপি দসপি সহস্সানি অগ্ঘতি.

তেসং তং হোতীতি তেসং সম্মাসম্বুদ্ধাদযো সেৰন্তানং ৰিয তং সেৰনং দীঘরত্তং হিতায সুখায হোতি. সম্মাসম্বুদ্ধঞ্হি একং নিস্সায যাৰজ্জকালা মুচ্চনকসত্তানং পমাণং নত্থি. তথা সারিপুত্তত্থেরমহামোগ্গল্লানত্থেরে অৰসেসে চ অসীতিমহাসাৰকে নিস্সায সগ্গং গতসত্তানং পমাণং নত্থি. যাৰজ্জকালা তেসং দিট্ঠানুগতিং পটিপন্নসত্তানম্পি পমাণং নত্থিযেৰ. আধেয্যং গচ্ছতীতি তস্স মহাথেরস্স তং অত্থনিস্সিতং ৰচনং যথা গন্ধকরণ্ডকে কাসিকৰত্থং আধাতব্বতং ঠপেতব্বতং গচ্ছতি, এৰং উত্তমঙ্গে সিরস্মিং হদযে চ আধাতব্বতং ঠপেতব্বতম্পি গচ্ছতি. সেসমেত্থ হেট্ঠা ৰুত্তানুসারেনেৰ ৰেদিতব্বং.

১১৮. সুপ্পমেয্যাদীসু – সুখেন পমেতব্বোতি সুপ্পমেয্যো. ইধাতি ইমস্মিং সত্তলোকে. উদ্ধতোতি উদ্ধচ্চেন সমন্নাগতো. উন্নল়োতি উগ্গতনল়ো; তুচ্ছমানং উক্খিপিত্ৰা ঠিতোতি অত্থো. চপলোতি পত্তমণ্ডনাদিনা চাপল্লেন সমন্নাগতো. মুখরোতি মুখখরো. ৰিকিণ্ণৰাচোতি অসংযতৰচনো. অসমাহিতোতি চিত্তেকগ্গতারহিতো. ৰিব্ভন্তচিত্তোতি ভন্তচিত্তো, ভন্তগাৰীভন্তমিগীসপ্পটিভাগো. পাকটিন্দ্রিযোতি ৰিৰটিন্দ্রিযো. অযং ৰুচ্চতীতি অযং এৰরূপো পুগ্গলো ‘সুপ্পমেয্যো’তি ৰুচ্চতি. যথা হি পরিত্তস্স উদকস্স সুখেন পমাণং গয্হতি; এৰমেৰ ইমেহি অগুণঙ্গেহি সমন্নাগতস্স সুখেন পমাণং গয্হতি. তেনেস ‘সুপ্পমেয্যো’তি ৰুত্তো.

১১৯. দুক্খেন পমেতব্বোতি দুপ্পমেয্যো. অনুদ্ধতাদীনি ৰুত্তপটিপক্খৰসেন ৰেদিতব্বানি. অযং ৰুচ্চতীতি অযং এৰরূপো পুগ্গলো ‘দুপ্পমেয্যো’তি ৰুচ্চতি. যথা হি মহাসমুদ্দস্স দুক্খেন পমাণং গয্হতি; এৰমেৰ ইমেহি গুণঙ্গেহি সমন্নাগতস্স দুক্খেন পমাণং গয্হতি. তাদিসো ‘অনাগামী নু খো, খীণাসৰো নু খো’তি ৰত্তব্বতং গচ্ছতি, তেনেস ‘দুপ্পমেয্যো’তি ৰুত্তো.

১২০. ন সক্কা পমেতুন্তি অপ্পমেয্যো. যথা হি আকাসস্স ন সক্কা পমাণং গহেতুং, এৰং খীণাসৰস্স. তেনেস ‘অপ্পমেয্যো’তি ৰুত্তো.

১২১. ন সেৰিতব্বাদীসু – ন সেৰিতব্বোতি ন উপসঙ্কমিতব্বো. ন ভজিতব্বোতি ন অল্লীযিতব্বো. ন পযিরুপাসিতব্বোতি ন সন্তিকে নিসীদনৰসেন পুনপ্পুনং উপাসিতব্বো. হীনো হোতি সীলেনাতিআদীসু উপাদাযুপাদায হীনতা ৰেদিতব্বা. যো হি পঞ্চ সীলানি রক্খতি, সো দস সীলানি রক্খন্তেন ন সেৰিতব্বো. যো পন দস সীলানি রক্খতি, সো চতুপারিসুদ্ধিসীলং রক্খন্তেন ন সেৰিতব্বো. অঞ্ঞত্র অনুদ্দযা অঞ্ঞত্র অনুকম্পাতি ঠপেত্ৰা অনুদ্দযঞ্চ অনুকম্পঞ্চ. অত্তনো অত্থায এৰ হি এৰরূপো পুগ্গলো ন সেৰিতব্বো. অনুদ্দযানুকম্পাৰসেন পন তং উপসঙ্কমিতুং ৰট্টতি.

১২২. সদিসো হোতীতি সমানো হোতি. সীলসামঞ্ঞগতানং সতন্তি সীলেন সমানভাৰং গতানং সন্তানং. সীলকথা চ নো ভৰিস্সতীতি এৰং সমানসীলানং অম্হাকং সীলমেৰ আরব্ভ কথা ভৰিস্সতি. সা চ নো ফাসু ভৰিস্সতীতি সা চ সীলকথা অম্হাকং ফাসুৰিহারো সুখৰিহারো ভৰিস্সতি. সা চ নো পৰত্তিনী ভৰিস্সতীতি সা চ অম্হাকং কথা দিৰসম্পি কথেন্তানং পৰত্তিনী ভৰিস্সতি, ন পটিহঞ্ঞিস্সতি. দ্ৰীসু হি সীলৰন্তেসু একেন সীলস্স ৰণ্ণে কথিতে ইতরো অনুমোদতি; তেন তেসং কথা ফাসু চেৰ হোতি, পৰত্তিনী চ. একস্মিং পন দুস্সীলে সতি দুস্সীলস্স সীলকথা দুক্কথাতি নেৰ সীলকথা হোতি, ন ফাসু হোতি, ন পৰত্তিনী. সমাধিপঞ্ঞাকথাসুপি এসেৰ নযো. দ্ৰে হি সমাধিলাভিনো সমাধিকথং, সপ্পঞ্ঞা চ পঞ্ঞাকথং কথেন্তা, রত্তিং ৰা দিৰসং ৰা অতিক্কন্তম্পি ন জানন্তি.

১২৩. সক্কত্ৰা গরুং কত্ৰাতি সক্কারঞ্চেৰ গরুকারঞ্চ করিত্ৰা. অধিকো হোতীতি অতিরেকো হোতি. সীলক্খন্ধন্তি সীলরাসিং. পরিপূরেস্সামীতি তং অতিরেকসীলং পুগ্গলং নিস্সায অত্তনো অপরিপূরং সীলরাসিং পরিপূরং করিস্সামি. তত্থ তত্থ পঞ্ঞায অনুগ্গহেস্সামীতি এত্থ সীলস্স অসপ্পাযে অনুপকারধম্মে ৰজ্জেত্ৰা সপ্পাযে উপকারধম্মে সেৰন্তো তস্মিং তস্মিং ঠানে সীলক্খন্ধং পঞ্ঞায অনুগ্গণ্হাতি নাম. সমাধিপঞ্ঞাক্খন্ধেসুপি এসেৰ নযো.

১২৪. জিগুচ্ছিতব্বাদীসু – জিগুচ্ছিতব্বোতি গূথং ৰিয জিগুচ্ছিতব্বো. অথ খো নন্তি অথ খো অস্স. কিত্তিসদ্দোতি কথাসদ্দো. এৰমেৰন্তি এত্থ গূথকূপো ৰিয দুস্সীল্যং দট্ঠব্বং. গূথকূপে পতিত্ৰা ঠিতো ধমনীঅহি ৰিয দুস্সীলপুগ্গলো. গুথকূপতো উদ্ধরিযমানেন তেন অহিনা পুরিসস্স সরীরং আরুল়্হেনাপি অদট্ঠভাৰো ৰিয দুস্সীলং সেৰমানস্সাপি তস্স কিরিযায কারণভাৰো সরীরং গূথেন মক্খেত্ৰা অহিনো গতকালো ৰিয দুস্সীলং সেৰমানস্স পাপকিত্তিসদ্দস্স অব্ভুগ্গমনকালো ৰেদিতব্বো.

১২৫. তিন্দুকালাতন্তি তিন্দুকরুক্খঅলাতং. ভিয্যোসো মত্তায চিচ্চিটাযতীতি তঞ্হি ঝাযমানং পকতিযাপি পপটিকাযো মুঞ্চন্তং চিচ্চিটাযতি চিটিচিটাতি সদ্দং করোতি. ঘট্টিতং পন অধিমত্তং করোতীতি অত্থো. এৰমেৰন্তি এৰমেৰং কোধনো অত্তনো ধম্মতাযপি উদ্ধতো চণ্ডিকতো হুত্ৰা চরতি. অপ্পমত্তকং পন ৰচনং ৰুত্তকালে ‘মাদিসং নাম এৰং ৰদতী’তি অতিরেকতরং উদ্ধতো চণ্ডিকতো হুত্ৰা চরতি. গূথকূপোতি গূথপুণ্ণকূপো, গূথরাসিযেৰ ৰা. ওপম্মসংসন্দনং পনেত্থ পুরিমনযেনেৰ ৰেদিতব্বং. তস্মা এৰরূপো পুগ্গলো অজ্ঝুপেক্খিতব্বো, ন সেৰিতব্বোতি যস্মা কোধনো অতিসেৰিযমানোপি অতিউপসঙ্কমিযমানোপি কুজ্ঝতিযেৰ, ‘কিং ইমিনা’তি পটিক্কমন্তোপি কুজ্ঝতিযেৰ, তস্মা পলালগ্গি ৰিয অজ্ঝুপেক্খিতব্বো, ন সেৰিতব্বো. কিং ৰুত্তং হোতি? যো হি পলালগ্গিং অতিউপসঙ্কমিত্ৰা তপ্পতি, তস্স সরীরং ঝাযতি. যো অতিপটিক্কমিত্ৰা তপ্পতি, তস্স সীতং ন ৰূপসম্মতি. অনুপসঙ্কমিত্ৰা অপটিক্কমিত্ৰা পন মজ্ঝত্তভাৰেন তপ্পেন্তস্স সীতং ৰূপসম্মতি, কাযোপি ন ডয্হতি. তস্মা পলালগ্গি ৰিয কোধনো পুগ্গলো মজ্ঝত্তভাৰেন অজ্ঝুপেক্খিতব্বো, ন সেৰিতব্বো, ন ভজিতব্বো, ন পযিরুপাসিতব্বো.

১২৬. কল্যাণমিত্তোতি সুচিমিত্তো. কল্যাণসহাযোতি সুচিসহাযো. সহাযোতি সহগামী সদ্ধিংচরো. কল্যাণসম্পৰঙ্কোতি কল্যাণেসু সুচিপুগ্গলেসু সম্পৰঙ্কো, তন্নিন্নতপ্পোণতপ্পব্ভারমানসোতি অত্থো.

১২৭. সীলেসু পরিপূরকারীতিআদীসু – সীলেসু পরিপূরকারিনোতি এতে অরিযসাৰকা যানি তানি মগ্গব্রহ্মচরিযস্স আদিভূতানি, আদিব্রহ্মচরিযকানি, পারাজিকসঙ্খাতানি চত্তারি মহাসীলসিক্খাপদানি, তেসং অৰীতিক্কমনতো যানি খুদ্দানুখুদ্দকানি আপজ্জন্তি, তেহি চ ৰুট্ঠানতো সীলেসু যং কত্তব্বং, তং পরিপূরং সমত্তং করোন্তীতি ‘সীলেসু পরিপূরকারিনো’তি ৰুচ্চন্তি. সমাধিপারিবন্ধকানং পন কামরাগব্যাপাদানং, পঞ্ঞাপারিবন্ধকস্স চ সচ্চপটিচ্ছাদকস্স মোহস্স অসমূহতত্তা, সমাধিং পঞ্ঞঞ্চ ভাৰেন্তাপি সমাধিপঞ্ঞাসু যং কত্তব্বং তং মত্তসো পমাণেন পদেসমত্তমেৰ করোন্তীতি সমাধিস্মিং পঞ্ঞায চ মত্তসো কারিনোতি ৰুচ্চন্তি. ইমিনা উপাযেন ইতরেসুপি দ্ৰীসু নযেসু অত্থো ৰেদিতব্বো.

তত্রাযং অপরোপি সুত্তন্তনযো –

‘‘ইধ, ভিক্খৰে, ভিক্খু সীলেসু পরিপূরকারী হোতি, সমাধিস্মিং মত্তসো কারী, পঞ্ঞায মত্তসো কারী. সো যানি তানি খুদ্দানুখুদ্দকানি সিক্খাপদানি তানি আপজ্জতিপি, ৰুট্ঠাতিপি. তং কিস্স হেতু? ন হি মেত্থ, ভিক্খৰে, অভব্বতা ৰুত্তা. যানি চ খো তানি সিক্খাপদানি আদিব্রহ্মচরিযকানি ব্রহ্মচরিযসারুপ্পানি, তত্থ ধুৰসীলো চ হোতি, ঠিতসীলো চ, সমাদায সিক্খতি সিক্খাপদেসু. সো তিণ্ণং সংযোজনানং পরিক্খযা সোতাপন্নো হোতি, অৰিনিপাতধম্মো নিযতো সম্বোধিপরাযণো. ইধ পন, ভিক্খৰে, ভিক্খু সীলেসু…পে… সো তিণ্ণং সংযোজনানং পরিক্খযা, রাগদোসমোহানং তনুত্তা, সকদাগামী হোতি; সকিদেৰ ইমং লোকং আগন্ত্ৰা দুক্খস্সন্তং করোতি. ইধ পন, ভিক্খৰে, ভিক্খু সীলেসু পরিপূরকারী হোতি, সমাধিস্মিং পরিপূরকারী, পঞ্ঞায মত্তসো কারী. সো যানি তানি…পে… সিক্খতি সিক্খাপদেসু. সো পঞ্চন্নং ওরম্ভাগিযানং…পে… অনাৰত্তিধম্মো তস্মা লোকা. ইধ পন, ভিক্খৰে, ভিক্খু সীলেসু পরিপূরকারী, সমাধিস্মিং পরিপূরকারী, পঞ্ঞায পরিপূরকারী. সো যানি তানি খুদ্দানুখুদ্দকানি…পে… সিক্খতি সিক্খাপদেসু. সো আসৰানং খযা…পে… উপসম্পজ্জ ৰিহরতী’’তি (অ. নি. ৩.৮৭).

১৩০. সত্থারনিদ্দেসে – পরিঞ্ঞং পঞ্ঞপেতীতি পহানং সমতিক্কমং পঞ্ঞপেতি. তত্রাতি তেসু তীসু জনেসু. তেন দট্ঠব্বোতি তেন পঞ্ঞাপনেন সো সত্থা রূপাৰচরসমাপত্তিযা লাভীতি দট্ঠব্বোতি অত্থো. দুতিযৰারেপি এসেৰ নযো. সম্মাসম্বুদ্ধো সত্থা তেন দট্ঠব্বোতি তেন তিত্থিযেহি অসাধারণেন পঞ্ঞাপনেন অযং ততিযো সত্থা সব্বঞ্ঞুবুদ্ধো দট্ঠব্বো. তিত্থিযা হি কামানং পরিঞ্ঞং পঞ্ঞপেন্তা রূপভৰং ৰক্খন্তি. রূপানং পরিঞ্ঞং পঞ্ঞপেন্তা অরূপভৰং ৰক্খন্তি. ৰেদনানং পরিঞ্ঞং পঞ্ঞপেন্তা অসঞ্ঞভৰং ৰক্খন্তি. সম্মা পঞ্ঞপেন্তা ‘এৰং পঞ্ঞপেয্যুং’, নো চ সম্মা পঞ্ঞপেতুং সক্কোন্তি. সম্মাসম্বুদ্ধো পন কামানং পরিঞ্ঞং পহানং অনাগামিমগ্গেন পঞ্ঞপেতি. রূপৰেদনানং পরিঞ্ঞং পহানং অরহত্তমগ্গেন পঞ্ঞপেতি. ইমে তযো সত্থারোতি ইমে দ্ৰে জনা বাহিরকা, একো সম্মাসম্বুদ্ধোতি – ইমস্মিং লোকে তযো সত্থারো নাম.

১৩১. দুতিযে সত্থারনিদ্দেসে – দিট্ঠে চেৰ ধম্মেতি ইমস্মিং অত্তভাৰে. অত্তানং সচ্চতো থেততো পঞ্ঞপেতীতি ‘‘অত্তা নামেকো অত্থি নিচ্চো ধুৰো সস্সতো’’তি ভূততো থিরতো পঞ্ঞপেতি. অভিসম্পরাযঞ্চাতি অপরস্মিং অত্তভাৰে এৰমেৰ পঞ্ঞপেতি. সেসমেত্থ ৰুত্তনযেনেৰ ৰেদিতব্বন্তি.

তিকনিদ্দেসৰণ্ণনা.