২. দুকনিদ্দেসৰণ্ণনা

৪৫. দুকনিদ্দেসে কোধনোতি কুজ্ঝনসীলো মহাকোধো. এৰং পুগ্গলং পুচ্ছিত্ৰাপি ধম্মেন পুগ্গলং দস্সেতুং তত্থ কতমো কোধোতিআদিমাহ. উপনাহীনিদ্দেসাদীসুপি এসেৰ নযো. কোধো কুজ্ঝনাতিআদীনি হেট্ঠা ৰুত্তত্থানেৰ. তথা উপনাহীনিদ্দেসাদীসু পুব্বকালং কোধোতিআদীনি. অযং কোধো অপ্পহীনোতি অযং এত্তকো কোধো ৰিক্খম্ভনপ্পহানেন ৰা তদঙ্গপ্পহানেন ৰা সমুচ্ছেদপ্পহানেন ৰা অপ্পহীনো. পরতো উপনাহাদীসুপি এসেৰ নযো.

৫৩. অহিরিকনিদ্দেসাদীসু – ইমিনা অহিরিকেনাতি ইমিনা এৰংপকারেন অহিরিকধম্মেন সমন্নাগতো. ইমিনা অনোত্তপ্পেনাতিআদীসুপি এসেৰ নযো.

৬৩. অজ্ঝত্তসংযোজনোতি অজ্ঝত্তবন্ধনো. বহিদ্ধাসংযোজনোতি বহিদ্ধাবন্ধনো. তে উভোপি ৰচ্ছকসালূপমায দীপেতব্বা. ৰচ্ছকসালায হি অন্তো বদ্ধো অন্তোযেৰ সযিতৰচ্ছকো ৰিয ইধট্ঠকসোতাপন্নসকদাগামিনো. তেসঞ্হি বন্ধনম্পি ইধেৰ, সযম্পি ইধেৰ. অন্তো বদ্ধো পন বহি সযিতৰচ্ছকো ৰিয রূপারূপভৰে সোতাপন্নসকদাগামিনো. তেসঞ্হি বন্ধনমেৰ ইধ, সযং পন ব্রহ্মলোকে ঠিতা. বহি বদ্ধো বহি সযিতৰচ্ছকো ৰিয রূপারূপভৰে অনাগামী. তস্স হি বন্ধনম্পি বহিদ্ধা, সযম্পি বহিদ্ধাৰ. বহি বদ্ধো পন অন্তোসযিতৰচ্ছকো ৰিয ইধট্ঠকঅনাগামী. তস্স হি বন্ধনং রূপারূপভৰেসু, সযং পন ইধ ঠিতো.

৬৫. অক্কোধননিদ্দেসাদীসু – পহীনোতি ৰিক্খম্ভনপ্পহানেন ৰা, তদঙ্গপ্পহানেন ৰা, সমুচ্ছেদপ্পহানেন ৰা পহীনো.

৮৩. দুল্লভনিদ্দেসে – দুল্লভাতি ন সুলভা. পুব্বকারীতি পঠমমেৰ কারকো. কতৰেদীতি কতং ৰেদেতি, ৰিদিতং পাকটং করোতি. তে অগারিযানগারিযেহি দীপেতব্বা. অগারিযেসু হি মাতাপিতরো পুব্বকারিনো নাম. পুত্তধীতরো পন মাতাপিতরো পটিজগ্গন্তা অভিৰাদনাদীনি তেসং কুরুমানা কতৰেদিনো নাম. অনগারিযেসু আচরিযুপজ্ঝাযা পুব্বকারিনো নাম. অন্তেৰাসিকসদ্ধিৰিহারিকা আচরিযুপজ্ঝাযে পটিজগ্গন্তা অভিৰাদনাদীনি তেসং কুরুমানা কতৰেদিনো নাম. তেসং আৰিভাৰত্থায উপজ্ঝাযপোসকসোণত্থেরাদীনং ৰত্থূনি কথেতব্বানি.

অপরো নযো – পরেন অকতেযেৰ উপকারে অত্তনি কতং উপকারং অনপেক্খিত্ৰা কারকো পুব্বকারী, সেয্যথাপি মাতাপিতরো চেৰ আচরিযুপজ্ঝাযা চ. সো দুল্লভো; সত্তানং তণ্হাভিভূতত্তা. পরেন কতস্স উপকারস্স অনুরূপপ্পৰত্তিং অত্তনি কতং উপকারং উপকারতো জানন্তো, ৰেদিযন্তো, কতঞ্ঞুকতৰেদী. সেয্যথাপি মাতাপিতুআচরিযুপজ্ঝাযেসু সম্মা পটিপন্নো. সোপি দুল্লভো; সত্তানং অৰিজ্জাভিভূতত্তা.

অপিচ – অকারণৰচ্ছলো পুব্বকারী, সকারণৰচ্ছলো কতঞ্ঞুকতৰেদী. ‘করিস্সতি মে’তি এৰমাদিকারণনিরপেক্খকিরিযো পুব্বকারী. ‘করিস্সতি মে’তি এৰমাদিকারণসাপেক্খকিরিযো কতঞ্ঞুকতৰেদী. তমোজোতিপরাযণো পুব্বকারী, জোতিজোতিপরাযণো কতঞ্ঞুকতৰেদী. দেসেতা পুব্বকারী, পটিপজ্জিতা কতঞ্ঞুকতৰেদী. সদেৰকে লোকে অরহং সম্মাসম্বুদ্ধো পুব্বকারী, অরিযসাৰকো কতঞ্ঞুকতৰেদীতি. দুকনিপাতট্ঠকথাযং (অ. নি. অট্ঠ. ২.২.১২০) পন – ‘‘‘পুব্বকারী’তি পঠমং উপকারস্স কারকো, ‘কতঞ্ঞুকতৰেদী’তি তেন কতং ঞত্ৰা পচ্ছা কারকো. তেসু পুব্বকারী ইণং দেমীতি সঞ্ঞং করোতি, পচ্ছাকারকো ‘ইণং জীরাপেমী’তি সঞ্ঞং করোতী’’তি এত্তকমেৰ ৰুত্তং.

৮৪. দুত্তপ্পযনিদ্দেসে – দুত্তপ্পযাতি অতপ্পযা, ন সক্কা কেনচি তপ্পেতুং. যো হি উপট্ঠাককুলং ৰা ঞাতিকুলং ৰা নিস্সায ৰসমানো চীৰরে জিণ্ণে তেহি দিন্নং চীৰরং নিক্খিপতি, ন পরিভুঞ্জতি. পুনপ্পুনং দিন্নম্পি গহেত্ৰা নিক্খিপতেৰ. যো চ তেনেৰ নযেন লদ্ধং লদ্ধং ৰিস্সজ্জেতি পরস্স দেতি. পুনপ্পুনং লদ্ধম্পি তথেৰ করোতি. ইমে দ্ৰে পুগ্গলা সকটেহিপি পচ্চযে উপনেন্তেন তপ্পেতুং ন সক্কাতি দুত্তপ্পযা নাম.

৮৫. সুতপ্পযনিদ্দেসে – ন ৰিস্সজ্জেতীতি অত্তনো অকত্ৰা পরস্স ন দেতি. অতিরেকে পন সতি ন নিক্খিপতি পরস্স দেতি. ইদং ৰুত্তং হোতি – যো পন ভিক্খু উপট্ঠাককুলা ৰা ঞাতিকুলা ৰা জিণ্ণচীৰরো সাটকং লভিত্ৰা চীৰরং কত্ৰা পরিভুঞ্জতি, ন নিক্খিপতি; অগ্গল়ং দত্ৰা পারুপন্তোপি পুন দিয্যমানে সহসা ন পটিগ্গণ্হাতি. যো চ লদ্ধং লদ্ধং অত্তনা পরিভুঞ্জতি, পরেসং ন দেতি. ইমে দ্ৰেপি সুখেন সক্কা তপ্পেতুন্তি সুতপ্পযা নামাতি.

৮৬. আসৰাতি কিলেসা. ন কুক্কুচ্চাযিতব্বং কুক্কুচ্চাযতীতি ন কুক্কুচ্চাযিতব্বযুত্তকং কুক্কুচ্চাযতি. সূকরমংসং লভিত্ৰা অচ্ছমংসন্তি কুক্কুচ্চাযতি, মিগমংসং, লভিত্ৰা দীপিমংসন্তি কুক্কুচ্চাযতি. কালে সন্তেযেৰ ‘কালো নত্থী’তি, অপ্পৰারেত্ৰাৰ ‘পৰারিতোস্মী’তি, পত্তে রজস্মিং অপতিতেযেৰ ‘পতিত’ন্তি, অত্তানং উদ্দিস্স মচ্ছমংসে অকতেযেৰ ‘মং উদ্দিস্স কত’ন্তি কুক্কুচ্চাযতি. কুক্কুচ্চাযিতব্বং ন কুক্কুচ্চাযতীতি কুক্কুচ্চাযিতব্বযুত্তকং ন কুক্কুচ্চাযতি. অচ্ছমংসং লভিত্ৰা সূকরমংসন্তি ন কুক্কুচ্চাযতি…পে… অত্তানং উদ্দিস্স মচ্ছমংসে কতে ‘মং উদ্দিস্স কত’ন্তি ন কুক্কুচ্চাযতি. অঙ্গুত্তরট্ঠকথাযং পন – ‘‘‘ন কুক্কুচ্চাযিতব্ব’ন্তি সঙ্ঘভোগস্স অপট্ঠপনং অৰিচারণং ন কুক্কুচ্চাযিতব্বং নাম, তং কুক্কুচ্চাযতি. ‘কুক্কুচ্চাযিতব্ব’ন্তি তস্সেৰ পট্ঠপনং ৰিচারণং, তং ন কুক্কুচ্চাযতী’’তি এত্তকমেৰ ৰুত্তং. ইমেসন্তি ইমেসং দ্ৰিন্নং পুগ্গলানং সুভূমিযং তিণলতাদীনি ৰিয রত্তিম্পি দিৰাপি আসৰা ৰড্ঢন্তিযেৰ. সুক্কপক্খে কপ্পিযমংসং লভিত্ৰা কপ্পিযমংসন্ত্ৰেৰ গণ্হন্তো ন কুক্কুচ্চাযিতব্বং ন কুক্কুচ্চাযতি নামাতি ইমিনা নযেন অত্থো ৰেদিতব্বো.

৮৮. হীনাধিমুত্তোতি হীনজ্ঝাসযো. দুস্সীলোতি নিস্সীলো. পাপধম্মোতি লামকধম্মো.

৮৯. পণীতাধিমুত্তোতি পণীতজ্ঝাসযো. কল্যাণধম্মোতি ভদ্দকধম্মো, সুচিধম্মো, সুন্দরধম্মো.

৯০. তিত্তোতি সুহিতো পরিযোসিতো. তপ্পেতাতি অঞ্ঞেসম্পি তিত্তিকরো. পচ্চেকসম্বুদ্ধা যে চ তথাগতসাৰকাতি এত্থ পচ্চেকবুদ্ধা নৰহি লোকুত্তরধম্মেহি সযং তিত্তা পরিপুণ্ণা. অঞ্ঞে পন তপ্পেতুং ন সক্কোন্তি. তেসঞ্হি ধম্মকথায অভিসমযো ন হোতি. সাৰকানং পন ধম্মকথায অপরিমাণানম্পি দেৰমনুস্সানং অভিসমযো হোতি. এৰং সন্তেপি যস্মা পন তে ধম্মং দেসেন্তা ন অত্তনো ৰচনং কত্ৰা কথেন্তি, বুদ্ধানং ৰচনং কত্ৰা কথেন্তি. সোতুং নিসিন্নপরিসাপি ‘অযং ভিক্খু ন অত্তনা পটিৰিদ্ধধম্মং কথেতি, বুদ্ধেহি পটিৰিদ্ধধম্মং কথেতী’তি চিত্তীকারং করোতি. ইতি সো চিত্তীকারো বুদ্ধানংযেৰ হোতি. এৰং তত্থ সম্মাসম্বুদ্ধোৰ তপ্পেতা নাম. যথা হি ‘অসুকস্স নাম ইদঞ্চিদঞ্চ দেথা’তি রঞ্ঞা আণত্তা কিঞ্চাপি আনেত্ৰা দেন্তি, অথ খো রাজাৰ তত্থ দাযকো. যেহিপি লদ্ধং হোতি, তে ‘রঞ্ঞা অম্হাকং ঠানন্তরং দিন্নং, ইস্সরিযৰিভৰো দিন্নো’ত্ৰেৰ গণ্হন্তি, ন রাজপুরিসেহীতি. এৰংসম্পদমিদং ৰেদিতব্বং. সেসং সব্বত্থ উত্তানত্থমেৰাতি.

দুকনিদ্দেসৰণ্ণনা.