৫. উপোসথৰগ্গো

৪. ৰাসেট্ঠসুত্তৰণ্ণনা

৪৪. পঞ্চমস্স চতুত্থে ইমে চেপি, ৰাসেট্ঠ, মহাসালাতি পুরতো ঠিতে দ্ৰে সালরুক্খে দস্সেন্তো পরিকপ্পোপমং আহ. ইদং ৰুত্তং হোতি – ইমে তাৰ মহাসালা অচেতনা. সচে এতেপি সচেতনা হুত্ৰা অট্ঠঙ্গসমন্নাগতং উপোসথং উপৰসেয্যুং, এতেসম্পি সো উপোসথৰাসো দীঘরত্তং হিতায সুখায অস্স. ভূতে পন ৰত্তব্বমেৰ নত্থীতি.

৬. অনুরুদ্ধসুত্তৰণ্ণনা

৪৬. ছট্ঠে যেনাযস্মা অনুরুদ্ধোতি তা কির দেৰতা অত্তনো সম্পত্তিং ওলোকেত্ৰা ‘‘কিং নু খো নিস্সায অযং সম্পত্তি অম্হেহি লদ্ধা’’তি আৰজ্জমানা থেরং দিস্ৰা ‘‘মযং অম্হাকং অয্যস্স পুব্বে চক্কৰত্তিরজ্জং করোন্তস্স পাদপরিচারিকা হুত্ৰা তেন দিন্নোৰাদে ঠত্ৰা ইমং সম্পত্তিং লভিম্হ, গচ্ছাম থেরং আনেত্ৰা ইমং সম্পত্তিং অনুভৰিস্সামা’’তি দিৰা যেনাযস্মা অনুরুদ্ধো তেনুপসঙ্কমিংসু. তীসু ঠানেসূতি তীসু কারণেসু. ঠানসো পটিলভামাতি খণেনেৰ লভাম. সরন্তি ৰচনসদ্দং ৰা গীতসদ্দং ৰা আভরণসদ্দং ৰা. পীতা অস্সূতিআদীনি নীলা তাৰ জাতা, পীতা ভৰিতুং ন সক্খিস্সন্তীতিআদিনা নযেন চিন্তেত্ৰা ৰিতক্কেতি. তাপি ‘‘ইদানি অয্যো অম্হাকং পীতভাৰং ইচ্ছতি, ইদানি লোহিতভাৰ’’ন্তি তাদিসাৰ অহেসুং.

অচ্ছরং ৰাদেসীতি পাণিতলং ৰাদেসি. পঞ্চঙ্গিকস্সাতি আততং, ৰিততং, আততৰিততং, ঘনং, সুসিরন্তি ইমেহি পঞ্চহি অঙ্গেহি সমন্নাগতস্স. তত্থ আততং নাম চম্মপরিযোনদ্ধেসু ভেরিআদীসু একতলতূরিযং, ৰিততং নাম উভযতলং, আততৰিততং নাম সব্বসো পরিযোনদ্ধং, সুসিরং ৰংসাদি, ঘনং সম্মাদি. সুৰিনীতস্সাতি আকড্ঢনসিথিলকরণাদীহি সমুচ্ছিতস্স. সুপ্পটিপতাল়িতস্সাতি পমাণে ঠিতভাৰজাননত্থং সুট্ঠু পটিপতাল়িতস্স. কুসলেহি সুসমন্নাহতস্সাতি যে ৰাদেতুং কুসলা ছেকা, তেহি ৰাদিতস্স. ৰগ্গূতি ছেকো সুন্দরো. রজনীযোতি রঞ্জেতুং সমত্থো. কমনীযোতি কামেতব্বযুত্তো. খমনীযোতি ৰা পাঠো, দিৰসম্পি সুয্যমানো খমতেৰ, ন নিব্বিন্দতীতি অত্থো. মদনীযোতি মানমদপুরিসমদজননো. ইন্দ্রিযানি ওক্খিপীতি ‘‘অসারুপ্পং ইমা দেৰতা করোন্তী’’তি ইন্দ্রিযানি হেট্ঠা খিপি, ন অক্খীনি উম্মীলেত্ৰা ওলোকেসি. ন খ্ৰয্যো অনুরুদ্ধো সাদিযতীতি ‘‘মযং নচ্চাম গাযাম, অয্যো পন অনুরুদ্ধো ন খো সাদিযতি, অক্খীনি উম্মীলেত্ৰা ন ওলোকেতি, কিং মযং নচ্চিত্ৰা ৰা গাযিত্ৰা ৰা করিস্সামা’’তি তত্থেৰ অন্তরধাযিংসু. যেন ভগৰা তেনুপসঙ্কমীতি তাসং দেৰতানং আনুভাৰং দিস্ৰা ‘‘কতিহি নু খো ধম্মেহি সমন্নাগতো মাতুগামো মনাপকাযিকে দেৰলোকে নিব্বত্ততী’’তি ইমমত্থং পুচ্ছিতুং উপসঙ্কমি.

৯-১০. ইধলোকিকসুত্তদ্ৰযৰণ্ণনা

৪৯-৫০. নৰমে অযং’স লোকো আরদ্ধো হোতীতি অযমস্স লোকো ইধলোকে করণমত্তায আরদ্ধত্তা পরিপুণ্ণত্তা আরদ্ধো হোতি পরিপুণ্ণো. সোল়সাকারসম্পন্নাতি সুত্তে ৰুত্তেহি অট্ঠহি, গাথাসু অট্ঠহীতি সোল়সহি আকারেহি সমন্নাগতা, যানি ৰা অট্ঠঙ্গানি পরম্পি তেসু সমাদপেতীতি এৰম্পি সোল়সাকারসম্পন্নাতি একে. সদ্ধাসীলপঞ্ঞা পনেত্থ মিস্সিকা কথিতা. দসমং ভিক্খুসঙ্ঘস্স কথিতং. সব্বসুত্তেসু পন যং ন ৰুত্তং, তং হেট্ঠা আগতনযত্তা উত্তানত্থমেৰাতি.

উপোসথৰগ্গো পঞ্চমো.