৪. অস্সখল়ুঙ্কসুত্তৰণ্ণনা

১৪. চতুত্থে ‘‘পেহী’’তি ৰুত্তোতি ‘‘গচ্ছা’’তি ৰুত্তো. পিট্ঠিতো রথং পৰত্তেতীতি খন্ধট্ঠিকেন যুগং উপ্পীল়িত্ৰা পচ্ছিমভাগেন রথং পৰট্টেন্তো ওসক্কতি. পচ্ছা লঙ্ঘতি, কুব্বরং হনতীতি দ্ৰে পচ্ছিমপাদে উক্খিপিত্ৰা তেহি পহরিত্ৰা রথকুব্বরং ভিন্দতি. তিদণ্ডং ভঞ্জতীতি রথস্স পুরতো তযো দণ্ডকা হোন্তি, তে ভঞ্জতি. রথীসায সত্থিং উস্সজ্জিত্ৰাতি সীসং নামেত্ৰা যুগং ভূমিযং পাতেত্ৰা সত্থিনা রথীসং পহরিত্ৰা. অজ্ঝোমদ্দতীতি দ্ৰীহি পুরিমপাদেহি ঈসং মদ্দন্তো তিট্ঠতি. উব্বটুমং রথং করোতীতি থলং ৰা কণ্ডকট্ঠানং ৰা রথং আরোপেতি. অনাদিযিত্ৰাতি অমনসিকত্ৰা অগণিত্ৰা. মুখাধানন্তি মুখঠপনত্থায দিন্নং অযসঙ্খলিকং. খীলট্ঠাযীতি চত্তারো পাদে থম্ভে ৰিয নিচ্চলং ঠপেত্ৰা খীলট্ঠানসদিসেন ঠানেন তিট্ঠতি. ইমস্মিং সুত্তে ৰট্টমেৰ কথিতং.