৫. পঞ্চমপণ্ণাসকং

(২১) ১. কিমিলৰগ্গো

১. কিমিলসুত্তৰণ্ণনা

২০১. পঞ্চমস্স পঠমে কিমিলাযন্তি এৰংনামকে নগরে. নিচুলৰনেতি মুচলিন্দৰনে. এতদৰোচাতি অযং কির থেরো তস্মিংযেৰ নগরে সেট্ঠিপুত্তো সত্থু সন্তিকে পব্বজিত্ৰা পুব্বেনিৰাসঞাণং পটিলভি. সো অত্তনা নিৰুত্থং খন্ধসন্তানং অনুস্সরন্তো কস্সপদসবলস্স সাসনোসক্কনকালে পব্বজিত্ৰা চতূসু পরিসাসু সাসনে অগারৰং করোন্তীসু নিস্সেণিং বন্ধিত্ৰা পব্বতং আরুয্হ তত্থ সমণধম্মং কত্ৰা অত্তনো নিৰুত্থভাৰং অদ্দস. সো ‘‘সত্থারং উপসঙ্কমিত্ৰা তং কারণং পুচ্ছিস্সামী’’তি এতং ‘‘কো নু খো, ভন্তে’’তিআদিৰচনং অৰোচ.

সত্থরি অগারৰা ৰিহরন্তি অপ্পতিস্সাতি সত্থরি গারৰঞ্চেৰ জেট্ঠকভাৰঞ্চ অনুপট্ঠপেত্ৰা ৰিহরন্তি. সেসেসুপি এসেৰ নযো. তত্থ চেতিযঙ্গণাদীসু ছত্তং ধারেত্ৰা উপাহনা আরুয্হ ৰিচরন্তো নানপ্পকারঞ্চ নিরত্থককথং কথেন্তো সত্থরি অগারৰো ৰিহরতি নাম. ধম্মস্সৰনগ্গে পন নিসীদিত্ৰা নিদ্দাযন্তো চেৰ নানপ্পকারঞ্চ নিরত্থককথং কথেন্তো ধম্মে অগারৰো ৰিহরতি নাম. সঙ্ঘমজ্ঝে বাহাৰিক্খেপকং নানত্তকথং কথেন্তো থেরনৰমজ্ঝিমেসু চ চিত্তীকারং অকরোন্তো সঙ্ঘে অগারৰো ৰিহরতি নাম. সিক্খং অপরিপূরেন্তো সিক্খায অগারৰো ৰিহরতি নাম. অঞ্ঞমঞ্ঞং কলহভণ্ডনাদীনি করোন্তো অঞ্ঞমঞ্ঞং অগারৰো ৰিহরতি নাম. দুতিযং উত্তানত্থমেৰ.

৩. অস্সাজানীযসুত্তৰণ্ণনা

২০৩-২০৪. ততিযে অজ্জৰেনাতি উজুভাৰেন অৰঙ্কগমনেন. জৰেনাতি পদজৰেন. মদ্দৰেনাতি সরীরমুদুতায. খন্তিযাতি অধিৰাসনক্খন্তিযা. সোরচ্চেনাতি সুচিসীলতায. ভিক্খুৰারে অজ্জৰন্তি ঞাণস্স উজুকগমনং. জৰোতি সূরং হুত্ৰা ঞাণস্স গমনভাৰো. মদ্দৰন্তি সীলমদ্দৰং. খন্তীতি অধিৰাসনক্খন্তিযেৰ. সোরচ্চং সুচিসীলতাযেৰ. চতুত্থে পঞ্চ বলানি মিস্সকানি কথিতানি.

৫. চেতোখিলসুত্তৰণ্ণনা

২০৫. পঞ্চমে চেতোখিলাতি চিত্তস্স থদ্ধভাৰা, কচৰরভাৰা, খাণুকভাৰা. সত্থরি কঙ্খতীতি সত্থু সরীরে ৰা গুণে ৰা কঙ্খতি. সরীরে কঙ্খমানো ‘‘দ্ৰত্তিংসৰরপুরিসলক্খণপটিমণ্ডিতং নাম সরীরং অত্থি নু খো নত্থী’’তি কঙ্খতি, গুণে কঙ্খমানো ‘‘অতীতানাগতপচ্চুপ্পন্নজাননসমত্থং সব্বঞ্ঞুতঞ্ঞাণং অত্থি নু খো নত্থী’’তি কঙ্খতি. ৰিচিকিচ্ছতীতি ৰিচিনন্তো কিচ্ছতি, দুক্খং আপজ্জতি, ৰিনিচ্ছেতুং ন সক্কোতি. নাধিমুচ্চতীতি এৰমেতন্তি অধিমোক্খং ন পটিলভতি. ন সম্পসীদতীতি গুণেসু ওতরিত্ৰা নিব্বিচিকিচ্ছভাৰেন পসীদিতুং অনাৰিলো ভৰিতুং ন সক্কোতি. আতপ্পাযাতি কিলেসসন্তাপকৰীরিযকরণত্থায. অনুযোগাযাতি পুনপ্পুনং যোগায. সাতচ্চাযাতি সততকিরিযায. পধানাযাতি পদহনত্থায. অযং পঠমো চেতোখিলোতি অযং সত্থরি ৰিচিকিচ্ছাসঙ্খাতো পঠমো চিত্তস্স থদ্ধভাৰো এৰমেতস্স ভিক্খুনো অপ্পহীনো হোতি.

ধম্মেতি পরিযত্তিধম্মে চ পটিৰেধধম্মে চ. পরিযত্তিধম্মে কঙ্খমানো ‘‘তেপিটকং বুদ্ধৰচনং চতুরাসীতিধম্মক্খন্ধসহস্সানীতি ৰদন্তি, অত্থি নু খো এতং নত্থী’’তি কঙ্খতি. পটিৰেধধম্মে কঙ্খমানো ‘‘ৰিপস্সনানিস্সন্দো মগ্গো নাম, মগ্গনিস্সন্দং ফলং নাম, সব্বসঙ্খারপটিনিস্সগ্গো নিব্বানং নামাতি ৰদন্তি, তং অত্থি নু খো নত্থী’’তি কঙ্খতি. সঙ্ঘে কঙ্খতীতি ‘‘উজুপ্পটিপন্নো’’তিআদীনং পদানং ৰসেন ‘‘এৰরূপং পটিপদং পটিপন্নো চত্তারো মগ্গট্ঠা চত্তারো ফলট্ঠাতি অট্ঠন্নং পুগ্গলানং সমূহভূতো সঙ্ঘো নাম অত্থি নু খো নত্থী’’তি কঙ্খতি. সিক্খায কঙ্খমানো ‘‘অধিসীলসিক্খা নাম অধিচিত্তঅধিপঞ্ঞাসিক্খা নামাতি ৰদন্তি, সা অত্থি নু খো নত্থী’’তি কঙ্খতি. অযং পঞ্চমোতি অযং সব্রহ্মচারীসু কোপসঙ্খাতো পঞ্চমো চিত্তস্স থদ্ধভাৰো কচৰরভাৰো খাণুকভাৰো.

৬. ৰিনিবন্ধসুত্তৰণ্ণনা

২০৬. ছট্ঠে চেতসোৰিনিবন্ধাতি চিত্তং ৰিনিবন্ধিত্ৰা মুট্ঠিযং কত্ৰা ৰিয গণ্হন্তীতি চেতসোৰিনিবন্ধা. কামেতি ৰত্থুকামেপি কিলেসকামেপি. কাযেতি অত্তনো কাযে. রূপেতি বহিদ্ধারূপে. যাৰদত্থন্তি যত্তকং ইচ্ছতি, তত্তকং. উদরাৰদেহকন্তি উদরপূরং. তঞ্হি উদরং অৰদেহনতো উদরাৰদেহকন্তি ৰুচ্চতি. সেয্যসুখন্তি মঞ্চপীঠসুখং, উতুসুখং ৰা. পস্সসুখন্তি যথা সম্পরিৰত্তকং সযন্তস্স দক্খিণপস্স ৰামপস্সানং সুখং হোতি, এৰং উপ্পন্নসুখং. মিদ্ধসুখন্তি নিদ্দাসুখং. অনুযুত্তোতি যুত্তপ্পযুত্তো ৰিহরতি. পণিধাযাতি পত্থযিত্ৰা. সীলেনাতিআদীসু সীলন্তি চতুপারিসুদ্ধিসীলং. ৰতন্তি ৰতসমাদানং. তপোতি তপচরণং. ব্রহ্মচরিযন্তি মেথুনৰিরতি. দেৰো ৰা ভৰিস্সামীতি মহেসক্খদেৰো ৰা ভৰিস্সামি. দেৰঞ্ঞতরো ৰাতি অপ্পেসক্খদেৰেসু ৰা অঞ্ঞতরোতি.

৭-৮. যাগুসুত্তাদিৰণ্ণনা

২০৭-২০৮. সত্তমে ৰাতং অনুলোমেতীতি ৰাতং অনুলোমেত্ৰা হরতি. ৰত্থিং সোধেতীতি ধমনিযো সুদ্ধা করোতি. আমাৰসেসং পাচেতীতি সচে আমাৰসেসকং হোতি, তং পাচেতি. অট্ঠমে অচক্খুস্সন্তি ন চক্খূনং হিতং, চক্খুং ৰিসুদ্ধং ন করোতি.

৯. গীতস্সরসুত্তৰণ্ণনা

২০৯. নৰমে আযতকেনাতি দীঘেন, পরিপুণ্ণপদব্যঞ্জনকং গাথাৰত্তঞ্চ ৰিনাসেত্ৰা পৰত্তেন. সরকুত্তিম্পি নিকামযমানস্সাতি এৰং গীতস্সরো কাতব্বোতি সরকিরিযং পত্থযমানস্স. সমাধিস্স ভঙ্গো হোতীতি সমথৰিপস্সনাচিত্তস্স ৰিনাসো হোতি.

১০. মুট্ঠস্সতিসুত্তৰণ্ণনা

২১০. দসমে দুক্খং সুপতীতি নানাৰিধং সুপিনং পস্সন্তো দুক্খং সুপতি. দুক্খং পটিবুজ্ঝতীতি পটিবুজ্ঝন্তোপি উত্তসিত্ৰা সলোমহংসো পটিবুজ্ঝতি. ইমস্মিং সুত্তে সতিসম্পজঞ্ঞং মিস্সকং কথিতং.

কিমিলৰগ্গো পঠমো.

(২২) ২. অক্কোসকৰগ্গো

১. অক্কোসকসুত্তৰণ্ণনা

২১১. দুতিযস্স পঠমে অক্কোসকপরিভাসকোতি দসহি অক্কোসৰত্থূহি অক্কোসকো, ভযদস্সনেন পরিভাসকো. ছিন্নপরিপন্থোতি লোকুত্তরপরিপন্থস্স ছিন্নত্তা ছিন্নপরিপন্থো. রোগাতঙ্কন্তি রোগোযেৰ কিচ্ছজীৰিকাযাৰহনতো রোগাতঙ্কো নাম.

২. ভণ্ডনকারকসুত্তৰণ্ণনা

২১২. দুতিযে অধিকরণকারকোতি চতুন্নং অধিকরণানং অঞ্ঞতরস্স কারকো. অনধিগতন্তি পুব্বে অপ্পত্তৰিসেসং.

৩. সীলসুত্তৰণ্ণনা

২১৩. ততিযে দুস্সীলোতি অসীলো নিস্সীলো. সীলৰিপন্নোতি ৰিপন্নসীলো ভিন্নসংৰরো. পমাদাধিকরণন্তি পমাদকারণা. ইদঞ্চ সুত্তং গহট্ঠানং ৰসেন আগতং, পব্বজিতানম্পি পন লব্ভতেৰ. গহট্ঠো হি যেন যেন সিপ্পট্ঠানেন জীৰিকং কপ্পেতি, যদি কসিযা, যদি ৰণিজ্জায, পাণাতিপাতাদিৰসেন পমত্তো তং তং যথাকালং সম্পাদেতুং ন সক্কোতি, অথস্স মূলং ৰিনস্সতি. মাঘাতকালেপি পাণাতিপাতং অদিন্নাদানাদীনি চ করোন্তো দণ্ডৰসেন মহতিং ভোগজানিং নিগচ্ছতি. পব্বজিতো দুস্সীলো পমাদকারণা সীলতো বুদ্ধৰচনতো ঝানতো সত্তঅরিযধনতো চ জানিং নিগচ্ছতি. গহট্ঠস্স ‘‘অসুকো অসুককুলে জাতো দুস্সীলো পাপধম্মো পরিচ্চত্তইধলোকপরলোকো সলাকভত্তমত্তম্পি ন দেতী’’তি চতুপরিসমজ্ঝে পাপকো কিত্তিসদ্দো অব্ভুগ্গচ্ছতি. পব্বজিতস্স ‘‘অসুকো নাসক্খি সীলং রক্খিতুং বুদ্ধৰচনং গহেতুং, ৰেজ্জকম্মাদীহি জীৰতি, ছহি অগারৰেহি সমন্নাগতো’’তি এৰং অব্ভুগ্গচ্ছতি.

অৰিসারদোতি গহট্ঠো তাৰ ‘‘অৰস্সং বহূনং সন্নিপাতট্ঠানে কোচি মম কম্মং জানিস্সতি, অথ মং নিগ্গণ্হিস্সন্তি ৰা, রাজকুলস্স ৰা দস্সন্তী’’তি সভযো উপসঙ্কমতি. মঙ্কুভূতো চ পতিতক্খন্ধো অধোমুখো অঙ্গুট্ঠকেন ভূমিং কসন্তো নিসীদতি, ৰিসারদো হুত্ৰা কথেতুং ন সক্কোতি. পব্বজিতোপি ‘‘বহূ ভিক্খূ সন্নিপতিতা, অৰস্সং কোচি মম কম্মং জানিস্সতি, অথ মে উপোসথম্পি পৰারণম্পি ঠপেত্ৰা সামঞ্ঞা চাৰেত্ৰা নিক্কড্ঢিস্সন্তী’’তি সভযো উপসঙ্কমতি, ৰিসারদো হুত্ৰা কথেতুং ন সক্কোতি. একচ্চো পন দুস্সীলোপি দপ্পিতো ৰিয চরতি, সোপি অজ্ঝাসযেন মঙ্কু হোতিযেৰ.

সম্মূল়্হো কালং করোতীতি তস্স হি মরণমঞ্চে নিপন্নস্স দুস্সীলকম্মং সমাদায ৰত্তিতট্ঠানং আপাথং আগচ্ছতি. সো উম্মীলেত্ৰা ইধলোকং পস্সতি, নিম্মীলেত্ৰা পরলোকং. তস্স চত্তারো অপাযা উপট্ঠহন্তি, সত্তিসতেন সীসে পহরিযমানো ৰিয হোতি. সো ‘‘ৰারেথ ৰারেথা’’তি ৰিরৰন্তো মরতি. তেন ৰুত্তং – ‘‘সম্মূল়্হো কালং করোতী’’তি. পঞ্চমপদং উত্তানমেৰ. আনিসংসকথা ৰুত্তৰিপরিযাযেন ৰেদিতব্বা.

৪. বহুভাণিসুত্তৰণ্ণনা

২১৪. চতুত্থে বহুভাণিস্মিন্তি পঞ্ঞায অপরিচ্ছিন্দিত্ৰা বহুং ভণন্তে. মন্তভাণিস্মিন্তি মন্তা ৰুচ্চতি পঞ্ঞা, তায পরিচ্ছিন্দিত্ৰা ভণন্তে.

৫. পঠমঅক্খন্তিসুত্তৰণ্ণনা

২১৫. পঞ্চমে ৰেরবহুলোতি পুগ্গলৰেরেনপি অকুসলৰেরেনপি বহুৰেরো. ৰজ্জবহুলোতি দোসবহুলো.

৬. দুতিযঅক্খন্তিসুত্তৰণ্ণনা

২১৬. ছট্ঠে লুদ্দোতি দারুণো কক্খল়ো. ৰিপ্পটিসারীতি মঙ্কুভাৰেন সমন্নাগতো.

৭.পঠমঅপাসাদিকসুত্তৰণ্ণনা

২১৭. সত্তমে অপাসাদিকেতি অপাসাদিকেহি কাযকম্মাদীহি সমন্নাগতে. পাসাদিকেতি পসাদাৰহে পরিসুদ্ধসমাচারে. অট্ঠমনৰমানি উত্তানত্থানেৰ.

১০. মধুরাসুত্তৰণ্ণনা

২২০. দসমে পঞ্চিমে, ভিক্খৰে, আদীনৰা মধুরাযন্তি একং সমযং ভগৰা ভিক্খুসঙ্ঘপরিৰুতো চারিকং চরমানো মধুরানগরং সম্পাপুণিত্ৰা অন্তোনগরং পৰিসিতুং আরভি. অথেকা মিচ্ছাদিট্ঠিকা যক্খিনী অচেলা হুত্ৰা দ্ৰে হত্থে পসারেত্ৰা জিৰ্হং নিল্লালেত্ৰা দসবলস্স পুরতো অট্ঠাসি. সত্থা অন্তোনগরং অপ্পৰিসিত্ৰা ততোৰ নিক্খমিত্ৰা ৰিহারং অগমাসি. মহাজনো খাদনীযভোজনীযঞ্চেৰ সক্কারসম্মানঞ্চ আদায ৰিহারং গন্ত্ৰা বুদ্ধপ্পমুখস্স ভিক্খুসঙ্ঘস্স দানং অদাসি. সত্থা তস্স নগরস্স নিগ্গণ্হনত্থায ইমং সুত্তং আরভি. তত্থ ৰিসমাতি ন সমতলা. বহুরজাতি ৰাতপহরণকালে উদ্ধতেন রজক্খন্ধেন পরিযোনদ্ধা ৰিয হোতি. সেসং সব্বত্থ উত্তানমেৰাতি.

অক্কোসকৰগ্গো দুতিযো.

(২৩) ৩. দীঘচারিকৰগ্গো

১. পঠমদীঘচারিকসুত্তৰণ্ণনা

২২১. ততিযস্স পঠমে অনৰত্থচারিকন্তি অৰৰত্থিতচারিকং. সুতং ন পরিযোদপেতীতি যম্পিস্স সুতং অত্থি, তং পরিযোদপেতুং ন সক্কোতি. সুতেনেকচ্চেন অৰিসারদো হোতীতি থোকথোকেন সুতেন ৰিজ্জমানেনাপি ঞাণেন সোমনস্সপ্পত্তো ন হোতি. সমৰত্থচারেতি সমৰত্থিতচারে. দুতিযং উত্তানত্থমেৰ.

৩-৪. অতিনিৰাসসুত্তাদিৰণ্ণনা

২২৩-২২৪. ততিযে বহুভণ্ডোতি বহুপরিক্খারো. বহুভেসজ্জোতি সপ্পিনৰনীতাদীনং বহুতায বহুভেসজ্জো. ব্যত্তোতি ব্যাসত্তো. সংসট্ঠোতি পঞ্চৰিধেন সংসগ্গেন সংসট্ঠো হুত্ৰা. অননুলোমিকেনাতি সাসনস্স অননুচ্ছৰিকেন. চতুত্থে ৰণ্ণমচ্ছরীতি গুণমচ্ছরী. ধম্মমচ্ছরীতি পরিযত্তিমচ্ছরী.

৫-৬. কুলূপকসুত্তাদিৰণ্ণনা

২২৫-২২৬. পঞ্চমে অনামন্তচারে আপজ্জতীতি ‘‘নিমন্তিতো সভত্তো সমানো সন্তং ভিক্খুং অনাপুচ্ছা পুরেভত্তং ৰা পচ্ছাভত্তং ৰা কুলেসু চারিত্তং আপজ্জেয্যা’’তি সিক্খাপদে (পারা. ২৯৪) ৰুত্তং আপত্তিং আপজ্জতি. রহো নিসজ্জাযাতিআদীনিপি তেসং তেসং সিক্খাপদানং ৰসেন ৰেদিতব্বানি. ছট্ঠে অতিৰেলন্তি অতিক্কন্তপমাণকালং. সত্তমং উত্তানমেৰ.

৮. উস্সূরভত্তসুত্তৰণ্ণনা

২২৮. অট্ঠমে উস্সূরভত্তেতি অতিদিৰাপচনভত্তে. ন কালেন পটিপূজেন্তীতি যাগুকালে যাগুং, খজ্জককালে খজ্জকং, ভোজনকালে ভোজনং অপচন্তা যুত্তপ্পযুত্তকালস্স অতিনামিতত্তা ন কালেন পটিপূজেন্তি, অত্তনো চিত্তেনেৰ দেন্তি নাম. ততো তেপি তেসু অত্তনো গেহং আগতেসু তথেৰ করোন্তি. কুলপৰেণিযা আগতা বলিপটিগ্গাহিকা দেৰতাপি যুত্তপ্পযুত্তকালেন লাভং লভমানাযেৰ রক্খন্তি গোপযন্তি পীল়ং অকত্ৰা. অকালে লভমানা পন ‘‘ইমে অম্হেসু অনাদরা’’তি আরক্খং ন করোন্তি.

সমণব্রাহ্মণাপি ‘‘এতেসং গেহে ভোজনৰেলায ভোজনং ন হোতি, ঠিতমজ্ঝন্হিকে দেন্তী’’তি মঙ্গলামঙ্গলেসু কাতব্বং ন করোন্তি. ৰিমুখা কম্মং করোন্তীতি ‘‘পাতো কিঞ্চি ন লভাম, খুদায পটিপীল়িতা কম্মং কাতুং ন সক্কোমা’’তি কম্মং ৰিস্সজ্জেত্ৰা নিসীদন্তি. অনোজৰন্তং হোতীতি অকালে ভুত্তং ওজং হরিতুং ন সক্কোতি. সুক্কপক্খো ৰুত্তৰিপল্লাসেন ৰেদিতব্বো.

৯. পঠমকণ্হসপ্পসুত্তৰণ্ণনা

২২৯. নৰমে সভীরূতি সনিদ্দো মহানিদ্দং নিদ্দাযতি. সপ্পটিভযোতি তং নিস্সায ভযং উপ্পজ্জতি, তস্মা সপ্পটিভযো. মিত্তদুব্ভীতি পানভোজনদাযকম্পি মিত্তং দুব্ভতি হিংসতি. মাতুগামেপি এসেৰ নযো.

১০. দুতিযকণ্হসপ্পসুত্তৰণ্ণনা

২৩০. দসমে ঘোরৰিসোতি কক্খল়ৰিসো. দুজ্জিৰ্হোতি দ্ৰিধা ভিন্নজিৰ্হো. ঘোরৰিসতাতি ঘোরৰিসতায. সেসদ্ৰযেপি এসেৰ নযো.

দীঘচারিকৰগ্গো ততিযো.

(২৪) ৪. আৰাসিকৰগ্গো

১. আৰাসিকসুত্তৰণ্ণনা

২৩১. চতুত্থস্স পঠমে ন আকপ্পসম্পন্নোতি সমণাকপ্পেন সম্পন্নো. অভাৰনীযো হোতীতি ৰড্ঢনীযো ন হোতি. দুতিযং উত্তানমেৰ.

৩. সোভনসুত্তৰণ্ণনা

২৩৩. ততিযে পটিবলোতি কাযবলেন চ ঞাণবলেন চ সমন্নাগতত্তা পটিবলো.

৪. বহূপকারসুত্তৰণ্ণনা

২৩৪. চতুত্থে খণ্ডফুল্লন্তি পতিতট্ঠানঞ্চ ভিন্নট্ঠানঞ্চ. পটিসঙ্খরোতীতি পটিপাকতিকং করোতি. আরোচেতীতি ইদং পৰারিতকুলানং ৰসেন ৰুত্তং.

৫. অনুকম্পসুত্তৰণ্ণনা

২৩৫. পঞ্চমে অধিসীলেসূতি পঞ্চসু সীলেসু. ধম্মদস্সনে নিৰেসেতীতি চতুসচ্চধম্মদস্সনে পতিট্ঠাপেতি. অরহগ্গতন্তি সব্বসক্কারানং অরহে রতনত্তযেৰ গতং, তীসু ৰত্থূসু গরুচিত্তীকারং উপট্ঠপেথাতি অত্থো. ছট্ঠং উত্তানমেৰ.

৭. দুতিযঅৰণ্ণারহসুত্তৰণ্ণনা

২৩৭. সত্তমে আৰাসপলিগেধীতি আৰাসং বলৰগিদ্ধিৰসেন গিলিত্ৰা ৰিয ঠিতো. সেসং সব্বং উত্তানমেৰাতি.

আৰাসিকৰগ্গো চতুত্থো.

(২৫) ৫. দুচ্চরিতৰগ্গো

১. পঠমদুচ্চরিতসুত্তৰণ্ণনা

২৪১. পঞ্চমস্স পঠমে দুচ্চরিতে সুচরিতেতি ইদং অভেদতো ৰুত্তং, কাযদুচ্চরিতেতিআদি কাযদ্ৰারাদীনং ৰসেন ভেদতো. সদ্ধম্মাতি দসকুসলকম্মপথধম্মতো. অসদ্ধম্মেতি অকুসলকম্মপথসঙ্খাতে অস্সদ্ধম্মে.

৯. সিৰথিকসুত্তৰণ্ণনা

২৪৯. নৰমে সিৰথিকাযাতি সুসানে. আরোদনাতি আরোদনট্ঠানং. অসুচিনাতি জিগুচ্ছনীযেন.

১০. পুগ্গলপ্পসাদসুত্তৰণ্ণনা

২৫০. দসমে পুগ্গলপ্পসাদেতি একপুগ্গলস্মিং উপ্পন্নপ্পসাদে. অন্তে নিসীদাপেতীতি ভিক্খূনং আসনপরিযন্তে নিসীদাপেতি. সেসং সব্বত্থ উত্তানত্থমেৰাতি.

দুচ্চরিতৰগ্গো পঞ্চমো.

পঞ্চমপণ্ণাসকং নিট্ঠিতং.