(১৬) ৬. অচেলকৰগ্গৰণ্ণনা

১৫৭-১৬৩. ইতো পরেসু আগাল়্হা পটিপদাতি গাল়্হা কক্খল়া লোভৰসেন থিরগ্গহণা. নিজ্ঝামাতি অত্তকিলমথানুযোগৰসেন সুট্ঠু ঝামা সন্তত্তা পরিতত্তা. মজ্ঝিমাতি নেৰ কক্খল়া ন ঝামা মজ্ঝে ভৰা. অচেলকোতি নিচ্চেলো নগ্গো. মুত্তাচারোতি ৰিস্সট্ঠাচারো, উচ্চারকম্মাদীসু লোকিযকুলপুত্তাচারেন ৰিরহিতো ঠিতকোৰ উচ্চারং করোতি, পস্সাৰং করোতি, খাদতি ভুঞ্জতি. হত্থাপলেখনোতি হত্থে পিণ্ডম্হি নিট্ঠিতে জিৰ্হায হত্থং অপলেখতি, উচ্চারম্পি কত্ৰা হত্থস্মিংযেৰ দণ্ডকসঞ্ঞী হুত্ৰা হত্থেন অপলেখতি. ভিক্খায গহণত্থং ‘‘এহি, ভদন্তে’’তি ৰুত্তো ন এতীতি ন এহিভদন্তিকো. ‘‘তেন হি তিট্ঠ, ভন্তে’’তি ৰুত্তোপি ন তিট্ঠতীতি ন তিট্ঠভদন্তিকো. তদুভযম্পি কির সো ‘‘এতস্স ৰচনং কতং ভৰিস্সতী’’তি ন করোতি. অভিহটন্তি পুরেতরং গহেত্ৰা আহটভিক্খং. উদ্দিস্সকতন্তি ইদং তুম্হে উদ্দিস্স কতন্তি এৰমারোচিতভিক্খং. নিমন্তনন্তি ‘‘অসুকং নাম কুলং ৰা ৰীথিং ৰা গামং ৰা পৰিসেয্যাথা’’তি এৰং নিমন্তিতভিক্খম্পি ন সাদিযতি ন গণ্হাতি. ন কুম্ভিমুখাতি কুম্ভিতো উদ্ধরিত্ৰা দীযমানং ভিক্খম্পি ন গণ্হাতি. ন কল়োপিমুখাতি কল়োপীতি উক্খলি ৰা পচ্ছি ৰা, ততোপি ন গণ্হাতি. কস্মা? ‘‘কুম্ভিকল়োপিযো মং নিস্সায কটচ্ছুনা পহারং লভন্তী’’তি. ন এল়কমন্তরন্তি উম্মারং অন্তরং কত্ৰা দীযমানং ন গণ্হাতি. কস্মা? ‘‘অযং মং নিস্সায অন্তরকরণং লভতী’’তি. দণ্ডমুসলেসুপি এসেৰ নযো. দ্ৰিন্নন্তি দ্ৰীসু ভুঞ্জমানেসু একস্মিং উট্ঠায দেন্তে ন গণ্হাতি. কস্মা? কবল়ন্তরাযো হোতীতি.

ন গব্ভিনিযাতিআদীসু পন গব্ভিনিযা কুচ্ছিযং দারকো কিলমতি, পাযন্তিযা দারকস্স খীরন্তরাযো হোতি, পুরিসন্তরগতায রতিঅন্তরাযো হোতীতি ন গণ্হাতি. ন সঙ্কিত্তীসূতি সঙ্কিত্তেত্ৰা কতভত্তেসু. দুব্ভিক্খসমযে কির অচেলকসাৰকা অচেলকানং অত্থায ততো ততো তণ্ডুলাদীনি সমাদপেত্ৰা ভত্তং পচন্তি, উক্কট্ঠাচেলকো ততো ন পটিগ্গণ্হাতি. ন যত্থ সাতি যত্থ সুনখো ‘‘পিণ্ডং লভিস্সামী’’তি উপট্ঠিতো হোতি, তত্থ তস্স অদত্ৰা আহটং ন গণ্হাতি. কস্মা? এতস্স পিণ্ডন্তরাযো হোতীতি. সণ্ডসণ্ডচারিনীতি সমূহসমূহচারিনী. সচে হি অচেলকং দিস্ৰা ‘‘ইমস্স ভিক্খং দস্সামা’’তি মনুস্সা ভত্তগেহং পৰিসন্তি, তেসু চ পৰিসন্তেসু কল়োপিমুখাদীসু নিলীনা মক্খিকা উপ্পতিত্ৰা সণ্ডসণ্ডা চরন্তি, ততো আহটং ভিক্খং ন গণ্হাতি. কস্মা? ‘‘মং নিস্সায মক্খিকানং গোচরন্তরাযো জাতো’’তি.

থুসোদকন্তি সব্বসস্সসম্ভারেহি কতসোৰীরকং. এত্থ চ সুরাপানমেৰ সাৰজ্জং, অযং পন সব্বেসু সাৰজ্জসঞ্ঞী. একাগারিকোতি যো একস্মিংযেৰ গেহে ভিক্খং লভিত্ৰা নিৰত্ততি. একালোপিকোতি একেনেৰ আলোপেন যাপেতি. দ্ৰাগারিকাদীসুপি এসেৰ নযো. একিস্সাপি দত্তিযাতি একায দত্তিযা. দত্তি নাম একা খুদ্দকপাতি হোতি, যত্থ অগ্গভিক্খং পক্খিপিত্ৰা ঠপেন্তি. একাহিকন্তি একদিৰসন্তরিকং. অদ্ধমাসিকন্তি অদ্ধমাসন্তরিকং. পরিযাযভত্তভোজনন্তি ৰারভত্তভোজনং, একাহৰারেন দ্ৰীহৰারেন সত্তাহৰারেন অদ্ধমাসৰারেনাতি এৰং দিৰসৰারেন আভতভত্তভোজনং. সাকভক্খোতিআদীনি ৰুত্তত্থানেৰ.

উব্ভট্ঠকোতি উদ্ধং ঠিতকো. উক্কুটিকপ্পধানমনুযুত্তোতি উক্কুটিকৰীরিযমনুযুত্তো, গচ্ছন্তোপি উক্কুটিকোৰ হুত্ৰা উপ্পতিত্ৰা উপ্পতিত্ৰা গচ্ছতি. কণ্টকাপস্সযিকোতি অযকণ্টকে ৰা পকতিকণ্টকে ৰা ভূমিযং কোট্টেত্ৰা তত্থ চম্মং অত্থরিত্ৰা ঠানচঙ্কমাদীনি করোতি. সেয্যন্তি সযন্তোপি তত্থেৰ সেয্যং কপ্পেতি. সাযং ততিযমস্সাতি সাযততিযকং. পাতো মজ্ঝন্হিকে সাযন্তি দিৰসস্স তিক্খত্তুং ‘‘পাপং পৰাহেস্সামী’’তি উদকোরোহনানুযোগং অনুযুত্তো ৰিহরতি.

কাযে কাযানুপস্সীতিআদীনি হেট্ঠা এককনিপাতৰণ্ণনাযং ৰুত্তনযেনেৰ ৰেদিতব্বানি. অযং ৰুচ্চতি, ভিক্খৰে, মজ্ঝিমা পটিপদাতি, ভিক্খৰে, অযং কামসুখল্লিকানুযোগঞ্চ অত্তকিলমথানুযোগঞ্চাতি দ্ৰে অন্তে অনুপগতা, সস্সতুচ্ছেদন্তেহি ৰা ৰিমুত্তা মজ্ঝিমা পটিপদাতি ৰেদিতব্বা.

অচেলকৰগ্গো ছট্ঠো.