৩. ৰিনযপেয্যালং

২০১. দ্ৰেমে, ভিক্খৰে, অত্থৰসে পটিচ্চাতি, ভিক্খৰে, দ্ৰে অত্থে নিস্সায দ্ৰে কারণানি সন্ধায. সিক্খাপদং পঞ্ঞত্তন্তি সিক্খাকোট্ঠাসো ঠপিতো. সঙ্ঘসুট্ঠুতাযাতি সঙ্ঘস্স সুট্ঠুভাৰায, ‘‘সুট্ঠু, ভন্তে’’তি ৰত্ৰা সম্পটিচ্ছনত্থাযাতি অত্থো. সঙ্ঘফাসুতাযাতি সঙ্ঘস্স ফাসুৰিহারত্থায. দুম্মঙ্কূনন্তি দুস্সীলানং. পেসলানন্তি পীযসীলানং. দিট্ঠধম্মিকানং আসৰানন্তি দিট্ঠধম্মে ইমস্মিংযেৰ অত্তভাৰে ৰীতিক্কমপচ্চযা পটিলদ্ধব্বানং ৰধবন্ধনাদিদুক্খধম্মসঙ্খাতানং আসৰানং. সংৰরাযাতি পিদহনত্থায. সম্পরাযিকানন্তি তথারূপানংযেৰ অপাযদুক্খসঙ্খাতানং সম্পরাযে উপ্পজ্জনকআসৰানং. পটিঘাতাযাতি পটিসেধনত্থায. ৰেরানন্তি অকুসলৰেরানম্পি পুগ্গলৰেরানম্পি. ৰজ্জানন্তি দোসানং. তে এৰ ৰা দুক্খধম্মা ৰজ্জনীযত্তা ইধ ৰজ্জাতি অধিপ্পেতা. ভযানন্তি চিত্তুত্রাসভযানম্পি ভযহেতূনং তেসংযেৰ দুক্খধম্মানম্পি. অকুসলানন্তি অক্খমট্ঠেন অকুসলসঙ্খাতানং দুক্খধম্মানং. গিহীনং অনুকম্পাযাতি গিহীসু উজ্ঝাযন্তেসু পঞ্ঞত্তসিক্খাপদং গিহীনং অনুকম্পায পঞ্ঞত্তং নাম. পাপিচ্ছানং পক্খুপচ্ছেদাযাতি পাপিচ্ছা পক্খং নিস্সায সঙ্ঘং ভিন্দেয্যুন্তি তেসং পক্খুপচ্ছেদনত্থায. অপ্পসন্নানং পসাদাযাতি পুব্বে অপ্পসন্নানম্পি পণ্ডিতমনুস্সানং সিক্খাপদপঞ্ঞত্তিসম্পদং দিস্ৰা পসাদুপ্পত্তিঅত্থায. পসন্নানং ভিয্যোভাৰাযাতি পসন্নানং উপরূপরিপসাদভাৰায. সদ্ধম্মট্ঠিতিযাতি সদ্ধম্মস্স চিরট্ঠিতত্থং. ৰিনযানুগ্গহাযাতি পঞ্চৰিধস্সাপি ৰিনযস্স অনুগ্গণ্হনত্থায.

২০২-২৩০. পাতিমোক্খং পঞ্ঞত্তন্তি ভিক্খুপাতিমোক্খং ভিক্খুনিপাতিমোক্খন্তি দুৰিধং পাতিমোক্খং পঞ্ঞত্তং. পাতিমোক্খুদ্দেসোতি ভিক্খূনং পঞ্চ, ভিক্খুনীনং চত্তারোতি নৰ পাতিমোক্খুদ্দেসা পঞ্ঞত্তা. পাতিমোক্খট্ঠপনন্তি উপোসথট্ঠপনং. পৰারণা পঞ্ঞত্তাতি চাতুদ্দসিকা পন্নরসিকাতি দ্ৰে পৰারণা পঞ্ঞত্তা. পৰারণট্ঠপনং পঞ্ঞত্তন্তি সাপত্তিকস্স ভিক্খুনো পৰারণা উত্তিযা ৰত্তমানায পৰারণট্ঠপনং পঞ্ঞত্তং. তজ্জনীযকম্মাদীসু ভিক্খূ ৰাচাসত্তীহি ৰিতুদন্তানং পণ্ডুকলোহিতকানং ভিক্খূনং তজ্জনীযকম্মং (চূল়ৰ. ১ আদযো) পঞ্ঞত্তং. বালস্স অব্যত্তস্স সেয্যসকস্স ভিক্খুনো নিযস্সকম্মং পঞ্ঞত্তং. কুলদূসকে অস্সজিপুনব্বসুকে ভিক্খূ আরব্ভ পব্বাজনীযকম্মং (চূল়ৰ. ২১ আদযো) পঞ্ঞত্তং. গিহীনং অক্কোসকস্স সুধম্মত্থেরস্স পটিসারণীযকম্মং (চূল়ৰ. ৩৩ আদযো) পঞ্ঞত্তং. আপত্তিযা অদস্সনাদীসু উক্খেপনীযকম্মং পঞ্ঞত্তং. গরুকাপত্তিং আপন্নস্স পটিচ্ছন্নায আপত্তিযা পরিৰাসদানং পঞ্ঞত্তং. পরিৰাসে অন্তরাপত্তিং আপন্নস্স মূলায পটিকস্সনং পঞ্ঞত্তং. পটিচ্ছন্নাযপি অপ্পটিচ্ছন্নাযপি আপত্তিযা মানত্তদানং পঞ্ঞত্তং. চিণ্ণমানত্তস্স অব্ভানং পঞ্ঞত্তং. সম্মা ৰত্তন্তস্স ওসারণীযং পঞ্ঞত্তং. অসম্মাৰত্তনাদীসু নিস্সারণীযং পঞ্ঞত্তং.

এহিভিক্খূপসম্পদা সরণগমনূপসম্পদা ওৰাদূপসম্পদা পঞ্হাব্যাকরণূপসম্পদা ঞত্তিচতুত্থকম্মূপসম্পদা গরুধম্মূপসম্পদা উভতোসঙ্ঘে উপসম্পদা দূতেন উপসম্পদাতি অট্ঠৰিধা উপসম্পদা পঞ্ঞত্তা. ঞত্তিকম্মং নৰ ঠানানি গচ্ছতীতি এৰং নৰট্ঠানিকং ঞত্তিকম্মং পঞ্ঞত্তং. ঞত্তিদুতিযকম্মং সত্ত ঠানানি গচ্ছতীতি এৰং সত্তট্ঠানিকমেৰ ঞত্তিদুতিযকম্মং পঞ্ঞত্তং. ঞত্তিচতুত্থকম্মং সত্ত ঠানানি গচ্ছতীতি এৰং সত্তট্ঠানিকমেৰ ঞত্তিচতুত্থকম্মং পঞ্ঞত্তং. পঠমপারাজিকাদীনং পঠমপঞ্ঞত্তি অপঞ্ঞত্তে পঞ্ঞত্তং. তেসংযেৰ অনুপঞ্ঞত্তি পঞ্ঞত্তে অনুপঞ্ঞত্তং. ধম্মসম্মুখতা ৰিনযসম্মুখতা সঙ্ঘসম্মুখতা পুগ্গলসম্মুখতাতি ইমস্স চতুব্বিধস্স সম্মুখীভাৰস্স ৰসেন সম্মুখাৰিনযো পঞ্ঞত্তো. সতিৰেপুল্লপ্পত্তস্স খীণাসৰস্স অচোদনত্থায সতিৰিনযো পঞ্ঞত্তো. উম্মত্তকস্স ভিক্খুনো অমূল়্হৰিনযো পঞ্ঞত্তো. অপ্পটিঞ্ঞায চুদিতকস্স আপত্তিযা অতরণত্থং পটিঞ্ঞাতকরণং পঞ্ঞত্তং. বহুতরানং ধম্মৰাদীনং লদ্ধিং গহেত্ৰা অধিকরণৰূপসমনত্থং. যেভুয্যসিকা পঞ্ঞত্তা. পাপুস্সন্নস্স পুগ্গলস্স নিগ্গণ্হনত্থং তস্সপাপিযসিকা পঞ্ঞত্তা. ভণ্ডনাদিৰসেন বহুং অস্সামণকং কত্ৰা আপত্তিং আপন্নানং ভিক্খূনং ঠপেত্ৰা থুল্লৰজ্জং ঠপেত্ৰা গিহিপটিসংযুত্তঞ্চ অৰসেসাপত্তীনং ৰূপসমনত্থায তিণৰত্থারকো পঞ্ঞত্তো.

ৰিনযপেয্যালং নিট্ঠিতং.