১. কোধপেয্যালং

১৮১. ইতো পরেসু কুজ্ঝনলক্খণো কোধো. উপনন্ধনলক্খণো উপনাহো. সুকতকরণমক্খনলক্খণো মক্খো. যুগগ্গাহলক্খণো পলাসো. উসূযনলক্খণা ইস্সা. পঞ্চমচ্ছেরভাৰো মচ্ছরিযং. তং সব্বম্পি মচ্ছরাযনলক্খণং. কতপটিচ্ছাদনলক্খণা মাযা. কেরাটিকলক্খণং সাঠেয্যং. অলজ্জনাকারো অহিরিকং. উপৰাদতো অভাযনাকারো অনোত্তপ্পং. অক্কোধাদযো তেসং পটিপক্খৰসেন ৰেদিতব্বা.

১৮৫. সেক্খস্স ভিক্খুনোতি সত্তৰিধস্সাপি সেক্খস্স উপরিউপরিগুণেহি পরিহানায সংৰত্তন্তি, পুথুজ্জনস্স পন পঠমতরংযেৰ পরিহানায সংৰত্তন্তীতি ৰেদিতব্বা. অপরিহানাযাতি উপরিউপরিগুণেহি অপরিহানত্থায.

১৮৭. যথাভতং নিক্খিত্তোতি যথা আনেত্ৰা নিক্খিত্তো, এৰং নিরযে পতিট্ঠিতো ৰাতি ৰেদিতব্বো.

১৯০. একচ্চোতি যস্সেতে কোধাদযো অত্থি, সো একচ্চো নাম.

কোধপেয্যালং নিট্ঠিতং.