৪. চতুত্থপণ্ণাসকং

১৫৫. চতুত্থস্স পঠমাদীনি উত্তানত্থানেৰাতি.

৮. কম্মনিদানসুত্তৰণ্ণনা

১৭৪. অট্ঠমে লোভহেতুকম্পীতি পাণাতিপাতস্স লোভো উপনিস্সযকোটিযা হেতু হোতি দোসমোহসম্পযুত্তোপি. ইমিনা উপাযেন সব্বত্থ অত্থো ৰেদিতব্বো.

৯. পরিক্কমনসুত্তৰণ্ণনা

১৭৫. নৰমে পরিক্কমনং হোতীতি পরিৰজ্জনং হোতি.

১০. চুন্দসুত্তৰণ্ণনা

১৭৬. দসমে কম্মারপুত্তস্সাতি সুৰণ্ণকারপুত্তস্স. কস্স নো ত্ৰন্তি কস্স নু ত্ৰং. পচ্ছাভূমকাতি পচ্ছাভূমিৰাসিকা. কমণ্ডলুকাতি কমণ্ডলুধারিনো. সেৰালমালিকাতি সেৰালমালা ৰিয ধারেন্তি. সেৰালপটনিৰাসিতাতিপি ৰুত্তমেৰ. উদকোরোহকাতি সাযততিযকং উদকোরোহনানুযোগমনুযুত্তা. আমসেয্যাসীতি হত্থেন পরিমজ্জেয্যাসি.

১১. জাণুস্সোণিসুত্তৰণ্ণনা

১৭৭. একাদসমে উপকপ্পতূতি পাপুণাতু. ঠানেতি ওকাসে. নো অট্ঠানেতি নো অনোকাসে. নেরযিকানং আহারো নাম তত্থ নিব্বত্তনকম্মমেৰ. তেনেৰ হি তে তত্থ যাপেন্তি. তিরচ্ছানযোনিকানং পন তিণপণ্ণাদিৰসেন আহারো ৰেদিতব্বো. মনুস্সানং ওদনকুম্মাসাদিৰসেন, দেৰানং সুধাভোজনাদিৰসেন, পেত্তিৰেসযিকানং খেল়সিঙ্ঘাণিকাদিৰসেন. যং ৰা পনস্স ইতো অনুপ্পৰেচ্ছন্তীতি যং তস্স মিত্তাদযো ইতো দদন্তা অনুপৰেসেন্তি. পেত্তিৰেসযিকা এৰ হি পরদত্তূপজীৰিনো হোন্তি, ন অঞ্ঞেসং পরেহি দিন্নং উপকপ্পতি. দাযকোপি অনিপ্ফলোতি যং সন্ধায তং দানং দিন্নং, তস্স উপকপ্পতু ৰা মা ৰা, দাযকেন পন ন সক্কা নিপ্ফলেন ভৰিতুং, দাযকো তস্স দানস্স ৰিপাকং লভতিযেৰ.

অট্ঠানেপি ভৰং গোতমো পরিকপ্পং ৰদতীতি অনোকাসে উপ্পন্নেপি তস্মিং ঞাতকে ভৰং গোতমো দানস্স ফলং পরিকপ্পেতিযেৰ পঞ্ঞাপেতিযেৰাতি পুচ্ছতি. ব্রাহ্মণস্স হি ‘‘এৰং দিন্নস্স দানস্স ফলং দাযকো ন লভতী’’তি লদ্ধি. অথস্স ভগৰা পঞ্হং পটিজানিত্ৰা ‘‘দাযকো নাম যত্থ কত্থচি পুঞ্ঞফলূপজীৰিট্ঠানে নিব্বত্তো দানস্স ফলং লভতিযেৰা’’তি দস্সেতুং ইধ ব্রাহ্মণাতিআদিমাহ. সো তত্থ লাভী হোতীতি সো তত্থ হত্থিযোনিযং নিব্বত্তোপি মঙ্গলহত্থিট্ঠানং পত্ৰা লাভী হোতি. অস্সাদীসুপি এসেৰ নযো. সাধুৰগ্গো উত্তানত্থোযেৰাতি.

জাণুস্সোণিৰগ্গো দুতিযো.

চতুত্থপণ্ণাসকং নিট্ঠিতং.

(২১) ১. করজকাযৰগ্গো

২১১. পঞ্চমস্স পঠমাদীনি উত্তানত্থানেৰ.

৬. সংসপ্পনীযসুত্তৰণ্ণনা

২১৬. ছট্ঠে সংসপ্পনীযপরিযাযং ৰো, ভিক্খৰে, ধম্মপরিযাযন্তি সংসপ্পনস্স কারণং দেসনাসঙ্খাতং ধম্মদেসনং. সংসপ্পতীতি তং কম্মং করোন্তো আসপ্পতি পরিসপ্পতি ৰিপ্ফন্দতি. জিম্হা গতীতি তেন কম্মেন যং গতিং গমিস্সতি, সা জিম্হা হোতি. জিম্হুপপত্তীতি তস্স যং গতিং উপপজ্জিস্সতি, সাপি জিম্হাৰ হোতি. সংসপ্পজাতিকাতি সংসপ্পনসভাৰা. ভূতা ভূতস্স উপপত্তি হোতীতি ভূতস্মা সভাৰতো ৰিজ্জমানকম্মা সত্তস্স নিব্বত্তি হোতি. ফস্সা ফুসন্তীতি ৰিপাকফস্সা ফুসন্তি.

৭-৮. সঞ্চেতনিকসুত্তদ্ৰযৰণ্ণনা

২১৭-২১৮. সত্তমে সঞ্চেতনিকানন্তি চেতেত্ৰা পকপ্পেত্ৰা কতানং. উপচিতানন্তি চিতানং ৰড্ঢিতানং. অপ্পটিসংৰেদিত্ৰাতি তেসং কম্মানং ৰিপাকং অৰেদিযিত্ৰা. ব্যন্তীভাৰন্তি ৰিগতন্তভাৰং তেসং কম্মানং পরিচ্ছেদপরিৰটুমতাকরণং. তঞ্চ খো দিট্ঠেৰ ধম্মেতি তঞ্চ খো ৰিপাকং দিট্ঠধম্মৰেদনীযং দিট্ঠেৰ ধম্মে. উপপজ্জন্তি উপপজ্জৰেদনীযং অনন্তরে অত্তভাৰে. অপরে ৰা পরিযাযেতি অপরপরিযাযৰেদনীযং পন সংসারপ্পৰত্তে সতি সহস্সিমেপি অত্তভাৰেতি. ইমিনা ইদং দস্সেতি ‘‘সংসারপ্পৰত্তে পটিলদ্ধৰিপাকারহকম্মে ন ৰিজ্জতি সো জগতিপ্পদেসো, যত্থ ঠিতো মুচ্চেয্য পাপকম্মা’’তি. তিৰিধাতি তিপ্পকারা. কাযকম্মন্তসন্দোসব্যাপত্তীতি কাযকম্মন্তসঙ্খাতা ৰিপত্তি. ইমিনা নযেন সব্বপদানি ৰেদিতব্বানি. অট্ঠমে অপণ্ণকো মণীতি সমন্ততো চতুরস্সো পাসকো.

৯. করজকাযসুত্তৰণ্ণনা

২১৯. নৰমে দুক্খস্সাতি ৰিপাকদুক্খস্স, ৰট্টদুক্খস্সেৰ ৰা. ইমস্মিং সুত্তে মণিওপম্মং নত্থি. এৰং ৰিগতাভিজ্ঝোতি এৰন্তি নিপাতমত্তং. যথা ৰা মেত্তং ভাৰেন্তা ৰিগতাভিজ্ঝা ভৰন্তি, এৰং ৰিগতাভিজ্ঝো. এৰমস্স ৰিগতাভিজ্ঝতাদীহি নীৰরণৰিক্খম্ভনং দস্সেত্ৰা ইদানি অকুসলনিস্সরণানি কথেন্তো মেত্তাসহগতেনাতিআদিমাহ. অপ্পমাণন্তি অপ্পমাণসত্তারম্মণতায চিণ্ণৰসিতায ৰা অপ্পমাণং. পমাণকতং কম্মং নাম কামাৰচরকম্মং. ন তং তত্রাৰতিট্ঠতীতি তং মহোঘো পরিত্তং উদকং ৰিয অত্তনো ওকাসং গহেত্ৰা ঠাতুং ন সক্কোতি, অথ খো নং ওঘে পরিত্তং উদকং ৰিয ইদমেৰ অপ্পমাণং কম্মং অজ্ঝোত্থরিত্ৰা অত্তনো ৰিপাকং নিব্বত্তেতি. দহরতগ্গেতি দহরকালতো পট্ঠায.

নাযং কাযো আদাযগমনিযোতি ইমং কাযং গহেত্ৰা পরলোকং গন্তুং নাম ন সক্কাতি অত্থো. চিত্তন্তরোতি চিত্তকারণো, অথ ৰা চিত্তেনেৰ অন্তরিকো. একস্সেৰ হি চুতিচিত্তস্স অনন্তরা দুতিযে পটিসন্ধিচিত্তে দেৰো নাম হোতি, নেরযিকো নাম হোতি, তিরচ্ছানগতো নাম হোতি. পুরিমনযেপি চিত্তেন কারণভূতেন দেৰো নেরযিকো ৰা হোতীতি অত্থো. সব্বং তং ইধ ৰেদনীযন্তি দিট্ঠধম্মৰেদনীযকোট্ঠাসৰনেতং ৰুত্তং. ন তং অনুগং ভৰিস্সতীতি মেত্তায উপপজ্জৰেদনীযভাৰস্স উপচ্ছিন্নত্তা উপপজ্জৰেদনীযৰসেন ন অনুগতং ভৰিস্সতি. ইদং সোতাপন্নসকদাগামিঅরিযপুগ্গলানং পচ্চৰেক্খণং ৰেদিতব্বং. অনাগামিতাযাতি ঝানানাগামিতায. ইধপঞ্ঞস্সাতি ইমস্মিং সাসনে পঞ্ঞা ইধপঞ্ঞা নাম, সাসনচরিতায অরিযপঞ্ঞায ঠিতস্স অরিযসাৰকস্সাতি অত্থো. উত্তরিৰিমুত্তিন্তি অরহত্তং. দসমং উত্তানত্থমেৰাতি.

করজকাযৰগ্গো পঠমো.

(২২) ২. সামঞ্ঞৰগ্গৰণ্ণনা

২২১. দুতিযস্স পঠমং আদিং কত্ৰা সব্বা পেয্যালতন্তি উত্তানত্থাযেৰাতি.

মনোরথপূরণিযা অঙ্গুত্তরনিকায-অট্ঠকথায

দসকনিপাতস্স সংৰণ্ণনা নিট্ঠিতা.