৬. নিজ্জরসুত্তৰণ্ণনা

১০৬. ছট্ঠে নিজ্জরৰত্থূনীতি নিজ্জরকারণানি. মিচ্ছাদিট্ঠি নিজ্জিণ্ণা হোতীতি অযং হেট্ঠা ৰিপস্সনাযপি নিজ্জিণ্ণা এৰ পহীনা. কস্মা পুন গহিতাতি? অসমুচ্ছিন্নত্তা. ৰিপস্সনায হি কিঞ্চাপি নিজ্জিণ্ণা, ন পন সমুচ্ছিন্না. মগ্গো পন উপ্পজ্জিত্ৰা তং সমুচ্ছিন্দতি, ন পুন ৰুট্ঠাতুং দেতি. তস্মা পুন গহিতা. এৰং সব্বপদেসু যোজেতব্বো. এত্থ চ সম্মাৰিমুত্তিপচ্চযা চতুসট্ঠি ধম্মা ভাৰনাপারিপূরিং গচ্ছন্তি. কতমে চতুসট্ঠি? সোতাপত্তিমগ্গক্খণে অধিমোক্খট্ঠেন সদ্ধিন্দ্রিযং পরিপূরতি, পগ্গহট্ঠেন ৰীরিযিন্দ্রিযং, উপট্ঠানট্ঠেন সতিন্দ্রিযং, অৰিক্খেপট্ঠেন সমাধিন্দ্রিযং, দস্সনট্ঠেন পঞ্ঞিন্দ্রিযং পরিপূরেতি, ৰিজাননট্ঠেন মনিন্দ্রিযং, অভিনন্দনট্ঠেন সোমনস্সিন্দ্রিযং, পৰত্তসন্ততিআধিপতেয্যট্ঠেন জীৰিতিন্দ্রিযং পরিপূরতি…পে… অরহত্তফলক্খণে অধিমোক্খট্ঠেন সদ্ধিন্দ্রিযং…পে… পৰত্তসন্ততিআধিপতেয্যট্ঠেন জীৰিতিন্দ্রিযং পরিপূরতীতি এৰং চতূসু চ মগ্গেসু চতূসু চ ফলেসু অট্ঠট্ঠ হুত্ৰা চতুসট্ঠি ধম্মা পারিপূরিং গচ্ছন্তি.