৯. উপালিসুত্তৰণ্ণনা
৯৯. নৰমে দুরভিসম্ভৰানীতি সম্ভৰিতুং দুক্খানি দুস্সহানি, ন সক্কা অপ্পেসক্খেহি অজ্ঝোগাহিতুন্তি ৰুত্তং হোতি. অরঞ্ঞৰনপত্থানীতি অরঞ্ঞানি চ ৰনপত্থানি চ. আরঞ্ঞকঙ্গনিপ্ফাদনেন অরঞ্ঞানি, গামন্তং অতিক্কমিত্ৰা মনুস্সানং অনুপচারট্ঠানভাৰেন ৰনপত্থানি. পন্তানীতি পরিযন্তানি অতিদূরানি. দুক্করং পৰিৰেকন্তি কাযৰিৰেকো দুক্করো. দুরভিরমন্তি অভিরমিতুং ন সুকরং. একত্তেতি একীভাৰে. কিং দস্সেতি? কাযৰিৰেকে কতেপি তত্থ চিত্তং অভিরমাপেতুং দুক্করং. দ্ৰযংদ্ৰযারামো হি অযং লোকোতি. হরন্তি মঞ্ঞেতি হরন্তি ৰিয ঘসন্তি ৰিয. মনোতি চিত্তং. সমাধিং অলভমানস্সাতি উপচারসমাধিং ৰা অপ্পনাসমাধিং ৰা অলভন্তস্স. কিং দস্সেতি? ঈদিসস্স ভিক্খুনো তিণপণ্ণমিগাদিসদ্দেহি ৰিৰিধেহি চ ভীসনকেহি ৰনানি চিত্তং ৰিক্খিপন্তি মঞ্ঞেতি. সংসীদিস্সতীতি কামৰিতক্কেন সংসীদিস্সতি. উপ্লৰিস্সতীতি ব্যাপাদৰিহিংসাৰিতক্কেহি উদ্ধং প্লৰিস্সতি.
কণ্ণসংধোৰিকন্তি কণ্ণে ধোৰন্তেন কীল়িতব্বং. পিট্ঠিসংধোৰিকন্তি পিট্ঠিং ধোৰন্তেন কীল়িতব্বং. তত্থ উদকং সোণ্ডায গহেত্ৰা দ্ৰীসু কণ্ণেসু আসিঞ্চনং কণ্ণসংধোৰিকা নাম, পিট্ঠিযং আসিঞ্চনং পিট্ঠিসংধোৰিকা নাম. গাধং ৰিন্দতীতি পতিট্ঠং লভতি. কো চাহং কো চ হত্থিনাগোতি অহং কো, হত্থিনাগো কো, অহম্পি তিরচ্ছানগতো, অযম্পি, ময্হম্পি চত্তারো পাদা, ইমস্সপি, ননু উভোপি মযং সমসমাতি.
ৰঙ্ককন্তি কুমারকানং কীল়নকং খুদ্দকনঙ্গলং. ঘটিকন্তি দীঘদণ্ডকেন রস্সদণ্ডকং পহরণকীল়ং. মোক্খচিকন্তি সংপরিৰত্তককীল়ং, আকাসে দণ্ডকং গহেত্ৰা ভূমিযং ৰা সীসং ঠপেত্ৰা হেট্ঠুপরিযভাৰেন পরিৰত্তনকীল়ন্তি ৰুত্তং হোতি. চিঙ্গুলকন্তি তালপণ্ণাদীহি কতং ৰাতপ্পহারেন পরিব্ভমনচক্কং. পত্তাল়্হকং ৰুচ্চতি পণ্ণনাল়ি, তায ৰালুকাদীনি মিনন্তা কীল়ন্তি. রথকন্তি খুদ্দকরথং. ধনুকন্তি খুদ্দকধনুমেৰ.
ইধ খো পন ৰোতি এত্থ ৰোতি নিপাতমত্তং, ইধ খো পনাতি অত্থো. ইঙ্ঘ ত্ৰং, উপালি, সঙ্ঘে ৰিহরাহীতি এত্থ ইঙ্ঘাতি চোদনত্থে নিপাতো. তেন থেরং সঙ্ঘমজ্ঝে ৰিহারত্থায চোদেতি, নাস্স অরঞ্ঞৰাসং অনুজানাতি. কস্মা? অরঞ্ঞসেনাসনে ৰসতো কিরস্স ৰাসধুরমেৰ পূরিস্সতি, ন গন্থধুরং. সঙ্ঘমজ্ঝে ৰসন্তো পন দ্ৰে ধুরানি পূরেত্ৰা অরহত্তং পাপুণিস্সতি, ৰিনযপিটকে চ পামোক্খো ভৰিস্সতি. অথস্সাহং পরিসমজ্ঝে পুব্বপত্থনং পুব্বাভিনীহারঞ্চ কথেত্ৰা ইমং ভিক্খুং ৰিনযধরানং অগ্গট্ঠানে ঠপেস্সামীতি ইমমত্থং পস্সমানো সত্থা থেরস্স অরঞ্ঞৰাসং নানুজানীতি. দসমং উত্তানত্থমেৰাতি.
উপালিৰগ্গো পঞ্চমো.
দুতিযপণ্ণাসকং নিট্ঠিতং.