৫. উত্তিযসুত্তৰণ্ণনা

৯৫. পঞ্চমে তুণ্হী অহোসীতি সত্তূপলদ্ধিযং ঠত্ৰা অপুচ্ছং পুচ্ছতীতি তুণ্হী অহোসি. সব্বসামুক্কংসিকং ৰত মেতি মযা সব্বপুচ্ছানং উত্তমপুচ্ছং পুচ্ছিতো সমণো গোতমো সংসাদেতি নো ৰিস্সজ্জেতি, নূন ন ৰিসহতি ন সক্কোতি ৰিস্সজ্জেতুন্তি এৰং পাপিকং দিট্ঠিং মা পটিলভীতি. তদস্সাতি তং এৰং উপ্পন্নং দিট্ঠিগতং ভৰেয্য. পচ্চন্তিমন্তি যস্মা মজ্ঝিমদেসে নগরস্স উদ্ধাপাদীনি থিরানি ৰা হোন্তু দুব্বলানি ৰা, সব্বসো ৰা পন মা হোন্তু, চোরাসঙ্কা ন হোতি. তস্মা তং অগ্গহেত্ৰা ‘‘পচ্চন্তিমং নগর’’ন্তি আহ. দল়্হুদ্ধাপন্তি থিরপাকারপাদং. দল়্হপাকারতোরণন্তি থিরপাকারঞ্চেৰ থিরপিট্ঠিসঙ্ঘাটঞ্চ. একদ্ৰারন্তি কস্মা আহ? বহুদ্ৰারস্মিঞ্হি নগরে বহূহি পণ্ডিতদোৰারিকেহি ভৰিতব্বং, একদ্ৰারে একোৰ ৰট্টতি. তথাগতস্স চ পঞ্ঞায অঞ্ঞো সদিসো নত্থি. তস্মা সত্থু পণ্ডিতভাৰস্স ওপম্মত্থং একংযেৰ দোৰারিকং দস্সেতুং ‘‘একদ্ৰার’’ন্তি আহ. পণ্ডিতোতি পণ্ডিচ্চেন সমন্নাগতো. ব্যত্তোতি ৰেয্যত্তিযেন সমন্নাগতো. মেধাৰীতি ঠানুপ্পত্তিযপঞ্ঞাসঙ্খাতায মেধায সমন্নাগতো. অনুপরিযাযপথন্তি অনুপরিযাযনামকং মগ্গং. পাকারসন্ধিন্তি দ্ৰিন্নং ইট্ঠকানং অপগতট্ঠানং. পাকারৰিৰরন্তি পাকারস্স ছিন্নট্ঠানং. তদেৰেতং পঞ্হন্তি তংযেৰ ‘‘সস্সতো লোকো’’তিআদিনা নযেন পুট্ঠং ঠপনীযপঞ্হং পুনপি পুচ্ছি. সব্বো চ তেন লোকোতি সত্তূপলদ্ধিযংযেৰ ঠত্ৰা অঞ্ঞেনাকারেন পুচ্ছতীতি দস্সেতি.