৯. কোকালিকসুত্তৰণ্ণনা
৮৯. নৰমে কোকালিকো ভিক্খু যেন ভগৰা তেনুপসঙ্কমীতি কোযং কোকালিকো, কস্মা চ উপসঙ্কমি? অযং কির কোকালিকরট্ঠে কোকালিকনগরে কোকালিকসেট্ঠিস্স পুত্তো পব্বজিত্ৰা পিতরা কারিতে ৰিহারে ৰসতি চূল়কোকালিকোতি নামেন, ন পন দেৰদত্তস্স সিস্সো. সো হি ব্রাহ্মণপুত্তো মহাকোকালিকো নাম. ভগৰতি পন সাৰত্থিযং ৰিহরন্তে দ্ৰে অগ্গসাৰকা পঞ্চমত্তেহি ভিক্খুসতেহি সদ্ধিং জনপদচারিকং চরমানা উপকট্ঠায ৰস্সূপনাযিকায ৰিৰেকৰাসং ৰসিতুকামা তে ভিক্খূ উয্যোজেত্ৰা অত্তনো পত্তচীৰরমাদায তস্মিং জনপদে তং নগরং পত্ৰা ৰিহারং অগমিংসু. তত্থ নেসং কোকালিকো ৰত্তং অকাসি. তেপি তেন সদ্ধিং সম্মোদিত্ৰা, ‘‘আৰুসো, মযং ইধ তেমাসং ৰসিস্সাম, মা নো কস্সচি আরোচেসী’’তি পটিঞ্ঞং গহেত্ৰা ৰসিংসু. ৰসিত্ৰা পৰারণাদিৰসে পৰারেত্ৰা ‘‘গচ্ছাম মযং, আৰুসো’’তি কোকালিকং আপুচ্ছিংসু. কোকালিকো ‘‘অজ্জ, আৰুসো, একদিৰসং ৰসিত্ৰা স্ৰে গমিস্সথা’’তি ৰত্ৰা দুতিযদিৰসে নগরং পৰিসিত্ৰা মনুস্সে আমন্তেসি – ‘‘আৰুসো, তুম্হে দ্ৰে অগ্গসাৰকে ইধ আগন্ত্ৰা ৰসমানেপি ন জানাথ, ন তে কোচি পচ্চযেনপি নিমন্তেতী’’তি. নগরৰাসিনো ‘‘কহং, ভন্তে, থেরা, কস্মা নো নারোচযিত্থা’’তি? কিং, আৰুসো, আরোচিতেন, কিং ন পস্সথ দ্ৰে ভিক্খূ থেরাসনে নিসীদন্তে, এতে অগ্গসাৰকাতি. তে খিপ্পং সন্নিপতিত্ৰা সপ্পিফাণিতাদীনি চেৰ চীৰরদুস্সানি চ সংহরিংসু.
কোকালিকো চিন্তেসি – ‘‘পরমপ্পিচ্ছা অগ্গসাৰকা পযুত্তৰাচায উপ্পন্নলাভং ন সাদিযিস্সন্তি, অসাদিযন্তা ‘আৰাসিকস্স দেথা’তি ৰক্খন্তী’’তি তং লাভং গাহাপেত্ৰা থেরানং সন্তিকং অগমাসি. থেরা দিস্ৰাৰ ‘‘ইমে পচ্চযা নেৰ অম্হাকং, ন কোকালিকস্স কপ্পন্তী’’তি পটিক্খিপিত্ৰা পক্কমিংসু. কোকালিকো ‘‘কথঞ্হি নাম সযং অগ্গণ্হন্তা ময্হম্পি অদাপেত্ৰা পক্কমিস্সন্তী’’তি আঘাতং উপ্পাদেসি. তেপি ভগৰতো সন্তিকং গন্ত্ৰা ভগৰন্তং ৰন্দিত্ৰা পুন অত্তনো পরিসং আদায জনপদচারিকং চরন্তা অনুপুব্বেন তস্মিং রট্ঠে তমেৰ নগরং পচ্চাগমিংসু. নাগরা থেরে সঞ্জানিত্ৰা সহ পরিক্খারেহি দানং সজ্জেত্ৰা নগরমজ্ঝে মণ্ডপং কত্ৰা দানং অদংসু, থেরানঞ্চ পরিক্খারে উপনামেসুং. থেরা ভিক্খুসঙ্ঘস্স নিয্যাদযিংসু. তং দিস্ৰা কোকালিকো চিন্তেসি – ‘‘ইমে পুব্বে অপ্পিচ্ছা অহেসুং, ইদানি পাপিচ্ছা জাতা, পুব্বেপি অপ্পিচ্ছসন্তুট্ঠপৰিৰিত্তসদিসাৰ মঞ্ঞে’’তি থেরে উপসঙ্কমিত্ৰা, ‘‘আৰুসো, তুম্হে পুব্বে অপ্পিচ্ছা ৰিয, ইদানি পন পাপভিক্খূ জাতত্থা’’তি ৰত্ৰা ‘‘মূলট্ঠানেযেৰ নেসং পতিট্ঠং ভিন্দিস্সামী’’তি তরমানরূপো নিক্খমিত্ৰা যেন ভগৰা তেনুপসঙ্কমি. অযমেস কোকালিকো, ইমিনা চ কারণেন উপসঙ্কমীতি ৰেদিতব্বো.
ভগৰা তং তুরিততুরিতং আগচ্ছন্তং দিস্ৰাৰ আৰজ্জেন্তো অঞ্ঞাসি ‘‘অযং অগ্গসাৰকে অক্কোসিতুকামো আগতো, সক্কা নু খো পটিসেধেতু’’ন্তি. ততো ‘‘ন সক্কা পটিসেধেতুং, থেরেসু অপরজ্ঝিত্ৰা আগতো, একংসেন পন পদুমনিরযে নিব্বত্তিস্সতী’’তি দিস্ৰা ‘‘সারিপুত্তমোগ্গল্লানেপি নাম গরহন্তং সুত্ৰা ন নিসেধেতী’’তি ৰাদমোচনত্থং অরিযূপৰাদস্স চ মহাসাৰজ্জভাৰদস্সনত্থং মা হেৰন্তি তিক্খত্তুং পটিসেধেসি. তত্থ মা হেৰন্তি মা এৰং অভণি. সদ্ধাযিকোতি সদ্ধায আগমকরো পসাদাৰহো, সদ্ধাতব্বৰচনো ৰা. পচ্চযিকোতি পত্তিযাযিতব্বৰচনো.
পক্কামীতি কম্মানুভাৰেন চোদিযমানো পক্কামি. ওকাসকতঞ্হি কম্মং ন সক্কা পটিবাহিতুং. অচিরপক্কন্তস্সাতি পক্কন্তস্স সতো নচিরেনেৰ. সব্বো কাযো ফুটো অহোসীতি কেসগ্গমত্তম্পি ওকাসং অৰজ্জেত্ৰা সকলসরীরং অট্ঠীনি ভিন্দিত্ৰা উগ্গতাহি পীল়কাহি অজ্ঝোত্থটং অহোসি. যস্মা পন বুদ্ধানুভাৰেন তথারূপং কম্মং বুদ্ধানং সম্মুখীভাৰে ৰিপাকং দাতুং ন সক্কোতি, দস্সনূপচারে ৰিজহিতমত্তে দেতি, তস্মা তস্স অচিরপক্কন্তস্স পীল়কা উট্ঠহিংসু. কলাযমত্তিযোতি চণকমত্তিযো. বেলুৰসলাটুকমত্তিযোতি তরুণবেলুৰমত্তিযো. পভিজ্জিংসূতি ভিজ্জিংসু. তাসু ভিন্নাসু সকলসরীরং পনসপক্কং ৰিয অহোসি. সো পক্কেন গত্তেন জেতৰনদ্ৰারকোট্ঠকে ৰিসগিলিতো মচ্ছো ৰিয কদলিপত্তেসু নিপজ্জি. অথ ধম্মস্সৰনত্থং আগতাগতা মনুস্সা ‘‘ধি কোকালিক, ধি কোকালিক, অযুত্তমকাসি, অত্তনোযেৰ মুখং নিস্সায অনযব্যসনং পত্তোসী’’তি আহংসু. তেসং সদ্দং সুত্ৰা আরক্খদেৰতা ধিক্কারমকংসু, আরক্খদেৰতানং আকাসদেৰতাতি ইমিনা উপাযেন যাৰ অকনিট্ঠভৰনা একধিক্কারো উদপাদি.
তুরূতি কোকালিকস্স উপজ্ঝাযো তুরুত্থেরো নাম অনাগামিফলং ৰত্ৰা ব্রহ্মলোকে নিব্বত্তো. সো ভুম্মট্ঠদেৰতা আদিং কত্ৰা ‘‘অযুত্তং কোকালিকেন কতং অগ্গসাৰকে অন্তিমৰত্থুনা অব্ভাচিক্খন্তেনা’’তি পরম্পরায ব্রহ্মলোকসম্পত্তং তং সদ্দং সুত্ৰা ‘‘মা ময্হং পস্সন্তস্সেৰ ৰরাকো নস্সি, ওৰদিস্সামি নং থেরেসু চিত্তপ্পসাদত্থাযা’’তি আগন্ত্ৰা তস্স পুরতো অট্ঠাসি. তং সন্ধাযেতং ৰুত্তং – ‘‘তুরূ পচ্চেকব্রহ্মা’’তি. পেসলাতি পিযসীলা. কোসি ত্ৰং, আৰুসোতি নিসিন্নকোৰ কবরক্খীনি উম্মীলেত্ৰা এৰমাহ. পস্স যাৰঞ্চ তে ইদং অপরদ্ধতি যত্তকং তযা অপরদ্ধং, অত্তনো নলাটে মহাগণ্ডং অপস্সন্তো সাসপমত্তায পীল়কায মং চোদেতব্বং মঞ্ঞসীতি আহ.
অথ নং ‘‘অদিট্ঠিপ্পত্তো অযং কোকালিকো, গিলিতৰিসো ৰিয ন কস্সচি ৰচনং ন করিস্সতী’’তি ঞত্ৰা পুরিসস্স হীতিআদিমাহ. তত্থ কুঠারীতি কুঠারিসদিসা ফরুসৰাচা. ছিন্দতীতি কুসলমূলসঙ্খাতে মূলেযেৰ নিকন্ততি. নিন্দিযন্তি নিন্দিতব্বং দুস্সীলপুগ্গলং. পসংসতীতি উত্তমত্থে সম্ভাৰেত্ৰা খীণাসৰোতি ৰদতি. তং ৰা নিন্দতি যো পসংসিযোতি যো ৰা পসংসিতব্বো খীণাসৰো, তং অন্তিমৰত্থুনা চোদেন্তো ‘‘দুস্সীলো অয’’ন্তি ৰদতি. ৰিচিনাতি মুখেন সো কলিন্তি সো তং অপরাধং মুখেন ৰিচিনাতি নাম. কলিনা তেনাতি তেন অপরাধেন সুখং ন ৰিন্দতি. নিন্দিযপসংসায হি পসংসিযনিন্দায চ সমকোৰ ৰিপাকো.
সব্বস্সাপি সহাপি অত্তনাতি সব্বেন সকেন ধনেনপি অত্তনাপি সদ্ধিং যো অক্খেসু ধনপরাজযো নাম, অযং অপ্পমত্তকো অপরাধো. যো সুগতেসূতি যো পন সম্মগ্গতেসু পুগ্গলেসু চিত্তং দূসেয্য, অযং চিত্তপদোসোৰ ততো কলিতো মহন্ততরো কলি.
ইদানি তস্স মহন্ততরভাৰং দস্সেন্তো সতং সহস্সানন্তিআদিমাহ. তত্থ সতং সহস্সানন্তি নিরব্বুদগণনায সতসহস্সঞ্চ. ছত্তিংসতীতি অপরানি ছত্তিংসতি নিরব্বুদানি. পঞ্চ চাতি অব্বুদগণনায পঞ্চ অব্বুদানি. যমরিযগরহীতি যং অরিযে গরহন্তো নিরযং উপপজ্জতি, তত্থ এত্তকং আযুপ্পমাণন্তি অত্থো.
কালমকাসীতি উপজ্ঝাযে পক্কন্তে কালং অকাসি. পদুমনিরযন্তি পাটিযেক্কো পদুমনিরযো নাম নত্থি, অৰীচিমহানিরযস্মিংযেৰ পন পদুমগণনায পচ্চিতব্বে একস্মিং ঠানে নিব্বত্তি.
ৰীসতিখারিকোতি মাগধকেন পত্থেন চত্তারো পত্থা, কোসলরট্ঠে একো পত্থো হোতি. তেন পত্থেন চত্তারো পত্থা আল়্হকং, চত্তারি আল়্হকানি দোণং, চতুদোণা মানিকা, চতুমানিকা খারী, তায খারিযা ৰীসতিখারিকো. তিলৰাহোতি মাগধকানং সুখুমতিলানং তিলসকটং. অব্বুদো নিরযোতি অব্বুদো নাম পাটিযেক্কো নিরযো নত্থি, অৰীচিম্হিযেৰ পন অব্বুদগণনায পচ্চিতব্বট্ঠানস্সেতং নামং. নিরব্বুদাদীসুপি এসেৰ নযো.
ৰস্সগণনাপি পনেত্থ এৰং ৰেদিতব্বা – যথেৰ হি সতং সতসহস্সানি কোটি হোতি, এৰং সতং সতসহস্সকোটিযো পকোটি নাম হোতি, সতং সতসহস্সপকোটিযো কোটিপকোটি নাম, সতং সতসহস্সকোটিপকোটিযো নহুতং, সতং সতসহস্সনহুতানি নিন্নহুতং, সতং সতসহস্সনিন্নহুতানি একং অব্বুদং, ততো ৰীসতিগুণং নিরব্বুদং, এস নযো সব্বত্থাতি. দসমং হেট্ঠা ৰুত্তনযেনেৰ ৰেদিতব্বং. সেসং সব্বত্থ উত্তানত্থমেৰাতি.
থেরৰগ্গো চতুত্থো.