৫. মিগসালাসুত্তৰণ্ণনা

৭৫. পঞ্চমস্স আদিম্হি তাৰ যং ৰত্তব্বং, তং ছক্কনিপাতে ৰুত্তমেৰ. দুস্সীলো হোতীতিআদীসু পন দুস্সীলোতি নিস্সীলো. চেতোৰিমুত্তিন্তি ফলসমাধিং. পঞ্ঞাৰিমুত্তিন্তি ফলঞাণং. নপ্পজানাতীতি উগ্গহপরিপুচ্ছাৰসেন ন জানাতি. দুস্সীল্যং অপরিসেসং নিরুজ্ঝতীতি এত্থ পঞ্চ দুস্সীল্যানি তাৰ সোতাপত্তিমগ্গেন পহীযন্তি, দস অরহত্তমগ্গেন. ফলক্খণে তানি পহীনানি নাম হোন্তি. ফলক্খণং সন্ধায ইধ ‘‘নিরুজ্ঝতী’’তি ৰুত্তং. পুথুজ্জনস্স সীলং পঞ্চহি কারণেহি ভিজ্জতি পারাজিকাপজ্জনেন সিক্খাপচ্চক্খানেন তিত্থিযপক্খন্দনেন অরহত্তেন মরণেনাতি. তত্থ পুরিমা তযো ভাৰনাপরিহানায সংৰত্তন্তি, চতুত্থো ৰড্ঢিযা, পঞ্চমো নেৰ হানায ন ৰড্ঢিযা. কথং পনেতং অরহত্তেন সীলং ভিজ্জতীতি? পুথুজ্জনস্স হি সীলং অচ্চন্তকুসলমেৰ হোতি, অরহত্তমগ্গো চ কুসলাকুসলকম্মক্খযায সংৰত্ততীতি এৰং তেন তং ভিজ্জতি. সৰনেনপি অকতং হোতীতি সোতব্বযুত্তকং অস্সুতং হোতি. বাহুসচ্চেনপি অকতং হোতীতি এত্থ বাহুসচ্চন্তি ৰীরিযং. ৰীরিযেন কত্তব্বযুত্তকং অকতং হোতি, তস্স অকতত্তা সগ্গতোপি মগ্গতোপি পরিহাযতি. দিট্ঠিযাপি অপ্পটিৰিদ্ধং হোতীতি দিট্ঠিযা পটিৰিজ্ঝিতব্বং অপ্পটিৰিদ্ধং হোতি অপচ্চক্খকতং. সামযিকম্পি ৰিমুত্তিং ন লভতীতি কালানুকালং ধম্মস্সৰনং নিস্সায পীতিপামোজ্জং ন লভতি. হানায পরেতীতি হানায পৰত্ততি.

যথাভূতং পজানাতীতি ‘‘সোতাপত্তিফলং পত্ৰা পঞ্চৰিধং দুস্সীল্যং অপরিসেসং নিরুজ্ঝতী’’তি উগ্গহপরিপুচ্ছাৰসেন জানাতি. তস্স সৰনেনপি কতং হোতীতি সোতব্বযুত্তকং সুতং হোতি. বাহুসচ্চেনপি কতং হোতীতি ৰীরিযেন কত্তব্বযুত্তকং অন্তমসো দুব্বলৰিপস্সনামত্তকম্পি কতং হোতি. দিট্ঠিযাপি সুপ্পটিৰিদ্ধং হোতীতি অন্তমসো লোকিযপঞ্ঞাযপি পচ্চযপটিৰেধো কতো হোতি. ইমস্স হি পুগ্গলস্স পঞ্ঞা সীলং পরিধোৰতি, সো পঞ্ঞাপরিধোতেন ৰিসেসং পাপুণাতি.

পমাণিকাতি পুগ্গলেসু পমাণগ্গাহকা. পমিণন্তীতি পমেতুং তুলেতুং অরহন্তি. একো হীনোতি একো গুণেহি হীনো. পণীতোতি একো গুণেহি পণীতো উত্তমো. তং হীতি তং পমাণকরণং. অভিক্কন্ততরোতি সুন্দরতরো. পণীততরোতি উত্তমতরো. ধম্মসোতো নিব্বহতীতি সূরং হুত্ৰা পৰত্তমানং ৰিপস্সনাঞাণং নিব্বহতি, অরিযভূমিং পাপেতি. তদন্তরং কো জানেয্যাতি তং এৰং কারণং কো জানেয্য. সীলৰা হোতীতি লোকিযসীলেন সীলৰা হোতি. যত্থস্স তং সীলন্তি অরহত্তৰিমুত্তিং পত্ৰা সীলং অপরিসেসম্পি নিরুজ্ঝতি নাম, তত্থ যুত্তি ৰুত্তাযেৰ. ইতো পরেসু দ্ৰীসু অঙ্গেসু অনাগামিফলং ৰিমুত্তি নাম, পঞ্চমে অরহত্তমেৰ. সেসমেত্থ ৰুত্তনযানুসারেনেৰ ৰেদিতব্বং. ছট্ঠং উত্তানত্থমেৰ.