২. অধিৰুত্তিপদসুত্তৰণ্ণনা

২২. দুতিযে যে তে ধম্মাতি যে তে দসবলঞাণং সব্বঞ্ঞুতঞ্ঞাণধম্মা. অধিৰুত্তিপদানন্তি অধিৰচনপদানং, খন্ধাযতনধাতুধম্মানন্তি অত্থো. অধিৰুত্তিযোতি হি অধিৰচনানি ৰুচ্চন্তি, তেসং যে পদভূতা দেসনায পদট্ঠানত্তা. অতীতা বুদ্ধাপি হি এতে ধম্মে কথযিংসু, অনাগতাপি এতেৰ কথযিস্সন্তি. তস্মা খন্ধাদযো অধিৰুত্তিপদানি নাম. তেসং অধিৰুত্তিপদানং. অথ ৰা ভূতমত্থং অভিভৰিত্ৰা যথাসভাৰতো অগ্গহেত্ৰা ৰত্তনতো অধিৰুত্তিযোতি দিট্ঠিযো ৰুচ্চন্তি, অধিৰুত্তীনং পদানি অধিৰুত্তিপদানি, দিট্ঠিদীপকানি ৰচনানীতি অত্থো. তেসং অধিৰুত্তিপদানং দিট্ঠিৰোহারানং. অভিঞ্ঞা সচ্ছিকিরিযাযাতি জানিত্ৰা পচ্চক্খকরণত্থায. ৰিসারদোতি ঞাণসোমনস্সপ্পত্তো. তত্থাতি তেসু ধম্মেসু তেসং তেসং তথা তথা ধম্মং দেসেতুন্তি তেসং তেসং দিট্ঠিগতিকানং ৰা ইতরেসং ৰা আসযং ঞত্ৰা তথা তথা ধম্মং দেসেতুং. হীনং ৰা হীনন্তি ঞস্সতীতি হীনং ৰা ধম্মং ‘‘হীনো ধম্মো’’তি জানিস্সতি. ঞাতেয্যন্তি ঞাতব্বং. দট্ঠেয্যন্তি দট্ঠব্বং. সচ্ছিকরেয্যন্তি সচ্ছিকাতব্বং. তত্থ তত্থ যথাভূতঞাণন্তি তেসু তেসু ধম্মেসু যথাসভাৰঞাণং. ইমিনা সব্বঞ্ঞুতঞ্ঞাণং দস্সেতি. এৰং সব্বঞ্ঞুতঞ্ঞাণং দস্সেত্ৰা পুন দসবলঞাণং দস্সেন্তো দসযিমানীতিআদিমাহ. দসবলঞাণম্পি হি তত্থ তত্থ যথাভূতঞাণমেৰাতি.