মহাকচ্চানত্থেরৰত্থু

১৯৭. দসমে সংখিত্তেন ভাসিতস্সাতি সংখিত্তেন কথিতধম্মস্স. ৰিত্থারেন অত্থং ৰিভজন্তানন্তি তং দেসনং ৰিত্থারেত্ৰা অত্থং ৰিভজমানানং. অঞ্ঞে কির তথাগতস্স সঙ্খেপৰচনং অত্থৰসেন ৰা পূরেতুং সক্কোন্তি ব্যঞ্জনৰসেন ৰা, অযং পন থেরো উভযৰসেনপি সক্কোতি. তস্মা অগ্গোতি ৰুত্তো. পুব্বপত্থনাপি চস্স এৰরূপাৰ.

অযং পনস্স পঞ্হকম্মে অনুপুব্বিকথা – অযং কির পদুমুত্তরসম্মাসম্বুদ্ধকালে গহপতিমহাসালকুলে নিব্বত্তিত্ৰা ৰুদ্ধিপ্পত্তো একদিৰসং ৰুত্তনযেনেৰ ৰিহারং গন্ত্ৰা পরিসপরিযন্তে ঠিতো ধম্মং সুণন্তো সত্থারং অত্তনা সংখিত্তেন ভাসিতস্স ৰিত্থারেন অত্থং ৰিভজন্তানং অগ্গট্ঠানে ঠপেন্তং একং ভিক্খুং দিস্ৰা ‘‘মহন্তো ৰতাযং ভিক্খু, যং সত্থা এৰং ৰণ্ণেতি, মযাপি অনাগতে একস্স বুদ্ধস্স সাসনে এৰরূপেন ভৰিতুং ৰট্টতী’’তি সত্থারং নিমন্তেত্ৰা ৰুত্তনযেনেৰ সত্তাহং মহাদানং দত্ৰা, ‘‘ভন্তে, অহং ইমস্স সক্কারস্স ফলেন ন অঞ্ঞং সম্পত্তিং পত্থেমি, অনাগতে পন একস্স বুদ্ধস্স সাসনে ইতো সত্তদিৰসমত্থকে তুম্হেহি ঠানন্তরে ঠপিতভিক্খু ৰিয অহম্পি তং ঠানন্তরং লভেয্য’’ন্তি পত্থনং কত্ৰা পাদমূলে নিপজ্জি. সত্থা অনাগতং ওলোকেন্তো ‘‘সমিজ্ঝিস্সতি ইমস্স কুলপুত্তস্স পত্থনা’’তি দিস্ৰা ‘‘অম্ভো, কুলপুত্ত, অনাগতে কপ্পসতসহস্সাৰসানে গোতমো নাম বুদ্ধো উপ্পজ্জিস্সতি, ত্ৰং তস্স সাসনে সংখিত্তেন ভাসিতস্স ৰিত্থারেন অত্থং ৰিভজন্তানং অগ্গো ভৰিস্সসী’’তি ব্যাকরিত্ৰা অনুমোদনং কত্ৰা পক্কামি.

সোপি কুলপুত্তো যাৰজীৰং কুসলং কত্ৰা কপ্পসতসহস্সং দেৰমনুস্সেসু সংসরিত্ৰা কস্সপবুদ্ধকালে বারাণসিযং কুলগেহে পটিসন্ধিং গহেত্ৰা সত্থরি পরিনিব্বুতে সুৰণ্ণচেতিযকরণট্ঠানং গন্ত্ৰা সতসহস্সগ্ঘনিকায সুৰণ্ণিট্ঠকায পূজং কত্ৰা ‘‘ভগৰা ময্হং নিব্বত্তনিব্বত্তট্ঠানে সরীরং সুৰণ্ণৰণ্ণং হোতূ’’তি পত্থনং অকাসি. ততো যাৰজীৰং কুসলকম্মং কত্ৰা একং বুদ্ধন্তরং দেৰমনুস্সেসু সংসরিত্ৰা অম্হাকং দসবলস্স উপ্পত্তিকালে উজ্জেনিনগরে পুরোহিতস্স গেহে নিব্বত্তি. তস্স নামগ্গহণদিৰসে ‘‘ময্হং পুত্তো সুৰণ্ণৰণ্ণসরীরো অত্তনাৰ অত্তনো নামং গহেত্ৰা আগতো’’তি কঞ্চনমাণৰোতেৰস্স নামং অকংসু. সো ৰুদ্ধিমন্ৰায তযো ৰেদে উগ্গণ্হিত্ৰা পিতু অচ্চযেন পুরোহিতট্ঠানং লভি. সো গোত্তৰসেন কচ্চানো নাম জাতো.

চণ্ডপজ্জোতরাজা অমচ্চে সন্নিপাতেত্ৰা আহ – ‘‘বুদ্ধো লোকে নিব্বত্তো, তং আনেতুং সমত্থা গন্ত্ৰা আনেথ তাতা’’তি. দেৰ, অঞ্ঞো দসবলং আনেতুং সমত্থো নাম নত্থি, আচরিযো কচ্চানব্রাহ্মণোৰ সমত্থো, তং পহিণথাতি. রাজা তং পক্কোসাপেত্ৰা, ‘‘তাত, দসবলস্স সন্তিকং গচ্ছাহী’’তি আহ. গন্ত্ৰা পব্বজিতুং লভন্তো গমিস্সামি, মহারাজাতি. যংকিঞ্চি কত্ৰা তথাগতং আনেহি, তাতাতি. সো ‘‘বুদ্ধানং সন্তিকং গচ্ছন্তস্স মহাপরিসায কম্মং নত্থী’’তি অত্তট্ঠমো অগমাসি. অথস্স সত্থা ধম্মং দেসেসি. দেসনাপরিযোসানে সদ্ধিং সত্তহি জনেহি সহ পটিসম্ভিদাহি অরহত্তং পাপুণি. সত্থা ‘‘এথ ভিক্খৰো’’তি হত্থং পসারেসি. তংখণংযেৰ সব্বেৰ অন্তরহিতকেসমস্সূ ইদ্ধিমযপত্তচীৰরধরা ৰস্সসট্ঠিকত্থেরা ৰিয জাতা.

থেরো অত্তনো কিচ্চে মত্থকং পত্তে তুণ্হীভাৰেন অনিসীদিত্ৰা কাল়ুদাযিত্থেরো ৰিয সত্থু উজ্জেনিগমনত্থায গমনৰণ্ণং কথেসি. সত্থা তস্স ৰচনং সুত্ৰা ‘‘কচ্চানো অত্তনো জাতিভূমিযং মম গমনং পচ্চাসীসতী’’তি অঞ্ঞাসি. বুদ্ধা চ নাম একং কারণং পটিচ্চ গন্তুং অযুত্তট্ঠানং ন গচ্ছন্তি. তস্মা থেরং আহ – ‘‘ত্ৰংযেৰ ভিক্খু গচ্ছ, তযি গতেপি রাজা পসীদিস্সতী’’তি. থেরো ‘‘বুদ্ধানং দ্ৰে কথা নাম নত্থী’’তি তথাগতং ৰন্দিত্ৰা অত্তনা সদ্ধিং আগতেহি সত্তহি ভিক্খূহি সদ্ধিং উজ্জেনিং গচ্ছন্তো অন্তরামগ্গে তেলপনাল়ি নাম নিগমো, তত্থ পিণ্ডায চরি. তস্মিং চ নিগমে দ্ৰে সেট্ঠিধীতরো. তাসু একা পরিজিণ্ণকুলে নিব্বত্তা দুগ্গতা মাতাপিতূনং অচ্চযেন ধাতিং নিস্সায জীৰতি. অত্তভাৰো পনস্সা সমিদ্ধো, কেসা অঞ্ঞাহি অতিৰিয দীঘা. তস্মিংযেৰ নিগমে অঞ্ঞা ইস্সরসেট্ঠিকুলস্স ধীতা নিক্কেসিকা. সা ততো পুব্বে তস্সা সমীপং পেসেত্ৰা ‘‘সতং ৰা সহস্সং ৰা দস্সামী’’তি ৰত্ৰাপি কেসে আহরাপেতুং নাসক্খি.

তস্মিং পন দিৰসে সা সেট্ঠিধীতা মহাকচ্চানত্থেরং সত্তহি ভিক্খূহি পরিৰুতং তুচ্ছপত্তং আগচ্ছন্তং দিস্ৰা ‘‘অযং সুৰণ্ণৰণ্ণো একো ব্রহ্মবন্ধুভিক্খু যথাধোতেনেৰ পত্তেন আগচ্ছতি, ময্হঞ্চ অঞ্ঞং ধনং নত্থি. অসুকসেট্ঠিধীতা পন ইমেসং কেসানং অত্থায পেসেসি. ইদানি ইতো লদ্ধউপ্পাদেন সক্কা থেরস্স দেয্যধম্মং দাতু’’ন্তি ধাতিং পেসেত্ৰা থেরে নিমন্তেত্ৰা অন্তোগেহে নিসীদাপেসি. থেরানং নিসিন্নকালে গব্ভং পৰিসিত্ৰা ধাতিযা অত্তনো কেসে কপ্পাপেত্ৰা, ‘‘অম্ম, ইমে কেসে অসুকায নাম সেট্ঠিধীতায দত্ৰা যং সা দেতি, তং আহর, অয্যানং পিণ্ডপাতং দস্সামা’’তি. ধাতি পিট্ঠিহত্থেন অস্সূনি পুঞ্ছিত্ৰা একেন হত্থেন হদযমংসং সন্ধারেত্ৰা থেরানং সন্তিকে পটিচ্ছাদেত্ৰা তে কেসে আদায তস্সা সেট্ঠিধীতায সন্তিকং গতা.

পণিযং নাম সারৰন্তম্পি সযং উপনীতং গারৰং ন জনেতি, তস্মা সা সেট্ঠিধীতা চিন্তেসি – ‘‘অহং পুব্বে বহুনাপি ধনেন ইমে কেসে আহরাপেতুং নাসক্খিং, ইদানি পন ছিন্নকালতো পট্ঠায ন যথামূলমেৰ লভিস্সতী’’তি. ধাতিং আহ – ‘‘অহং পুব্বে তৰ সামিনিং বহুনাপি ধনেন কেসে আহরাপেতুং নাসক্খিং, যত্থ কত্থচি ৰিনিপাতা পন নিজ্জীৰকেসা নাম অট্ঠ কহাপণে অগ্ঘন্তী’’তি অট্ঠেৰ কহাপণে অদাসি. ধাতি কহাপণে আহরিত্ৰা সেট্ঠিধীতায অদাসি. সেট্ঠিধীতা একেকং পিণ্ডপাতং একেককহাপণগ্ঘনকং কত্ৰা থেরানং দাপেসি. থেরো আৰজ্জিত্ৰা সেট্ঠিধীতায উপনিস্সযং দিস্ৰা ‘‘কহং সেট্ঠিধীতা’’তি পুচ্ছি. গব্ভে, অয্যাতি. পক্কোসথ নন্তি. সা চ থেরেসু গারৰেন একৰচনেনেৰ আগন্ত্ৰা থেরে ৰন্দিত্ৰা বলৰসদ্ধং উপ্পাদেসি. সুখেত্তে পতিট্ঠিতপিণ্ডপাতো দিট্ঠেৰ ধম্মে ৰিপাকং দেতীতি সহ থেরানং ৰন্দনেন কেসা পকতিভাৰেযেৰ অট্ঠংসু. থেরাপি তং পিণ্ডপাতং গহেত্ৰা পস্সন্তিযাযেৰ সেট্ঠিধীতায ৰেহাসং অব্ভুগ্গন্ত্ৰা কঞ্চনৰনুয্যানে ওতরিংসু.

উয্যানপালো থেরং দিস্ৰা রঞ্ঞো সন্তিকং গন্ত্ৰা ‘‘দেৰ, মে অয্যো পুরোহিতো কচ্চানো পব্বজিত্ৰা উয্যানমাগতো’’তি আহ. রাজা চণ্ডপজ্জোতো উয্যানং গন্ত্ৰা কতভত্তকিচ্চং থেরং পঞ্চপতিট্ঠিতেন ৰন্দিত্ৰা একমন্তং নিসিন্নো ‘‘কহং, ভন্তে, ভগৰা’’তি পুচ্ছি. সত্থা সযং অনাগন্ত্ৰা মং পেসেসি মহারাজাতি. কহং, ভন্তে, অজ্জ ভিক্খং অলত্থাতি? থেরো রঞ্ঞো পুচ্ছাসভাগেন সব্বং সেট্ঠিধীতায কতং দুক্করং আরোচেসি. রাজা থেরস্স ৰসনট্ঠানং পটিযাদেত্ৰা থেরং নিমন্তেত্ৰা নিৰেসনং গন্ত্ৰা সেট্ঠিধীতরং আণাপেত্ৰা অগ্গমহেসিট্ঠানে ঠপেসি. ইমিস্সা ইত্থিযা দিট্ঠধম্মিকোৰ যসপটিলাভো অহোসি.

ততো পট্ঠায রাজা থেরস্স মহাসক্কারং করোতি. থেরস্স ধম্মকথায পসীদিত্ৰা মহাজনো থেরস্স সন্তিকে পব্বজি. ততো পট্ঠায সকলনগরং এককাসাৰপজ্জোতং ইসিৰাতপটিৰাতং অহোসি. সাপি দেৰী গব্ভং লভিত্ৰা দসমাসচ্চযেন পুত্তং ৰিজাযি. তস্স নামগ্গহণদিৰসে গোপালকুমারোতি মাতামহসেট্ঠিনো নামং অকংসু. সা পুত্তস্স নামৰসেন গোপালমাতা নাম দেৰী জাতা. সা দেৰী থেরে অতিৰিয পসীদিত্ৰা রাজানং সম্পটিচ্ছাপেত্ৰা কঞ্চনৰনুয্যানে থেরস্স ৰিহারং কারেসি. থেরো উজ্জেনিনগরং পসাদেত্ৰা পুন সত্থু সন্তিকং গতো. অথ সত্থা অপরভাগে জেতৰনে ৰিহরন্তো মধুপিণ্ডিকসুত্তং (ম. নি. ১.১৯৯ আদযো) কচ্চানপেয্যালং (ম. নি. ৩.২৭৯ আদযো) পারাযনসুত্তন্তি ইমে তযো সুত্তন্তে অট্ঠুপ্পত্তিং কত্ৰা থেরং সংখিত্তেন ভাসিতস্স ৰিত্থারেন অত্থং ৰিভজন্তানং অগ্গট্ঠানে ঠপেসীতি.

পঠমৰগ্গৰণ্ণনা.