(১) পচ্চুপ্পন্নৰারো

(ক) অনুলোমপুগ্গলো

১৯. (ক) যস্স কাযসঙ্খারো উপ্পজ্জতি তস্স ৰচীসঙ্খারো উপ্পজ্জতীতি?

ৰিনা ৰিতক্কৰিচারেহি অস্সাসপস্সাসানং উপ্পাদক্খণে তেসং কাযসঙ্খারো উপ্পজ্জতি, নো চ তেসং ৰচীসঙ্খারো উপ্পজ্জতি. পঠমজ্ঝানং সমাপন্নানং কামাৰচরানং অস্সাসপস্সাসানং উপ্পাদক্খণে তেসং কাযসঙ্খারো চ উপ্পজ্জতি ৰচীসঙ্খারো চ উপ্পজ্জতি.

(খ) যস্স ৰা পন ৰচীসঙ্খারো উপ্পজ্জতি তস্স কাযসঙ্খারো উপ্পজ্জতীতি?

ৰিনা অস্সাসপস্সাসেহি ৰিতক্কৰিচারানং উপ্পাদক্খণে তেসং ৰচীসঙ্খারো উপ্পজ্জতি, নো চ তেসং কাযসঙ্খারো উপ্পজ্জতি. পঠমজ্ঝানং সমাপন্নানং কামাৰচরানং অস্সাসপস্সাসানং উপ্পাদক্খণে তেসং ৰচীসঙ্খারো চ উপ্পজ্জতি কাযসঙ্খারো চ উপ্পজ্জতি.

(ক) যস্স কাযসঙ্খারো উপ্পজ্জতি তস্স চিত্তসঙ্খারো উপ্পজ্জতীতি? আমন্তা.

(খ) যস্স ৰা পন চিত্তসঙ্খারো উপ্পজ্জতি তস্স কাযসঙ্খারো উপ্পজ্জতীতি?

ৰিনা অস্সাসপস্সাসেহি চিত্তস্স উপ্পাদক্খণে তেসং চিত্তসঙ্খারো উপ্পজ্জতি, নো চ তেসং কাযসঙ্খারো উপ্পজ্জতি. অস্সাসপস্সাসানং উপ্পাদক্খণে তেসং চিত্তসঙ্খারো চ উপ্পজ্জতি কাযসঙ্খারো চ উপ্পজ্জতি.

২০. (ক) যস্স ৰচীসঙ্খারো উপ্পজ্জতি তস্স চিত্তসঙ্খারো উপ্পজ্জতীতি? আমন্তা.

(খ) যস্স ৰা পন চিত্তসঙ্খারো উপ্পজ্জতি তস্স ৰচীসঙ্খারো উপ্পজ্জতীতি?

ৰিনা ৰিতক্কৰিচারেহি চিত্তস্স উপ্পাদক্খণে তেসং চিত্তসঙ্খারো উপ্পজ্জতি, নো চ তেসং ৰচীসঙ্খারো উপ্পজ্জতি. ৰিতক্কৰিচারানং উপ্পাদক্খণে তেসং চিত্তসঙ্খারো চ উপ্পজ্জতি ৰচীসঙ্খারো চ উপ্পজ্জতি.

(খ) অনুলোমওকাসো

২১. (ক) যত্থ কাযসঙ্খারো উপ্পজ্জতি তত্থ ৰচীসঙ্খারো উপ্পজ্জতীতি?

দুতিযজ্ঝানে ততিযজ্ঝানে তত্থ কাযসঙ্খারো উপ্পজ্জতি, নো চ তত্থ ৰচীসঙ্খারো উপ্পজ্জতি. পঠমজ্ঝানে কামাৰচরে তত্থ কাযসঙ্খারো চ উপ্পজ্জতি ৰচীসঙ্খারো চ উপ্পজ্জতি.

(খ) যত্থ ৰা পন ৰচীসঙ্খারো উপ্পজ্জতি তত্থ কাযসঙ্খারো উপ্পজ্জতীতি?

রূপাৰচরে অরূপাৰচরে তত্থ ৰচীসঙ্খারো উপ্পজ্জতি, নো চ তত্থ কাযসঙ্খারো উপ্পজ্জতি. পঠমজ্ঝানে কামাৰচরে তত্থ ৰচীসঙ্খারো চ উপ্পজ্জতি কাযসঙ্খারো চ উপ্পজ্জতি.

(ক) যত্থ কাযসঙ্খারো উপ্পজ্জতি তত্থ চিত্তসঙ্খারো উপ্পজ্জতীতি? আমন্তা.

(খ) যত্থ ৰা পন চিত্তসঙ্খারো উপ্পজ্জতি তত্থ কাযসঙ্খারো উপ্পজ্জতীতি?

চতুত্থজ্ঝানে রূপাৰচরে অরূপাৰচরে তত্থ চিত্তসঙ্খারো উপ্পজ্জতি, নো চ তত্থ কাযসঙ্খারো উপ্পজ্জতি. পঠমজ্ঝানে দুতিযজ্ঝানে ততিযজ্ঝানে কামাৰচরে তত্থ চিত্তসঙ্খারো চ উপ্পজ্জতি কাযসঙ্খারো চ উপ্পজ্জতি.

২২. (ক) যত্থ ৰচীসঙ্খারো উপ্পজ্জতি তত্থ চিত্তসঙ্খারো উপ্পজ্জতীতি? আমন্তা.

(খ) যত্থ ৰা পন চিত্তসঙ্খারো উপ্পজ্জতি তত্থ ৰচীসঙ্খারো উপ্পজ্জতীতি?

দুতিযজ্ঝানে ততিযজ্ঝানে চতুত্থজ্ঝানে তত্থ চিত্তসঙ্খারো উপ্পজ্জতি, নো চ তত্থ ৰচীসঙ্খারো উপ্পজ্জতি. পঠমজ্ঝানে কামাৰচরে রূপাৰচরে অরূপাৰচরে তত্থ চিত্তসঙ্খারো চ উপ্পজ্জতি ৰচীসঙ্খারো চ উপ্পজ্জতি.

(গ) অনুলোমপুগ্গলোকাসা

২৩. যস্স যত্থ কাযসঙ্খারো উপ্পজ্জতি…পে….

(যস্সকম্পি যস্সযত্থকম্পি সদিসং.)

(ঘ) পচ্চনীকপুগ্গলো

২৪. (ক) যস্স কাযসঙ্খারো নুপ্পজ্জতি তস্স ৰচীসঙ্খারো নুপ্পজ্জতীতি?

ৰিনা অস্সাসপস্সাসেহি ৰিতক্কৰিচারানং উপ্পাদক্খণে তেসং কাযসঙ্খারো নুপ্পজ্জতি, নো চ তেসং ৰচীসঙ্খারো নুপ্পজ্জতি. সব্বেসং চিত্তস্স ভঙ্গক্খণে ৰিনা অস্সাসপস্সাসেহি অৰিতক্কঅৰিচারচিত্তস্স উপ্পাদক্খণে নিরোধসমাপন্নানং অসঞ্ঞসত্তানং তেসং কাযসঙ্খারো চ নুপ্পজ্জতি ৰচীসঙ্খারো চ নুপ্পজ্জতি.

(খ) যস্স ৰা পন ৰচীসঙ্খারো নুপ্পজ্জতি তস্স কাযসঙ্খারো নুপ্পজ্জতীতি?

ৰিনা ৰিতক্কৰিচারেহি অস্সাসপস্সাসানং উপ্পাদক্খণে তেসং ৰচীসঙ্খারো নুপ্পজ্জতি, নো চ তেসং কাযসঙ্খারো নুপ্পজ্জতি. সব্বেসং চিত্তস্স ভঙ্গক্খণে ৰিনা অস্সাসপস্সাসেহি অৰিতক্কঅৰিচারচিত্তস্স উপ্পাদক্খণে নিরোধসমাপন্নানং অসঞ্ঞসত্তানং তেসং ৰচীসঙ্খারো চ নুপ্পজ্জতি কাযসঙ্খারো চ নুপ্পজ্জতি.

(ক) যস্স কাযসঙ্খারো নুপ্পজ্জতি তস্স চিত্তসঙ্খারো নুপ্পজ্জতীতি?

ৰিনা অস্সাসপস্সাসেহি চিত্তস্স উপ্পাদক্খণে তেসং কাযসঙ্খারো নুপ্পজ্জতি, নো চ তেসং চিত্তসঙ্খারো নুপ্পজ্জতি. সব্বেসং চিত্তস্স ভঙ্গক্খণে নিরোধসমাপন্নানং অসঞ্ঞসত্তানং তেসং কাযসঙ্খারো চ নুপ্পজ্জতি চিত্তসঙ্খারো চ নুপ্পজ্জতি.

(খ) যস্স ৰা পন চিত্তসঙ্খারো নুপ্পজ্জতি তস্স কাযসঙ্খারো নুপ্পজ্জতীতি? আমন্তা.

২৫. (ক) যস্স ৰচীসঙ্খারো নুপ্পজ্জতি তস্স চিত্তসঙ্খারো নুপ্পজ্জতীতি?

ৰিনা ৰিতক্কৰিচারেহি চিত্তস্স উপ্পাদক্খণে তেসং ৰচীসঙ্খারো নুপ্পজ্জতি, নো চ তেসং চিত্তসঙ্খারো নুপ্পজ্জতি. সব্বেসং চিত্তস্স ভঙ্গক্খণে নিরোধসমাপন্নানং অসঞ্ঞসত্তানং তেসং ৰচীসঙ্খারো চ নুপ্পজ্জতি চিত্তসঙ্খারো চ নুপ্পজ্জতি.

(খ) যস্স ৰা পন চিত্তসঙ্খারো নুপ্পজ্জতি তস্স ৰচীসঙ্খারো নুপ্পজ্জতীতি? আমন্তা.

(ঙ) পচ্চনীকওকাসো

২৬. (ক) যত্থ কাযসঙ্খারো নুপ্পজ্জতি তত্থ ৰচীসঙ্খারো নুপ্পজ্জতীতি?

রূপাৰচরে অরূপাৰচরে তত্থ কাযসঙ্খারো নুপ্পজ্জতি, নো চ তত্থ ৰচীসঙ্খারো নুপ্পজ্জতি. চতুত্থজ্ঝানে অসঞ্ঞসত্তে তত্থ কাযসঙ্খারো চ নুপ্পজ্জতি ৰচীসঙ্খারো চ নুপ্পজ্জতি.

(খ) যত্থ ৰা পন ৰচীসঙ্খারো নুপ্পজ্জতি তত্থ কাযসঙ্খারো নুপ্পজ্জতীতি?

দুতিযজ্ঝানে ততিযজ্ঝানে তত্থ ৰচীসঙ্খারো নুপ্পজ্জতি, নো চ তত্থ কাযসঙ্খারো নুপ্পজ্জতি. চতুত্থজ্ঝানে অসঞ্ঞসত্তে তত্থ ৰচীসঙ্খারো চ নুপ্পজ্জতি কাযসঙ্খারো চ নুপ্পজ্জতি.

(ক) যত্থ কাযসঙ্খারো নুপ্পজ্জতি তত্থ চিত্তসঙ্খারো নুপ্পজ্জতীতি?

চতুত্থজ্ঝানে রূপাৰচরে অরূপাৰচরে তত্থ কাযসঙ্খারো নুপ্পজ্জতি, নো চ তত্থ চিত্তসঙ্খারো নুপ্পজ্জতি. অসঞ্ঞসত্তে তত্থ কাযসঙ্খারো চ নুপ্পজ্জতি চিত্তসঙ্খারো চ নুপ্পজ্জতি.

(খ) যত্থ ৰা পন…পে…? আমন্তা.

২৭. (ক) যত্থ ৰচীসঙ্খারো নুপ্পজ্জতি তত্থ চিত্তসঙ্খারো নুপ্পজ্জতীতি?

দুতিযজ্ঝানে ততিযজ্ঝানে চতুত্থজ্ঝানে তত্থ ৰচীসঙ্খারো নুপ্পজ্জতি, নো চ তত্থ চিত্তসঙ্খারো নুপ্পজ্জতি. অসঞ্ঞসত্তে তত্থ ৰচীসঙ্খারো চ নুপ্পজ্জতি চিত্তসঙ্খারো চ নুপ্পজ্জতি.

(খ) যত্থ ৰা পন…পে…? আমন্তা.

(চ) পচ্চনীকপুগ্গলোকাসা

২৮. (ক) যস্স যত্থ কাযসঙ্খারো নুপ্পজ্জতি তস্স তত্থ ৰচীসঙ্খারো নুপ্পজ্জতীতি?

ৰিনা অস্সাসপস্সাসেহি ৰিতক্কৰিচারানং উপ্পাদক্খণে তেসং তত্থ কাযসঙ্খারো নুপ্পজ্জতি, নো চ তেসং তত্থ ৰচীসঙ্খারো নুপ্পজ্জতি. সব্বেসং চিত্তস্স ভঙ্গক্খণে ৰিনা অস্সাসপস্সাসেহি অৰিতক্কঅৰিচারচিত্তস্স উপ্পাদক্খণে অসঞ্ঞসত্তানং তেসং তত্থ কাযসঙ্খারো চ নুপ্পজ্জতি ৰচীসঙ্খারো চ নুপ্পজ্জতি.

(খ) যস্স ৰা পন যত্থ…পে…? আমন্তা.

(যস্সকম্পি যস্সযত্থকম্পি সদিসং ৰিত্থারেতব্বং, যস্সযত্থকে নিরোধসমাপন্নানন্তি ন লব্ভতি.)