(২) অতীতৰারো

(ক) অনুলোমপুগ্গলো

২৯. (ক) যস্স কাযসঙ্খারো উপ্পজ্জিত্থ তস্স ৰচীসঙ্খারো উপ্পজ্জিত্থাতি? আমন্তা.

(খ) যস্স ৰা পন…পে…? আমন্তা.

(ক) যস্স কাযসঙ্খারো উপ্পজ্জিত্থ তস্স চিত্তসঙ্খারো উপ্পজ্জিত্থাতি? আমন্তা.

(খ) যস্স ৰা পন…পে…? আমন্তা.

৩০. (ক) যস্স ৰচীসঙ্খারো উপ্পজ্জিত্থ তস্স চিত্তসঙ্খারো উপ্পজ্জিত্থাতি? আমন্তা.

(খ) যস্স ৰা পন…পে…? আমন্তা.

(খ) অনুলোমওকাসো

৩১. যত্থ কাযসঙ্খারো উপ্পজ্জিত্থ…পে…

(যত্থকম্পি সব্বত্থ একসদিসং).

(গ) অনুলোমপুগ্গলোকাসা

৩২. (ক) যস্স যত্থ কাযসঙ্খারো উপ্পজ্জিত্থ তস্স তত্থ ৰচীসঙ্খারো উপ্পজ্জিত্থাতি?

দুতিযজ্ঝানং ততিযজ্ঝানং সমাপন্নানং তেসং তত্থ কাযসঙ্খারো উপ্পজ্জিত্থ, নো চ তেসং তত্থ ৰচীসঙ্খারো উপ্পজ্জিত্থ. পঠমজ্ঝানং সমাপন্নানং কামাৰচরানং তেসং তত্থ কাযসঙ্খারো চ উপ্পজ্জিত্থ ৰচীসঙ্খারো চ উপ্পজ্জিত্থ.

(খ) যস্স ৰা পন যত্থ ৰচীসঙ্খারো উপ্পজ্জিত্থ তস্স তত্থ কাযসঙ্খারো উপ্পজ্জিত্থাতি?

রূপাৰচরানং অরূপাৰচরানং তেসং তত্থ ৰচীসঙ্খারো উপ্পজ্জিত্থ, নো চ তেসং তত্থ কাযসঙ্খারো উপ্পজ্জিত্থ. পঠমজ্ঝানং সমাপন্নানং কামাৰচরানং তেসং তত্থ ৰচীসঙ্খারো চ উপ্পজ্জিত্থ কাযসঙ্খারো চ উপ্পজ্জিত্থ.

(ক) যস্স যত্থ কাযসঙ্খারো উপ্পজ্জিত্থ তস্স তত্থ চিত্তসঙ্খারো উপ্পজ্জিত্থাতি? আমন্তা.

(খ) যস্স ৰা পন যত্থ চিত্তসঙ্খারো উপ্পজ্জিত্থ তস্স তত্থ কাযসঙ্খারো উপ্পজ্জিত্থাতি?

চতুত্থজ্ঝানং সমাপন্নানং রূপাৰচরানং অরূপাৰচরানং তেসং তত্থ চিত্তসঙ্খারো উপ্পজ্জিত্থ, নো চ তেসং তত্থ কাযসঙ্খারো উপ্পজ্জিত্থ. পঠমজ্ঝানং দুতিযজ্ঝানং ততিযজ্ঝানং সমাপন্নানং কামাৰচরানং তেসং তত্থ চিত্তসঙ্খারো চ উপ্পজ্জিত্থ কাযসঙ্খারো চ উপ্পজ্জিত্থ.

৩৩. (ক) যস্স যত্থ ৰচীসঙ্খারো উপ্পজ্জিত্থ তস্স তত্থ চিত্তসঙ্খারো উপ্পজ্জিত্থাতি? আমন্তা.

(খ) যস্স ৰা পন যত্থ চিত্তসঙ্খারো উপ্পজ্জিত্থ তস্স তত্থ ৰচীসঙ্খারো উপ্পজ্জিত্থাতি?

দুতিযজ্ঝানং ততিযজ্ঝানং চতুত্থজ্ঝানং সমাপন্নানং সুদ্ধাৰাসানং দুতিযে চিত্তে ৰত্তমানে তেসং তত্থ চিত্তসঙ্খারো উপ্পজ্জিত্থ, নো চ তেসং তত্থ ৰচীসঙ্খারো উপ্পজ্জিত্থ. পঠমজ্ঝানং সমাপন্নানং কামাৰচরানং ইতরেসং রূপাৰচরানং অরূপাৰচরানং তেসং তত্থ চিত্তসঙ্খারো চ উপ্পজ্জিত্থ ৰচীসঙ্খারো চ উপ্পজ্জিত্থ.

(ঘ) পচ্চনীকপুগ্গলো

৩৪. (ক) যস্স কাযসঙ্খারো নুপ্পজ্জিত্থ তস্স ৰচীসঙ্খারো নুপ্পজ্জিত্থাতি? নত্থি.

(খ) যস্স ৰা পন ৰচীসঙ্খারো নুপ্পজ্জিত্থ তস্স কাযসঙ্খারো নুপ্পজ্জিত্থাতি? নত্থি.

(ক) যস্স কাযসঙ্খারো নুপ্পজ্জিত্থ তস্স চিত্তসঙ্খারো নুপ্পজ্জিত্থাতি? নত্থি.

(খ) যস্স ৰা পন…পে…? নত্থি.

৩৫. (ক) যস্স ৰচীসঙ্খারো নুপ্পজ্জিত্থ তস্স চিত্তসঙ্খারো নুপ্পজ্জিত্থাতি? নত্থি.

(খ) যস্স ৰা পন…পে…? নত্থি.

(ঙ) পচ্চনীকওকাসো

৩৬. যত্থ কাযসঙ্খারো নুপ্পজ্জিত্থ…পে….

(চ) পচ্চনীকপুগ্গলোকাসা

৩৭. (ক) যস্স যত্থ কাযসঙ্খারো নুপ্পজ্জিত্থ তস্স তত্থ ৰচীসঙ্খারো নুপ্পজ্জিত্থাতি?

রূপাৰচরানং অরূপাৰচরানং তেসং তত্থ কাযসঙ্খারো নুপ্পজ্জিত্থ, নো চ তেসং তত্থ ৰচীসঙ্খারো নুপ্পজ্জিত্থ. চতুত্থজ্ঝানং সমাপন্নানং সুদ্ধাৰাসানং দুতিযে চিত্তে ৰত্তমানে অসঞ্ঞসত্তানং তেসং তত্থ কাযসঙ্খারো চ নুপ্পজ্জিত্থ ৰচীসঙ্খারো চ নুপ্পজ্জিত্থ.

(খ) যস্স ৰা পন যত্থ ৰচীসঙ্খারো নুপ্পজ্জিত্থ তস্স তত্থ কাযসঙ্খারো নুপ্পজ্জিত্থাতি?

দুতিযজ্ঝানং ততিযজ্ঝানং সমাপন্নানং তেসং তত্থ ৰচীসঙ্খারো নুপ্পজ্জিত্থ, নো চ তেসং তত্থ কাযসঙ্খারো নুপ্পজ্জিত্থ. চতুত্থজ্ঝানং সমাপন্নানং সুদ্ধাৰাসানং দুতিযে চিত্তে ৰত্তমানে অসঞ্ঞসত্তানং তেসং তত্থ ৰচীসঙ্খারো চ নুপ্পজ্জিত্থ কাযসঙ্খারো চ নুপ্পজ্জিত্থ.

(ক) যস্স যত্থ কাযসঙ্খারো নুপ্পজ্জিত্থ তস্স তত্থ চিত্তসঙ্খারো নুপ্পজ্জিত্থাতি?

চতুত্থজ্ঝানং সমাপন্নানং রূপাৰচরানং অরূপাৰচরানং তেসং তত্থ কাযসঙ্খারো নুপ্পজ্জিত্থ, নো চ তেসং তত্থ চিত্তসঙ্খারো নুপ্পজ্জিত্থ. সুদ্ধাৰাসং উপপজ্জন্তানং অসঞ্ঞসত্তানং তেসং তত্থ কাযসঙ্খারো চ নুপ্পজ্জিত্থ চিত্তসঙ্খারো চ নুপ্পজ্জিত্থ.

(খ) যস্স ৰা পন যত্থ…পে…? আমন্তা.

৩৮. (ক) যস্স যত্থ ৰচীসঙ্খারো নুপ্পজ্জিত্থ তস্স তত্থ চিত্তসঙ্খারো নুপ্পজ্জিত্থাতি?

দুতিযজ্ঝানং ততিযজ্ঝানং চতুত্থজ্ঝানং সমাপন্নানং সুদ্ধাৰাসানং দুতিযে চিত্তে ৰত্তমানে তেসং তত্থ ৰচীসঙ্খারো নুপ্পজ্জিত্থ, নো চ তেসং তত্থ চিত্তসঙ্খারো নুপ্পজ্জিত্থ. সুদ্ধাৰাসং উপপজ্জন্তানং অসঞ্ঞসত্তানং তেসং তত্থ ৰচীসঙ্খারো চ নুপ্পজ্জিত্থ চিত্তসঙ্খারো চ নুপ্পজ্জিত্থ.

(খ) যস্স ৰা পন যত্থ…পে…? আমন্তা.