(৫) পচ্চুপ্পন্নানাগতৰারো

(ক) অনুলোমপুগ্গলো

১৪৮. (ক) যস্স কাযসঙ্খারো উপ্পজ্জতি তস্স ৰচীসঙ্খারো নিরুজ্ঝিস্সতীতি? আমন্তা.

(খ) যস্স ৰা পন ৰচীসঙ্খারো নিরুজ্ঝিস্সতি তস্স কাযসঙ্খারো উপ্পজ্জতীতি?

সব্বেসং চিত্তস্স ভঙ্গক্খণে ৰিনা অস্সাসপস্সাসেহি চিত্তস্স উপ্পাদক্খণে নিরোধসমাপন্নানং অসঞ্ঞসত্তানং তেসং ৰচীসঙ্খারো নিরুজ্ঝিস্সতি, নো চ তেসং কাযসঙ্খারো উপ্পজ্জতি. অস্সাসপস্সাসানং উপ্পাদক্খণে তেসং ৰচীসঙ্খারো চ নিরুজ্ঝিস্সতি কাযসঙ্খারো চ উপ্পজ্জতি.

(ক) যস্স কাযসঙ্খারো উপ্পজ্জতি তস্স চিত্তসঙ্খারো নিরুজ্ঝিস্সতীতি? আমন্তা.

(খ) যস্স ৰা পন চিত্তসঙ্খারো নিরুজ্ঝিস্সতি তস্স কাযসঙ্খারো উপ্পজ্জতীতি?

সব্বেসং চিত্তস্স ভঙ্গক্খণে ৰিনা অস্সাসপস্সাসেহি চিত্তস্স উপ্পাদক্খণে নিরোধসমাপন্নানং অসঞ্ঞসত্তানং তেসং চিত্তসঙ্খারো নিরুজ্ঝিস্সতি, নো চ তেসং কাযসঙ্খারো উপ্পজ্জতি. অস্সাসপস্সাসানং উপ্পাদক্খণে তেসং চিত্তসঙ্খারো চ নিরুজ্ঝিস্সতি কাযসঙ্খারো চ উপ্পজ্জতি.

১৪৯. (ক) যস্স ৰচীসঙ্খারো উপ্পজ্জতি তস্স চিত্তসঙ্খারো নিরুজ্ঝিস্সতীতি? আমন্তা.

(খ) যস্স ৰা পন চিত্তসঙ্খারো নিরুজ্ঝিস্সতি তস্স ৰচীসঙ্খারো উপ্পজ্জতীতি?

সব্বেসং চিত্তস্স ভঙ্গক্খণে ৰিনা ৰিতক্কৰিচারেহি চিত্তস্স উপ্পাদক্খণে নিরোধসমাপন্নানং অসঞ্ঞসত্তানং তেসং চিত্তসঙ্খারো নিরুজ্ঝিস্সতি, নো চ তেসং ৰচীসঙ্খারো উপ্পজ্জতি. ৰিতক্কৰিচারানং উপ্পাদক্খণে তেসং চিত্তসঙ্খারো চ নিরুজ্ঝিস্সতি ৰচীসঙ্খারো চ উপ্পজ্জতি.

(খ) অনুলোমওকাসো

১৫০. যত্থ কাযসঙ্খারো উপ্পজ্জতি…পে….

(গ) অনুলোমপুগ্গলোকাসা

১৫১. (ক) যস্স যত্থ কাযসঙ্খারো উপ্পজ্জতি তস্স তত্থ ৰচীসঙ্খারো নিরুজ্ঝিস্সতীতি?

দুতিযজ্ঝানং ততিযজ্ঝানং সমাপন্নানং অস্সাসপস্সাসানং উপ্পাদক্খণে তেসং তত্থ কাযসঙ্খারো উপ্পজ্জতি, নো চ তেসং তত্থ ৰচীসঙ্খারো নিরুজ্ঝিস্সতি. পঠমজ্ঝানং সমাপন্নানং কামাৰচরানং অস্সাসপস্সাসানং উপ্পাদক্খণে তেসং তত্থ কাযসঙ্খারো চ উপ্পজ্জতি ৰচীসঙ্খারো চ নিরুজ্ঝিস্সতি.

(খ) যস্স ৰা পন যত্থ ৰচীসঙ্খারো নিরুজ্ঝিস্সতি তস্স তত্থ কাযসঙ্খারো উপ্পজ্জতীতি?

পঠমজ্ঝানং সমাপন্নানং কামাৰচরানং অস্সাসপস্সাসানং ভঙ্গক্খণে তেসংযেৰ ৰিনা অস্সাসপস্সাসেহি চিত্তস্স উপ্পাদক্খণে রূপাৰচরানং অরূপাৰচরানং তেসং তত্থ ৰচীসঙ্খারো নিরুজ্ঝিস্সতি, নো চ তেসং তত্থ কাযসঙ্খারো উপ্পজ্জতি. পঠমজ্ঝানং সমাপন্নানং কামাৰচরানং অস্সাসপস্সাসানং উপ্পাদক্খণে তেসং তত্থ ৰচীসঙ্খারো চ নিরুজ্ঝিস্সতি কাযসঙ্খারো চ উপ্পজ্জতি.

(ক) যস্স যত্থ কাযসঙ্খারো উপ্পজ্জতি তস্স তত্থ চিত্তসঙ্খারো নিরুজ্ঝিস্সতীতি? আমন্তা.

(খ) যস্স ৰা পন যত্থ চিত্তসঙ্খারো নিরুজ্ঝিস্সতি তস্স তত্থ কাযসঙ্খারো উপ্পজ্জতীতি?

সব্বেসং চিত্তস্স ভঙ্গক্খণে ৰিনা অস্সাসপস্সাসেহি চিত্তস্স উপ্পাদক্খণে তেসং তত্থ চিত্তসঙ্খারো নিরুজ্ঝিস্সতি, নো চ তেসং তত্থ কাযসঙ্খারো উপ্পজ্জতি. অস্সাসপস্সাসানং উপ্পাদক্খণে তেসং তত্থ চিত্তসঙ্খারো চ নিরুজ্ঝিস্সতি কাযসঙ্খারো চ উপ্পজ্জতি.

১৫২. (ক) যস্স যত্থ ৰচীসঙ্খারো উপ্পজ্জতি তস্স তত্থ চিত্তসঙ্খারো নিরুজ্ঝিস্সতীতি? আমন্তা.

(খ) যস্স ৰা পন যত্থ চিত্তসঙ্খারো নিরুজ্ঝিস্সতি তস্স তত্থ ৰচীসঙ্খারো উপ্পজ্জতীতি?

সব্বেসং চিত্তস্স ভঙ্গক্খণে ৰিনা ৰিতক্কৰিচারেহি চিত্তস্স উপ্পাদক্খণে তেসং তত্থ চিত্তসঙ্খারো নিরুজ্ঝিস্সতি, নো চ তেসং তত্থ ৰচীসঙ্খারো উপ্পজ্জতি. ৰিতক্কৰিচারানং উপ্পাদক্খণে তেসং তত্থ চিত্তসঙ্খারো চ নিরুজ্ঝিস্সতি ৰচীসঙ্খারো চ উপ্পজ্জতি.

(ঘ) পচ্চনীকপুগ্গলো

১৫৩. (ক) যস্স কাযসঙ্খারো নুপ্পজ্জতি তস্স ৰচীসঙ্খারো ন নিরুজ্ঝিস্সতীতি?

সব্বেসং চিত্তস্স ভঙ্গক্খণে ৰিনা অস্সাসপস্সাসেহি চিত্তস্স উপ্পাদক্খণে নিরোধসমাপন্নানং অসঞ্ঞসত্তানং তেসং কাযসঙ্খারো নুপ্পজ্জতি, নো চ তেসং ৰচীসঙ্খারো ন নিরুজ্ঝিস্সতি. সৰিতক্কসৰিচারপচ্ছিমচিত্তস্স ভঙ্গক্খণে অৰিতক্কঅৰিচারপচ্ছিমচিত্তসমঙ্গীনং যস্স চিত্তস্স অনন্তরা অৰিতক্কঅৰিচারং পচ্ছিমচিত্তং উপ্পজ্জিস্সতি তেসং কাযসঙ্খারো চ নুপ্পজ্জতি ৰচীসঙ্খারো চ ন নিরুজ্ঝিস্সতি.

(খ) যস্স ৰা পন ৰচীসঙ্খারো ন নিরুজ্ঝিস্সতি তস্স কাযসঙ্খারো নুপ্পজ্জতীতি? আমন্তা.

(ক) যস্স কাযসঙ্খারো নুপ্পজ্জতি তস্স চিত্তসঙ্খারো ন নিরুজ্ঝিস্সতীতি?

সব্বেসং চিত্তস্স ভঙ্গক্খণে ৰিনা অস্সাসপস্সাসেহি চিত্তস্স উপ্পাদক্খণে নিরোধসমাপন্নানং অসঞ্ঞসত্তানং তেসং কাযসঙ্খারো নুপ্পজ্জতি, নো চ তেসং চিত্তসঙ্খারো ন নিরুজ্ঝিস্সতি. পচ্ছিমচিত্তস্স ভঙ্গক্খণে তেসং কাযসঙ্খারো চ নুপ্পজ্জতি চিত্তসঙ্খারো চ ন নিরুজ্ঝিস্সতি.

(খ) যস্স ৰা পন চিত্তসঙ্খারো ন নিরুজ্ঝিস্সতি তস্স কাযসঙ্খারো নুপ্পজ্জতীতি? আমন্তা.

১৫৪. (ক) যস্স ৰচীসঙ্খারো নুপ্পজ্জতি তস্স চিত্তসঙ্খারো ন নিরুজ্ঝিস্সতীতি?

সব্বেসং চিত্তস্স ভঙ্গক্খণে ৰিনা ৰিতক্কৰিচারেহি চিত্তস্স উপ্পাদক্খণে নিরোধসমাপন্নানং অসঞ্ঞসত্তানং তেসং ৰচীসঙ্খারো নুপ্পজ্জতি, নো চ তেসং চিত্তসঙ্খারো ন নিরুজ্ঝিস্সতি. পচ্ছিমচিত্তস্স ভঙ্গক্খণে তেসং ৰচীসঙ্খারো চ নুপ্পজ্জতি চিত্তসঙ্খারো চ ন নিরুজ্ঝিস্সতি.

(খ) যস্স ৰা পন চিত্তসঙ্খারো ন নিরুজ্ঝিস্সতি তস্স ৰচীসঙ্খারো নুপ্পজ্জতীতি? আমন্তা.

(ঙ) পচ্চনীকওকাসো

১৫৫. যত্থ কাযসঙ্খারো নুপ্পজ্জতি…পে….

(চ) পচ্চনীকপুগ্গলোকাসা

১৫৬. (ক) যস্স যত্থ কাযসঙ্খারো নুপ্পজ্জতি তস্স তত্থ ৰচীসঙ্খারো ন নিরুজ্ঝিস্সতীতি?

পঠমজ্ঝানং সমাপন্নানং কামাৰচরানং অস্সাসপস্সাসানং ভঙ্গক্খণে তেসংযেৰ ৰিনা অস্সাসপস্সাসেহি চিত্তস্স উপ্পাদক্খণে রূপাৰচরানং অরূপাৰচরানং তেসং তত্থ কাযসঙ্খারো নুপ্পজ্জতি, নো চ তেসং তত্থ ৰচীসঙ্খারো ন নিরুজ্ঝিস্সতি. সৰিতক্কসৰিচারপচ্ছিমচিত্তস্স ভঙ্গক্খণে অৰিতক্কঅৰিচারপচ্ছিমচিত্তসমঙ্গীনং যস্স চিত্তস্স অনন্তরা অৰিতক্কঅৰিচারং পচ্ছিমচিত্তং উপ্পজ্জিস্সতি দুতিযজ্ঝানং ততিযজ্ঝানং সমাপন্নানং অস্সাসপস্সাসানং ভঙ্গক্খণে তেসংযেৰ ৰিনা অস্সাসপস্সাসেহি চিত্তস্স উপ্পাদক্খণে চতুত্থজ্ঝানং সমাপন্নানং অসঞ্ঞসত্তানং তেসং তত্থ কাযসঙ্খারো চ নুপ্পজ্জতি ৰচীসঙ্খারো চ ন নিরুজ্ঝিস্সতি.

(খ) যস্স ৰা পন যত্থ ৰচীসঙ্খারো ন নিরুজ্ঝিস্সতি তস্স তত্থ কাযসঙ্খারো নুপ্পজ্জতীতি?

দুতিযজ্ঝানং ততিযজ্ঝানং সমাপন্নানং অস্সাসপস্সাসানং উপ্পাদক্খণে তেসং তত্থ ৰচীসঙ্খারো ন নিরুজ্ঝিস্সতি, নো চ তেসং তত্থ কাযসঙ্খারো নুপ্পজ্জতি. সৰিতক্কসৰিচারপচ্ছিমচিত্তস্স ভঙ্গক্খণে অৰিতক্কঅৰিচারপচ্ছিমচিত্তসমঙ্গীনং যস্স চিত্তস্স অনন্তরা অৰিতক্কঅৰিচারং পচ্ছিমচিত্তং উপ্পজ্জিস্সতি দুতিযজ্ঝানং ততিযজ্ঝানং সমাপন্নানং অস্সাসপস্সাসানং ভঙ্গক্খণে তেসংযেৰ ৰিনা অস্সাসপস্সাসেহি চিত্তস্স উপ্পাদক্খণে চতুত্থজ্ঝানং সমাপন্নানং অসঞ্ঞসত্তানং তেসং তত্থ ৰচীসঙ্খারো চ ন নিরুজ্ঝিস্সতি কাযসঙ্খারো চ নুপ্পজ্জতি.

(ক) যস্স যত্থ কাযসঙ্খারো নুপ্পজ্জতি তস্স তত্থ চিত্তসঙ্খারো ন নিরুজ্ঝিস্সতীতি?

সব্বেসং চিত্তস্স ভঙ্গক্খণে ৰিনা অস্সাসপস্সাসেহি চিত্তস্স উপ্পাদক্খণে তেসং তত্থ কাযসঙ্খারো নুপ্পজ্জতি, নো চ তেসং তত্থ চিত্তসঙ্খারো ন নিরুজ্ঝিস্সতি. পচ্ছিমচিত্তস্স ভঙ্গক্খণে অসঞ্ঞসত্তানং তেসং তত্থ কাযসঙ্খারো চ নুপ্পজ্জতি চিত্তসঙ্খারো চ ন নিরুজ্ঝিস্সতি.

(খ) যস্স ৰা পন যত্থ চিত্তসঙ্খারো ন নিরুজ্ঝিস্সতি তস্স তত্থ কাযসঙ্খারো নুপ্পজ্জতীতি? আমন্তা.

১৫৭. (ক) যস্স যত্থ ৰচীসঙ্খারো নুপ্পজ্জতি তস্স তত্থ চিত্তসঙ্খারো ন নিরুজ্ঝিস্সতীতি?

সব্বেসং চিত্তস্স ভঙ্গক্খণে ৰিনা ৰিতক্কৰিচারেহি চিত্তস্স উপ্পাদক্খণে তেসং তত্থ ৰচীসঙ্খারো নুপ্পজ্জতি, নো চ তেসং তত্থ চিত্তসঙ্খারো ন নিরুজ্ঝিস্সতি. পচ্ছিমচিত্তস্স ভঙ্গক্খণে অসঞ্ঞসত্তানং তেসং তত্থ ৰচীসঙ্খারো চ নুপ্পজ্জতি চিত্তসঙ্খারো চ ন নিরুজ্ঝিস্সতি.

(খ) যস্স ৰা পন যত্থ চিত্তসঙ্খারো ন নিরুজ্ঝিস্সতি তস্স তত্থ ৰচীসঙ্খারো নুপ্পজ্জতীতি? আমন্তা.