(৬) অতীতানাগতৰারো

(ক) অনুলোমপুগ্গলো

১৫৮. (ক) যস্স কাযসঙ্খারো উপ্পজ্জিত্থ তস্স ৰচীসঙ্খারো নিরুজ্ঝিস্সতীতি?

সৰিতক্কসৰিচারপচ্ছিমচিত্তস্স ভঙ্গক্খণে অৰিতক্কঅৰিচারপচ্ছিমচিত্তসমঙ্গীনং যস্স চিত্তস্স অনন্তরা অৰিতক্কঅৰিচারং পচ্ছিমচিত্তং উপ্পজ্জিস্সতি তেসং কাযসঙ্খারো উপ্পজ্জিত্থ, নো চ তেসং ৰচীসঙ্খারো নিরুজ্ঝিস্সতি. ইতরেসং তেসং কাযসঙ্খারো চ উপ্পজ্জিত্থ ৰচীসঙ্খারো চ নিরুজ্ঝিস্সতি.

(খ) যস্স ৰা পন ৰচীসঙ্খারো নিরুজ্ঝিস্সতি তস্স কাযসঙ্খারো উপ্পজ্জিত্থাতি? আমন্তা.

(ক) যস্স কাযসঙ্খারো উপ্পজ্জিত্থ তস্স চিত্তসঙ্খারো নিরুজ্ঝিস্সতীতি?

পচ্ছিমচিত্তস্স ভঙ্গক্খণে তেসং কাযসঙ্খারো উপ্পজ্জিত্থ, নো চ তেসং চিত্তসঙ্খারো নিরুজ্ঝিস্সতি. ইতরেসং তেসং কাযসঙ্খারো চ উপ্পজ্জিত্থ চিত্তসঙ্খারো চ নিরুজ্ঝিস্সতি.

(খ) যস্স ৰা পন চিত্তসঙ্খারো নিরুজ্ঝিস্সতি তস্স কাযসঙ্খারো উপ্পজ্জিত্থাতি? আমন্তা.

(যথা নিরোধৰারে অতীতানাগতা পুচ্ছা অনুলোমম্পি পচ্চনীকম্পি এৰং উপ্পাদনিরোধৰারেপি অতীতানাগতা পুচ্ছা অনুলোমম্পি পচ্চনীকম্পি ৰিভজিতব্বং অসম্মোহন্তেন নিরোধৰারেন সদিসং, নত্থি নানাকরণং.)

উপ্পাদনিরোধৰারো.