১. পদসোধনৰারো

(ক) অনুলোমং

১০. (ক) চক্খু চক্খুধাতূতি?

দিব্বচক্খু পঞ্ঞাচক্খু চক্খু, ন চক্খুধাতু. চক্খুধাতু চক্খু চেৰ চক্খুধাতু চ.

(খ) চক্খুধাতু চক্খূতি? আমন্তা.

(ক) সোতং সোতধাতূতি?

দিব্বসোতং তণ্হাসোতং সোতং, ন সোতধাতু. সোতধাতু সোতঞ্চেৰ সোতধাতু চ.

(খ) সোতধাতু সোতন্তি? আমন্তা.

(ক) ঘানং ঘানধাতূতি? আমন্তা.

(খ) ঘানধাতু ঘানন্তি? আমন্তা. (জিৰ্হাপি ঘানধাতুসদিসা).

(ক) কাযো কাযধাতূতি?

কাযধাতুং ঠপেত্ৰা অৰসেসো কাযো [অৰসেসো কাযো কাযো (স্যা.)], ন কাযধাতু. কাযধাতু কাযো চেৰ কাযধাতু চ.

(খ) কাযধাতু কাযোতি? আমন্তা.

(ক) রূপং রূপধাতূতি?

রূপধাতুং ঠপেত্ৰা অৰসেসং রূপং, ন রূপধাতু. রূপধাতু রূপঞ্চেৰ রূপধাতু চ.

(খ) রূপধাতু রূপন্তি? আমন্তা. (সদ্দো ঘানসদিসো).

(ক) গন্ধো গন্ধধাতূতি?

সীলগন্ধো সমাধিগন্ধো পঞ্ঞাগন্ধো গন্ধো, ন গন্ধধাতু. গন্ধধাতু গন্ধো চেৰ গন্ধধাতু চ.

(খ) গন্ধধাতু গন্ধোতি? আমন্তা.

(ক) রসো রসধাতূতি?

অত্থরসো ধম্মরসো ৰিমুত্তিরসো রসো, ন রসধাতু. রসধাতু রসো চেৰ রসধাতু চ.

(খ) রসধাতু রসোতি? আমন্তা. (ফোট্ঠব্বো ঘানসদিসো).

(ক) চক্খুৰিঞ্ঞাণং চক্খুৰিঞ্ঞাণধাতূতি? আমন্তা.

(খ) চক্খুৰিঞ্ঞাণধাতু চক্খুৰিঞ্ঞাণন্তি? আমন্তা.

সোতৰিঞ্ঞাণং…পে… ঘানৰিঞ্ঞাণং… জিৰ্হাৰিঞ্ঞাণং… কাযৰিঞ্ঞাণং….

(ক) মনো মনোধাতূতি?

মনোধাতুং ঠপেত্ৰা অৰসেসো মনো, ন মনোধাতু. মনোধাতু মনো চেৰ মনোধাতু চ.

(খ) মনোধাতু মনোতি? আমন্তা.

(ক) মনোৰিঞ্ঞাণং মনোৰিঞ্ঞাণধাতূতি? আমন্তা.

(খ) মনোৰিঞ্ঞাণধাতু মনোৰিঞ্ঞাণন্তি? আমন্তা.

(ক) ধম্মো ধম্মধাতূতি?

ধম্মধাতুং ঠপেত্ৰা অৰসেসো ধম্মো, ন ধম্মধাতু. ধম্মধাতু ধম্মো চেৰ ধম্মধাতু চ.

(খ) ধম্মধাতু ধম্মোতি? আমন্তা.

(খ) পচ্চনীকং

১১. (ক) ন চক্খু ন চক্খুধাতূতি? আমন্তা.

(খ) ন চক্খুধাতু ন চক্খূতি?

দিব্বচক্খু পঞ্ঞাচক্খু ন চক্খুধাতু, চক্খু. চক্খুঞ্চ চক্খুধাতুঞ্চ ঠপেত্ৰা অৰসেসং ন চেৰ চক্খু ন চ চক্খুধাতু.

(ক) ন সোতং ন সোতধাতূতি? আমন্তা.

(খ) ন সোতধাতু ন সোতন্তি?

দিব্বসোতং তণ্হাসোতং ন সোতধাতু, সোতং. সোতঞ্চ সোতধাতুঞ্চ ঠপেত্ৰা অৰসেসং ন চেৰ সোতং ন চ সোতধাতু.

(ক) ন ঘানং ন ঘানধাতূতি? আমন্তা.

(খ) ন ঘানধাতু ন ঘানন্তি? আমন্তা.

ন জিৰ্হা… (সংখিত্তং [যং সংখিত্তং (স্যা.)], উভতো আমন্তা).

(ক) ন কাযো ন কাযধাতূতি? আমন্তা.

(খ) ন কাযধাতু ন কাযোতি?

কাযধাতুং ঠপেত্ৰা অৰসেসো ন কাযধাতু, কাযো. কাযঞ্চ কাযধাতুঞ্চ ঠপেত্ৰা অৰসেসো [অৰসেসো কাযো (স্যা.)] ন চেৰ কাযো ন চ কাযধাতু.

(ক) ন রূপং ন রূপধাতূতি? আমন্তা.

(খ) ন রূপধাতু ন রূপন্তি?

রূপধাতুং ঠপেত্ৰা অৰসেসং ন রূপধাতু, রূপং. রূপঞ্চ রূপধাতুঞ্চ ঠপেত্ৰা অৰসেসং ন চেৰ রূপং ন চ রূপধাতু.

ন সদ্দো…পে… ন গন্ধো ন গন্ধধাতূতি? আমন্তা.

ন গন্ধধাতু ন গন্ধোতি?

সীলগন্ধো সমাধিগন্ধো পঞ্ঞাগন্ধো ন গন্ধধাতু, গন্ধো. গন্ধঞ্চ গন্ধধাতুঞ্চ ঠপেত্ৰা অৰসেসো ন চেৰ গন্ধো ন চ গন্ধধাতু.

(ক) ন রসো ন রসধাতূতি? আমন্তা.

(খ) ন রসধাতু ন রসোতি?

অত্থরসো ধম্মরসো ৰিমুত্তিরসো ন রসধাতু, রসো. রসঞ্চ রসধাতুঞ্চ ঠপেত্ৰা অৰসেসো ন চেৰ রসো ন চ রসধাতু.

ন ফোট্ঠব্বো…পে… ন চক্খুৰিঞ্ঞাণং ন চক্খুৰিঞ্ঞাণধাতূতি? আমন্তা.

ন চক্খুৰিঞ্ঞাণধাতু ন চক্খুৰিঞ্ঞাণন্তি? আমন্তা.

ন সোতৰিঞ্ঞাণং…পে… ন ঘানৰিঞ্ঞাণং… ন জিৰ্হাৰিঞ্ঞাণং… ন কাযৰিঞ্ঞাণং….

(ক) ন মনো ন মনোধাতূতি? আমন্তা.

(খ) ন মনোধাতু ন মনোতি?

মনোধাতুং ঠপেত্ৰা অৰসেসো ন মনোধাতু, মনো. মনঞ্চ মনোধাতুঞ্চ ঠপেত্ৰা অৰসেসো ন চেৰ মনো ন চ মনোধাতু.

(ক) ন মনোৰিঞ্ঞাণং ন মনোৰিঞ্ঞাণধাতূতি? আমন্তা.

(খ) ন মনোৰিঞ্ঞাণধাতু ন মনোৰিঞ্ঞাণন্তি? আমন্তা.

(ক) ন ধম্মো ন ধম্মধাতূতি? আমন্তা.

(খ) ন ধম্মধাতু ন ধম্মোতি?

ধম্মধাতুং ঠপেত্ৰা অৰসেসো ন ধম্মধাতু, ধম্মো. ধম্মঞ্চ ধম্মধাতুঞ্চ ঠপেত্ৰা অৰসেসো ন চেৰ ধম্মো ন চ ধম্মধাতু.