(২) অতীতৰারো

(ক) অনুলোমপুগ্গলো

১৬৫. (ক) যস্স রূপক্খন্ধো উপ্পজ্জিত্থ তস্স ৰেদনাক্খন্ধো নিরুজ্ঝিত্থাতি? আমন্তা.

(খ) যস্স ৰা পন ৰেদনাক্খন্ধো নিরুজ্ঝিত্থ তস্স রূপক্খন্ধো উপ্পজ্জিত্থাতি? আমন্তা.

১৬৬. (ক) যস্স ৰেদনাক্খন্ধো উপ্পজ্জিত্থ তস্স সঞ্ঞাক্খন্ধো নিরুজ্ঝিত্থাতি? আমন্তা.

(খ) যস্স ৰা পন সঞ্ঞাক্খন্ধো নিরুজ্ঝিত্থ তস্স ৰেদনাক্খন্ধো উপ্পজ্জিত্থাতি? আমন্তা.

(খ) অনুলোমওকাসো

১৬৭. যত্থ রূপক্খন্ধো উপ্পজ্জিত্থ…পে….

(গ) অনুলোমপুগ্গলোকাসা

১৬৮. (ক) যস্স যত্থ রূপক্খন্ধো উপ্পজ্জিত্থ তস্স তত্থ ৰেদনাক্খন্ধো নিরুজ্ঝিত্থাতি?

অসঞ্ঞসত্তানং তেসং তত্থ রূপক্খন্ধো উপ্পজ্জিত্থ, নো চ তেসং তত্থ ৰেদনাক্খন্ধো নিরুজ্ঝিত্থ. পঞ্চৰোকারানং তেসং তত্থ রূপক্খন্ধো চ উপ্পজ্জিত্থ ৰেদনাক্খন্ধো চ নিরুজ্ঝিত্থ.

(খ) যস্স ৰা পন যত্থ ৰেদনাক্খন্ধো নিরুজ্ঝিত্থ তস্স তত্থ রূপক্খন্ধো উপ্পজ্জিত্থাতি?

অরূপানং তেসং তত্থ ৰেদনাক্খন্ধো নিরুজ্ঝিত্থ, নো চ তেসং তত্থ রূপক্খন্ধো উপ্পজ্জিত্থ. পঞ্চৰোকারানং তেসং তত্থ ৰেদনাক্খন্ধো চ নিরুজ্ঝিত্থ রূপক্খন্ধো চ উপ্পজ্জিত্থ.

১৬৯. (ক) যস্স যত্থ ৰেদনাক্খন্ধো উপ্পজ্জিত্থ তস্স তত্থ সঞ্ঞাক্খন্ধো নিরুজ্ঝিত্থাতি? আমন্তা.

(খ) যস্স ৰা পন যত্থ সঞ্ঞাক্খন্ধো নিরুজ্ঝিত্থ তস্স তত্থ ৰেদনাক্খন্ধো উপ্পজ্জিত্থাতি? আমন্তা.

(ঘ) পচ্চনীকপুগ্গলো

১৭০. (ক) যস্স রূপক্খন্ধো নুপ্পজ্জিত্থ তস্স ৰেদনাক্খন্ধো ন নিরুজ্ঝিত্থাতি? নত্থি.

(খ) যস্স ৰা পন ৰেদনাক্খন্ধো ন নিরুজ্ঝিত্থ তস্স রূপক্খন্ধো নুপ্পজ্জিত্থাতি? নত্থি.

১৭১. (ক) যস্স ৰেদনাক্খন্ধো নুপ্পজ্জিত্থ তস্স সঞ্ঞাক্খন্ধো ন নিরুজ্ঝিত্থাতি? নত্থি.

(খ) যস্স ৰা পন সঞ্ঞাক্খন্ধো ন নিরুজ্ঝিত্থ তস্স ৰেদনাক্খন্ধো নুপ্পজ্জিত্থাতি? নত্থি.

(ঙ) পচ্চনীকওকাসো

১৭২. যত্থ রূপক্খন্ধো নুপ্পজ্জিত্থ…পে….

(চ) পচ্চনীকপুগ্গলোকাসা

১৭৩. (ক) যস্স যত্থ রূপক্খন্ধো নুপ্পজ্জিত্থ তস্স তত্থ ৰেদনাক্খন্ধো ন নিরুজ্ঝিত্থাতি?

অরূপানং তেসং তত্থ রূপক্খন্ধো নুপ্পজ্জিত্থ, নো চ তেসং তত্থ ৰেদনাক্খন্ধো ন নিরুজ্ঝিত্থ. সুদ্ধাৰাসানং তেসং তত্থ রূপক্খন্ধো চ নুপ্পজ্জিত্থ ৰেদনাক্খন্ধো চ ন নিরুজ্ঝিত্থ.

(খ) যস্স ৰা পন যত্থ ৰেদনাক্খন্ধো ন নিরুজ্ঝিত্থ তস্স তত্থ রূপক্খন্ধো নুপ্পজ্জিত্থাতি?

অসঞ্ঞসত্তানং তেসং তত্থ ৰেদনাক্খন্ধো ন নিরুজ্ঝিত্থ, নো চ তেসং তত্থ রূপক্খন্ধো নুপ্পজ্জিত্থ. সুদ্ধাৰাসানং তেসং তত্থ ৰেদনাক্খন্ধো চ ন নিরুজ্ঝিত্থ রূপক্খন্ধো চ নুপ্পজ্জিত্থ.

১৭৪. (ক) যস্স যত্থ ৰেদনাক্খন্ধো নুপ্পজ্জিত্থ তস্স তত্থ সঞ্ঞাক্খন্ধো ন নিরুজ্ঝিত্থাতি? আমন্তা.

(খ) যস্স ৰা পন যত্থ সঞ্ঞাক্খন্ধো ন নিরুজ্ঝিত্থ তস্স তত্থ ৰেদনাক্খন্ধো নুপ্পজ্জিত্থাতি? আমন্তা.