(৩) অনাগতৰারো

(ক) অনুলোমপুগ্গলো

১৭৫. (ক) যস্স রূপক্খন্ধো উপ্পজ্জিস্সতি তস্স ৰেদনাক্খন্ধো নিরুজ্ঝিস্সতীতি? আমন্তা.

(খ) যস্স ৰা পন ৰেদনাক্খন্ধো নিরুজ্ঝিস্সতি তস্স রূপক্খন্ধো উপ্পজ্জিস্সতীতি?

পচ্ছিমভৰিকানং উপপজ্জন্তানং যে চ অরূপং উপপজ্জিত্ৰা পরিনিব্বাযিস্সন্তি তেসং ৰেদনাক্খন্ধো নিরুজ্ঝিস্সতি, নো চ তেসং রূপক্খন্ধো উপ্পজ্জিস্সতি. ইতরেসং তেসং ৰেদনাক্খন্ধো চ নিরুজ্ঝিস্সতি রূপক্খন্ধো চ উপ্পজ্জিস্সতি.

১৭৬. (ক) যস্স ৰেদনাক্খন্ধো উপ্পজ্জিস্সতি তস্স সঞ্ঞাক্খন্ধো নিরুজ্ঝিস্সতীতি? আমন্তা.

(খ) যস্স ৰা পন সঞ্ঞাক্খন্ধো নিরুজ্ঝিস্সতি তস্স ৰেদনাক্খন্ধো উপ্পজ্জিস্সতীতি?

পচ্ছিমভৰিকানং উপপজ্জন্তানং তেসং সঞ্ঞাক্খন্ধো নিরুজ্ঝিস্সতি, নো চ তেসং ৰেদনাক্খন্ধো উপ্পজ্জিস্সতি. ইতরেসং তেসং সঞ্ঞাক্খন্ধো চ নিরুজ্ঝিস্সতি ৰেদনাক্খন্ধো চ উপ্পজ্জিস্সতি.

(খ) অনুলোমওকাসো

১৭৭. যত্থ রূপক্খন্ধো উপ্পজ্জিস্সতি…পে….

(গ) অনুলোমপুগ্গলোকাসা

১৭৮. (ক) যস্স যত্থ রূপক্খন্ধো উপ্পজ্জিস্সতি তস্স তত্থ ৰেদনাক্খন্ধো নিরুজ্ঝিস্সতীতি?

অসঞ্ঞসত্তানং তেসং তত্থ রূপক্খন্ধো উপ্পজ্জিস্সতি, নো চ তেসং তত্থ ৰেদনাক্খন্ধো নিরুজ্ঝিস্সতি. পঞ্চৰোকারানং তেসং তত্থ রূপক্খন্ধো চ উপ্পজ্জিস্সতি ৰেদনাক্খন্ধো চ নিরুজ্ঝিস্সতি.

(খ) যস্স ৰা পন যত্থ ৰেদনাক্খন্ধো নিরুজ্ঝিস্সতি তস্স তত্থ রূপক্খন্ধো উপ্পজ্জিস্সতীতি?

পচ্ছিমভৰিকানং পঞ্চৰোকারং উপপজ্জন্তানং অরূপানং তেসং তত্থ ৰেদনাক্খন্ধো নিরুজ্ঝিস্সতি, নো চ তেসং তত্থ রূপক্খন্ধো উপ্পজ্জিস্সতি. ইতরেসং পঞ্চৰোকারানং তেসং তত্থ ৰেদনাক্খন্ধো চ নিরুজ্ঝিস্সতি রূপক্খন্ধো চ উপ্পজ্জিস্সতি.

১৭৯. (ক) যস্স যত্থ ৰেদনাক্খন্ধো উপ্পজ্জিস্সতি তস্স তত্থ সঞ্ঞাক্খন্ধো নিরুজ্ঝিস্সতীতি? আমন্তা.

(খ) যস্স ৰা পন যত্থ সঞ্ঞাক্খন্ধো নিরুজ্ঝিস্সতি তস্স তত্থ ৰেদনাক্খন্ধো উপ্পজ্জিস্সতীতি?

পচ্ছিমভৰিকানং উপপজ্জন্তানং তেসং তত্থ সঞ্ঞাক্খন্ধো নিরুজ্ঝিস্সতি, নো চ তেসং তত্থ ৰেদনাক্খন্ধো উপ্পজ্জিস্সতি. ইতরেসং চতুৰোকারানং পঞ্চৰোকারানং তেসং তত্থ সঞ্ঞাক্খন্ধো চ নিরুজ্ঝিস্সতি ৰেদনাক্খন্ধো চ উপ্পজ্জিস্সতি.

(ঘ) পচ্চনীকপুগ্গলো

১৮০. (ক) যস্স রূপক্খন্ধো নুপ্পজ্জিস্সতি তস্স ৰেদনাক্খন্ধো ন নিরুজ্ঝিস্সতীতি?

পচ্ছিমভৰিকানং উপপজ্জন্তানং যে চ অরূপং উপপজ্জিত্ৰা পরিনিব্বাযিস্সন্তি তেসং রূপক্খন্ধো নুপ্পজ্জিস্সতি, নো চ তেসং ৰেদনাক্খন্ধো ন নিরুজ্ঝিস্সতি. পরিনিব্বন্তানং তেসং রূপক্খন্ধো চ নুপ্পজ্জিস্সতি ৰেদনাক্খন্ধো চ ন নিরুজ্ঝিস্সতি.

(খ) যস্স ৰা পন ৰেদনাক্খন্ধো ন নিরুজ্ঝিস্সতি তস্স রূপক্খন্ধো নুপ্পজ্জিস্সতীতি? আমন্তা.

১৮১. (ক) যস্স ৰেদনাক্খন্ধো নুপ্পজ্জিস্সতি তস্স সঞ্ঞাক্খন্ধো ন নিরুজ্ঝিস্সতীতি?

পচ্ছিমভৰিকানং উপপজ্জন্তানং তেসং ৰেদনাক্খন্ধো নুপ্পজ্জিস্সতি, নো চ তেসং সঞ্ঞাক্খন্ধো ন নিরুজ্ঝিস্সতি. পরিনিব্বন্তানং তেসং ৰেদনাক্খন্ধো চ নুপ্পজ্জিস্সতি সঞ্ঞাক্খন্ধো চ ন নিরুজ্ঝিস্সতি.

(খ) যস্স ৰা পন সঞ্ঞাক্খন্ধো ন নিরুজ্ঝিস্সতি তস্স ৰেদনাক্খন্ধো নুপ্পজ্জিস্সতীতি? আমন্তা.

(ঙ) পচ্চনীকওকাসো

১৮২. যত্থ রূপক্খন্ধো নুপ্পজ্জিস্সতি…পে….

(চ) পচ্চনীকপুগ্গলোকাসা

১৮৩. (ক) যস্স যত্থ রূপক্খন্ধো নুপ্পজ্জিস্সতি তস্স তত্থ ৰেদনাক্খন্ধো ন নিরুজ্ঝিস্সতীতি?

পচ্ছিমভৰিকানং পঞ্চৰোকারং উপপজ্জন্তানং অরূপানং তেসং তত্থ রূপক্খন্ধো নুপ্পজ্জিস্সতি, নো চ তেসং তত্থ ৰেদনাক্খন্ধো ন নিরুজ্ঝিস্সতি. পরিনিব্বন্তানং তেসং তত্থ রূপক্খন্ধো চ নুপ্পজ্জিস্সতি ৰেদনাক্খন্ধো চ ন নিরুজ্ঝিস্সতি.

(খ) যস্স ৰা পন যত্থ ৰেদনাক্খন্ধো ন নিরুজ্ঝিস্সতি তস্স তত্থ রূপক্খন্ধো নুপ্পজ্জিস্সতীতি?

অসঞ্ঞসত্তানং তেসং তত্থ ৰেদনাক্খন্ধো ন নিরুজ্ঝিস্সতি, নো চ তেসং তত্থ রূপক্খন্ধো নুপ্পজ্জিস্সতি. পরিনিব্বন্তানং তেসং তত্থ ৰেদনাক্খন্ধো চ ন নিরুজ্ঝিস্সতি রূপক্খন্ধো চ নুপ্পজ্জিস্সতি.

১৮৪. (ক) যস্স যত্থ ৰেদনাক্খন্ধো নুপ্পজ্জিস্সতি তস্স তত্থ সঞ্ঞাক্খন্ধো ন নিরুজ্ঝিস্সতীতি?

পচ্ছিমভৰিকানং উপপজ্জন্তানং তেসং তত্থ ৰেদনাক্খন্ধো নুপ্পজ্জিস্সতি, নো চ তেসং তত্থ সঞ্ঞাক্খন্ধো ন নিরুজ্ঝিস্সতি. পরিনিব্বন্তানং অসঞ্ঞসত্তানং তেসং তত্থ ৰেদনাক্খন্ধো চ নুপ্পজ্জিস্সতি সঞ্ঞাক্খন্ধো চ ন নিরুজ্ঝিস্সতি.

(খ) যস্স ৰা পন যত্থ সঞ্ঞাক্খন্ধো ন নিরুজ্ঝিস্সতি তস্স তত্থ ৰেদনাক্খন্ধো নুপ্পজ্জিস্সতীতি? আমন্তা.