১. সুত্তন্তভাজনীযং

৬৪২. চতস্সো অপ্পমঞ্ঞাযো – ইধ ভিক্খু মেত্তাসহগতেন চেতসা একং দিসং ফরিত্ৰা ৰিহরতি, তথা দুতিযং, তথা ততিযং, তথা চতুত্থং [চতুত্থিং (সী.)]. ইতি উদ্ধমধো তিরিযং সব্বধি সব্বত্ততায সব্বাৰন্তং লোকং মেত্তাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন [অব্যাপজ্ঝেন (সী. স্যা.)] ফরিত্ৰা ৰিহরতি. করুণাসহগতেন চেতসা একং দিসং ফরিত্ৰা ৰিহরতি, তথা দুতিযং, তথা ততিযং, তথা চতুত্থং. ইতি উদ্ধমধো তিরিযং সব্বধি সব্বত্ততায সব্বাৰন্তং লোকং করুণাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরতি. মুদিতাসহগতেন চেতসা একং দিসং ফরিত্ৰা ৰিহরতি, তথা দুতিযং, তথা ততিযং, তথা চতুত্থং. ইতি উদ্ধমধো তিরিযং সব্বধি সব্বত্ততায সব্বাৰন্তং লোকং মুদিতাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরতি. উপেক্খাসহগতেন চেতসা একং দিসং ফরিত্ৰা ৰিহরতি, তথা দুতিযং, তথা ততিযং, তথা চতুত্থং. ইতি উদ্ধমধো তিরিযং সব্বধি সব্বত্ততায সব্বাৰন্তং লোকং উপেক্খাসহগতেন চেতসা ৰিপুলেন মহগ্গতেন অপ্পমাণেন অৰেরেন অব্যাপজ্জেন ফরিত্ৰা ৰিহরতি.

১. মেত্তা

৬৪৩. কথঞ্চ ভিক্খু মেত্তাসহগতেন চেতসা একং দিসং ফরিত্ৰা ৰিহরতি? সেয্যথাপি নাম একং পুগ্গলং পিযং মনাপং দিস্ৰা মেত্তাযেয্য, এৰমেৰ সব্বে সত্তে মেত্তায ফরতি.

তত্থ কতমা মেত্তা? যা সত্তেসু মেত্তি মেত্তাযনা মেত্তাযিতত্তং মেত্তাচেতোৰিমুত্তি – অযং ৰুচ্চতি ‘‘মেত্তা’’.

তত্থ কতমং চিত্তং? যং চিত্তং মনো মানসং হদযং পণ্ডরং মনো মনাযতনং মনিন্দ্রিযং ৰিঞ্ঞাণং ৰিঞ্ঞাণক্খন্ধো তজ্জামনোৰিঞ্ঞাণধাতু – ইদং ৰুচ্চতি ‘‘চিত্তং’’. ইদং চিত্তং ইমায মেত্তায সহগতং হোতি সহজাতং সংসট্ঠং সম্পযুত্তং. তেন ৰুচ্চতি ‘‘মেত্তাসহগতেন চেতসা’’তি.

৬৪৪. ‘‘একং দিস’’ন্তি পুরত্থিমং ৰা দিসং পচ্ছিমং ৰা দিসং উত্তরং ৰা দিসং দক্খিণং ৰা দিসং উদ্ধং ৰা অধো ৰা তিরিযং ৰা ৰিদিসং ৰা.

৬৪৫. ‘‘ফরিত্ৰা’’তি ফরিত্ৰা অধিমুচ্চিত্ৰা.

৬৪৬. ‘‘ৰিহরতী’’তি ইরিযতি ৰত্ততি পালেতি যপেতি যাপেতি চরতি ৰিহরতি. তেন ৰুচ্চতি ‘‘ৰিহরতী’’তি.

৬৪৭. ‘‘তথা দুতিয’’ন্তি যথেৰ একং দিসং তথা দুতিযং দিসং তথা ততিযং দিসং তথা চতুত্থং দিসং তথা উদ্ধং তথা অধো তথা তিরিযং তথা ৰিদিসং.

৬৪৮. ‘‘সব্বধি সব্বত্ততায সব্বাৰন্তং লোক’’ন্তি সব্বেন সব্বং সব্বথা সব্বং অসেসং নিস্সেসং. পরিযাদাযৰচনমেতং – ‘‘সব্বধি সব্বত্ততায সব্বাৰন্তং লোক’’ন্তি.

৬৪৯. ‘‘মেত্তাসহগতেন চেতসা’’তি তত্থ কতমা মেত্তা? যা সত্তেসু মেত্তি মেত্তাযনা মেত্তাযিতত্তং মেত্তাচেতোৰিমুত্তি – অযং ৰুচ্চতি ‘‘মেত্তা’’.

তত্থ কতমং চিত্তং? যং চিত্তং মনো মানসং…পে… তজ্জামনোৰিঞ্ঞাণধাতু – ইদং ৰুচ্চতি ‘‘চিত্তং’’. ইদং চিত্তং ইমায মেত্তায সহগতং হোতি সহজাতং সংসট্ঠং সম্পযুত্তং. তেন ৰুচ্চতি ‘‘মেত্তাসহগতেন চেতসা’’তি.

৬৫০. ‘‘ৰিপুলেনা’’তি যং ৰিপুলং তং মহগ্গতং, যং মহগ্গতং তং অপ্পমাণং, যং অপ্পমাণং সো অৰেরো, যো অৰেরো সো অব্যাপজ্জো [অব্যাপজ্ঝো (সী. স্যা.)].

৬৫১. ‘‘ফরিত্ৰা’’তি ফরিত্ৰা অধিমুচ্চিত্ৰা.

৬৫২. ‘‘ৰিহরতী’’তি…পে… তেন ৰুচ্চতি ‘‘ৰিহরতী’’তি.

২. করুণা

৬৫৩. কথঞ্চ ভিক্খু করুণাসহগতেন চেতসা একং দিসং ফরিত্ৰা ৰিহরতি? সেয্যথাপি নাম একং পুগ্গলং দুগ্গতং দুরূপেতং দিস্ৰা করুণাযেয্য, এৰমেৰ সব্বে সত্তে করুণায ফরতি.

তত্থ কতমা করুণা? যা সত্তেসু করুণা করুণাযনা করুণাযিতত্তং করুণাচেতোৰিমুত্তি – অযং ৰুচ্চতি ‘‘করুণা’’.

তত্থ কতমং চিত্তং? যং চিত্তং মনো মানসং…পে… তজ্জামনোৰিঞ্ঞাণধাতু – ইদং ৰুচ্চতি ‘‘চিত্তং’’. ইদং চিত্তং ইমায করুণায সহগতং হোতি সহজাতং সংসট্ঠং সম্পযুত্তং. তেন ৰুচ্চতি ‘‘করুণাসহগতেন চেতসা’’তি.

৬৫৪. ‘‘একং দিস’’ন্তি পুরত্থিমং ৰা দিসং পচ্ছিমং ৰা দিসং উত্তরং ৰা দিসং দক্খিণং ৰা দিসং উদ্ধং ৰা অধো ৰা তিরিযং ৰা ৰিদিসং ৰা.

৬৫৫. ‘‘ফরিত্ৰা’’তি ফরিত্ৰা অধিমুচ্চিত্ৰা.

৬৫৬. ‘‘ৰিহরতী’’তি ইরিযতি ৰত্ততি পালেতি যপেতি যাপেতি চরতি ৰিহরতি. তেন ৰুচ্চতি ‘‘ৰিহরতী’’তি.

৬৫৭. ‘‘তথা দুতিয’’ন্তি যথেৰ একং দিসং তথা দুতিযং দিসং তথা ততিযং দিসং তথা চতুত্থং দিসং তথা উদ্ধং তথা অধো তথা তিরিযং তথা ৰিদিসং.

৬৫৮. ‘‘সব্বধি সব্বত্ততায সব্বাৰন্তং লোক’’ন্তি সব্বেন সব্বং সব্বথা সব্বং অসেসং নিস্সেসং. পরিযাদাযৰচনমেতং – ‘‘সব্বধি সব্বত্ততায সব্বাৰন্তং লোক’’ন্তি.

৬৫৯. ‘‘করুণাসহগতেন চেতসা’’তি তত্থ কতমা করুণা? যা সত্তেসু করুণা করুণাযনা করুণাযিতত্তং করুণাচেতোৰিমুত্তি – অযং ৰুচ্চতি ‘‘করুণা’’.

৬৬০. ‘‘ৰিপুলেনা’’তি যং ৰিপুলং তং মহগ্গতং, যং মহগ্গতং তং অপ্পমাণং, যং অপ্পমাণং সো অৰেরো, যো অৰেরো সো অব্যাপজ্জো.

৬৬১. ‘‘ফরিত্ৰা’’তি ফরিত্ৰা অধিমুচ্চিত্ৰা.

৬৬২. ‘‘ৰিহরতী’’তি…পে… তেন ৰুচ্চতি ‘‘ৰিহরতী’’তি.

৩. মুদিতা

৬৬৩. কথঞ্চ ভিক্খু মুদিতাসহগতেন চেতসা একং দিসং ফরিত্ৰা ৰিহরতি? সেয্যথাপি নাম একং পুগ্গলং পিযং মনাপং দিস্ৰা মুদিতো অস্স, এৰমেৰ সব্বে সত্তে মুদিতায ফরতি.

তত্থ কতমা মুদিতা? যা সত্তেসু মুদিতা মুদিতাযনা মুদিতাযিতত্তং মুদিতাচেতোৰিমুত্তি – অযং ৰুচ্চতি ‘‘মুদিতা’’.

তত্থ কতমং চিত্তং? যং চিত্তং মনো মানসং…পে… তজ্জামনোৰিঞ্ঞাণধাতু – ইদং ৰুচ্চতি ‘‘চিত্তং’’. ইদং চিত্তং ইমায মুদিতায সহগতং হোতি সহজাতং সংসট্ঠং সম্পযুত্তং. তেন ৰুচ্চতি ‘‘মুদিতাসহগতেন চেতসা’’তি.

৬৬৪. ‘‘একং দিস’’ন্তি পুরত্থিমং ৰা দিসং পচ্ছিমং ৰা দিসং উত্তরং ৰা দিসং দক্খিণং ৰা দিসং উদ্ধং ৰা অধো ৰা তিরিযং ৰা ৰিদিসং ৰা.

৬৬৫. ‘‘ফরিত্ৰা’’তি ফরিত্ৰা অধিমুচ্চিত্ৰা.

৬৬৬. ‘‘ৰিহরতী’’তি…পে… তেন ৰুচ্চতি ‘‘ৰিহরতী’’তি.

৬৬৭. ‘‘তথা দুতিয’’ন্তি যথেৰ একং দিসং তথা দুতিযং দিসং তথা ততিযং দিসং তথা চতুত্থং দিসং তথা উদ্ধং তথা অধো তথা তিরিযং তথা ৰিদিসং.

৬৬৮. ‘‘সব্বধি সব্বত্ততায সব্বাৰন্তং লোক’’ন্তি সব্বেন সব্বং সব্বথা সব্বং অসেসং নিস্সেসং. পরিযাদাযৰচনমেতং – ‘‘সব্বধি সব্বত্ততায সব্বাৰন্তং লোক’’ন্তি.

৬৬৯. ‘‘মুদিতাসহগতেন চেতসা’’তি তত্থ কতমা মুদিতা? যা সত্তেসু মুদিতা মুদিতাযনা মুদিতাযিতত্তং মুদিতাচেতোৰিমুত্তি – অযং ৰুচ্চতি ‘‘মুদিতা’’.

৬৭০. ‘‘ৰিপুলেনা’’তি যং ৰিপুলং তং মহগ্গতং, যং মহগ্গতং তং অপ্পমাণং, যং অপ্পমাণং সো অৰেরো, যো অৰেরো সো অব্যাপজ্জো.

৬৭১. ‘‘ফরিত্ৰা’’তি ফরিত্ৰা অধিমুচ্চিত্ৰা.

৬৭২. ‘‘ৰিহরতী’’তি …পে… তেন ৰুচ্চতি ‘‘ৰিহরতী’’তি.

৪. উপেক্খা

৬৭৩. কথঞ্চ ভিক্খু উপেক্খাসহগতেন চেতসা একং দিসং ফরিত্ৰা ৰিহরতি? সেয্যথাপি নাম একং পুগ্গলং নেৰ মনাপং ন অমনাপং দিস্ৰা উপেক্খকো অস্স, এৰমেৰ সব্বে সত্তে উপেক্খায ফরতি.

তত্থ কতমা উপেক্খা? যা সত্তেসু উপেক্খা উপেক্খাযনা উপেক্খাযিতত্তং উপেক্খাচেতোৰিমুত্তি – অযং ৰুচ্চতি ‘‘উপেক্খা’’.

তত্থ কতমং চিত্তং? যং চিত্তং মনো মানসং…পে… তজ্জামনোৰিঞ্ঞাণধাতু – ইদং ৰুচ্চতি ‘‘চিত্তং’’. ইদং চিত্তং ইমায উপেক্খায সহগতং হোতি সহজাতং সংসট্ঠং সম্পযুত্তং. তেন ৰুচ্চতি ‘‘উপেক্খাসহগতেন চেতসা’’তি.

৬৭৪. ‘‘একং দিস’’ন্তি পুরত্থিমং ৰা দিসং পচ্ছিমং ৰা দিসং উত্তরং ৰা দিসং দক্খিণং ৰা দিসং উদ্ধং ৰা অধো ৰা তিরিযং ৰা ৰিদিসং ৰা.

৬৭৫. ‘‘ফরিত্ৰা’’তি ফরিত্ৰা অধিমুচ্চিত্ৰা.

৬৭৬. ‘‘ৰিহরতী’’তি…পে… তেন ৰুচ্চতি ‘‘ৰিহরতী’’তি.

৬৭৭. ‘‘তথা দুতিয’’ন্তি যথেৰ একং দিসং তথা দুতিযং দিসং তথা ততিযং দিসং তথা চতুত্থং দিসং তথা উদ্ধং তথা অধো তথা তিরিযং তথা ৰিদিসং.

৬৭৮. ‘‘সব্বধি সব্বত্ততায সব্বাৰন্তং লোক’’ন্তি সব্বেন সব্বং সব্বথা সব্বং অসেসং নিস্সেসং. পরিযাদাযৰচনমেতং – ‘‘সব্বধি সব্বত্ততায সব্বাৰন্তং লোক’’ন্তি.

৬৭৯. ‘‘উপেক্খাসহগতেন চেতসা’’তি, তত্থ কতমা উপেক্খা? যা সত্তেসু উপেক্খা উপেক্খাযনা উপেক্খাযিতত্তং উপেক্খাচেতোৰিমুত্তি – অযং ৰুচ্চতি ‘‘উপেক্খা’’.

৬৮০. ‘‘ৰিপুলেনা’’তি যং ৰিপুলং তং মহগ্গতং, যং মহগ্গতং তং অপ্পমাণং, যং অপ্পমাণং সো অৰেরো, যো অৰেরো সো অব্যাপজ্জো.

৬৮১. ‘‘ফরিত্ৰা’’তি ফরিত্ৰা অধিমুচ্চিত্ৰা.

৬৮২. ‘‘ৰিহরতী’’তি…পে… তেন ৰুচ্চতি ‘‘ৰিহরতী’’তি.

সুত্তন্তভাজনীযং.